Yena A Yendle Swilo Hi Wutlharhi A Tlhela A Tiya Nhlana

1-3. a) Estere a titwise ku yini nkama lowu a a tshinela ka xitshamu xa wuhosi xa nuna wa yena? b) Hosi yi yendle yini nkama Estere a nga ya ka yona?

ESTERE a ye a tshinela hi kutsongokutsongo lani hosi a yi tshame kona naswona mbilu ya yena a yi ba hintamu. Pimisa hi ndhawu liyani leyi a yi yo zwee lakaku Estere a a twa ni guwa la minenge ya yena loko a famba naswona a a twa ni guwa la mpahla ya yena nkama lowu a yi ti mexamexa. Estere a a nga fanelanga a kavanyetiwa hi ku txuvukisela ku xonga ka yindlo ya hosi, leyi a yi fuleliwe hi mapulangu ya mukedari lawa a ma ta hi Lebanoni ni mapilari ya ku xonga. Estere a wo pimisa ntsena hi ku ta vulavula ni hosi ku nga wanuna lweyi a a ta yendla xiboho xa leswaku a a ta mu tshika a hanya kumbe a a ta dlayiwa.

² Nkama Estere na a tshinela a hosi a yi mu txuvukisisa kahle yi gama yi tlakusa nhonga ya yona ya woru. Ku ve xikombiso xa xitsongo kambe leswo a swi khumba wutomi la Estere hikusa a swi kombisa swaku a hosi yi mu rivalelile ka leswi a nga swi yendla, hi ku va a humelelile na a nga vitaniwanga. Nkama a nga fika kusuhi ni xitshamu xa wuhosi a tlakuse voko la yena a khumba ponta ya nhonga ya hosi na a kombisa ku khensa. — Est. 5:1, 2.

³ Hinkwaswu leswi hosi Asuwerusi a a li na swona a swi kombisa a ku ganya ni matimba ya yena. A mpahla leyi a yi yambaliwa hi tihosi ta Vapersiya ta nkama lowuyani a yi dura hintamu. Hi ku ya hi timale ta masiku ya hina, hi nga vula swaku a a yi dura kolomuyani ka ma milhões ni ma milhões ya madolari. Hambileswo Estere a a swi vona ka matihlo ya nuna wa yena leswaku a a mu rhandza, yena a te: “Ku yendleka yini nkatanga Estere? U lava swaku ni ku yendlela yini? Phela hambi hafu ya wuhosi la mina, ni nga ku nyika yona!” — Est. 5:3.

4. Hi swini swikarhatu leswi Estere a nga kumana na swona?

⁴ Hi ku va Estere a yile a ya vulavula ni hosi a lwela vanhu va yena leswaku va nga dlayiwi a kombise lipfumelo lalikulu hintamu a tlhela a kombisa leswaku a a tiye nhlana. Phela swilo a swi mu fambele kahle kambe a a nga se yendla nchumu, hikusa swikarhatu a swa ha li ku teni. Phela a swi lava swaku Estere a kholwisa nuna wa yena lweyi a a tibyela leswaku mutsundzuxi wa yena lweyi a a mu tshemba hintamu a a li munhu wa ku biha, naswona a a mu kanganyisile hi ku yendla leswaku a humesa nawu lowu a wu ta helisa vanhu va Estere. I mpsini leswi Estere a a ta swi yendla leswaku a kholwisa nuna wa yena naswona hi nga djondza yini ka lipfumelo la yena?

Yena A Wu Lange Kahle “Nkama Wa Ku Vulavula”

5, 6. a) Estere a li tirhisise ku yini tshinya la nawu leli nga ka Ekleziyaxta 3:1, 7? b) Estere a li kombisise ku yini wutlharhi nkama a nga vulavula ni nuna wa yena?

