¿Andichisï jatsi para chénharhini Tata Diosï Jeobani?

1, 2. Eska na uandajka Salmo 25:14, ¿ambechi jatsiski para úni parachi sési pájperani Tata Diosï Jeoba jingoni?

PARAKA nema ambakiti amigu máeuaka, ¿náki kualidadichantsï exesïni eskaksï uétarhisïnga? Jamberijtsï chá uandajka eskaksï ambakiti amiguecha jatsiska para xénchperani ka jarhuajperani. Seguru eskajtsï no uandapiringa eskajtsï jatsiska para chénharperani. Peru ísï eska na uandajka karakata enga i jorhenguarhikua pʼitakata jaka, imeecha engaksï uéjka sési pájperani Tata Diosï Jeoba jingoni, jatsistiksï para chénharhini o janhanharhini (arhinta je Salmo 25:14).

² No arhiparini na engachi xáni ióni páni jakaia jurhimbikuarhu, iáminduechachi jatsiska para seguiriini chénharhini Tata Diosï Jeobani. Joperu, ¿ambe arhikuekasïni chénharhini Tata Diosïni? ¿Ambejtsïni jarhuataa indeni ambe úni? ¿Ka ambechi jorhenguarhisïni na engaksï chénharhienga Tata Diosïni ari kʼuiripuecha: achamasï ma enga Abdíasi arhinheenga, kʼéri saserdoti Jeoiadá ka rei Jeoási?

¿AMBE ARHIKUEKASÏNI CHÉNHARHINI TATA DIOSÏNI?

3. ¿Nénajtsïni kuájchakusïni chétapu?

³ No no sési jarhasti chéni pʼikuarherani ka sánderia engachi exejka eskachi uaaka no sési úkuarhinchani. Inde jásï chétapujtsïni jarhuatasïndi parachi ambakiti ambe erakuni úni. Ju je exeani máru ejempluechani. Chéni uekorheni, jarhuataatijtsïni parachi no xáni andarhukuerani jimeesïsï enga kánikua iótaka. Ka chéni pʼikuarherani, jarhuataatijtsïni parachi no úni ima ambe enga peligrosueka. Ka ístu engachi chéjka eskachi ma repentku nóteru sési pájperaakia nemani jingoni, jarhuatasïndijtsïni parachi no uandani o úni ambe ma enga no sési pʼikuastaaka indeni kʼuiripuni.

4. ¿Ambe uékasïni Satanási eskachi pʼikuarheraaka Tata Diosï Jeobani jimbo?

⁴ Satanási uékasïndi eskaksï kʼuiripuecha chérhiaka Tata Diosï Jeobani. Ima uékasïndi eskachi jakajkuaka ambe enga Elifasi arhipka Jobuni, eska Jeoba Tata Diosï máeska enga méntku ikiani jarhajka, eskajtsïni uékasïnga kastigarini ka eskachi no méni uaaka sési pʼikuastani (Job 4:18, 19). Ambe enga Satanási uéjka, jindeesti eskachi chétapu jimbo nóteru uékaakia marhuakuni Tata Diosï Jeobani. Peruchi no jatsiska para chérhini Tata Diosï Jeobani, sánderu sési, jatsiskachi para janhanharhini ka chéni imani ambe úni enga no sési pʼikuastaaka.

5. ¿Ambe arhikuekasïni chénharhini Tata Diosïni?

