Julayi

Vyose ivyo Yesu wakachita na kuyowoya—kusazgapo minthondwe iyo wakachita—wakayezga mwakufikapo Awiske umo ŵakughanaghanira na kujipulikira. (Yoh. 14:9) Kasi tingasambirako vichi ku minthondwe iyo Yesu wakachita? Yesu na Awiske ŵakutitemwa chomene. Apo Yesu wakaŵa pa charu chapasi, wakalongora kuti ŵanthu wakuŵatemwa chomene, pakugwiliskira ntchito nkhongono zake zakuzizwiska kuti wawovwire awo ŵakasuzgikanga. Pa nyengo yinyake, ŵanalume ŵaŵiri ŵachibulumutira ŵakachemerezga kuti waŵawovwire. (Mat. 20:​30-34) Wonani kuti Yesu “wakachita chitima” ndipo pamanyuma wakaŵachizga. Pa lemba ili, verebu Lachigiriki ilo lili kung’anamulika kuti “wakachita chitima,” likung’anamura kumulengera munthu lusungu kufumira pasi pamtima. Yesu pakuŵalengera lusungu ŵanthu wakalongora kuti wakuŵatemwa chomene, ndipo ivi ndivyo vikamuchiskaso kuti walyeske ŵanthu ŵanjara kweniso kuchizga ŵavyoni. (Mat. 15:32; Mrk. 1:41) Tili na chigomezgo chose kuti Yehova, Chiuta ‘walusungu,’ kweniso Mwana wake, ŵakutitemwa chomene ndipo nawo vikuŵaŵinya para tikusuzgika. (Luka 1:78; 1 Pet. 5:7) Iwo mbakukhumbisiska chomene kuwuskapo masuzgo ghose agho taŵanthu tikusuzgika nagho. w23.04 3 ¶4-5

Tiyezgeyezgenge kuchita vyose ivyo tingafiska kuti tigege kuŵazga na kutegherezga vinthu vyawakawaka ivyo vyazara mu charu cha Satana ichi. Tingazuzga maghanoghano ghithu na vinthu viwemi para tikuŵazga na kusambira Baibolo. Kuwungana kweniso kupharazga kungatovwiraso kuvikilira maghanoghano ghithu. Ndipo Yehova wakutilayizga kuti wazomerezgenge yayi kuti tiyezgeke kujumpha icho tingazizipizga. (1 Kor. 10:​12, 13) Waliyose wa ise wakukhumbikwira kulomba chomene kuluska kumasinda kose kuti walutilire kugomezgeka kwa Yehova mu mazuŵa ghaumaliro agha. Yehova wakukhumba kuti ‘tipungulirenge mitima yithu’ kwa iyo mu lurombo. (Sal. 62:8) Mulumbani Yehova na kumuwonga pa vyose ivyo wakuchita. Mulombani kuti wamovwirani kuŵa na chikanga mu uteŵeti. Muŵeyelerani kuti wamovwirani kulimbana na suzgo lililose na kugega chiyezgo chilichose icho mungakumana nacho. Mungazomerezganga chilichose yayi panji waliyose kumutondeskani kulomba kwa Yehova nyengo zose. w23.05 7 ¶17-18

Chifukwa wuli tikusangikapo pa maungano gha mpingo? Chifukwa chakwamba ntchakuti tisope Yehova. (Sal. 26:12; 111:1) Chinyake ntchakuti tikukhumba kukhozgana yumoza na munyake mu nyengo zakusuzga izi. (1 Tes. 5:11) Para tikuzgorapo pa maungano, ndikuti tikuchita vyose viŵiri ivi. Kweni pangaŵa masuzgo ghanyake agho ghangatitondeska kuzgorapo. Masuzgo nga, kuchita wofi, panji nyengo zinyake mubali uyo wakuchitiska wakutiwuska yayi nangauli tingawuska woko kanandi waka. Kasi tingachita wuli para vili nthena? Mpositole Paulosi wakayowoya kuti tiŵikengepo mtima “kuchiskana yumoza na munyake.” Para tamanya kuti ŵanji mu mpingo ŵangakhozgeka na zgoro lithu nanga lingaŵa lipusu waka, tichitenge wofi chomene yayi kuzgorapo. Para kanandi ŵakutiwuska yayi, tikondwenge chifukwa chakuti ŵanyithu ŵapika mwaŵi wakuzgorapo.—1 Pet. 3:8. w23.04 20 ¶1-3

Themba likapharazga ndipo Ŵayuda awo ŵakaŵa ŵazga ku Babuloni kwa vyaka 70, ŵakafwatuka kuti ŵangaweleraso ku charu chawo cha Israyeli. (Ezir. 1:​2-4) Yehova pera ndiyo wangafiska kuchita nthena. Ŵababuloni ŵakafumiskanga bweka yayi ŵazga ŵawo. (Yes. 14:​4, 17) Kweni Babuloni wakathereskeka, ndipo fumu yiphya yikaphalira Ŵayuda kuti ŵangawelera ku charu chawo. Muyuda waliyose payekha, chomene mitu ya mbumba yikeneranga kusankha kukhala ku Babuloni panji kuwelera kwawo. Kweni chikaŵa chipusu yayi kusankha pa nkhani iyi. Ŵanandi ŵakwenera kuti ŵakaŵa ŵachekuru chomene panyengo iyi. Kweniso pakuti Ŵayuda ŵanandi ŵakaŵa kuti ŵababikira ku Babuloni, ku Babuloni ndiko kukaŵa nga ntchikaya waka chawo. Ŵakawonanga kuti ku Israyeli nkhukaya kwawo yayi, kweni nkhwa ŵapapi ŵawo. Ŵayuda ŵanyake ŵakwenera kuti ŵakaŵa ŵasambazi ku Babuloni, ntheura chikaŵa chakusuzga kuti ŵaleke umoyo wawofuwofu panji bizinesi yawo na kukakhala ku malo ghakuti ŵandaghazgoŵere. w23.05 14 ¶1-2

