1 Патшалар
4 Сөләйман патша бөтен Исраи́л белән идарә итте.+ 2 Җаваплы урыннарда аның кулы астында хезмәт итүчеләр болар иде: Сады́йк+ улы Азария́ — рухани, 3 Шиша́ уллары Әлхәри́ф белән Ахия́ — сәркатипләр,+ Әхилу́т улы Йәһшәфә́т+ — елъязмачы, 4 Йода́й улы Бина́й+ — гаскәр башлыгы, Садыйк белән Әбьятә́р+ — руханилар, 5 Ната́н+ улы Азария — җитәкчеләр өстеннән башлык, Натан улы Зәбу́д — патша дусты*+ һәм рухани, 6 Әхшә́р — патша сарае караучысы, Абда́й улы Адонира́м+ мәҗбүри хезмәткә алынганнар өстеннән башлык иде.+
7 Бөтен Исраил өстеннән Сөләйман 12 җитәкче билгеләде. Алар патшаны һәм аның йортын азык-төлек белән тәэмин итеп торды. Аларның һәрберсе моның өчен елына бер ай җаваплы иде.+ 8 Менә ул җитәкчеләр: Ифраимның таулы җирләрендә — Хур улы; 9 Мака́с, Шагалби́м,+ Бәйтшеме́ш һәм Илу́н-бәйтһананда — Дәке́р улы; 10 Аруботта — Хәсе́д улы (Сохка́ һәм бөтен Хәфә́р җире дә аның карамагында иде); 11 Дорның бөтен калкулыкларында — Абинада́б улы (Сөләйманның кызы Тафитә́ аның хатыны иде); 12 Тагана́к, Мегиддо́+ һәм бөтен Бәйтшеанда (ул Сарета́н янында, Йәзриилдән түбәндәрәк урнашкан), Бәйтшеаннан+ алып Әбелмикалага һәм Йакми́м+ өлкәсенә кадәрге җирләрдә — Әхилут улы Баана́; 13 Раму́т-гиладта+ — Гәби́р улы (Манашше́ улы Йәһирнең+ Гиладтагы+ чатыр авыллар, шулай ук Башандагы+ Әргү́б өлкәсе+ — стеналар белән уратып алынган һәм капкаларында бакыр бикләре булган 60 зур шәһәр аның карамагында иде); 14 Маханаимда+ — Иддә́й улы Әхинәдә́б; 15 Нәфтәли́ җирендә — Ахимаха́с (ул Сөләйманның бүтән кызын — Бәсимәне хатынлыкка алган иде); 16 Әши́р җирендә һәм Биалутта — Хуша́й улы Баана; 17 Иссаха́р җирендә — Фәру́х улы Йәһшәфәт; 18 Биньями́н+ җирендә — Ила́ улы Шимгы́й;+ 19 Гила́д+ җирендә — аморлылар патшасы Сихо́н+ белән Баша́н патшасы Ог+ җирендә — Ури́й улы Гәбир. Илдәге бөтен җитәкчеләр өстеннән бер җитәкче билгеләнгән иде.
20 Яһүд һәм Исраил халкы диңгез буендагы ком бөртекләредәй күпсанлы иде.+ Алар ашап-эчеп һәм күңел ачып гомер итте.+
21 Сөләйман бөек елгадан*+ алып филистилеләр җиренә һәм Мисыр чикләренә кадәр бөтен патшалыклар белән идарә итте. Бу патшалыклар салым түләделәр һәм Сөләйманның үлеменә кадәр аңа хезмәт иттеләр.+
22 Сөләйманның сараендагыларның ашарына көненә 30 кор* иң яхшы он, 60 кор гади он китә иде, 23 моннан тыш 10 симертелгән үгез, көтүлектән китерелгән 20 үгез, 100 сарык, шулай ук боланнар, газәлләр, кыр кәҗәләре һәм симертелгән күкеләр суела иде. 24 Бөек елганың+ бу ягындагы* Типсахтан алып Га́зага+ кадәрге бөтен җирләр, шул исәптән бөек елганың бу ягындагы бөтен патшалар, аның кулы астында иде. Аның бөтен өлкәләрендә, бөтен тирә-ягында тынычлык хөкем сөрде.+ 25 Сөләйманның бөтен көннәрендә Яһүд һәм Исраил иминлектә көн күрде, Даннан алып Бәхи́р-шебага кадәр һәркем үзенең йөзем агачы һәм үзенең инҗир агачы астында утыра иде.
26 Сөләйманның сугыш арбаларына җигелә торган атлары өчен 4 000* араны һәм 12 000 аты* бар иде.+
27 Теге җитәкчеләр, һәрберсе үз аенда, Сөләйман патшаны һәм аның табыныннан ашаучы һәркемне азык-төлек белән тәэмин итеп һәм һәрнәрсәнең җитәрлек булуын кайгыртып тордылар.+ 28 Алар шулай ук җигүле атлар һәм башка атлар өчен кая кирәк булса, шунда арпа белән салам китерделәр. Һәрберсе үзеннән таләп ителгән өлешне китерде.
29 Һәм Аллаһы Сөләйманга иксез-чиксез дәрәҗәдә зирәклек белән төшенүчәнлек һәм диңгез буендагы ком бөртекләредәй күп акыл-зиһен тулы йөрәк бирде.+ 30 Бөтен Көнчыгышта һәм бөтен Мисыр җирендә зирәклектә Сөләйманга тиңнәр юк иде.+ 31 Ул бөтен кешеләрдән, хәтта Зирә́х токымыннан булган Итаннан,+ Мәху́л уллары Хима́н,+ Калку́л+ һәм Дардадан да зирәгрәк иде. Аның даны тирә-яктагы бөтен халыкларга таралды.+ 32 Ул 3 000 гыйбрәтле әйтем+ язды* һәм 1 005 җыр+ иҗат итте. 33 Ул Ливандагы эрбет агачларыннан алып стена буйлап үскән иссопка кадәр төрле-төрле үсемлекләр,+ шулай ук хайваннар,+ кош-кортлар,+ балыклар һәм хәрәкәт итүче башка хайваннар+ турында сөйли иде. 34 Төрле халык кешеләре, шул исәптән Сөләйманның зирәклеге турында ишеткән, җир йөзендәге патшалар, аның зирәклеген тыңларга дип килә иде.+