⁵ Ima kʼuiripu enga chénharhijka o enga kánikua janhanharhijka Tata Diosïni, kánikua xénchasïndi ka no uékasïndi úni ambe ma enga uaaka eskaksï nóteru sési pájperaakia. Ka Jesúsi ambakiti ejemplu máesti jimboka “chénharhisïreenga Tata Diosïni” (Heb. 5:7, TNM). Ima no chérhisïreendi Tata Diosïni (Is. 11:2, 3). Sánderu sési, Jesúsi iámu imeeri mintsita jingoni xénchasïreendi imeeri Taatini ka uékasïreendi kurhajchani (Juanu 14:21, 31). Juchajtuchi kánikua janhanharhisïnga Tata Diosï Jeobani ka kʼéri ambechi arhisïnga jimboka Tata Diosï máeska enga uékpijka, enga jánhaskatiika, enga iámindu ambe sési újka ka enga kánikua uinhapikua jatsika. Ístu, míteskachi eskajtsïni ima kánikua xénchasïnga jimboka uandanhiasïnga imani ambe jimbo engachi jucha újka. Ísï jimbo, engachi no kurhajchajka, ima no sési pʼikuarherasïndi; joperu engachi kurhajchajka, ima kánikua sési pʼikuarherasïndi imeeri mintsitarhu (Sal. 78:41; Prov. 27:11).

¿AMBEJTSÏNI JARHUATAA PARACHI CHÉNHARHINI TATA DIOSÏNI?

6. ¿Ambejtsïni uaa jarhuatani chénharhini Tata Diosïni? (Salmo 34:11).

⁶ Jatsiskachi para jorhenguarhini chénharhini Tata Diosï Jeobani jimbokachi no ísï andajpenusïnga (arhinta je Salmo 34:11). Ambe ma engajtsïni jarhuataaka ísï úni, jindeesti kueraakatani exeni. Engachi exejka ambe enga xáni kueraaka Tata Diosï Jeoba, exesïngachi na enga xáni jánhastiika, na enga xáni uinhapitiika, na engajtsïni xáni xénchajka ka inde ambe úsïndi eskachi sánderu janhanharhiaka ka eskachi sánderu xénchaaka (Rom. 1:20). Pirenchi ma enga Adrienne arhinhajka, uandaspti: “Engani exejka ambe enga xáni kueraaka Tata Diosï Jeoba, exesïnga na enga xáni jánhastiika. Inde ambe úsïndi eskani kánikua janhanharhiaka ka sánderu segura jarhasïnga eska ima míteska ambe enga sánderu sési ambeeka para ji”. Enga pirenchi na eratsentapkia ini ambe, uandaspti: “No ma ambe uékapiringa úni engareni jarharitapiringa Tata Diosï Jeobaeri, imeeri engareni tsípikua íntskuka”. ¿Úpirintsï arhutani sáni tiempu i semana para eratsentani ambe ma enga Tata Diosï kueraaka? Inde ambejtsïni jarhuataati parachi sánderu janhanharhini ka sánderu xénchani Tata Diosï Jeobani (Sal. 111:2, 3).

7. ¿Nénajtsïni jarhuatasïni kómarhikua parachi chénharhini Tata Diosï Jeobani?

⁷ Máteru ambe engajtsïni jarhuataaka chénharhini Tata Diosï Jeobani jindeesti pʼindeni kómarhini. Engachi sánderu uandontskuarhejka Tata Diosï jingoni, sánderuchi sési mítesïnga ka méni engachi kurhakujka eskajtsïni jarhuataaka tekaantani engachi no sési nitamakuarhini jarhajka, eratsentasïngachi na enga xáni uinhapitiika, ka engachi diosmaiamukua íntskuntajka jimboka íntspiska imeeri uájpani juchantsïni jimbo, miántasïngachi eskajtsïni ima kánikua xénchasïnga. Ístu, engachi mintsita jingoni kurhakujka eskajtsïni jánhastaaka parachi orhepani uérakuni problemani ma, úsïngachi exeni na enga xáni jánhaskatiika ima. I járhati kómarhikuechajtsïni jarhuataati parachi sánderu janhanharhini ka parachi jánguarhintani no méni úni imani ambe enga uaaka úni eskachi nóteru sési pájperaakia imani jingoni.

8. ¿Ambechi jatsiski para úni parachi méntkisï chénharhini Tata Diosï Jeobani?