Mazgu gha Chiuta ghakutichiska kuti tilutilire kuŵa na mikhaliro nga nkhuzizipizga, chiwuravi, na chitemwa. Lemba la Luka 21:19 likuti: “Para muzamuzizipizga, muzamusungilira umoyo winu.” Lemba la Ŵakolose 3:12 likuti: “Vwarani mtima wa chiwuravi.” Ndipo lemba la 1 Ŵatesalonika 4:​9, 10 likuti: “Imwe mukusambizgika na Chiuta kuti mutemwanenge. . . . Kweni tikumuchiskani ŵabali, kuti mulutilire kuchita ichi mwakukwana.” Malemba ghose agha ghakalutanga ku ŵasambiri awo ŵakaŵa kuti ŵalongora kale kuzizipizga, chiwuravi, na chitemwa. Vili nthena chifukwa ŵakeneranga kulutilira kulongora mikhaliro iyi. Nase ndimo tikwenera kuchitira. Kweni kuti tichite nthena, tikwenera kughanaghanira umo Ŵakhristu ŵakwambilira ŵakalongolera mikhaliro iyi. Kufuma apo tighanaghanire umo tingaŵayezgera ŵasambiri aŵa, na kulongora kuti tanozgekera nadi suzgo yikuru. Ntheura para suzgo yikuru yazakamba, muzamuŵa kuti mwasambira umo mungazizipizgira, kweniso muzamuŵikapo mtima kulutilira kuzizipizga. w23.07 3 ¶4, 8

Kwali ndise ŵakuphakazgika panji ŵamberere zinyake, tikwenera kukhalilira pa “Nthowa Yakupatulika.” Nthowa iyi yitovwirenge kulutilira kusopa Yehova sono kweniso munthazi apo Ufumu wa Chiuta uzamwiza na vitumbiko vinandi pa charu chapasi. (Yoh. 10:16) Kwambira waka mu 1919 C.E., ŵanalume, ŵanakazi na ŵana mamiliyoni ghanandi ŵali kufumamo mu Babuloni Mukuru, nyinawo wa chisopa chautesi pa charu chose, ndipo ŵali kwamba kwenda pa nthowa yakuyelezgera. Ŵayuda ŵakati ŵakafuma ku Babuloni, Yehova wakawoneseska kuti vyakujandizga vyafumamo mu nthowa. (Yes. 57:14) Wuli pakuyowoya za “Nthowa Yakupatulika” ya mazuŵa ghano? Kwa vyaka vinandi chomene pambere chaka cha 1919 chindafike, Yehova wakamba kugwiliskira ntchito ŵanalume awo ŵakamopanga kuti ŵawovwirepo pakunozga nthowa yakuwukiramo mu Babuloni Mukuru. (Yaniskani na Yesaya 40:3.) Ŵakachita mulimo wakuzirwa chomene, mulimo wakunozga nthowa yauzimu, mwakuti viŵe vyamachitiko kuti pamanyuma ŵanthu ŵamitima yiwemi ŵafumemo mu Babuloni Mukuru na kunjira mu paradiso wauzimu, umo kusopa kutuŵa kuli kuwezgekeramo. w23.05 15-16 ¶8-9

Yehova wakukhumba kuti timuteŵeterenge mwakukondwa kweniso mwambura kuchichizgika. (2 Kor. 9:7) Ipo kasi tikwenera kulutilira kuchitapo kanthu kuti tifiske chilato chithu uku tilije khumbo? Ghanaghanirani ivyo vikachitikira mpositole Paulosi. Iyo wakayowoya kuti: “Nkhutchaya thupi lane ndipo nkhulilongozga nga ni muzga.” (1 Kor. 9:​25-27) Paulosi wakajichichizganga kuchita icho ntchiwemi kwa Yehova nanga mphanyengo iyo mtima wake ukukhumba kuchita vyakupambanako. Kasi Yehova wakakondwanga navyo ivyo Paulosi wakachitanga? Enya. Nakuti Yehova wakamupa njombe chifukwa cha kulimbikira kwake. (2 Tim. 4:​7, 8) Mwakuyana waka, Yehova wakukondwa chomene para wakuwona kuti tikuyezgayezga kufiska chilato chinyake nanga vingaŵa kuti khumbo lakuti tifiske chilato icho lachepa. Iyo wakukondwa chifukwa wakumanya kuti nangauli chilato icho tajiŵikira tikuchitemwa viŵi yayi, kweni tikuchita chifukwa chakuti tikumutemwa. Nga umo Yehova wakatumbikira Paulosi, nase watitumbikenge chifukwa cha kuyezgayezga kwithu. (Sal. 126:5) Para tamba kuwona kuti Yehova wakutitumbika, tambenge kutemwa ivyo tikuchita. w23.05 29 ¶9-10

Mpositole Paulosi wakayaniska ŵanthu awo ŵazamuparanyika pa zuŵa la Yehova na ŵanthu awo ŵakugona tulo. Ŵanthu awo ŵagona tulo ŵakumanya yayi ivyo vikuchitika pafupi nawo kweniso umo nyengo yikwendera. Ntheura ŵakumanya yayi para vinthu vinyake vyakuzirwa vikuchitika ndipo ŵangachitapo kanthu yayi. Ŵanthu ŵanandi mazuŵa ghano ŵali mu tulo twauzimu. (Rom. 11:8) Iwo ŵakugomezga yayi kuti tili mu “mazuŵa ghaumaliro” kweniso kuti suzgo yikuru yili pafupi, nangauli pali vimanyikwiro vinandi. (2 Pet. 3:​3, 4) Kweni ise tikumanya kuti zuŵa lililose tikwenera kuŵa ŵakunozgeka. (1 Tes. 5:6) Ntheura tikwenera kuŵa ŵakuzika na ŵakunozgeka. Chifukwa wuli? Kuti tileke kunjilirapo pa vya charu, panji vya ndyali. Apo zuŵa la Yehova likusendelera, tichichizgikenge chomene kuti titoremo chigaŵa mu vinthu ivi. Ndipouli, tikwenera yayi kopa umo tizamuzgolera pa nyengo iyo. Mzimu wa Chiuta uzamutovwira kuŵa ŵakuzikira kweniso kunozgeka mu maghanoghano kuti tichite vinthu mwamahara.—Luka 12:​11, 12. w23.06 10 ¶6-7

