SEMANA 20
Ju je sánderu sési uaani juchaari kómarhikuechani
“Aiangukuarhi je iámindu ambe enga chaari mintsita pʼikuarhinhijka” (SAL. 62:8).
PIREKUA 45 Ambe enga eratsijka juchiti mintsita
AMBE ENGACHI EXEAKAa
Uaakachi someni kómarhini Tata Diosï Jeobani ka kurhakuni eskajtsïni jarhuataaka iámindu ambe jimbo. (Exe je párrafu 1).
1. ¿Ambejtsïni arhisïni Tata Diosï eskachi uaaka? (Ístu exea je imajeniichani).
¿NÉNCHI uaa andarhierani engachi uétarhinchani jauaka eskajtsïni nema uinhaperantaaka ka jánhastani? Juchachi míteskia nénchi uaa andarhierani. Uaakachi kómarhini Tata Diosï Jeobani ka imajtsïni pʼímarhisïndi parachi ísï úni. Ístuchi míteska eska ima uékasïnga eskachi someni uandontskuarheaka imani jingoni jimbokajtsïni arhisïnga ‘méntku jauena [je] kómarhini’ (1 Tes. 5:17). Uaakachi iámindu ambe aiangukuarhini Tata Diosïni ka kurhakuni eskajtsïni jánhastaaka iámindu ambe jingoni (Prov. 3:5, 6). Ka jimboka Tata Diosï Jeoba kánikua sési kámpisïnga, imajtsïni jurajkusïndi eskachi kómarhiaka namuni xanhari engachi jucha uékaaka.
2. ¿Ambechi exea ini jorhenguarhikua jimbo?
2 Kánikuachi jukaparharasïnga kómarhikuani jimboka ambakiti regalu máeska. Joperu ménichani, no fásiliisïndi arhutani tiempu parachi uandontskuarheni Tata Diosï Jeoba jingoni jimbokachi uánikua ambe jatsisïnga para úni. Ístuchi jamberi eratsejka eskachi jatsiska para sánderu sési uaani juchaari kómarhikuechani. Perujtsïni Biblia uaati jarhuatani ini ambe jingoni. Ini jorhenguarhikua jimbo, exeakachi Jesúsiiri ejempluni engajtsïni jarhuataaka néna engachi uaaka arhutani tiempu parachi kómarhini. Ístuchi exeaka eskachi uaaka sánderu sési uaani juchaari kómarhikuechani engachi uandaska sinko ambe enga kánikua jukaparhakueka.
JESÚSI ARHUTASPTI TIEMPU PARA KÓMARHINI
3. ¿Ambe mítespi Jesúsi?
3 Jesúsi mítespti eska Tata Diosï Jeoba kánikua jukaparharasïnga engaksï kʼuiripuecha kómarhijka. Kánikua ante de Jesúsi Echerirhu jurhani, ima exespti na enga imeeri Taati mókukuantapka kómarhikuechani imeeri marhuariichani. Jesúsi imani jingoni jarhaspti jiáni enga ima mókukuantapka xáni sési járhati kómarhikuechani enga Ana, Dabidi, Elíasi ka uánikua máteruechaksï úkupka (1 Sam. 1:10, 11, 20; 1 Rey. 19:4-6; Sal. 32:5). Jimbosï Jesúsi úpti arhiani imeeri chúxapatiichani eskaksï mémindu kómarhipiringa Tata Diosïni ka eska ima kurhajchaapiringa (Mat. 7:7-11).
4. ¿Náki ambakiti ejemplujtsïni íntskuski Jesúsi?
