Фәкыйрьләргә өметебез турында сөйлик
1 Җирдә яшәгәндә Гайсә фәкыйрьләргә аерым игътибар биргән. Кайвакыт ул могҗиза эшләп кешеләргә ярдәм иткән һәм авырганнарны сәламәтләндергән, әмма аның төп эше «фәкыйрьләргә Яхшы хәбәр игълан итү» булган (Мат. 11:5). Бүген дә мәсихчеләрнең хезмәте фәкыйрьләргә һәм башка кешеләргә файда китерә (Мат. 24:14; 28:19, 20).
2 Чын өмет. Христиан диненең руханилары фәкыйрь кешеләргә мондый вәгъдә бирә: әгәр чиркәүгә юмарт бирсәгез, бай булып китәчәксез. Әмма, Изге Язмалар буенча, Аллаһы Патшалыгы гына фәкыйрьлекне юк итәчәк һәм кешелекнең бар проблемаларын хәл итәчәк (Мәд. 9:19; 144:16; Ишаг. 65:21—23). Без фәкыйрьләргә Изге Язмаларның хак тәгълиматларын күрсәтеп, аларга үз рухи ихтыяҗларын канәгатьләндерергә булышабыз һәм өмет бирәбез (Мат. 5:3).
3 Гайсә көннәрендә яшәгән фарисейләр фәкыйрьләргә өстән генә караганнар, алар андый кешеләрне мыскыллап ам-хаа́ретс, ягъни «җир кешеләре» дип атаганнар. Әмма Гайсә өчен «аларның каны», ягъни тормышы «кадерле булган» (Мәд. 71:13, 14). Без Гайсәдән үрнәк ала алабыз һәм фәкыйрьләргә карата игелекле һәм кызганучан булып, аларга «мәрхәмәт күрсәтә» алабыз (Гыйб. сүз. 14:31). Ярлы кешеләр турында беркайчан да кимсетеп сөйләмик һәм аларга да вәгазьлик. Гадәттә Патшалык турындагы хәбәрне бай булмаган кешеләр кабул итә.
4 Хәзер булыш. Безнең участоклардагы фәкыйрьләрне Изге Язмалардагы принципларга өйрәтү аларга инде хәзер фәкыйрьлек китергән авырлыкларны киметергә булыша. Мәсәлән, Изге Язмаларда эчкечелек, комарлы уеннар, ялкаулык, тәмәке тарту һәм фәкыйрьлеккә китерүче башка эшләр һәм гадәтләр хөкем ителә (Гыйб. сүз. 6:10, 11; 23:21; 2 Көр. 7:1; Эфес. 5:5). Изге Язмалардагы киңәшләр намуслы булырга һәм «саф күңелдән» эшләргә өйрәтә, а андый эшчеләрне бик кадерлиләр (Көл. 3:22, 23; Евр. 13:18). Чыннан да, үткәрелгән бер сораштыру буенча, күп кенә эшкә алучылар өчен «эшкә урнашучының намуслы һәм тугры булуы аеруча кадерле».
5 Йәһвә фәкыйрьләрнең газапларына ваемсыз түгел. Тиздән Гайсә Мәсих ярдәм сорап дәшүче «ярлыны... коткарыр» (Мәд. 71:12). Ә әлегә безнең башкаларны, шул исәптән фәкыйрьләрне дә, Изге Язмалардагы өмет хәбәрен сөйләп, юатырга мөмкинлек бар.