Kasi ntchivichi chikwiza mu maghanoghano ghinu para mwapulika zina lakuti Samusoni? Mukwenera kuti mukughanaghanira za munthu uyo wakaŵa na nkhongono chomene. Uwu mbunenesko. Kweni Samusoni wakasankha vinthu mwambura mahara ivyo vikapangiska kuti wanjire mu suzgo. Ndipouli, Yehova wakaŵika waka mtima pa vyose ivyo Samusoni wakachita pakumuteŵetera. Lekani Chiuta wakazomerezga kuti nkhani ya Samusoni yilembeke mu Baibolo kuti tisange nayo chandulo. Yehova wakamugwiliskira ntchito Samusoni pakuchita vinthu vyakuzizwiska kuti wawovwire ŵanthu ŵake ŵakusoleka, Ŵaisrayeli. Vyaka vinandi vikati vyajumphapo Samusoni wati wafwa, Yehova wakakhuŵilizga mpositole Paulosi kumusazgapo Samusoni pa mazina gha ŵanthu awo ŵakaŵa na chipulikano chikuru. (Heb. 11:​32-34) Chiyelezgero cha Samusoni chingatikhozga. Wakathemba Yehova, nanga mphanyengo yakusuzga chomene. Nase tingasambirako vinthu vinandi kwa Samusoni. w23.09 2 ¶1-2

Tingalutilira kuzizipizga para nyengo zose tikufwilirapo kulomba kwa Yehova na kumuphalira vyose ivyo vili mu mtima withu. (1 Tes. 5:17) Nyengo zinyake pasono mukusangana na viyezgo vyakofya viŵi yayi. Kweni kasi mukupenja wovwiri kufuma kwa Yehova kuti wamovwirani para mwakhuŵara, mwatimbanizgika panji mwasoŵa chakuchita pa nkhani yinyake? Usange nyengo zose mukulomba kwa Yehova kuti wamovwirani pa tumasuzgo tuchokotuchoko uto mukusangana nato pasono, chizamuŵaso chipusu kulomba para munthazi mwazakakumana na masuzgo ghakuru. Para muchitenge nthena, muŵenge na chigomezgo chose kuti Chiuta wakumanya nyengo yakwenelera iyo wangamovwilirani. (Sal. 27:​1, 3) Tingazakazizipizga suzgo yikuru, para pasono tikuzizipizga masuzgo agho tikukumana nagho. (Rom. 5:3) Chifukwa wuli tikuyowoya nthena? Ŵabali ŵanandi ŵawona kuti nyengo yiliyose para ŵazizipizga chiyezgo chinonono, vikuŵawovwira kuti ŵazizipizge chiyezgo chakulondezgapo icho ŵasangana nacho. Para ŵazizipizga suzgo na wovwiri wa Yehova, ŵakuŵa na chigomezgo chose kuti Yehova ngwakunozgeka na wakukhumbisiska kuŵawovwira. Chifukwa cha kuŵa na chipulikano mwa Yehova, vikuŵawovwira kuzizipizga chiyezgo chakulondezgapo.—Yak. 1:​2-4. w23.07 3 ¶7-8

Yehova ngwakujiyuyura kweniso ngwachiwuravi lekani wakuchita vinthu mwamahara. Mwachiyelezgero, Yehova wakalongora kuti ngwakujiyuyura chomene apo wakaŵa kuti wakhala pachoko kuparanya ŵanthu ŵaheni mu Sodomu. Kwizira mu ŵangelo ŵake, Yehova wakalangura munthu murunji Loti kuti wachimbilire ku chigaŵa cha mapiri. Kweni Loti wakawopa chomene kulutako. Ndipo wakaŵeyelera Yehova kuti iyo na mbumba yake ŵachimbilire ku Zowari, tawuni yichoko iyo nayo Yehova wakakhumbanga kuyiparanya. Yehova wakhumbenge mphanyi wakaphalira Loti kuti walondezge waka vyose ivyo wakaphalirika. Ndipouli, iyo wakazomerezga ivyo Loti wakapempha, nangauli kuchita nthena kukapangiskaso kuti Yehova wasinthe chilato chake cha kuparanya tawuni ya Zowari. (Gen. 19:​18-22) Nyengo yati yajumphapo, Yehova wakalongoraso chiwuravi ku ŵanthu awo ŵakakhalanga mu Nineve. Wakatuma ntchimi Yona kuti yikapharazge za kuparanyika kwa msumba wa Nineve kusazgapo na ŵanthu ŵaheni. Kweni ŵanthu ŵa mu Nineve ŵati ŵapera, Yehova wakaŵalengera lusungu ndipo wakaparanya yayi msumba uwu.—Yona 3:​1, 10; 4:​10, 11. w23.07 21 ¶5

