Pedru A Yala Yesu

Nkama Yesu a nga byela vapostolo va yena swaku hinkwavu a va ta mu baleka ka wusiku leliyani, Pedru a vule swaku yena a a nga ta swi yendla leswo. Kambe Yesu a mu byele a ku:

— Na nkuku wu nga se yimba, wena u ta vula kanharhu swaku a wu ni tivi.

Loko se ku hundze nkamanyana masonchwa ma teke Yesu ma mu yisa kaya ka Kayafasi. Nkama leswo swi nga yendleka vapostolo va vanyingi va balekile kambe Pedru ni mupostolo mun’wanyani va mu landzelelile hi kule. Pedru a game a nghena kaya ka Kayafasi a tshama kusuhi ni ndzilu. Nkama a nga voningeliwa hi ndzilu, mutirhi mun’wanyani a mu tivile, se a gama a vula leswaku Pedru a a fambafamba na Yesu. Kambe Pedru a te:

— A hi mina! Swi nga yendleka wo ni fananisa ni munhu mun’wani!

Pedru a game a suka a ya nyima kusuhi ni xipfalu kambe mutirhi mun’wani wa xisati a byele vanhu hinkwavu lava a va li kona ka ndhawu liyani leswaku Pedru a a fambafamba na Yesu, kambe Pedru a te:

— Mina a ni mu tivi Yesu.

Se ku humelela wanuna mun’wani a ku:

— U mun’we wa vona! Mavulavulelo ya wena i ya Galileya ku fana ni ya Yesu.

Hi khambi la wunharhu Pedru a te a a nga mu tivi Yesu. Hi nkama wolowo a nkuku wu sungule ku yimba. Yesu a txuvuke Pedru se Pedru a khumbuka marito lawa Yesu a nga mu byela wona. Pedru a sukile ka ndhawu liyani a sungula ku rila hintamu.

Se muprista wamukulu ni vavanuna van’wani va tlhanganile akaya ka Kayafasi leswaku va thethisa Yesu. Vona se a va yendle xiboho xa ku dlaya Yesu, kambe a va fanele va swi kombisa ka vanhu swaku a a yendle nchumu wa ku biha. Kambe a va swi kotanga ku yendla leswo hikusa Yesu a a nge se tshama a yendla nchumu wa ku biha.

Se Kayafasi a vutise Yesu leswaku a a li N’wana wa Xikwembu ke? Nkama Yesu a nga hlamula a ku ‘Ina’, Kayafasi a te:

— Mi mu twile hi n’wexe swaku a rhuketele Xikwembu.

Hinkwavu va pfumelelanile va vula leswaku Yesu a a faneliwa hi ku dlayiwa. Ku sukela kolanu va sungule ku mu ba ni ku mu pshitela marhi va tlhela va mu mbhonya ka nhloko na va mu ba va ku:

— Leswi wena u nge u muprofeta hi byele, i mani a nga ku ba?

Loko li xile, Kayafasi ni vavanuna van’wani va hlengeletanile swaku va ya vutisa Yesu leswaku hikakunene a a li N’wana wa Xikwembu ke? Kambe Yesu a te:

— Hi n’wina mi vulaka swaku ni yena.

Se vavanuna lavayani va vule leswaku Yesu a a ni nandzu hikusa a rhuketele Xikwembu. Se va game va mu teka va famba na yena ka yindlo ya wuhosi ya Pontiyo Pilatu lweyi a a li govhernadori wa Roma. Se a ku ta yendleka yini hi Yesu? Hi ta swi vona ka xitoriya lexi landzelaka.