Хакимнәр
3 Кәнганлылар белән булган сугышларда катнашмаган барлык исраиллеләр сыналсын өчен, Йәһвә мондый халыкларга калырга ирек бирде+ 2 (бу үз аталарына алмашка килгән буын — беркайчан сугышта катнашмаган исраиллеләр — аны татысын өчен эшләнде): 3 филистилеләрнең биш идарәчесе,+ бөтен кәнганлылар, сидонлылар+ һәм Багалхәрму́н тавыннан алып Лебо́-хаматка*+ хәтле Лива́н тауларында+ яшәүче хивлеләр.+ 4 Бу халыклар аркылы Исраи́л Йәһвәнең Муса аша аталарына биргән әмерләренә буйсынырмы, юкмы икәне сыналды.+ 5 Шулай итеп исраиллеләр кәнганлылар,+ хитлеләр, аморлылар, пәризлеләр, хивлеләр һәм йәвүслеләр арасында яшәде. 6 Исраиллеләр аларның кызларын хатынлыкка алды, үз кызларын аларның улларына хатынлыкка бирде һәм аларның илаһларына хезмәт итә башлады.+
7 Исраиллеләр Йәһвә күзендә начар булганны эшләде, алар үзләренең Аллаһысы Йәһвәне онытты, Багалларга+ һәм изге агач баганаларга*+ хезмәт итте. 8 Шуңа күрә Йәһвәнең Исраилгә ачуы кабынды, һәм ул аларны Месопота́мия* патшасы Куша́н-ришәтаи́м кулына бирде.* Исраиллеләр Кушан-ришәтаимгә сигез ел хезмәт итте. 9 Исраиллеләр Йәһвәдән ярдәм сорагач,+ Йәһвә, аларны азат итәр өчен, Кәле́б энесе Кыназның улы Өтнәилне+ коткаручы итеп бирде.+ 10 Аңа Йәһвәнең рухы иңде,+ һәм ул Исраилнең хакиме булып китте. Ул сугышка чыккач, Йәһвә Месопотамия* патшасы Кушан-ришәтаимне аның кулына бирде, һәм ул Кушан-ришәтаимне җиңеп чыкты. 11 Шуннан соң җирдә 40 ел тынычлык* булды. Аннары Кына́з улы Өтнәи́л вафат булды.
12 Исраиллеләр кабат Йәһвә күзендә начар булганны эшли башлады.+ Шунда Йәһвә Моа́б+ патшасы Әгълунга Исраилне җиңеп чыгарга юл куйды, чөнки алар Йәһвә күзендә начар булганны эшләде. 13 Моннан тыш, ул аларга каршы амунлыларны+ һәм амаликлыларны+ китерде. Алар Исраилгә һөҗүм итеп, финик пальмалары шәһәрен+ яулап алды. 14 Исраиллеләр Моаб патшасы Әгълунга 18 ел хезмәт итте.+ 15 Аннары исраиллеләр Йәһвәдән ярдәм сорады.+ Һәм Йәһвә аларга бер биньяминлыны+ — Гайрә́ улы сулагай+ Әһүдне+ коткаручы итеп бирде.+ Бер көнне исраиллеләр аның аша Моаб патшасы Әгълунга ясак җибәрде. 16 Әһү́д исә үзенә бер терсәк* озынлыгында ике ягы да үткен кылыч ясады һәм аны уң яктан биленә кием астына тагып куйды. 17 Ул Моаб патшасы Әгълунга ясак китерде. Әгълу́н исә бик юан кеше иде.
18 Ясакны тапшыргач, Әһүд ясакны алып килгән кешеләрне кайтарып җибәрде. 19 Ә үзе Гилгәлдәге+ потларга* җиткәч, борылып кире килде һәм: «И патша, сиңа яшерен хәбәрем бар иде»,— диде. Шунда патша үз хезмәтчеләренә чыгып китәргә кушты, һәм тегеләре чыгып китте. 20 Шулай итеп, Әһүд үзенең салкынча өске бүлмәсендә берүзе генә утырган патша янына керде. Әһүд: «Сиңа Аллаһыдан хәбәрем бар»,— диде. Шунда тегесе тәхетеннән* күтәрелде. 21 Шулчак Әһүд сул кулы белән уң ягыннан кылычын чыгарып, аның карынына кадады. 22 Ул кылычын аның карыныннан чыгармаганга, кылыч артыннан сабы да кереп китте, май кылычны каплады, һәм патшаның тизәкләре килеп чыкты. 23 Әһүд үзе артыннан өске бүлмәнең ишекләрен ябып бикләде дә балкон* аша чыгып китте. 24 Ул киткәч, хезмәтчеләр килде һәм өске бүлмәнең ишекләре ябык икәнен күрде. Шунда алар: «Ул, күрәсең, салкынча эчке бүлмәдә йомышын башкара»,— диештеләр. 25 Алар, берникадәр вакыт көтеп торгач, тынычсызлана башлады, ләкин аның һаман да өске бүлмәнең ишекләрен ачмаганын күргәч, ачкыч алып ишекне ачтылар һәм, ни күрсеннәр, хуҗалары үле килеш идәндә ята!
26 Әһүд, алар тоткарланган арада, качып китте һәм потларны*+ үтеп, исән-имин Сәирәгә җитте. 27 Ифраимның таулы җиренә+ килеп җиткәч, ул мөгез быргы кычкыртты.+ Исраиллеләр аның җитәкчелегендә таулы җирдән төште. 28 Шунда ул аларга: «Миңа иярегез, чөнки Йәһвә дошманнарыгызны — моаблыларны сезнең кулыгызга бирде»,— диде. Алар аңа иярде һәм, моаблылар кача алмасын өчен, Үрдү́н кичүләрен басып алды һәм беркемгә дә кичеп чыгарга ирек бирмәде. 29 Алар якынча 10 000 моаблыны — көчле һәм кыю кешеләрне харап итте.+ Берсе дә котылмады.+ 30 Шулай итеп, ул көнне Исраил Моабны үзенә буйсындырды. Һәм җирдә 80 ел тынычлык* булды.+
31 Аңардан соң Әна́т улы Сәмига́р+ хаким булды. Ул мал куалый торган очлы таяк+ белән 600 филистилене+ үтерде. Ул да Исраилне коткарды.