Kasi tikusambirapo vichi pa umo Yehowashi wakachitira? Yehowashi wakaŵa nga ni khuni ilo misisi yake njambura kujintha pasi ndipo likukholera waka makuni ghanyake. Yehoyada uyo wakamovwiranga Yehowashi wati wafwa, Yehowashi wakamba kutegherezga ku visambizgo vya ŵachigaluka, wakaleka kuŵa wakugomezgeka kwa Yehova. Chiyelezgero ichi chikulongora kuti tikwenera yayi kupulikira Chiuta chifukwa cha kulondezga waka ŵamumbumba yithu kweniso ŵanji mu mpingo. Kuti tilutilire kuŵa paubwezi wakukhora na Yehova, tikwenera kukhozga chitemwa chithu kwa iyo kweniso kumuchindika chomene mwakusambira mazgu gha Chiuta nyengo zose, kughanaghanirapo, na kulomba. (Yer. 17:​7, 8; Kol. 2:​6, 7) Yehova wakukhumba vinandi yayi kwa ise. Ivyo wakukhumba, ni ivyo vili pa Mupharazgi 12:​13, apo pakuti: “Wopenge Chiuta waunenesko na kusunga malango ghake, pakuti ichi ndicho munthu wakwenera kuchita.” Para tikopa Chiuta, tilutilirenge kuŵa ŵakugomezgeka kwa iyo. Nanga tingakumana na viyezgo wuli munthazi palije icho chizamutimbanizga ubwezi withu na Yehova. w23.06 19 ¶17-19

Vesi 5 likwamba na mazgu ghakuti: “Uyo wakakhala pa chitengo wakati.” (Chivu. 21:5a) Mazgu agha ngapadera chifukwa ngamoza mwa mazgu agho ghakuyowoyeka nyengo zitatu mu buku la Chivumbuzi apo Yehova wakayowoya yekha kwizira mu mboniwoni. Ntheura uyo wakayowoya mazgu agha ni mungelo yayi panji Yesu uyo wakawuskika, kweni ni Yehova! Mazgu agha ghakutipa chifukwa chakukwana chakugomezgera fundo iyo yili mu mazgu ghakulondezgapo gha mu vesi ili. Chifukwa wuli tikuyowoya nthena? Chifukwa ntchakuti Yehova “wakuteta yayi.” (Tito 1:2) Mazgu agha ghakupangiska kuti tigomezgenge chomene ivyo tikuŵazga pa Chivumbuzi 21:​5, 6 kuti ni vyaunenesko. Ghanaghanirani mazgu ghakuti “Wonani!” Lizgu la Chigiriki ilo lili kung’anamulika kuti “wonani!” likugwiliskirika ntchito kanandi waka mu buku la Chivumbuzi. Kasi Chiuta wakayowoyaso vichi kufuma apo? Iyo wakati: “Nkhupanga vinthu vyose kuŵa viphya.” Mbunenesko kuti apa Yehova wakuyowoya vyakunthazi, kweni pakuti kwa iyo layizgo ili lizamufiskika nadi, lekani wakuyowoya nga wambapo kale kuchita.—Yes. 46:10. w23.11 3-4 ¶7-8

Mpositole Petrosi wakasuzgika na suzgo lake. Wonani viyelezgero vichoko waka ivi. Apo Yesu wakalongosoranga umo wasuzgikirenge na kufwa pakufiska uchimi wa mu Baibolo, Petrosi wakamba kumususka Yesu. (Mrk. 8:​31-33) Kweniso mwakuwerezgawerezga, Petrosi na ŵapositole ŵanyake ŵakagazgananga vya uyo ni mukuru pakati pawo. (Mrk. 9:​33, 34) Pa usiku wakuti machero Yesu wakomekenge, Petrosi wakadumura khutu mwanalume munyake. (Yoh. 18:10) Pa usiku wenewuwu uwu, Petrosi wakawopa chomene ŵanthu ndipo wakamukana Yesu katatu kuti wakumumanya yayi. (Mrk. 14:​66-72) Ivi vikapangiska kuti Petrosi walire chomene. Yesu wakamukana yayi mpositole wake uyu, uyo wakagongowa chomene. Yesu wati wawuskika, wakamupaso mwaŵi Petrosi kuti walongore kuti wakumutemwa. Yesu wakaphalira Petrosi kuti waliskenge mberere zake, ndipo wachitenge nthena mwakujiyuyura. (Yoh. 21:​15-17) Petrosi wakapulikira ivyo Yesu wakamuphalira. Iyo wakaŵa ku Yerusalemu pa zuŵa la Pentekoste ndipo wakaŵa yumoza wa ŵanthu ŵakwamba kuphakazgika na mzimu utuŵa. w23.09 22 ¶6-7

Mpositole Petrosi wakachiska ŵalara kuti ŵakwenera ‘kuliska mskambo wa Chiuta.’ (1 Pet. 5:​1-4.) Para ndimwe mubali mulara, tikumanya kuti mukuŵatemwa ŵabali na ŵadumbu ndipo mukukhumba kuŵaliska. Ndipouli, nyengo zinyake mungajiwona kuti ndimwe ŵakutangwanika chomene panji ŵakuvuka chomene mwakuti mungafiska yayi kuchita mulimo uwu. Kasi mukwenera kuchita wuli? Muphalirani Yehova umo mukujipulikira. Petrosi wakalemba kuti: “Usange munyake wakuteŵeta, pakuteŵeta wagomezgenge nkhongono izo Chiuta wakupeleka.” (1 Pet. 4:11) Ŵabali na ŵadumbu ŵinu ŵangaŵa kuti ŵakukumana na masuzgo agho ghangamazgikirathu yayi mu charu ichi. Kweni manyani kuti “muliska mukuru,” Yesu Khristu, wangaŵawovwira makora kuluska waliyose. Iyo wangaŵawovwira sono kweniso na mu charu chiphya wuwo. Icho Yehova wakukhumba kuti ŵalara ŵachitenge ndicho kutemwa ŵabali na ŵadumbu, kuŵaliska, kweniso kuŵa “vyakuwonerapo ku mskambo.” w23.09 29-30 ¶13-14