⁵ Ku nga va swaku Estere a a ta byela hosi leswi a swi mu karhata a phambheni ka vanhu lava a va tirha ka yindlo ya hosi? Phela loko a wo yendla leswo a hosi a yi ta daniseka naswona Hamani a a ta va ni nkama wa ku tinyimelela. Se Estere a yendle yini? Ka malembe lawa ma nga hundza, hosi Solomoni hi ku kongomisiwa hi Yehovha a tsale marito lawa: “Nchumu xin’wani ni xin’wani xi ni nkama wa xona, . . . Nkama wa ku miyela ni nkama wa ku vulavula.” (Ekl. 3:1, 7) Hi nga mu pimisa Mordekayi papayi wa Estere, na a mu djondzisa ku ma tirhisa kahle marito lawa. Phela ha tiyiseka swaku Estere a a li tiva lisima la ku wu langa kahle nkama wa ku vulavula.

⁶ Estere a vule leswi: “Loko u swi tsakela wena hosi, tani namuntlha na Hamani ka fexta leli ni nga ku hambela lona.” (Est. 5:4) A hosi yi pfumelile leswi Estere a nga swi vula yi tlhela yi byela na Hamani. Ku nga va swaku wa yi vona ndlela leyi Estere a nga ma langa kahle marito ya yena hi yona? Yena a kombise leswaku a a mu hlonipha nuna wa yena ni swaku a a nyimela nkama ni ndhawu yayinene swaku a vulavula hi leswi a swi mu karhata. — Lerha Swivuriso 10:19.

7, 8. Li fambise ku yini fexta la ku sungula leli Estere a nga li hamba naswona hi mhaka muni a nga vulavulanga ni hosi hi leswi a swi mu karhata?

⁷ Estere a lunghiselele fexta hi wutlharhi, a yendle hinkwaswu swaku a tiyiseka swaku leswi nuna wa yena a a swi rhandza swi va kona ka fexta. A ku ni vhinyu leswaku yi tsakisa mbilu. (Ps. 104:15) Hosi Asuwerusi a a tsake hintamu lakaku a vutisa Estere swaku hi xini xikombelo lexi a a lava ku xi yendla. Indjhe a ku li nkama wawunene wa ku a vulavula?

⁸ Nada. Estere a nga pimisanga swaku lowu a wu li nkama wawunene wa ku a vulavula, handle ka leswo a rhambe hosi na Hamani ka fexta leli a a ta li yendla hi siku leli landzelaka. (Est. 5:7, 8) Kasi hi mhaka muni Estere a nga vulavulanga hi siku leliyani? Khumbuka leswaku a wutomi la vanhu va Estere a li li nghozini hi mhaka ya nawu lowu hosi a a yi wu humesile. Se Estere a a lava ku tiyiseka swaku a wu langa kahle nkama wa ku vulavula ni hosi. Hi mhaka leyo, a rindzile a tlhela a lavetela nkama wa ku kombisa swaku a a mu hlonipha hintamu nuna wa yena.

9. Hi mhaka muni swi li swa lisima ku lehisa mbilu naswona hi nga xi tekelelisa ku yini xikombiso xa Estere ka mhaka leyi?

⁹ A ku lehisa mbilu i wumunhu la lisima hintamu funtshi swa kala kuva vanhu va li kombisa. Hambileswi Estere a a karhatekile naswona a a swi lava hintamu ku vula leswi a a swi mu karhata, yena a lehise mbilu a nyimela nkama wawunene. Hi nga djondza minchumu ya yinyingi ka xikombiso xa Estere hikusa hi nga ha vona swihoxo leswi swi lavaka ku lulamisiwa. Se loko hi lava ku kholwisa munhu lweyi a nga ni matimba ya ku swi lulamisa, hi fanele hi tekelela Estere hi ku va hi lehisa mbilu. A buku la Swivuriso 25:15 li li: “Ku lehisa mbilu swi kholwisa murhangeli, naswona lirimi la ku rhula li nga tshova rhambu.” Loko hi lehisa mbilu hi nyimela nkama wawunene swaku hi vulavula hi tlhela hi vulavula hi lirhandzu ku fana na Estere, hi nga swi kota ku kholwisa hambi hi munhu lweyi a hi kanetaka. Se ku nga va swaku Yehovha, Xikwembu xa Estere a mu katekisile hileswi a nga lehisa mbilu a tlhela a yendla swilo hi wutlharhi?