⁸ Parachi méntkisï chénharhini Tata Diosï Jeobani, jatsiskachi para estudiariini Bibliani parachi jorhenguarhini imeecheeri engaksï ambakiti ejemplu máeka ka engaksï no ambakiti ejemplu máeka. Ju je exeani tanimu ejempluechani. Orhetachi exeaka tsimani Tata Diosïiri marhuariicheeri engaksï sési marhuakuka: Abdíasiiri enga rei Akabiiri kʼumanchikuarhu ambe exeenga; ístuchi exeaka kʼéri saserdoti Jeoiadáeri ambe. Ka tátsekuachi exeni jauaka Jeoásiiri ejemplu enga Judá anapu reiipka. Ima, orheta sési marhuakuspti Tata Diosï Jeobani joperu tátsekua niáraspti jarharini.

JU JE BALORI JUKANI ÍSÏ ESKA ABDÍASI

9. ¿Néna jarhuataspi Abdíasini chénharhini Tata Diosïni? (1 Reyes 18:3, 12).

⁹ Primeru xanhari enga Biblia Abdíasiirib ambe uandajka, ísï uandasïndi: “Abdíasi kánikua chénharhisïreendi Tata Diosï Jeobani” (arhinta je 1 Reyes 18:3, 12). ¿Néna jarhuataspi Abdíasini enga ísï chénharhienga Tata Diosï Jeobani? Jarhuataspti paraka jurhimbitku jámapiringa ka para mintsinharhikueni. Ini ambe jimbo, rei uandaspti eska ima exepiringa iámindu ambe imeeri kʼumanchikuarhu (terukutanta je Nehemías 7:2 jingoni). Ístu, jarhuataspti paraka balori jukapiringa, ambe ma enga meru uétarhinchapiringa. ¿Andi? Jimboka jimajkanisï enga ima irekapka, rei Akabi juramuxapti, rei ma enga “sánderu no sési ambe niátapka Tata Diosï Jeobaeri orhepani jimbo ka eska iámindu reiicha engaksï antesi juramupka” (1 Rey. 16:30). Ístu, Akabi tembuchatixapti Jesabeli jingoni enga Baalini kómarhienga ka enga mintsita jingoni kurhunhienga Tata Diosï Jeobani. Jimbosï uékeendi eska Israeli enga jindeepka norterhu anapu reinu nóteru kómarhipiringia Tata Diosïni ísï eska ima na uékeenga; asta niáraspti uándikuani uánikua Tata Diosïiri profeteechani (1 Rey. 18:4). Kánikua úkua jukaspti marhuakuni Tata Diosï Jeobani indeni tiempuni jimbo.

10. ¿Néna xarhataspi Abdíasi eska kánikua balori jukaspka?

¹⁰ ¿Néna xarhataspi Abdíasi eska kánikua balori jukaspka? Enga Jesabeli ueenapka jirinhantani Tata Diosï Jeobaeri profeteechani para uándikuani, Abdíasi jískaaspti kuebeecharhu 100 profeteechani, sinkuenteechani arhukuaspti ka ima pákuasïreendi kurhinda ka itsï (1 Reyes 18:13, 14). Enga Jesabeli mítepiringa ini ambe, i achamasï enga xáni balori jukapka uándikunhapirindi; ka ísï eska náki uéjki kʼuiripu ma, Abdíasi no uékasïreendi uarhini. Peru jimboka Abdíasi kánikua xénchasïreenga Tata Diosï Jeobani ka imeeri marhuariichani, úspti indeni ambe nájkiruka úpiringa uándikunhani.

11. ¿Nénaksï májkueni úxaki eska Abdíasi uánikua Tata Diosï Jeobaeri marhuariicha? (Ístu exe je imajenini).

