Дистанцион укуда ничек уңышка ирешергә?

Күп кенә укучылар хәзер башка төрле «класста» — үз өйләрендә укый. Синең очрагыңда шулай булса, андый укудан тулы файда алырга сиңа нәрсә булышыр? Кайбер киңәшләрне карап чыгыйкa.

• Биш киңәш

• Яшьтәшләрең сөйли

Биш киңәш

• График төзе. График буенча яшәргә тырыш, әйтерсең лә син мәктәпкә йөрисең. Дәресләр, өйдәге эшләр һәм башка мөһим нәрсәләр өчен аерым вакыт бүлеп куй. Кирәк булганда, графигыңны үзгәртеп була.

  Изге Язмалардагы принцип: «Барысы килешле һәм тәртипле үтсен» (1 Көринтлеләргә 14:40).

  «Көнеңне мәктәптә укыгандай үткәр. Бар эшләрне үз вакытында тәмамлау мөһим» (Кэти).

  Уйланыр өчен сорау: Ни өчен графикны язып, аны күренекле урынга кую яхшы булыр иде?

• Тәртипкә өйрән. Җитлеккән кеше булып үсәр өчен, сиңа кайвакыт хәтта теләмәгән эшләрне дә башкарырга кирәк. Вакытны сузма!

  Изге Язмалардагы принцип: «Эшчән булыгыз, ялкауланмагыз» (Римлыларга 12:11).

  «Иң авыры — дисциплинаны тоту. Акланыр өчен сәбәпләр табу һәм „мин өй эшемне соңрак ясармын“ дип әйтү җиңел. Ләкин соңрак син моны эшләмисең һәм эшләрең җыела бара» (Александра).

  Уйланыр өчен сорау: Өй эшеңне бер үк урында һәм бер үк вакытта ясау ничек тәртипкә өйрәтә?

• Укыр өчен махсус урын оештыр. Бар кирәклесе кул астында булсын. Бу урын уңайлы булсын, ләкин йоклап китәрлек түгел. Анда син йокларга түгел, ә эшләргә җыенасың. Укыр өчен аерым урының булмаса, син, бәлки, моның өчен кухня я йокы бүлмәсен куллана аласың.

  Изге Язмалардагы принцип: «Тырыш кешенең ниятләре уңышка илтә» (Гыйбрәтле сүзләр 21:5).

  «Туп, уеннар һәм музыкаль коралларны читкә алып куй, телефоныңны тавышсыз режимга күчер. Бернәрсә дә комачауламаска тиеш» (Элизабет).

  Уйланыр өчен сорау: Урының укырга яраклы булсын өчен, син нәрсә үзгәртә аласың?

• Игътибарың читкә юнәлмәсен. Бар игътибарны бер эшкә тупла һәм бер үк вакытта берничә эшне башкарма. Югыйсә, хаталар җибәрүең бар. Нәтиҗәдә, эшне тәмамлар өчен, синең тагы да күбрәк вакытың китәр.

  Изге Язмалардагы принцип: «Вакытны мөмкин кадәр яхшырак кулланыгыз» (Эфеслеләргә 5:16).

  «Телефоным якында булганда, мин бөтен игътибарымны эшкә туплый алмый идем. Мин юк-бар эшләргә күп вакыт сарыф итә идем» (Оливия).

  Уйланыр өчен сорау: Күпме вакыт син, игътибарыңны читкә юнәлтмичә, бер эш белән шөгыльләнә аласың? Бу вакытны әкренләп озынайта аласыңмы?

• Тәнәфесләр яса. Урамда җәяү я велосипедта йөреп ал, күнегүләр яса. Хобби белән шөгыльләнү шулай ук көч өсти ала. Бер китапта мондый киңәш бирелә: «Башта эшеңне эшлә. Тәмамланмаган эшләрең калмаса, ял вакыты күбрәк шатлык китерер» («School Power»).

  Изге Язмалардагы принцип: «Ике уч авыр эш белән җил кууга караганда бер уч ял яхшырак» (Вәгазьче 4:6).

  «Еш кына мәктәптә музыкаль коралда уйнарга я рәсемнәр төшерергә өйрәнеп була. Бу мөмкинлекләр әле булганда, мин нәрсәне кулдан ычкындыруымны аңламый идем. Укудан тыш берәр хобби белән шөгыльләнү яхшы була» (Тейлор).

  Уйланыр өчен сорау: Нинди ял итү төрләре сиңа укыр өчен көч өсти ала?