Ku Lehisa Mbilu Swi Pfula Ndlela Leswaku Ku Va Ni Ku Lulama

10, 11. Ku yendleke yini nkama Hamani a nga vona Mordekayi naswona i mpsini leswi nsati wa yena ni vanghanu va yena va nga mu kutxa swaku a swi yendla?

¹⁰ Ku lehisa mbilu ka Estere ku pfule ndlela ya leswaku ku yendleka swilo swaswikulu hintamu. Hamani a humile hi ka fexta na a tsakile swinene ka mbilu ya yena hikusa a hosi ni nsati wa yona a va mu kombe wunene. Kambe loko a humile ka nyanghwa ya wuhosi, a vone Mordekayi wanuna wa Muyuda, lweyi a a yala ku mu khizamela. Hilani hi nga swi vona hi kona ka ndzima leyi yi nga hundza, Mordekayi a a nga mu khizameli Hamani ku nga li hileswi a a nga mu hloniphi kambe hi mhaka ya lipfalu la yena ni hi mhaka ya wunghanu la yena na Yehovha Xikwembu. Hambileswo Hamani ‘a kwate hintamu.’ — Est. 5:9.

¹¹ Nkama Hamani a nga byela nsati wa yena ni vanghanu va yena hi leswi Mordekayi a nga yala ku mu yendlela swona, va mu kutxe swaku a dzima mhandzi ya ku leha kolomu ka 22 wa mametru a tlhela a kombela hosi swaku yi mu pfumelela kuva a hayeka Mordekayi ka yona. Hamani a swi tsakelile leswi va nga mu byela swona, hi ku hantlisa a rhumise swaku ku dzimiwa mhandzi. — Est. 5:12-14.

12. Hi mhaka muni hosi yi rhumise swaku yi lerheliwa buku la matimu ya tiko naswona yi game yi tsumbula yini?

¹² Hi nkama wolowo, Bibele li vula leswaku a hosi yi heleliwe hi wurhongo ni wusiku se yi rhumisa leswaku ku tisiwa buku la matimu ya tiko li tlhela li lerhiwa phambheni ka yona hi rito la ku twala. Ku lerhiwe lani a ku tsaliwe mhaka ya leswaku a ku ni planu leli a li li kona la ku dlaya hosi Asuwerusi. Se hosi yi game yi khumbuka mhaka yoleyo ni leswaku vanhu lava a va hambile planu lolelo, va khomiwile va tlhela va dlayiwa. Kambe nkama yi nga vutisa swaku Mordekayi lweyi a nga byela hosi planu lolelo la ku biha a yendleliwe yini, yi tsumbule leswaku a a nga yendleliwanga nchumu. — Lerha Estere 6:1-3.

13, 14. a) A swilo swi sungulise ku yini ku djima hi nhloko ka wutomi la Hamani? b) I yini leswi nsati ni vanghanu va Hamani va nga mu byela swona?