¹¹ Ini jurhiatikuecha jimbo, uánikua Tata Diosï Jeobaeri marhuariichaksï jimeesïsï irekasti nani engachi no jurajkunhajka juchaari ánchikuarhitani úni. Janhanharhiasïndiksï juramutiichani, peru májkueni eska Abdíasi, juchaari erachiichaksï kómarhisïndi Tata Diosï Jeobani ísï eska ima na jukanchaka (Mat. 22:21). Xarhatasïndiksï eskaksï chénharhisïnga Tata Diosïni jimbokaksï imani kurhajchasïnga ka no kʼuiripuechani (Uku. 5:29). Ísï jimbo, imeechaksï seguiriixati aianhpini ambakiti aianhperakuani ka sïpatikuarku tánguarhini (Mat. 10:16; 10:28, TNM). Ístuksï exeni jarhasïndi eskaksï imeecheeri erachiicha jatsiaka iámindu ambe paraksï no jurajkuni Tata Diosïni. Ju je exeni ambe enga úpka erachi Henri enga África anapu paisi ma jimbo irekaka nani engachi antesi no jurajkunheenga juchaari ánchikuarhitani úni. Indeni tiempuni jimbo, Henri aiakukuarhespti para publikasioniichani pákuani erachiichani. Ima karaspti: “Paraksïni mátirku arhini, ji ménichani sáni chésïreenga. Ísï jimbo, ji seguru jarhaska eska ambe engareni jarhuataka balori jukani, jindeeska kánikua janhanharhini Tata Diosï Jeobani”. Májkueni eska Henri chájtujtsï uaaka balori jukani engajtsï jorhenguarhiska chénharhini Tata Diosïni.

JU JE NO MÉNI JURAJKUNI TATA DIOSÏNI ÍSÏ ESKA JEOIADÁ

12. ¿Néna xarhataspi Jeoiadá ka imeeri témba eskaksï no méni uékasïreenga jurajkuni Tata Diosï Jeobani?

¹² Kʼéri saserdoti Jeoiadá chénharhisïreendi Tata Diosï Jeobani ka inde ambe úspti eska no méni jurajkupiringa imani ka eska úpiringa eskaksï máteruecha kómarhipiringa Tata Diosïni. Enga Atalía, Jesabeliiri uájpa, niárapka juramukua jatsini Judá, nájkiruka no sésikua jatsipka, Jeoiadá xarhataspti na enga xáni chénharhienga Tata Diosïni. Kʼuiripuechaksï kánikua chérhisïreendi Atalíani. Ima kánikua no ambakispti ka jimboka uékasïreenga juramukua jatsini, uándikuaspti sáno iámindu imeeri nimakuechani paraka úpiringa juramukua jatsini (2 Crón. 22:10, 11). Peru máechakitu sapi enga Jeoási arhinheenga úspti tsípiti pakarani jimboka Jeosabeati enga Jeoiadáeri témbeepka kuájchakuspka. Ima ka imeeri uámba, jískasptiksï ka kuidariisptiksï indeni sapini. Engaksï ísï úpka, úsptiksï eska japiringa Dabidiiri familia ma enga niárapiringa reiini. Jeoiadá no méni jurajkuspti Tata Diosï Jeobani ka imani ambe úspti enga sési japka nájkirukaksï kʼuiripuecha kánikua chérhienga Atalíani (Prov. 29:25).

13. ¿Néna xarhataspi ménderu Jeoiadá eska méntkisï úpiringa ambe enga Jeoba uandeenga?

¹³ Enga Jeoási siete uéxurhini jatiripkia, Jeoiadá ménderu xarhataspti eska méntkisï úpiringa ambe enga Tata Diosï Jeoba uandajka. Ísï jimbo, eratsespti úni ambe ma. Enga inde ambe sési uérakupiringa, Jeoási reiipirindi jimboka Dabidiiri familiarhu anapuespka. Peru enga no sési uérakupiringa, Jeoiadánksï uándikupirindi. Tata Diosï Jeobaeri jarhuajperata jingoni, iámindu ambe sési uéraspti. Israeli anapu orhejtsïkutiicheeri jarhuajperata jingoni ka lebiteecheeri, Jeoiadá rei úspti Jeoásini ka juramuspti eskaksï uándikupiringa Atalíani (2 Crón. 23:1-5, 11, 12, 15; 24:1). “Tátsekua, Jeoiadá pakatperakua ma úspti Tata Diosï Jeoba jingoni, rei jingoni ka ireta jingoni. Indeni pakatperakua jimbo aiakukuarhexaptiksï paraksï seguiriini Tata Diosï Jeobaeri ireteeni” (2 Rey. 11:17). “Ístu, peeuaspti imeechani engaksï puertarhu jarheenga Tata Diosï Jeobaeri kʼumanchikuarhu puerteecharhu, paraka no nema enga no pímbinhasï japiringa úpiringa inchani” (2 Crón. 23:19).