Tikwenera kugega kugwiliskira ntchito vinjeru vya charu. Para tingamba kuwona vinthu nga umo ŵanthu ŵa mu charu ichi ŵakuwonera, tingamba kusulako Yehova na malango ghake. (1 Kor. 3:19) “Vinjeru vya charu ichi,” kanandi vikupangiska ŵanthu kuleka kupulikira Chiuta. Ŵakhristu ŵachoko waka ŵa mu mpingo wa Peregamo na Tiyatira ŵakatolerako mikhaliro ya ŵanthu awo ŵakaŵazingilizga awo ŵakachitanga uzaghali na kusopa vikozgo. Yesu wakapeleka ulongozgi wankhongono ku mipingo yose yiŵiri iyi chifukwa cha kulekelera uzaghali. (Chivu. 2:​14, 20) Nase mazuŵa ghano, ŵanthu awo ŵatizingilizga ŵangatipangiska kuti titolereko nkharo zawo ziheni. Ŵamumbumba yithu kweniso ŵabwezi ŵithu ŵangayezga kutikopa kuti tiswe malango gha Yehova. Mwachiyelezgero, ŵangatiphalira kuti palije suzgo kuchita ivyo ise tikukhumba ndipo fundo za mu Baibolo za makhaliro ghawemi zili kutchujuka. Nyengo zinyake tingamba kughanaghana kuti ulongozgi uwo Yehova wakutipa ngwambura kupulikikwa makora. Ntheura tingayezgeka kuti ‘tijumphe vinthu ivyo vili kulembeka.’—1 Kor. 4:6.w23. 07 16 ¶10-11

Mariya mama wa Yesu wakakhumbikwiranga nkhongono kuti wachite khumbo la Yehova. Wakaŵa kuti wandatengwe; kweni wakaŵa kuti waŵenge na nthumbo. Wakaŵa kuti wandalerepo mwana, kweni wakakhumbikwiranga kuzakapwelelera mwana uyo wazamuŵa Mesiya. Kweniso wakaŵa kuti wandagonanepo na mwanalume, kweni wakakhumbikwiranga kumuphalira Yosefe kuti wali na nthumbo. (Luka 1:​26-33) Kasi Mariya wakapokera wuli nkhongono izo wakakhumbikwiranga? Wakapempha ŵanji kuti ŵamovwire. Mwachiyelezgero, wakafumba mungelo Gabriyeli kuti wamuphalire fundo zakusazgikira zakukhwaskana na mulimo wake. (Luka 1:34) Kufuma apo, “wakaluta mu charu cha mapiri” gha Yuda kukawona mubali wake Elizabeti. Elizabeti wakamuwonga chomene Mariya, kweniso mwakovwirika na Yehova wakamuphalira Mariya uchimi wakukhozga wakukhwaskana na mwana uyo wazamubaba. (Luka 1:​39-45) Mariya wakati Yehova “wachita milimo yankhongono na woko lake.” (Luka 1:​46-51) Yehova wakamukhozga Mariya kwizira mwa Gabriyeli na Elizabeti. w23.10 14-15 ¶10-12

Ŵasambiri ŵa Khristu ŵachoko waka ndiwo ŵakuphakazgika na mzimu utuŵa, ndipo ŵakuŵa paubwezi wapadera na Yehova. Ŵa 144,000 aŵa ŵamuteŵetera nga mbasembe kuchanya pamoza na Yesu. (Chivu. 14:1) Malo Ghatuŵa gha mu chihema ghakwimira kuti ŵakuphakazgika ŵakuzgoreka kuŵa ŵana ŵauzimu apo ŵachali pa charu chapasi. (Rom. 8:​15-17) Malo Ghatuŵa Chomene gha mu chihema ghakwimira kuchanya, uko Yehova wakukhala. “Katani” iyo yikupatura Malo Ghatuŵa na Malo Ghatuŵa Chomene yikwimira thupi la Yesu lanyama ilo likaŵa chakujandizga kuti wanjire kuchanya pakuŵa Wasembe Mukuru wa tempile lauzimu. Yesu pakupeleka thupi lake kuŵa sembe yakuwombolera ŵanthu, wakajulira nthowa Ŵakhristu wose ŵakuphakazgika kuŵa na umoyo wakuchanya. Nawo ŵakwenera kughaleka mathupi ghawo gha nyama mwakuti ŵapokere njombe yawo yakuchanya.—Heb. 10:​19, 20; 1 Kor. 15:50 w23.10 28 ¶13

Gidiyoni wakalongora mtima wakuzika apo Ŵaefurayimu ŵakamukalipiranga. (Ŵeru. 8:​1-3) Iyo wakaŵazgora mwaukali yayi. Wakalongora kujiyuyura pa kuŵategherezga Ŵaefurayimu pa ivyo ŵakadandawuranga, kweniso wakaŵazgora mwantchindi. Ivi vikapangiska kuti ŵatune. Ŵalara ŵakujiyuyura ndimo nawo ŵakuchitira, ŵakuyezga Gidiyoni pakuŵa ŵategherezgi ŵawemi kweniso kuzgora mwakuzika para ŵanji ŵakuŵasuska. (Yak. 3:13) Ntheura mu mpingo mukuŵa mtende. Apo ŵanji ŵakamulumbanga Gidiyoni chifukwa chakuti wakathereska Ŵamidiyani, wakalongora kuti Yehova ndiyo wakwenera kulumbika. (Ŵeru. 8:​22, 23) Kasi ŵanalume ŵakwimikika ŵangamuyezga wuli Gidiyoni? Ŵakwenera kulumba Yehova pa milimo iyo ŵakwaniska kufiska. (1 Kor. 4:​6, 7) Mwachiyelezgero, para mulara walumbika chifukwa chakuti wakusambizga makora, iyo wangachita makora kuyowoya ivyo vikumovwira kuti wasambizgenge makora, nga nkhulondezga ulongozgi wa mu Mazgu gha Chiuta, kweniso kulondezga ivyo tikusambizgika kwizira mu gulu la Yehova. Ŵalara ŵangachita makora kughanaghanirapo usange ŵakusambizga mu nthowa yakuti Yehova ndiyo walumbike, panji iwo kuti ndiwo ŵalumbike. w23.06 4 ¶7-8