¹³ Na yi karhatekile hintamu a hosi yi vutise vatirhi va yona leswaku i mani lweyi a a ta yi pfuna ku lulamisa a xihoxo lexi? Lexi xi hlekisaka, i Hamani lweyi a a li ka yindlo ya hosi hi nkama wolowo. Phela yena a a phendzulile hintamu, swi nga yendleka hileswi a a lava ku vulavula ni hosi a kombela mpfumelelo wa leswaku a dlaya Mordekayi. Kambe na a nge se vula nchumu, a hosi yi mu vutise leswaku a ku ta va yini ndlela yayinene ya ku khensa wanuna lweyi a nga tsakeliwa hi hosi. Leswi Hamani a a pimisa swaku hosi yi vulavula hi yena a vule swaku a ku fanele ku yendliwa leswi: A yambexiwa mpahla ya hosi, ku tlhela ku rhumiwa mutirhi wa lisima hintamu ka mfumu leswaku a rhendzeleka na yena ka doropa la Xuxani, na a khwele ka kavhalu la hosi naswona mutirhi yelweyo a a fanele a huwelela ka vanhu hinkwavu. Pimisa hi leswi Hamani a nga titwisa xiswona nkama a nga tiva leswaku wanuna lweyi a a tsakeliwe hi hosi a ku li Mordekayi! Se mutirhi lweyi a a ta huwelela ka vanhu hinkwavu a ku li yena Hamani! — Est. 6:4-10.

¹⁴ Hambileswi Hamani a a nga swi lavi ku yendla ntirho lowuyani kambe sindziseke ku wu yendla. A game a muka hi ku tsutsuma na a vavisekile hintamu. Nsati wa yena ni vanghanu va yena va mu byele swaku swilo hinkwaswu leswi a swa ha li ku yendleka, a swi kombisa swaku a a ta humeleliwa hi swilo swa ku biha. Hamani a a ta hluliwa ka nyimpi leyi a a yi lwa na Mordekayi lweyi wa Muyuda. — Est. 6:12, 13.

15. a) Hi mhaka muni swi ve swinene ku va Estere a lehise mbilu? b) Hi mhaka muni ku li wutlharhi ku “nyimela” Yehovha?

¹⁵ Leswi Estere a nga lehisa mbilu a tlhela a nyimanyana swaku a yendla xikombelo xa yena ka hosi swi yendle leswaku Hamani a tipeta xikheleni. Swi nga yendleka ku ve Yehovha lweyi a nga yendla swaku hosi yi heleliwa hi wurhongo. (Swiv. 21:1) Phela a Bibele li hi byela leswaku hi “nyimela” Yehovha! (Lerha Mikiya 7:7.) Loko hi nyimela Yehovha, hi gama hi tsumbula leswaku ndlela leyi a lulamisaka swikarhatu hi yona yi tlula ndlela leyi hina a hi ta swi lulamisa hi yona.

A Vulavule Na A Tiyile

16, 17. a) Ku ve wini ‘nkama wawunene wa ku Estere a vulavula’? b) Estere a a hambanise ku yini na Vhaxiti lweyi a a li nsati wa hosi?

¹⁶ Phela Estere a a nga ta tlanga hi ku ringa ku lehisa mbilu ka hosi, hi mhaka leyo ka fexta la yena la wumbirhi a a fanele a yi byela hinkwaswu leswi a swi mu karhata. Kambe a a ta swi yendlisa ku yini swoleswo? A hosi yi mu nyike nkama wa ku yendla leswo hikusa yi tlhele yi mu vutisa swaku a a lava swaku yi mu yendlela yini. (Est. 7:2) Swi vhele swi tikomba swaku a “nkama wa ku vulavula” se a wu fikile.

¹⁷ Hi nga mu pimisa Estere na a khongela ka Xikwembu xa yena hi le mbilwini, na a nge se vula marito lawa ma nge: “Loko u ni tsakela wena hosi naswona u swi lava, ni kombela u ponisa wutomi la mina ni la vanhu va tiko la mina.” (Est. 7:3) Vona leswaku Estere a a swi hlonipha swilo leswi hosi a yi swi vona na swi li swinene. Phela Estere a a hambanile hintamu na Vhaxiti, lweyi a a li nsati wa ku sungula wa hosi, lweyi a a danise hosi hi maxivomu! (Est. 1:10-12) Handle ka leswo Estere a nga yi solasolanga hosi hileswi ku nga va wuphunta ku va yi tshembe Hamani, kambe yena a kombele swaku hosi yi mu vhikela ka swilo swa ku biha leswi a swi veka wutomi la yena nghozini.