14. ¿Néna kʼéri ambe arhinhaspi Jeoiadá jimboka kʼéri ambe arhispka Tata Diosï Jeobani?

¹⁴ Tata Diosï Jeoba uandaspti: “Uaaka eska kʼéri ambe exenhaaka ima engareni kʼéri ambe exejka”, ka ísï úpti Jeoiadá jingoni (1 Sam. 2:30). Pori ejemplu, Tata Diosï Jeoba úpti eska karakata pakarapiringa imeeri Karakatarhu ambe enga xáni úpka i kʼéri saserdoti parakachi jucha májkueni úpiringa (Rom. 15:4). Ka enga Jeoiadá uarhipkia, kʼéri kóntperata ma intsïnhaspti: “jatsinhantaspti Dabidiiri ireta jimbo, reiicha jingoni, jimboka ambakiti ambe úspka Israeli para Tata Diosï jurhimbiti ka ístu para imeeri kʼumanchikuarhu” (2 Crón. 24:15, 16).

15. ¿Ambechi uaa jorhenguarhini Jeoiadáeri ambe? (Ístu exea je imajeniichani).

¹⁵ Ambe enga Biblia uandajka Jeoiadáeri ambe, jarhuatasïndijtsïni parachi sánderu chénharhini Tata Diosïni. Orhejtsïkutiichaksï uaati májkueni úni eska ima engaksï jánguarhintaska kuájchakuni Tata Diosïiri kúnguarhikuani (Uku. 20:28). Ka erachiicha engaksï jatiriikia uaatiksï jorhenguarhini eska Tata Diosï Jeoba úrauaka para úni ambe enga ima uékajka ka méntkisï kuenta uaauati engaksï imeecha chénharhiska imani ka engaksï méntkisï úska ambe enga ima uandajka. Ka imeecha engaksï sapichku jaka, uaatiksï exeni na enga kámapka Tata Diosï Jeoba Jeoiadáni ka uaatiksï májkueni kaani erachiichani engaksï jatiriikia, jukaparharaani ka janhanharhikua jingoni kaani ka sánderia imeechani engaksï ióni páni jakaia sési marhuakuni Tata Diosïni (Prov. 16:31). Ka últimu, iáminduechachi uaaka ambakiti ambe jorhenguarhini familieri orhejtsïkutiicheeri ka lebiteecheeri. Jatsiskachi para mintsita jingoni jarhuataani ka kurhajchaani imeechani engajtsïni orhejtsïkujka (Ebr. 13:17).

JU JE NO ÍSÏINI ESKA JEOÁSI

16. ¿Ambe úspi Jeoási enga xarhatapka eska nóteru xáni sési pájperasïreengia Tata Diosï Jeoba jingoni?