Usange tikupika yayi ivyo talomba, tikwenera kujifumba kuti, ‘Kasi ivyo nkhulomba ni vyakwenelera nadi?’ Kanandi, tikughanaghana kuti tikumanya icho ntchakwenelera kwa ise. Kweni nyengo zinyake ivyo tingalomba vingaŵa kuti vitovwirenge kwanyengo yitali yayi. Usange tikulomba Yehova kuti watovwire pa suzgo linyake, nyengo zinyake pangaŵa nthowa yiwemi chomene yakumazgira suzgo lithu kuluska nthowa iyo tikulomba. Ndipo vinthu vinyake ivyo tingalomba vingaŵa vyambura kukolerana na khumbo la Yehova. (1 Yoh. 5:14) Mwachiyelezgero, wonani chiyelezgero cha ŵapapi awo ŵakalomba Yehova kuti wawoneseske kuti mwana wawo wakhalilire mu unenesko. Pempho ili lingawoneka nga ndakwenelera. Kweni Yehova wachichizgengepo waliyose yayi kuti wamuteŵeterenge. Wakukhumba kuti tose, kusazgapo ŵana ŵithu, tisankhe tekha kumuteŵetera. (Doto. 10:​12, 13; 30:​19, 20) Ntheura ŵapapi ŵakwenera kulomba Yehova kuti waŵawovwire kumufika pamtima mwana wawo mwakuti wambe kumutemwa Yehova na kuŵa mubwezi wake.—Zinth. 22:6; Efe. 6:4. w23.11 21 ¶5; 23 ¶12

Chifukwa wuli kusanguluskana ni nthowa yakukhumbikwa chomene yakulongolera kuti tikutemwa ŵanji? Kuyana na buku linyake lakulongosora Baibolo, lizgu lakuti “kusanguluskana” ilo Paulosi wakagwiliskira ntchito apa likung’anamura “kukhala pafupi na munthu uyo wakukhumbikwira kumukhwimiska chifukwa cha suzgo likuru ilo wasangana nalo.” Ntheura, para tikuŵasanguluska ŵabali awo ŵasangana na masuzgo tikuŵawovwira kuti ŵalutilire kuteŵetera Yehova mwakugomezgeka. Nakuti nyengo yiliyose para tasanguluska mubali withu tikulongora kuti tikumutemwa chomene. (2 Kor. 7: 6, 7, 13) Pali kukolerana chomene pakati pa kulengera munthu lusungu na kumusanguluska. Mu nthowa wuli? Munthu walusungu wakuyezgayezga kuchitapo kanthu kuti wasanguluske munthu uyo wasangana na suzgo. Chakwamba munthu tikumulengera lusungu, pamanyuma ndipo tikumusanguluska. Wonani umo Paulosi wakuyaniskira lusungu lwa Yehova na chisangulusko icho wakupeleka. Paulosi wakulongosora kuti Yehova “ni Dada wa mtima walusungu na Chiuta wa chisangulusko chose.”—2 Kor. 1:3. w23.11 9-10 ¶8-10

Ŵalondezgi wose ŵa Khristu ŵakwenera kukhazga kuti ŵatambuzgikenge. Wonani chiyelezgero cha mpositole Paulosi. Wakayowoya ku Ŵatesalonika kuti: “Apo tikaŵa na imwe, tikamuphaliraninge kuti tikumanenge na masuzgo, ndipo ndivyo nadi vyachitika nga umo mukumanyira.” (1 Tes. 3:4) Ndipo ku Ŵakorinte wakalemba kuti: “Ŵabali, tikukhumba kuti mumanye suzgo iyo yikatiwira . . . Tikamanyanga yayi kuti tingaŵa ŵamoyo.” (2 Kor. 1:8; 11:​23-27) Mazuŵa ghano napo, Ŵakhristu ŵakwenera kukhazga kuti ŵatambuzgikenge. (2 Tim. 3:12) Nyengo zinyake ŵabwezi panji ŵachibali ŵinu ŵali kumunyozanipo chifukwa chakuti mukulondezga Yesu na kumupulikira. Kasi abwana ŵinu panji awo mukugwira nawo ntchito ŵali kumutambuzganipo chifukwa chakuti mukuchita vinthu mwaunenesko? (Heb. 13:18) Kasi boma lili kumutambuzganipo chifukwa chakuti mukaphalirangako ŵanji vya chigomezgo chinu? Mulimose umo vingaŵira, kwali tingakumana na suzgo wuli, kweni Paulosi wakati tikwenera kuŵa ŵakukondwa. w23.12 10-11 ¶9-10

Yakhobe wakazizipizga masuzgo ghanandi chomene. Ŵana ŵaŵiri ŵa Yakhobe, Simiyoni na Levi, ŵakachita vinthu vyakukhozga soni mbumba yakwawo kweniso zina la Yehova. Chinyake ntchakuti, Rakelo, mwanakazi uyo Yakhobe wakamutemwanga chomene, wakafwa apo wakababanga mwana wawo wachiŵiri. Ndipo chifukwa cha njara yikuru iyo yikawa mu charu, Yakhobe wakachichizgika kusamira ku Eguputo uku ni muchekuru. (Gen. 34:30; 35:​16-19; 37:28; 45:​9-11, 28) Nangauli wakasangana na masuzgo ghose agha, Yakhobe wakalekapo yayi kuŵa na chipulikano mwa Yehova kweniso mu malayizgo ghake. Yehova wakachitapo kanthu kuti walongore Yakhobe kuti wakumutemwa. Mwachiyelezgero Yehova wakamutumbika Yakhobe ndipo wakaŵa na vinthu vinandi. Kweniso ghanaghanirani umo Yakhobe wakwenera kuti wakamuwongera Yehova wati wakumanaso na Yosefe, mwana wake uyo wakamutemwanga chomene, uyo kwanyengo yitali wakaghanaghananga kuti wali kufwa. Chifukwa chakuti wakaŵa paubwezi uwemi na Yehova, Yakhobe wakafiska kuzizipizga viyezgo ivyo wakakumana navyo. (Gen. 30:43; 32:​9, 10; 46:​28-30) Para tikulutilira kuŵa paubwezi wakukhora na Yehova, nase tingatonda viyezgo ivyo tingakumana navyo. w23.04 15 ¶6-7