18. Estere a xi tlhamuselise ku yini a xikarhatu xa yena ka hosi?

¹⁸ A hi kanakani swaku a xikombelo xa Estere xi yendle leswaku hosi yi hlamala. I mani lweyi a a ta yendla leswaku a wutomi la nsati wa hosi li va nghozini? Estere a tlhele a ku: “Hi xavisiwile, mina ni vanhu va tiko la mina swaku hi ta dlayiwa ni ku helisiwa. Loko a hi yo xavisiwa swaku hi va swikarawa, a ni ta va ni miyelile. Kambe mhaka leyi yi bihe hintamu hikusa ni hosi yi ta luzekeliwa swinene.” (Est. 7:4) Vona swaku Estere a vule xikarhatu xa yena hi ku kongoma, kambe a tlhele a vula swaku a a ta va a miyelile loko a vo yo xavisiwa swaku va va swikarawa ntsena. Kambe leswi ku helisiwa ka Vayuda a ku ta yendla swaku hosi yi luzekeliwa, a a nga ta tshama hi swona.

19. Hi nga djondza yini ka xikombiso xa Estere xa ndlela yayinene ya ku kholwisa munhu?

¹⁹ Hi nga djondza swilo swa swinyingi ka xikombiso xa Estere xa ndlela ya ku kholwisa munhu. Loko u lava ku byela munhu lweyi u mu rhandzaka kumbe munhu lweyi a rhangelaka hi xikarhatu xaxikulu, ku lehisa mbilu, ku mu hlonipha ni ku tlhela u tshembeka swi nga pfuna hintamu. — Swiv. 16:21, 23.

20, 21. a) Estere a yi byelise ku yini hosi maplanu ya ku biha lawa Hamani a li na wona naswona hosi yi titwise ku yini? b) I mpsini leswi Hamani a nga swi yendla nkama a nga vona swaku a tsumbuliwile?

²⁰ Na a kwate hintamu, Asuwerusi a vutise Estere a ku: “I mani lweyi a nga tiya a lava ku yendla leswo naswona a kwini?” Pimisa hi Estere na a xungeta Hamani a ku: “Nala wa kona hi lweyi, i Hamani wa mbilu ya ku biha.” Phela swilo se a swi txintxile, naswona Hamani a sungule ku chava hintamu. Pimisa hi kara la hosi leli se a li txintxile hileswi yi nga tsumbula swaku mutsundzuxi wa yona lweyi a yi mu tshemba a a yi xengile, a yendla swaku yi sinara nawu lowu a wu ta yendla swaku nsati wa yona a dlayiwa! A hosi na yi kwatile yi humile yi ya jardim swaku yi ya pepa nhloko. — Est. 7:5-7.

²¹ Hamani a kombise leswaku a a chava hintamu hi ku tiwisa kusuhi ni minenge ya hosi ya xisati. Nkama hosi yi nga vuya yi nghena ndlwini yi kume leswaku Hamani a a zama ku kombela ku rivaleliwa ka Estere na a tiwisile ka xitshamu lexi Estere a a tshame ka xona. Leswo swi yendle swaku hosi yi ya yi kwata hintamu yi tlhela yi mu lumbeta swaku a a zama ku pfinya nsati wa yona a ndlwini ka yona. Hamani a vhele a swi vona swaku a a ta dlayiwa. Se a humesiwe handle na a mbhonyiwile kara. Mun’wani wa vatirhi va hosi, a byele hosi swaku Hamani a a lunghiselele mhandzi leswaku a ta hayeka Mordekayi ka yona. Asuwerusi a vhele a rhumisa swaku Hamani a dlayiwa a gama a hayekiwa ka mhandzi yoleyo. — Est. 7:8-10.

22. Xikombiso xa Estere xi nga hi pfunisa ku yini leswaku hi nga godoli, hi pimisa swaswinene hi tlhela hi va ni lipfumelo?