¹⁶ Enga rei Jeoási sapichku japka, Jeoiadáeri jarhuajperata jingoni, ima jánguarhintaspti jaiapanherantani Tata Diosï Jeobani (2 Rey. 12:2). Peru enga Jeoiadá na uarhipkia, Jeoási kurhajchaaspti prinsipeechani engaksï no sáni janhanharhienga Tata Diosïni. Indeni ambe jimbo, rei Jeoási ka ístu ireta, “ueenasptiksï kómarhiani postiichani no jurhimbiti diosïicheeri ka diosï úkateechani” (2 Crón. 24:4, 17, 18). Nájkiruka inde ambe kánikua no sési pʼikuastapka Tata Diosï Jeobani, ima méntkisï axakuani jarhasïreendi profeteechani parakaksï imeecha ménderu andarhientapiringa Tata Diosï Jeobani. Peru imeechaksï no uékasïreendi kurhajchaani. Ni sikieraksï kasu úkupi Jeoiadáeri uájpani, Sakaríasini, enga profeteepka ka saserdotiini ka enga ístu Jeoásiiri primu jémbeepka. Ka Jeoási uándikutarkuarhispti Sakaríasini nájkiruka Sakaríasiiri familia uánikua ambe úpka imani jimbo (2 Crón. 22:11; 24:19-22).

17. ¿Néna kʼamarhukuspi Jeoási?

¹⁷ Jeoási nóteru chénharhisïreendia Tata Diosïni ka kánikua no sési nikuspti. Tata Diosï Jeoba uandaspti: “Imeecha engajtsïni no jukaparharajka ístuksï no jukaparharanhaati” (1 Sam. 2:30). Ísï tátsekua, Siria anapu ejersitu ma engaksï namunitu sondaduepka, andasptiksï Jeoásiiri ejersituni engaksï uánikua sondaduepka, ka ima kánikua atakata pakaraspti. Engaksï Siria anapuecha na níntapkia, mismu Jeoásiiri jántspiriichaksï uándikuspti jimboka ima uándikutarkuarhispka Sakaríasini. Ka jimboka Jeoási xáni no ambakiti kʼuiripu máespka, nóksï jatsintaspti jima engaksï reiicha jatsinhanteega (2 Crón. 24:23-25; exe je nota de estudio “hijo de Baraquías”, enga Mateo 23:35, TNM jimbo jaka).

18. Ísï eska na arhijka Jeremías 17:7, 8, ¿ambechi jatsiski para úni parachi no ísïini eska Jeoási?

¹⁸ ¿Ambechi jorhenguarhisïni Jeoásiiri ambe? Ima ísïispti eska anhatapu ma enga sïranguechani no xáni iauani inchatsekurhitini jatsiajka; ka paraka úpiringa uíuinhasï jarhani, uétarhinchasïreendi eska nema jarhuatapiringa, ísï eska na úpka kʼéri saserdoti Jeoiadá. Enga i uarhipkia, Jeoási ueenaspti kurhajchaani apostateechani ka jurajkuspti Tata Diosï Jeobani. I ejemplujtsïni jorhendasïndi eskachi no jatsiska para chénharhini Tata Diosï Jeobani nomasi jimbokaksï máteru erachiicha ísï uaaka ka juchaari familiariicha, o jimbokajtsïni iicha apoiarisïnga. Parachi jucha no jurajkuni Tata Diosï Jeobani, jatsiskachi para jorhenguarhini eratsentani ka mémindu kómarhini. Inde ambejtsïni jarhuataati parachi sánderu xénchani ka janhanharhini Tata Diosï Jeobani (arhinta je Jeremías 17:7, 8; Kol. 2:6, 7).

19. ¿Ambe erokuarhisïni Tata Diosï Jeoba juchaari ambe?

¹⁹ Tata Diosï Jeobajtsïni no kurhachesïndi ambe ma engachi jucha no uaaka úni. Eclesiastés 12:13 uandasïndi ambe enga ima erokuarhijka juchaari ambe: “Kánikua janhanharhi Tata Diosïni enga jurhimbitiika ka ú ambe enga ima juramujka, jimbokaksï ini ambesï jatsika para úni kʼuiripuecha”. Engachi jucha chénharhiska Tata Diosï Jeobani, uaakachi orhepani uérakuni náki uéjki uandanhiatani ka uaakachi kurhajchani ísï eska Abdíasi ka Jeoiadá ka no ma ambe uaati eskachi nóteru sési pájperaakia Tata Diosï Jeoba jingoni.