4 Jesúsi ambakiti ejemplu ma íntsaaspti imeeri chúxapatiichani. Enga aianhpini jámani japka, mémindu kómarhispti Tata Diosïni. Ima arhutaspti tiempu para kómarhini jimboka uánikua ambe jatsisïreenga para úni ka kʼuiripuechaksï méntkisï imani jingoni jarhasïreendi (Mar. 6:31, 45, 46). Pʼindespti xarhentkuechani uandontskuarheni imeeri Taati jingoni jiáni enga jandiajku jarheenga (Mar. 1:35). Ma uelta, erantskutaspti kómarhini ante de úni ambe ma enga kánikua jukaparhakuepka (Luk. 6:12, 13). Ka ima chúrikua ante de uarhini, Jesúsi someni kómarhispti Tata Diosï Jeobani jimboka mítespka eska nitamakuarhipiringa ambe ma enga kánikua úkua jukapka ka enga jimbo jupka Echerirhu (Mat. 26:39, 42, 44).
5. ¿Nénachi uaa májkueni úni eska Jesúsi?
5 Jesúsiiri ejemplujtsïni jorhendasïndi eska nájkirukachi no andajkuarhini jauaka, jatsiskachi para arhutani tiempu parachi Tata Diosï Jeobani kómarhini. Májkueni eska Jesúsi, jamberi uétarhiati eskachi jánguarhintaaka tiempu arhutani parachi kómarhini, jamberichi uaaka xarhentku jauarani o ióndani sáni kʼuíni parachi kómarhini Tata Diosïni. Engachi ísï úska, xarhatakunchi jauaka Tata Diosï Jeobani na engachi xáni jukaparharajka ini xáni ambakiti regaluni. Pirenchi ma enga Lynne arhinhajka, miásïndi na enga xáni sési pʼikuarherapka enga jorhenguarhipka eska úpiringa uandontskuarheni Tata Diosï Jeoba jingoni enga kómarhipiringa. Ima uandantasïndi: “Engani jorhenguarhipka eska Tata Diosï Jeoba jingontku kurhaasïnga engani kómarhijka na uéjki jatini, ueenaspka ísï exeni eska ambakiti amigu ma ka uandaspka eskani jánguarhintapiringa sánderu sési uaani juchiiti kómarhikuechani”. Seguru eskachi uánikuecha ísï pʼikuarherajka eska i pirenchi. Iásï, ju je exeni sinko ambe enga kánikua jukaparhakueka ka engachi jatsika para uandani juchaari kómarhikuecharhu.
SINKO AMBE ENGA JUKAPARHAKUEKA PARACHI UANDANI KÓMARHIKUECHARHU
6. Eska na arhijka Jaŋaskuecha 4:10, 11, ¿ambe jukanchaski Tata Diosï Jeoba?
6 Ju je kʼéri ambe arhini Tata Diosï Jeobani. Jánhaskua ma jimbo enga kánikua sési jáxepka, apostoli Juanu exeaspti 24 orhejtsïkutiichani engaksï kʼéri ambe arhini japka Tata Diosï Jeobani auandarhu. Imeechaksï kʼéri ambe arhixapti Tata Diosïni ka uandasïreendiksï eska ima jukanchaska para ʻtʼíntskua intsïnhani ka arhinhani eska kʼéri ambeeska ka uinhapikua jatsiniʼ (arhinta je Jaŋaskuecha 4:10, 11). Ístuksï ánjeliicha uánikua ambe jimbo kʼéri ambe arhisïndi Tata Diosï Jeobani. Imeechaksï imani jingoni jarhasti auandarhu ka sésiksï mítesti, exesïndiksï na enga jásïika Tata Diosï, ka uékasïndiksï kʼéri ambe arhini imani ambe jimbo enga újka (Job 38:4-7).
7. ¿Nénachi kʼéri ambe arhisïni Tata Diosï Jeobani juchaari kómarhikuecharhu?
7 Juchajtuchi jatsiska para kʼéri ambe arhini Tata Diosï Jeobani engachi kómarhini jauaka. Ka uaakachi ísï úni engachi arhiska ambe engachi tsitijka imeeri ambe ka andichisï xáni janhanharhijki. Engachi arhintaska ka jorhenguarhini jarhani Bibliani, ju je jánguarhintani exeani Tata Diosï Jeobaeri kualidadiichani engachi sánderu tsitiajka (Job 37:23; Rom. 11:33). Tátsekua, ju je aianguni Tata Diosïni na engachi pʼikuarherajka engachi eratseantajka imeeri kualidadiichani. Ístuchi uaaka kʼéri ambe arhini Tata Diosï Jeobani jimbokajtsïni jarhuatasïnga juchantsïni ka ístu iámindu erachiichani. Ima méntkisï jingontku jarhasïndi juchantsïni jimbo ka kuájchakusïndijtsïni (1 Sam. 1:27; 2:1, 2).