Salimo 23 ni sumu iyo yikulongora kuti munthu wakugomezga kuti Yehova wakumutemwa kweniso kumupwelelera. Davide, uyo wakalemba salimo ili, wakalongosora za ubwezi wakukhora uwo ukaŵa pakati pa iyo na Yehova, uyo wakati ni Muliska wake. Davide wakajiwonanga kuti ngwakuvikilirika chifukwa wakazomerezga kuti Yehova ndiyo wamulongozgenge, ndipo wakamugomezganga chomene. Wakamanya kuti Yehova walekengepo yayi kumulongora chitemwa umoyo wake wose. Chifukwa wuli wakagomezganga nthena? Davide wakawonanga kuti Yehova wakumupwelelera chifukwa chakuti nyengo zose wakamupanga ivyo wakakhumbikwiranga. Wakamanyangaso kuti Yehova ni mubwezi wake ndipo wakumutemwa. Lekani wakaŵa wakusimikizga kuti visuzge viti wuli, Yehova walutilirenge kumupa vyose ivyo wakukhumbikwira. Chifukwa chakuti Davide wakagomezganga kuti Yehova wakumutemwa na kumupwelelera, vikamovwira kuti waleke kwenjerwa, kweni wakondwenge na kuŵa wakukhorwa.—Sal. 16:11. w24.01 29 ¶12-13

Kufuma waka apo Nkhondo Yachiŵiri ya pa Charu Chose yikamalira, mu vyaru vinandi, ŵanthu ŵa Yehova ŵali pa mtende ndipo ŵali na wanangwa wakuchita ntchito yakupharazga. Nakuti ntchito iyi yikuluta panthazi chomene. Mazuŵa ghano, ŵabali ŵa mu Wupu Wakulongozga ŵakulutilira kulondezga ulongozgi wakufuma kwa Khristu. Ŵakukhumba kuti ulongozgi uwo ŵakupeleka ku ŵabali na ŵadumbu ukoleranenge na ivyo Yehova wakukhumba. Ŵakugwiliskira ntchito ŵalaŵiliri ŵa dera kweniso ŵalara kuti ŵapeleke ulongozgi ku mipingo. Ŵalara ŵakuphakazgika, kweniso ŵalara ŵanyake wose mu mpingo, ŵali mu ‘woko lamalyero’ la Khristu. (Chivu. 2:1) Ŵalara aŵa mbarunji yayi, ndipo nawo ŵakubudiska. Nga umo vikaŵira na ŵapositole, Mozesi na Joshuwa, nawo ŵakabudiskanga. (Maŵa. 20:12; Josh. 9:​14, 15; Rom. 3:23) M’paka sono, Khristu wakulongozga muzga wakugomezgeka na ŵalara, ndipo walutilirenge kuchita nthena. Ntheura tili na vifukwa vyakukwana vyakugomezgera ulongozgi uwo wakutipa kwizira mu ŵanthu awo ŵali kwimikika kulongozga. w24.02 23-24 ¶13-14

Mazuŵa ghano napo, tingamukondweska Yehova para tikuyowoya vyakukhwaskana na iyo munthowa yakulongora kuti tikumuwonga chomene kweniso kumutemwa. Para tili mu uteŵeti, tikumbukenge kuti chilato chithu chikuru nkhovwira ŵanthu kusendelera kwa Yehova, na kwamba kuŵawona Adada ŵithu ŵakuchanya nga umo ise tikuŵawonera. (Yak. 4:8) Tikukondwa kulongora ŵanthu umo Baibolo likumulongosolera Yehova, kuvumbura mikhaliro yake nga ntchitemwa, urunji, vinjeru, nkhongono, na mikhaliro yinyake yakukondweska. Tikulumbaso Yehova na kumukondweska para tikufwilirapo kumuyezga. Para tichitenge nthena, ŵanthu ŵawonenge kuti tikupambana chomene na ŵanthu ŵa mu charu chiheni ichi. (Mat. 5:​14-16) Ndipo apo tikuchita nawo vinthu vinyake vya zuŵa na zuŵa, tingaŵalongosolera chifukwa icho tikuchita vinthu mwakupambana na ŵanthu ŵanandi mu charu ichi. Ntheura ivi vikovwira ŵanthu ŵamitima yiwemi kusendelera kwa Chiuta. Para tikulumba Yehova munthowa izi, tikukondweska mtima wake.—1 Tim. 2:​3, 4. w24.02 10 ¶7

Kuti muŵe mwanalume wakukhwima mwauzimu, mukwenera kuŵa na maluso ghakovwira. Maluso agha ghamovwiraninge kuchita milimo mu mpingo, kusanga ntchito iyo yingamovwirani imwe panji kusangira vyakukhumbikwa mbumba yinu, kweniso kuti muŵe paubwezi uwemi na ŵanji. Mwachiyelezgero, sambirani kulemba na kuŵazga makora. Baibolo likuyowoya kuti munthu uyo wakupatura nyengo zuŵa lililose kuŵazga Mazgu gha Chiuta na kughanaghanirapo, wakuŵa wakukondwa kweniso vinthu vikumwendera makora. (Sal. 1:​1-3.) Para muŵazgenge Baibolo zuŵa lililose, mumanyenge maghanoghano gha Yehova, agho ghamovwiraninge kuti mughanaghanenge makora. (Zinth. 1:​3, 4) Ŵabali na ŵadumbu ŵithu ŵakukhumbikwira wovwiri wa ŵanalume awo ŵangasambizga makora na kupeleka ulongozgi wa mu Baibolo. Usange mungamanya kuŵazga na kulemba makora, mbwenu munozgekerenge makora nkhani na mazgoro agho ghangawovwira na kukhozga ŵabali na ŵadumbu. Kweniso mulembenge makora manosi agho ghamovwiraninge kuti mukhozge chipulikano chinu kweniso kukhozga ŵanji. w23.12 26-27 ¶9-11

