Кайсария

1. Рим театры

2. Патша сарае

3. Ипподром

4. Мәҗүси гыйбадәтханә

5. Гавань

Бу видеороликта Кайсария җимерекләре һәм шулай ук 3D форматта аның кайбер төп биналарының нинди була алганы күрсәтелә. Кайсария шәһәрен һәм андагы гаваньны б. э. к. беренче гасырның ахырына табарак Бөек Һируд төзегән булган. Ул бу шәһәрне кайсар Август хөрмәтенә атаган. Урта диңгез ярында урнашкан Кайсария мөһим үзәк булып киткән. Ул Иерусалимнан төньяк-көнбатышка таба 87 км ераклыкта булган. Шәһәрдә Рим театры (1), диңгезгә таба сузылган патша сарае (2), кайберәүләр уйлаганча, 30 000 кешене сыйдыра алган ипподром, ягъни ат чабышлары өчен стадион (3) һәм мәҗүси гыйбадәтханә (4) булган. Гавань (5) бик оста итеп ясалган булган. Кайсария су белән акведук ярдәмендә тәэмин ителгән, һәм шәһәрдә канализация үткәрелгән булган. Рәсүл Паул һәм башка мәсихчеләр корабта Кайсариягә килгән я корабка утырып аннан киткән (Рс 9:30; 18:21, 22; 21:7, 8, 16). Паул анда якынча ике ел төрмәдә утырган (Рс 24:27). Яхшы хәбәрне таратучы Филип үзенең вәгазь сәяхәтенең ахырында Кайсариягә килеп, бәлки, шунда урнашкандыр (Рс 8:40; 21:8). Мәсихче булып киткән Көрнили — сөннәткә утыртылмаган башка халык кешесе — бу шәһәрдә яшәгән (Рс 10:1, 24, 34, 35, 45—48). Лүк үзенең Яхшы хәбәрен, күрәсең, Кайсариядә язган.