8. ¿Ambe ka ambe jimbochi uaa diosmaiamukua arhini Tata Diosï Jeobani? (1 Tesalonika 5:18).
8 Ju je diosmaiamukua arhini Tata Diosï Jeobani. Uaakachi uánikua ambe jimbo diosmaiamukua arhini Tata Diosïni (arhinta je 1 Tesalonika 5:18). Ju je diosmaiamukua arhini Tata Diosïni iámindu ambakiti ambe jimbo, jimboka imasï újka eskachi jatsiaka ambakiti ambe (Sant. 1:17). Pori ejemplu, úpiringachi arhini na engachi xáni agradesidu jaka ini xáni sési jásï Echeri jimbo, xáni sési jásï ambe jimbo enga kueraaka, juchaari tsípikua jimbo, juchaari familia jimbo, juchaari amiguecha jimbo ka imani ambe jimbo engachi erokuarhini jaka. Ístuchi uékasïnga diosmaiamukua arhini, jimbokajtsïni sésikua íntskusïnga parachi jucha sési pájperani imani jingoni.
9. ¿Andisï no fásilii agradesidueni?
9 ¿Ambe ka ambe jimbochi uaa agradesidu jarhani Tata Diosï Jeoba jingoni? Jamberichi úkua jukanchajka indeni ambe exeni jimbokaksï iásï kʼuiripuecha no pʼindeska diosmaiamukua arhijpini. Kʼuiripuechaksï sánderu uandanhiasïndi imani ambe jimbo engaksï uéjka jatsini ka eska agradeseriini imani ambe jimbo engaksï jatsikia. Engachi juchajtu májkueni jámaska, juchaari kómarhikuecharhu puro kurhajkuarhini japiringachi ambe ma. Ka parachi no indeni ambe úni, jatsiskachi para jánguarhintani agradesidueni ka diosmaiamukua arhini Tata Diosï Jeobani iámindu ambe jimbo engajtsïni íntskujka (Luk. 6:45).
Diosmaiamukua arhini Tata Diosïni, jarhuatasïndijtsïni tekaantani. (Exe je párrafu 10).
10. ¿Néna jarhuataski pirenchini ma agradesidu pʼikuarherani? (Ístu exe je imajenini).
10 Engachi agradesiduejka, jarhuatasïndijtsïni parachi úni tekaantani engachi uandanhiata ambe jatsijka. Ju je exeni pirenchiiri ejemplu ma enga arhinhajka Kyung-sook enga uérapka rebistarhu La Atalaya 15 de eneru de 2015. Pirenchi kánseri exeminhantaspti pulmonicharhu. Ima uandaspti: “Míteni eskani pʼamenchaxapka, úspti eskani kánikua no sési pʼikuarherapiringa. Ísï exesïreenga enajkini nóteruni ambe ma úpirinia úni, ka kánikua chéspka”. ¿Ambe jarhuataspi pirenchini orhepani uérani? Ima uandantaspti eska mándani chúrikua, ante de nirani kʼuíni, imeeri kʼumanchikuarhu karhakua nirasïreenga para uandontskuarheni Tata Diosï Jeoba jingoni ka eska uinhachakuarhu diosmaiamukua íntskuntasïreenga sinko ambakiti ambe jimbo enga nitamakuarhienga ima jurhiatikua. Inde ambe sési pʼikuastantasïreendi ka jarhuatasïreendi para arhini Tata Diosï Jeobani na enga xáni xéncheenga. Pirenchi mismu exespti na enga Tata Diosï jarhuataajka imeeri marhuariichani jiáni engaksï no sési nitamakuarhini jarhajka, ka exespti eska ma sánderu uánikua kóntperateechani jatsiasïnga ka eska uandanhiateecha. Májkueni eska Kyung-sook, juchajtuchi uánikua ambe jatsiska engachi jimbo uaaka diosmaiamukua arhini Tata Diosïni, asta jiáni jamberi engachi no sési nitamakuarhini jauaka. Diosmaiamukua arhini Tata Diosï Jeobani, jarhuatasïndijtsïni parachi tekaantani ka úsïndi eskachi no xáni no sési pʼikuarheraaka.
