3:1

сәгать тугызларга: Ягъни көндезге өчләр тирәсенә. (Рс 2:15 кә аңлатманы кара.)

дога кылу вакытына: Гыйбадәтханәдә, күрәсең, иртәнге һәм кичке корбаннар китерелгәндә, догалар әйтелгән булган (Чг 29:38—42; 30:7, 8). Лүк «халык... дога кылган» вакытны «фимиам яндырылган» вакыт белән бәйли (Лк 1:10). Көндәлек корбаннар китерү турында нечкәлекләр әйткәндә, Йәһвә Давыт патшага, руханилар белән левилеләрнең хезмәтләрен оештырырга кушкан: алар Йәһвәне олыларга, мактарга һәм аңа рәхмәтләр белдерергә тиеш булган; бу дан-мактауга һичшиксез дога да кергән (1Ел 16:4; 23:30; 2Ел 29:25, 26). Шуңа күрә фимиам һәм догалар тыгыз бәйле булган (Зб 141:2; Ач 5:8; 8:3, 4). Дога кылу вакытына халык, гадәттә, гыйбадәтханә ишегалдында җыелган. Кайберәүләр ул көнне, күрәсең, руханилар тарафыннан пакьләнер өчен, ә күпләр гыйбадәт кылыр һәм бергәләшеп дога кылыр өчен килгән (Лк 2:22—38). Раввиннарның риваяте буенча, алтын мәзбәхтә фимиам яндырачак руханины жирәбә салып билгеләгәннәр (гадәттә андый хөрмәт гомергә бер тапкыр гына бирелгән). Бу сайланган рухани тантаналы рәвештә Изге урынга кергән, ә руханилар, левилеләр һәм халык ишегалдында дога кылган. Фимиамның хуш исе күтәрелгән чакта, халык якынча ярты сәгать буе тирән тынлыкта дога кылуын дәвам иткән (Лк 1:9, 10). Аннары «дога кылу вакытының» ахырында руханилар халыкны фатихалаган (Сн 6:22—27), һәм левилеләр хоры атнаның шул көненә билгеләнгән мәдхияне җырлаган.