Гәләтиялеләргә

6 Кардәшләр, берәү үзе дә абайламыйча ялгыш адым ясаса, сез, рухи яктан җитлеккәннәр, үзегезне юаш тотып, аны төзәтегез. Әмма вәсвәсәгә бирелмәс өчен, һәрберегез үз-үзен күзәтсен. 2 Авырлыкларыгызны күтәрешеп йөрегез һәм шулай эшләп Мәсих канунын үтәгез. 3 Берәрсе, һичкем булмый торып, үзен әллә кемгә санап йөрсә, ул үз-үзен алдый. 4 Ләкин һәркем үз эшләрен сынасын, шул чакта ул үз эшләренә шатланачак. Ул үзен башка берәү белән чагыштырмасын. 5 Чөнки һәркем үз йөген үзе йөртәчәк.

6 Өстәвенә, Аллаһы сүзенә телдән өйрәтелә торган һәркем үзенең бар яхшы нәрсәләрен үз өйрәтүчесе белән уртаклашсын.

7 Алданмагыз: Аллаһыдан көлеп булмый. Кеше ни чәчсә, шуны урыр. 8 Чөнки үзенең гөнаһлы тәне хакына чәчүче черү урыр, ә рух хакына чәчүче рухтан мәңгелек тормыш урыр. 9 Игелек эшләп бирешмик, чөнки хәлсезләнмәсәк, үз вакытында урырбыз. 10 Шуңа күрә, әле мөмкинлегебез булганда, бар кешегә, бигрәк тә имандашларыбызга, игелек эшлик.

11 Карагыз, үз кулым белән сезгә нинди зур хәрефләр белән яздым.

12 Сезне сөннәтле булырга мәҗбүр итүчеләрнең барысы башкаларда яхшы тәэсир калдырырга тели һәм моны Мәсихнең, Гайсәнең, җәфалану баганасы хакына эзәрлекләнмәс өчен эшли. 13 Сөннәткә утыртылганнар үзләре дә Канунны тотмыйлар, ләкин сезнең белән мактаныр өчен, сөннәтле булуыгызны телиләр. 14 Мин исә Хуҗабыз Гайсә Мәсихнең җәфалану баганасыннан башка һичнәрсә белән мактанырга теләмим, аның аша бу дөнья минем өчен шул баганага кадакланып үтерелде, ә мин дөнья өчен кадакланып үтерелдем. 15 Сөннәтнең дә, сөннәтсез булуның да һич әһәмияте юк, яңа зат итеп яратылу әһәмиятле. 16 Шушы тәртип буенча яшәүчеләрнең барысы — Аллаһы Исраиле — тынычлык һәм шәфкать татысын.

17 Моннан ары миңа һичкем авырлык тудырмасын, чөнки тәнемдә Гайсәнең колы булуымны күрсәтүче тамга йөртәм.

18 Кардәшләр, сезгә чагылдырган рухыгыз өчен Хуҗабыз Гайсә Мәсихнең юмарт игелеге күрсәтелсен. Амин.