11. ¿Andiksïsï balori uétarhincheeni Jesúsiiri chúxapatiicha?
11 Ju je kurhakuni balori Tata Diosï Jeobani parachi aianhpini. Ante de Jesúsi auandarhu kʼuanhatsentani, miátantaaspti imeeri chúxapatiichani eskaksï jatsispka para aianhpini imeeri ambe “Jerusaléni ka iápuru Judea ka Samaria ísï ka iápuru parhakpinirhu asta jima enga sánderu iauaniika” (Uku. 1:8; Luk. 24:46-48). Ísï tátsekua, judiuecha engaksï relijioniiri orhejtsïkutiipka, jupikasptiksï Pedruni ka Juanuni ka paasptiksï jima enga Sanedríni japka. Jimaksï arhiaspti eskaksï nóteru jámapiringia aianhpini ka chéraasptiksï (Uku. 4:18, 21). ¿Ambeksï úspi i tsimani apostoliicha?
12. Eska na arhijka Ukuecha 4:29, 31, ¿ambeksï úspi Jesúsiiri chúxapatiicha?
12 Pedru ka Juanu, ini ambeksï mókukuantaspti judiuecheeri relijioniiri orhejtsïkutiichani imani ambe jimbo engaksï arhinhapka: “Sienga sánderu sésiika [Tata] Diosïni japarini chánksïni janhanharhini ka eska para [Tata] Diosïni janhanharhini, jimboka jucha nómindu uaaka no uandantani [ambe] engachi exeka ka kurhandini” (Uku. 4:19, 20). Engaksï relijioniiri orhejtsïkutiicha jurajkuapka, íksï tsimani apostoliichaksï tánguarhintaspti máteru Jesúsiiri chúxapatiichani jingoni, ka májku kʼériksï kómarhispti Tata Diosï Jeobani paraka jarhuataapiringa úni ambe enga ima uéjka. Uandasptiksï: “Íntskujtsïni uinhapikua juchantsïni engachi jindeeka chiiti jántspiriicha, para eskachi uaaka uandantani chiiti uandakuani no sáni chéparini”. Ka Tata Diosï Jeoba mókukuantaspti indeni xáni sési jásï kómarhikuani (arhinta je Ukuecha 4:29, 31).
13. ¿Ambejtsïni jorhendasïni erachi Jin-hyukiiri ejemplu?
13 Uaakachi májkueni úni eska Jesúsiiri chúxapatiicha ka seguiriini aianhpini nájkirukajtsïni juramutiicha arhiaka eskachi no ísï uaaka. Indeni ambesï úpti erachi Jin-hyuk enga ónhanhapka jimboka no uékaspka ejersiturhu inchamukuni. Jima arhinhaspti eska exeapiringa imani presuechani engaksï jandiajkuechani ónhaapka. Imani ambejku úpirindi kurhamarhiani ambe engaksï uétarhinchani japiringa ka no úpirindi Biblieri ambe aianguani. Joperu erachi kurhakuspti Tata Diosï Jeobani eska balori íntskupiringa ka eska jarhuatapiringa paraka úpiringa aianguani méni enga úpiringa ísï úni (Uku. 5:29). Ima uandantasïndi: “Tata Diosï Jeoba mókuantaaspti juchiiti kómarhikuechani ka íntskusptirini balori ka jánhaskakua engani uétarhinchani japka. Ka seldeecharhu uératini, ueenaspka uánikuechani jorhendaani Biblieri ambe sinko minutuechani mándani arhini. Ka chúrikuechani, karteechani uaasïreenga parani ísï pauandikua presuechani íntsaantani”. Májkueni eska Jin-hyuk, juchajtuchi uaaka seguru jarhani eskajtsïni Tata Diosï Jeoba jarhuataaka aianhpini ka ístuchi uaaka kurhakuni eskajtsïni íntskuaka balori ka jánhaskakua.
