Олы яшьтәге кардәшләр, сез җыелыш өчен кадерле

Сез дә игътибар иткәнсездер, олыгайган саен көчебез кими бара. Йәһвәгә күп еллар тугры хезмәт иткән булсагыз да, хәзер булдыра алганны элек булдыра алганнар белән чагыштырып боегасыздыр. Андый тискәре хисләргә бирелмәскә нәрсә булышыр?

ЙӘҺВӘ СЕЗДӘН НӘРСӘ КӨТӘ

Үзегезгә мондый сорау биреп карагыз: «Йәһвә миннән нәрсә көтә?» 2 Көринтлеләргә 8:12 дә язылган сүзләр сезне юата ала. Анда болай диелә: «Аллаһыны аеруча чын күңелдән бирелгән бүләк сөендерә, чөнки ул кеше булмаганын түгел, ә булганын бирер дип көтә».

Бу шигырьдән күренгәнчә, Йәһвә үзегезнең кулыгыздан килгәнне эшләвегезне тели. Бу фикер сезгә үзегезне башкалар белән чагыштырмаска һәм шулай ук элек башкарганыгызны бүгенгесе белән чагыштырмаска булышыр.

Уйлап карагыз: яшьрәк булганда, сез Йәһвәгә, шул вакыттагы шартларыгызга карап, иң яхшысын биргән булгансыздыр. Әмма хәзер, шартларыгыз үзгәргәч тә, сез Йәһвәгә иң яхшысын бирүегезне дәвам итәсез бит. Әгәр дә моңа бу яктан карасак, бер нәрсә дә үзгәрмәгән булып чыга. Сез Йәһвәгә иң яхшысын үткәндә биргәнсез һәм хәзер дә бирүегезне дәвам итәсез.

СЕЗ БАШКАЛАР ӨЧЕН ФАТИХА БУЛА АЛАСЫЗ

Үз яшегезгә башкачарак карарга тырышыгыз. Яшегез нинди чикләр куйганына түгел, ә нинди мөмкинлекләр ачканына игътибар итеп карагыз. Сез хәзер яшь вакытта булдыра алмаганны башкара аласыз бит. Шундый мөмкинлекләрнең берсенә игътибар итик.

Үз тәҗрибәгез белән уртаклашыгыз. Аллаһы хезмәтчеләренең биредәге сүзләре турында уйлап карагыз.

Давыт патша: «Мин яшь идем һәм менә картайдым, ләкин Аллаһының бер тәкъва кешене калдырганын да, аның балаларының икмәк соранып йөргәнен дә күрмәдем» (Зәб. 37:25).

Йошуа: «Менә, тиздән мин үләм. Аллаһыгыз Йәһвә биргән бөтен яхшы вәгъдәләрнең бер сүзе дә үтәлми калмады, сез моны бөтен йөрәгегез һәм бөтен җаныгыз белән бик яхшы беләсез. Сезнең өчен алар бөтенесе үтәлде. Аларның берсе дә үтәлми калмады» (Йош. 23:14).

Давыт һәм Йошуа Йәһвәгә күп еллар хезмәт иткән. Алар зур тормыш тәҗрибәсе җыйганнар. Бу аларның сүзләренә ышаныч өстәгән.

Әгәр Аллаһыга күп еллар хезмәт итәсез икән, сез дә Йәһвәнең үзегез өчен һәм кардәшләр өчен башкарган күп яхшы эшләре турында сөйли аласыз. Сезнең яратып искә төшергән хатирәләрегез бардыр: сез Йәһвәнең үз халкына фатихалар яудырганын күргәнсездер. Моның турында башкаларга рәхәтләнеп сөйләгез. Бу кардәшләрне генә түгел, ә үзегезне дә дәртләндерер (Рим. 1:11, 12).

Башкаларны ныгытыр өчен тагын бер чара — мөмкин булганча Патшалык Залына җыелыш очрашуларына килү. Бу үзегезгә дә, башкаларга да көч өстәр. Мәкалә башында искә алынган Конни кардәш болай ди: «Очрашулар миңа боекмаска ярдәм итә. Патшалык Залында шулкадәр күп ярату күргәндә, ничек инде мин боегып утырыйм?! Мин кардәшләргә бик рәхмәтлемен һәм аларга кечкенә бүләкләр бирергә тырышам. Алга таба да кардәшләр белән бергә җыелыш эшләрендә катнашасым килә!»