²² Ka misava leyi ya ku biha namuntlha, swi nga hi vevukela ku pimisa leswaku a hi nge te tshuka hi li vona wululami na li yendliwa. U tshama u pimisa hi ndlela leyo? Estere a nga godolanga, a nga pimisanga swaku a a nga ta swi kota ku lwela swaswinene kambe a tame a va ni lipfumelo. Hi nkama wawunene a vulavulile na a nga chavi a lwela swaswinene, a tlhela a tshemba leswaku Yehovha a a ta yendla leswin’wani. Se na hina hi fanele hi yendla leswo! Yehovha a nge se txintxa. Ku fana ni ka masiku ya Estere a nga swi kota ku phasa munhu wa ku biha ka maplanu ya yena hilani a nga yendla hi kona ka Hamani. — Lerha Tipisalema 7:11-16.

A Yendle Swilo Hi Ku Tiveka Hansi Ka Yehovha Ni Ka Vanhu Va Tiko La Yena

23. a) A hosi yi va hakelise ku yini Mordekayi na Estere? b) A wuprofeta leli Yakobe a nga li vula hi Benjamini nkama na a li kusuhi ni ku fa li hetisekise ku yini? (Vona kwadru leli nge “Wuprofeta Leli Nga Hetiseka.”)

²³ Hi wugamu a a hosi yi tive leswaku Mordekayi a a ngo va wanuna wa ku tshembeka lweyi a nga ponisa wutomi la yona ntsena, kambe a a fana ni papayi ka Estere. Asuwerusi a veke Mordekayi leswaku a va murhangeli wamukulu a pfaleta Hamani. Naswona a nyike Estere munti lowu a a wu li wa Hamani ni tshomba hinkwalu la yena, se Estere a game a ya swi nyikela ka Mordekayi. — Est. 8:1, 2.

24, 25. a) Hi mhaka muni Estere a a nga fanelanga a rhula hambileswi maplanu ya Hamani se a ma tsumbuliwile? b) Estere a tlhele a veka wutomi la yena nghozini hi ndlela yini?

²⁴ Se leswi Estere na Mordekayi a va nga ha ta dlayiwa, ku nga va leswaku Estere a wa ha ta karhateka? Phela Estere a a nga ta karhateka loko a wo pimisa hi yena ntsena a nga pimisi hi vanhu van’wani. Hi nkama wolowo a nawu lowu Hamani a a wu humesile wa leswaku Vayuda hinkwavu va dlayiwa a wu hangalasiwa ka mfumu hinkwawu wa Persiya. Phela Hamani a a hoxe swiribyani kumbe Puru, swi nga yendleka ku li muxaka wun’wani wa wudimoni akuva a tiva nkama wawunene wa ku hetisisa maplanu ya yena ya ku biha. (Est. 9:24-26) I ntiyiso leswaku a a ka ha chota tiwheti leswaku siku lolelo li fika, kambe ka Estere a nkama a wu hundza hi ku hantlisa. Se ku nga va swaku a ka ha ta yendliwa nchumu leswaku Vayuda va nga dlayiwi?

²⁵ Na a nga tipimiseli, Estere a tlhele a veka wutomi la yena nghozini hi ku va a humelele ka hosi na a nga vitaniwanga. Ka khambi leli, Estere a rilile, a rilela vanhu va yena a kombela swaku nuna wa yena a txintxa nawu lowuyani wa Hamani. Kambe a minawu leyi a yi humesiwa hi hosi ya Persiya a yi nga fanelanga yi txintxiwa. (Dan. 6:12, 15) Hi mhaka leyo, a hosi yi nyike Estere na Mordekayi mpfumelelo wa leswaku va tlhela va tsala nawu wun’wani. A nawu wolowo, wu rhumeliwe Vayuda naswona a wu va pfumelela leswaku va tivhikela. A vatirhi lava a va famba hi makavhalu va teke nawu lowu, va wu byela Vayuda hinkwavu. A Vayuda va tlhele va va ni ntshembo. (Est. 8:3-16) Hi nga pimisa hi Vayuda hinkwavu na va tilunghiselela swaku va tivhikela. Phela leswo a swi nga ta koteka loko a ku nga humesiwanga nawu lowu wa nyuwani. Kambe a xa lisima ku tlula hinkwaswu hi leswaku “Yehovha murhangeli wa tintsumi” a a ta va na vona. — 1 Sa. 17:45.