14. ¿Ambeksïni jarhuataa orhepani uérakuani uandanhiateechani? (Salmo 37:3, 5).
14 Ju je kurhakuni Tata Diosï Jeobani eskajtsïni jarhuataaka orhepani uérakuani uandanhiateechani. Uánikuechachi no sési nitamakuarhixaka jimbokachi uarhiranchaska nemani, jimbokachi no sési kánhaxaka, o jimbokachi pʼamenchaxaka o kánikua kómu pʼikuarherani jarhani o jimboka jarhaska ambe ma familiarhu. Ka pandemiecha ka guerreecha, úsïndiksï eska sánderu úkua jukaaka orhepani uérakuni indeni ambe. Ísï jimbo, mintsita jingoni aiangukuarhi je Tata Diosï Jeobani na engajtsï pʼikuarherani jaka, ísï eskajtsï na úpiringa ambakiti amigu ma jingoni ka uaakajtsï seguru jarhani eskaksïni Tata Diosï Jeoba jarhuataaka (arhinta je Salmo 37:3, 5).
15. ¿Nénajtsïni jarhuatasïni kómarhikua parachi tekaantani jiáni engachi no sési nitamakuarhini jarhajka? Uandanta je ejemplu ma.
15 Méntku kómarhini jarhani, jarhuatasïndijtsïni parachi úni tekaantani engachi no sési nitamakuarhini jarhajka (Rom. 12:12). Tata Diosï Jeoba mítesti ambe engaksï nitamakuarhijka imeeri marhuariicha ka “kurhaasïndi engaksï uinhachaparini jarhuajperata kurhajkuarhijka” (Sal. 145:18, 19). Prekursora ma enga 29 jatiriika enga Kristie arhinhajka, exesti eska inde ambe ísïiska. Pirenchi, ma repentku uinhamu pʼamenchaspti, ka indeni ambe jimbo, depresioni pʼiraspti. Ka sánderu tátsekua imeeri amamba pʼamenchakua ma exeminhantaspti enga nóteru úpiringia ambakentani. Kristie uandantasïndi: “Mintsita jingoni kurhakusïreenga Tata Diosï Jeobani eskarini jarhuatapiringa pauani pauani orhepani uérani. Jánguarhintaspka no jurajkuni Tata Diosïni, no kueratasïreenga tánguarhikuecharhu ka jandiajkuni jorhenguarhisïreenga Biblieri ambe”. Ístu uandasïndi: “Kómarhikua kánikuarini jarhuataspti jiáni engani no sési nitamakuarhini japka. Míteni eska Tata Diosï Jeoba jíndeni jingoni jarhaspka, kánikuarini uinhaperantaspti. Ka nájkirukani no sóntkuni ambakentapka, Tata Diosïreni kurhajchaspti, jimbokani úspka sési pʼikuarhenhintani”. Ju je no méni mirikurhini eska Tata Diosï Jeoba jarhuataasïnga imeechani “engaksï janhanharhijka imani parakaksï no terungutanhaaka” (2 Ped. 2:9).
Parachi no no sési ambe niátani, 1) ju je kurhakuni Tata Diosï Jeobani eskajtsïni jarhuataaka, 2) ju je juchajtu jánguarhintani ka 3) ju je sánderu sési pájperani Tata Diosï Jeoba jingoni. (Exea je párrafuechani 16 ka 17).
16. ¿Andichisï uétarhinchajki eskajtsïni Tata Diosï Jeoba jarhuataaka parachi no úni imani ambe enga no sési jaka?