Para mwamba kopa, ghanaghanirani ivyo Yehova wachitenge munthazi para Satana wazakaparanyika. Pa ungano wa chigaŵa wa 2014 pakaŵa chiyelezgero icho chikalongoranga dada wakadumbiskananga na mbumba yake umo lemba la 2 Timote 3:​1-5 mphanyi likalembekera, liŵenge kuti likayowoyanga ivyo vizamuchitika mu paradiso. Wakati: “Kweni umanye cheneichi, kuti mu charu chiphya nyengo zizamuŵa zakukondweska. Pakuti ŵanthu ŵazamutemwa ŵanyawo, vinthu vyauzimu, ŵazamuŵa ŵakujiyuyura, ŵakuchindika Chiuta, ŵakupulikira ŵapapi, ŵakuwonga, ŵakugomezgeka, ŵakutemwa mbumba zawo, ŵakupulika vya ŵanyawo, ŵakuyowoya viwemi vya ŵanji, ŵakujikora, ŵakuzika, ŵakutemwa uwemi, ŵambura kunotha, ŵakutemwa Chiuta m’malo mwa kutemwa vyakusanguluska, ŵakusopa Chiuta mwakujipeleka; ndipo ku aŵa ungapatukangako chara.” Kasi mukudumbiskana na ŵamumbumba yinu panji ŵasopi ŵanyinu umo umoyo uzamuŵira mu charu chiphya? w24.01 6 ¶13-14

Ntchakukhozga chomene kumanya kuti Yehova wakukondwa nawo ŵanthu ŵake wose nga ni gulu. Baibolo likuti: “Yehova wakukondwa na ŵanthu ŵake.” (Sal. 149:4) Ndipouli, nyengo zinyake ŵanyake ŵangamba kukayika na kujifumba kuti, ‘Kasi Yehova wakukondwa nane panekha?’ Ŵateŵeti ŵa Yehova ŵanandi ŵakugomezgeka mu nyengo yakale, nyengo zinyake vikaŵasuzganga kugomezga usange Yehova wakukondwa nawo nadi. (1 Sam. 1:​6-10; Yobu 29:​2, 4; Sal. 51:11) Baibolo likulongora kuti ŵanthu ŵambura kufikapo nawo, Yehova wangakondwa nawo. Ipo kasi tikwenera kuchita wuli? Tikwenera kuŵa na chipulikano mwa Yesu Khristu na kubatizika. (Yoh. 3:16) Para tachita nthena, tikulongora ku ŵanji kuti talapa zakwananga zithu na kumulayizga Chiuta kuti tichitenge khumbo lake. (Mil. 2:38; 3:19) Yehova wakukondwa para tikuchita nthena mwakuti tiŵe nayo paubwezi. Para tikuchita vyose ivyo tingafiska na kulutilira kusungilira layizgo lithu lakuti timuteŵeterenge, Yehova wakukondwa nase na kutiwona kuti ndise ŵabwezi ŵake ŵa pamtima.—Sal. 25:14. w24.03 26 ¶1-2

Tingaŵayezga ŵasambiri aŵa mwa kulutilira kupharazga nanga ŵalara ŵaboma ŵangatikanizga kupharazga. Tingaŵa na chigomezgo chose kuti Yehova watovwirenge kufiska uteŵeti withu. Ntheura mulombenge Yehova kuti wamupani vinjeru na chikanga, kweniso mulombani kuti wamovwirani kulimbana na masuzgo ghinu. Taŵanandi ŵa ise tikusuzgika chifukwa cha ulwari panji kusuzgika maghanoghano, kutayika kwa ŵakutemweka ŵithu, masuzgo ghakuru gha mu mbumba, kutambuzgika, panji masuzgo ghanyake. Vinthu nga ni miliri na nkhondo vyapangiska kuti chiŵe chakusuzga chomene kuzizipizga masuzgo agha. Ntheura muphalirani Yehova umo mukujipulikira nadi. Muphalirani suzgo linu nga umo mungachitira para mukuphalira mubwezi winu wapamtima. Manyani kuti Yehova ‘wamovwiraninge.’ (Sal. 37:​3, 5) Kukosera mu lurombo kumovwiraninge ‘kuzizipizga mu suzgo.’ (Rom. 12:12) Yehova wakumanya ivyo ŵateŵeti ŵake ŵakuzizipizga, ndipo “wakupulika para ŵakulira kuti waŵavwire.” —Sal. 145:​18, 19. w23.05 5-6 ¶12-15

Para pali nkhani yakuzirwa yakuti tisankhe, tikwenera “kumanya [dankha ilo ni] khumbo la Yehova” ndipo pamanyuma tichite mwakuyana na khumbo lake. (Efe. 5:17) Para tikupenjerezga na kusanga fundo za mu Baibolo izo zikukolerana na suzgo lithu, ndikuti tikukhumba kumanya umo Chiuta wakuwonera nkhani iyo. Ndipo para tikulondezga fundo izi, tisankhenge makora vinthu. Muheni,” uyo ni mulwani withu Satana, wakukhumba kuti titangwanikenge chomene na vinthu vya charu ichi mwakuti tisoŵenge na nyengo yakuteŵetera Chiuta. (1 Yoh. 5:19) Ntchipusu chomene kwa Mkhristu kudangizga kupenja vinthu vyakuthupi, ntchito, panji masambiro m’malo mwa kuteŵetera Yehova. Para wangamba kuchita nthena, vingalongora kuti wamba kutolera kaghanaghaniro ka charu. Nangauli vinthu ivi pa ivyo vyekha ni viheni yayi, kweni ndivyo vingaŵanga pakwamba yayi pa umoyo withu. w24.03 24 ¶16-17