ЙӘҺВӘ ТУГРЫ ХЕЗМӘТЕГЕЗНЕ КАДЕРЛИ

Изге Язмаларда Йәһвә яраткан, әмма аның өчен теләгән кадәр эшли алмаган күп кешеләр турында әйтелә. Шимон мисалын искә төшерик. Гайсә туганда, ул инде бик карт булган. Гыйбадәтханәгә килгәндә, Шимон мөһим эшләр башкарып йөргән яшь кешеләрне күргәндер. Бәлки, ул үзен файдасыз дип санагандыр, чөнки яшьләр кебек Аллаһы өчен күпне эшли алмаган. Әмма Йәһвә Шимонга бөтенләй башкача караган: ул аны «тәкъва һәм диндар бер кеше» дип санаган. Йәһвә аны фатихалаган: Шимон Гайсәнең сабый чагын күрә алган. Моннан тыш, Аллаһы Шимон аша Гайсәнең вәгъдә ителгән Мәсих булачагын пәйгамбәрлек иткән! (Лүк 2:25—35) Һичшиксез, аңарда изге рух булган. Йәһвә өчен Шимонның нык сәламәтлеге түгел, ә нык иманы мөһимрәк булган.

Һич тә шикләнмәгез: мөмкинлекләрегез чикле булса да, Йәһвә сезнең дә хезмәтегезне кадерли. Йәһвә «кеше булмаганын түгел, ә булганын» биргәндә сөенә. Андый корбаннар аның өчен бик кыйммәтле (2 Көр. 8:12).

Шуңа күрә игътибарыгызны булдыра алган нәрсәләргә туплагыз. Уйлап карагыз, хезмәтнең кайсы төрләрендә сез әле дә, бераз булса да, катнаша аласыз. Бәлки, сез башкаларны ныгыта алырсыз. Мәсәлән, кемгәдер шалтыратып я открытка язып була. Шундый кечкенә эшләр дә имандашларыбызны бик дәртләндерә ала, бигрәк тә Йәһвәгә күптән хезмәт иткән кеше моны эшләсә.

Сәламәтлек белән авырлыклар булса да, Йәһвәгә шатлык белән хезмәт итеп була. Бу Көнчыгыш Африкада булган бер очрактан күренә. Моның турында «Бу аның тормышын коткарган» дигән рамкада язылган.

Онытмагыз, сезнең иманыгыз һәм тугрылыгыгыз башкаларны рухландыра ала. Сез аларны бирешмәскә дәртләндерә аласыз. Шикләнмәгез, «Аллаһы гаделсез түгел: ул сезнең башкарган эшегезне дә, изгеләргә хезмәт итеп һәм шул хезмәтегезне дәвам итеп, аның исеменә күрсәткән мәхәббәтегезне дә онытмаячак» (Евр. 6:10).

КУЛЫГЫЗДАН КИЛГӘННЕ ЭШЛӘВЕГЕЗНЕ ДӘВАМ ИТЕГЕЗ

Тикшерүләр күрсәткәнчә, башкаларга ярдәм итүче олылар, гадәттә, үзләрен яхшырак хис итә, ачык зиһенле була һәм озаграк яши.

Әлбәттә, игелекле эшләр картаюны туктата алмый. Аллаһы Патшалыгы гына картлыкның һәм үлемнең төп сәбәбен — Адәмнән мирас итеп алынган камилсезлекне юк итәчәк (Рим. 5:12).

Шулай да Йәһвәгә хезмәт итү өметегезне нык килеш сакларга ярдәм итәр һәм, бәлки, сәламәтлегегезгә дә уңай яктан тәэсир итәр. Кадерле олы яшьтәгеләр, шуны онытмагызчы: Йәһвә хезмәттә башкарган һәр эшегезне кадерли. Сезнең иманыгыз — җыелыш өчен чын фатиха.