16 Ju je kurhakuni Tata Diosï Jeobani eskajtsïni jarhuataaka parachi no úni imani ambe enga no sési jaka. Jimbokachi no perfektueska, jatsiskachi para méntku jánguarhintani jarhani parachi no úni imani ambe enga no sési jaka. Ístu, Satanási mámaru jásï ambe úrasïndi parachi no sési jásï ambe niátani. Pori ejemplu, úsïndi eskachi ikichakueni jásï ambe jingoni tsípikuarhiaka parachi no sési jásï ambe eratseni. Ka inde ambe úsïndi eskajtsïni Tata Diosï nóteru sési exeakia ka eskachi kʼéri pekadu ma uaaka (Mar. 7:21-23; Sant. 1:14, 15).
17. Engachi na kómarhiakia, ¿ístuchi ambe jatsiski para úni parachi no úni imani ambe enga no sési jaka? (Ístu exea je imajeniichani).
17 Uétarhinchasïngachi eskajtsïni Tata Diosï Jeoba jarhuataaka parachi no úni imani ambe enga no sési jaka. Jiáni enga Jesúsi jorhentpipka néna kómarhini, ístu uandaspti eskachi kurhajkuarhipiringa arini ambe: “Asïjtsïni jurajku eskachi terungutanhaaka, sino kuájpijtsïni para Noambakitini jingoni” (Mat. 6:13). Tata Diosïjtsïni uékasïndi jarhuatani, peruchi jatsiska para kurhakuni eskajtsïni jarhuataaka. Peru no solu uétarhisïndi kómarhini, sino ístu eskachi juchajtu jánguarhintaaka no kurhaani ni arhintani imani ambe enga no sési jaka ka enga Satanásiiri parhakpini no no sési exejka (Sal. 97:10). Parachi imani ambe eratseni enga sési jaka, uétarhisïndi arhintani ka jorhenguarhini Bibliani, tánguarhikuecharhu nirani ka aianhpini. Tata Diosï Jeobajtsïni aiachisïndi eska no jurajkuaka eskachi jukari tsʼéjkunhaaka (1 Kor. 10:12, 13).
18. ¿Ambechi jatsiski para úni iáminduecha?
18 Parachi no jurajkuni Tata Diosïni ini últimu jurhiatikuechani jimbo enga xáni úkua jukaka, uétarhisïndi eskachi sánderu kómarhiaka. Tata Diosï Jeoba uékasïndi eskachi aiangukuarhiaka ambe enga juchaari “mintsita pʼikuarhenhijka” (Sal. 62:8). Ísï jimbo, arhuta je tiempu parajtsï pauani pauani mintsita jingoni kómarhini Tata Diosï Jeobani. Kʼéri ambe arhi je ka diosmaiamukua arhi je imani ambe jimbo enga újka. Kurhaku je eskaksïni íntskuaka balori parajtsï úni aianhpini ka eskaksïni jarhuataaka orhepani uérakuani uandanhiateechani ka parajtsï no úni imani ambe enga no sési jaka. Ísï jimbo, asï jurajku je eskaksïni ambe ma o nema ójkutaaka parajtsï chá kómarhini Tata Diosï Jeobani. Joperu, ¿néna mókuantasïni ima juchaari kómarhikuechani? Máteru jorhenguarhikua jimbo, exeni jauakachi ini ambe enga xáni jukaparhakueka.
PIREKUA 42 Kómarhikua enga Tata Diosïri marhuari újka
a Iámu mintsita jingonchi uékasïnga kómarhini Tata Diosï Jeobani, ísï enajkichi amiguni ma karta ma karakuni japirini. Joperu no méntkisï fásiliisïndi arhutani tiempu parachi ísï úni ka ménichanchi no jánhaskasïnga ambe uandani. Ini jorhenguarhikua jimbo, exeakachi ambejtsïni uaa jarhuatani parachi úni arhutani tiempu ka parachi exeni ambe engachi uaaka uandani.