9 КИСӘК
Йәһвәгә гаилә буларак гыйбадәт кылыгыз
«Күкне, җирне... Булдыручыга табыныгыз» (Ачылыш 14:7)
Бу брошюрада инде әйтелгәнчә, Изге Язмаларда сезнең үзегезгә һәм гаиләгезгә булыша алган күп кенә принциплар бар. Йәһвә сезнең бәхетле булуыгызны тели. Аңа хезмәт итү тормышыгызда беренче урында торса «барысы сезгә бирелер» дип әйтә ул (Маттай 6:33). Аның сезне үз дусты итәсе килә. Аның белән дуслыгыгызны ныгытыр өчен һәр мөмкинлекне кулланыгыз. Аның дусты булу — кеше өчен зур хөрмәт (Маттай 22:37, 38).
1 АЛЛАҺЫ БЕЛӘН ДУСЛЫГЫГЫЗНЫ НЫГЫТЫГЫЗ
ИЗГЕ ЯЗМАЛАРНЫҢ КАРАШЫ. «„Мин сезгә ата булырмын, ә сез улларым һәм кызларым булырсыз“,— ди Чиксез Кодрәт Иясе Йәһвә» (2 Көринтлеләргә 6:18). Аллаһының сезне үз дусты итәсе килә. Бу яктан мөһим рольне дога уйный. Йәһвә безне: «Өзлексез дога кылыгыз»,— дип өйрәтә (1 Тисалуникәлеләргә 5:17). Аның сезне борчыган нәрсәләрне һәм уйларыгызны ишетәсе килә (Филипиялеләргә 4:6). Сез гаиләгез белән җыелып дога кылганда, алар сезнең Аллаһы белән мөнәсәбәтләрегезне күрә.
Аллаһы белән сөйләшү дә, аны тыңлау да мөһим. Сез аның Сүзен һәм Изге Язмаларга нигезләнгән басмаларны өйрәнеп аның тавышын тыңлый аласыз (Мәдхия 1:1, 2). Алган белемнәрегез турында уйланыгыз (Мәдхия 76:12, 13). Аның әйткәннәрен ишетер өчен шулай ук регуляр рәвештә мәсихче очрашуларга йөрү мөһим (Мәдхия 121:1—4).
Аллаһы белән дуслыгыгыз аның турында башкаларга сөйләгәндә дә ныгый. Аның турында күбрәк сөйләп аңа тагын да якынрак булып китәсез (Маттай 28:19, 20).
КИҢӘШЛӘР
Изге Язмаларны укыр өчен, дога кылыр өчен һәр көн вакыт бүлеп куегыз
Гаиләгездә беренче урында күңел ачу белән ял итү түгел, ә рухи эшләр торсын
2 ГАИЛӘГЕЗ БЕЛӘН ГЫЙБАДӘТ КЫЛЫГЫЗ
ИЗГЕ ЯЗМАЛАРНЫҢ КАРАШЫ. «Аллаһыга якынлашыгыз, ул да сезгә якынлашыр» (Ягъкуб 4:8). Гаиләгез белән гыйбадәт кылу графигы булсын һәм ул графикны тотыгыз (Яратылыш 18:19). Ләкин бу гына әле әз. Аллаһы көндәлек тормышыгызның өлеше булырга тиеш. Аллаһы «турында иртән торганда да, кичен ятканда да, өегездә утырганда һәм юлда йөргәндә дә сөйләгез», шулай итеп гаиләгезнең Аллаһы белән дуслыгы ныгыр (Канун 6:6, 7). Йошуадан үрнәк алыгыз. Ул: «Мин һәм минем йортым, без, Йәһвәгә хезмәт итәчәкбез»,— дип әйткән (Йошуа 24:15).
КИҢӘШ
Өйрәнүне гаиләгездәге һәр кешенең ихтыяҗларын исәпкә алып планлаштырыгыз