Кайбер диннәр нәрсәгә өйрәтә?

Индуизм

буенча, газаплар — кешенең бу я үткән тормышта кылган эшләренең нәтиҗәсе. Индуистлар ышануынча, мокша хәленә ирешеп, ягъни яңадан туу циклыннан чыгып, кеше газаплардан арына ала. Моның өчен ул дөньяви нәрсәләр турында уйламаска өйрәнергә тиеш.

Ислам

буенча, газаплар гөнаһлар өчен җәза һәм иман сынавы булып тора. Төньяк Америка ислам җәмгыятенең президенты Саид Саед әйтүенчә, бәла-казалар «безгә Аллаһыга бар фатихаларыбыз өчен рәхмәтле булырга һәм мохтаҗларга ярдәм итәргә кирәклеген искә төшерә».

Иудаизм (яһүд дине)

буенча, кеше газапларны үз эшләре нәтиҗәсендә кичерә. Кайбер яһүдләр үледән терелтелү булачак дип ышана. Шунда элек газап кичергән гаепсез кешеләр гаделлек күрәчәк. Каббалистик иудаизм өйрәтүенчә, реинкарнация кешегә үз хаталарын йолып алыр өчен кабатлана торган мөмкинлекләр бирә.

Буддизм

буенча, кеше, тискәре эшләреннән, хисләреннән һәм нәфесләреннән арынганчы, кат-кат яңадан туып, газаплар кичерәчәк. Зирәклек, игелекле эшләр һәм уй-фикерләрне контрольдә тоту ярдәмендә кеше нирванага — бар газаплардан арыну хәленә ирешә ала.

Конфуцианлык

буенча, күпчелек газаплар «кешенең уңышсызлыгына һәм хаталарына» бәйле («A Dictionary of Comparative Religion»). Газапларны игелекле эшләр кылып киметеп булса да, күп кенә җәфаларны «рухи көчләр китерә, ә алар кешедән куәтлерәк. Шуңа күрә кеше моны чыдамлылык белән кабул итәргә тиеш».

Африкадагы кайбер диннәр

буенча, газаплар сихерчелектән килә. Сихерчеләр уңыш та, бәла дә китерә ала. Төрле йолалар ярдәмендә аларның тәэсирен киметеп була. Шулай итеп, кеше чирдән газапланса, өшкерүче, йолалар үткәреп һәм үз даруларын биреп, сихерченең көченә каршы тора ала.

Христианлык

буенча, газаплар беренче кешеләрнең гөнаһыннан башланган. Моның турында Изге Язмалардагы Яратылыш китабында әйтелә. Ләкин кайбер конфессияләр моңа үз өйрәтүләрен өстәгән. Мәсәлән, католиклар өйрәтүенчә, Аллаһы кешенең газапларын чиркәү файдасына я берәрсенең котылуы хакына куллана ала.