Yohani A Chumayela Hi Mesiya

Nkama lowu Yohani n’wana wa Zakariya na Elizabeti a nga kula a ve muprofeta. Yehovha a lange Yohani leswaku a byela vanhu swaku Mesiya a a li kusuhi ni ku fika. Yohani a a nga djondzisi ka tindhawu leti vanhu a va mu gandzela ka tona Yehovha naswona a a nga djondzisi kusuhi ni lomu vanhu a va tshama kona. Yena a a djondzisa kule ni madoropa, se vanhu va le Yerusalema ni le Yuda a va ya lomu a a li kona leswaku va djondzisiwa hi yena. Yohani a a djondzisa vanhu swaku loko va lava ku tsakeliwa hi Yehovha a va fanele va tshika swilo swa ku biha. Hi mhaka leyo vanhu va vanyingi va tshikile ku yendla swilo swa ku biha, va tisola va tlhela va tsakamisiwa hi Yohani Mutsakamisi.

Yohani a a hanya wutomi la ku kala a nga tilaveli swilo swa swinyingi, a mpahla ya yena a yi yendliwe hi mavoya ya kamela, funtshi yena a a dla mintete ni wulombe. Vanhu va vanyingi a va lava ku mu tiva. Hambi hi Vafarisi ni Vasaduki lava a va tibyela hintamu va fambe va ya vulavula na Yohani. Kambe Yohani a a va byela a ku:

— Mi nga pimisi swaku n’wina mi va lisima ku tlula vanhu van’wani. Phela n’wina mi fanele mi tisola mi tlhela mi txintxa.

Vanhu va vanyingi a va vutisa Yohani swaku a va fanele va yendla yini leswaku va tsakisa Xikwembu. Yena a a va hlamula a ku:

— Loko mi ni timpahla timbirhi, tekani yin’we mi nyika lweyi a kalaka a nga li na yona.

Wa swi tiva swaku hi mhaka muni Yohani a a vula leswo? Yohani a a lava ku djondzisa vanhu swaku loko va lava ku tsakisa Xikwembu a va fanele va rhandza vanhu van’wani. Yohani a a byela vanhu lava a va hakelisa a rhesa a ku:

— Mi nga kanganyisi munhu.

A masonchwa a a ma byela a ku:

— Mi nga hembeni, naswona mi nga va tekeleni male ya vona vanhu van’wani.

Nkama lowu vaprista ni Valevhi va nga vutisa Yohani leswaku yena a a li mani a va hlamulile a ku:

— Mina ni munhu lweyi a kongomisaka vanhu leswaku va ya ka Yehovha, funtshi hambi hi muprofeta Esaya a vulavule hi mina.

A vanhu a va swi rhandza leswi Yohani a a swi djondzisa funtshi vanhu va vanyingi a va vula leswaku yena a a li Mesiya. Kambe yena a te:

— Munhu wa ku tlula mina a le ku fikeni, mina a swi ni faneli hambi hi ku susa tingoti ta masandaliya ya yena. Mina ni tsakamisa hi mati kambe yena a ta tsakamisa hi moya wa ku kwetsima.