26, 27. a) Yehovha a va pfunise ku yini vanhu va yena leswaku va hlula valala va vona hi ndlela ya ku hlamalisa? b) Ku hetiseke wuprofeta lini nkama vana va Hamani va nga dlayiwa?

²⁶ Hi wugamu a siku leli a va li nyimelile hintamu li fikile, vanhu va Xikwembu na vona se a va lunghekile. Hambi hi vatirhi va mfumu wa Persiya swoswi se a va nyima ni Vayisrayele nkama lowu a ku hangalasiwa mhaka ya leswaku Mordekayi se a a li yena murhangeli wamukulu. Yehovha a pfune vanhu va yena swaku va hlula naswona a va vhikelile ka swilo swa ku biha leswi valala va vona a va lava ku va yendla swona a tlhela a yendla swaku valala va Vayisrayele, va hluliwa.a — Est. 9:1-6.

²⁷ Leswi Mordekayi a a nyikiwe ntirho wa ku hlayisa munti lowu a wu li wa Hamani a a ta va nghozini hikusa a 10 wa vana va Hamani a va ha hanya, se na vona va game va dlayiwa. (Est. 9:7-10) Leswo swi hetisise wuprofeta la Bibele leli Xikwembu xi nga profeta leswaku a Vaamaleki hinkwavu lava a va li valala va vanhu va xona a va ta helisiwa. (Det. 25:17-19) Swi nga yendleka vana va Hamani a va li Vaamaleki va wugamu hikusa Yehovha a a vule leswaku Vaamaleki hinkwavu a va ta helisiwa funtshi a va nga ha ta tshuka va va kona.

28, 29. a) Hi mhaka muni a ku li ku rhandza ka Yehovha swaku Estere ni vanhu va yena va lwa nyimpi liyani? b) Hi mhaka muni xikombiso xa Estere ku li nkateko wawukulu ka hina namuntlha?

²⁸ Estere a a rhwale ku tika hikusa a swi lava a tsala minawu ya wuhosi leyi a yi patsa minawu ya nyimpi ni ya ku dlaya vanhu. Leswo a swi nga mu vevukeli. Kambe a ku rhandza ka Yehovha a ku li ka leswaku vanhu va yena va vhikeleliwa hikusa ka tiko la Israyele a ku ta huma Mesiya ku nga ndlela yin’we leyi vanhu hinkwavu a va ta kuma ntshembo hi yona. (Gen. 22:18) Nkama Yesu Kreste ku nga Mesiya lweyi a nga tshembisiwa a nga ta lani misaveni, a byele valandzeli va yena leswaku ku sukela ka nkama wolowo a va nga ha fanelanga va tipeta ka tinyimpi. Phela leswo swi yendla vatirheli hinkwavu va Xikwembu va tsaka. — Mat. 26:52.

²⁹ Vakreste va ntiyiso namuntlha va lwa nyimpi na Sathana hikusa a yendla hinkwaswu leswi a nga swi kotaka swaku a helisa lipfumelo leli hi nga na lona ka Yehovha Xikwembu. (Lerha 2 Vakorinto 10:3, 4.) Kambe xikombiso xa Estere i nkateko wawukulu ka hina! Phela ku fana na Estere na hina hi nga kombisa lipfumelo hi ku va vanhu va ku tlhariha, hi va ni wutivi hi tlhela hi lehisa mbilu. Naswona hi nga tlhela hi kombisa ku tiya nhlana ni ku nyimelela vanhu va Xikwembu hi ndlela yayinene.