Te Lua Samuelu

13 A te tama tagata a Tavita ko Apisaloma e isi sena tuagane tinogali e igoa ki a Tamala,+ kae ko Amanono+ te tama tagata a Tavita ne fiafai ki tou fafine. 2 Ne mafatia malosi a Amanono i ei, tenā ne masaki ei a ia ona ko tena tuagane ko Tamala, me i tou fafine koi tamafine tela la, ne faigata eiloa ke fai ne Amanono se mea ki tou fafine. 3 E isi se taugasoa o Amanono e igoa ki a Ionatapa,+ te tama tagata a Simeai,+ te taina o Tavita; kae ko Ionatapa se tagata e poto. 4 Ne fai atu tou tagata ki a ia: “Te tama a te tupu, kaia e mata fanoanoa ei koe i tafataeao katoa? Kaia e se fakaasi mai ei ne koe ki a au?” Ne tali atu a Amanono ki ei: “Au e fiafai ki a Tamala, te tuagane+ o toku taina ko Apisaloma.” 5 Ne tali atu a Ionatapa ki a ia: “Takato i tou moega kae fakaloiloi i a koe e masaki. Kafai e vau tou tamana o āsi ki a koe, fai atu ki ei, ‘Fakamolemole tuku mai aka a toku tuagane ko Tamala ke vau o fakatoka aku meakai. Kafai e fakatoka ne ia a meakai ke avatu ki te tino masaki i oku mua, ka kai eiloa au ki ei.’”

6 Tenā ne takato ifo ei a Amanono kae fakaloiloi i a ia e masaki, kae ne vau te tupu o āsi a ia. Ne fai atu a Amanono ki te tupu: “Fakamolemole tuku mai aka a toku tuagane ko Tamala ke vau o tao ne keke* e lua i oku mua ko te mea ke mafai au o kai mai meakai ne fakatoka ne ia.” 7 I konā loa ne avatu ne Tavita se fekau ki a Tamala i te fale, ana muna: “Fakamolemole fano ki te fale o tou tuagane ko Amanono o fakatoka ana meakai.” 8 Ne fano a Tamala ki te fale o tena tuagane ko Amanono telā e takato i lalo. Ne puke ne ia te palugā falaoa kae fai ne ia a keke i ana mua eiloa, kae tao ne ia. 9 Oti aka, puke ei a ia ki te telē kae avatu ki a ia. Kae ko Amanono ne ita ma kai ana muna: “Fai ke olo kea‵tea a tino katoa!” Tenā ne olo kea‵tea ei a tino.

10 Ne fai atu a Amanono ki a Tamala: “Aumai a meakai ki loto i te potu ‵moe, ke fagai au ne koe.” Tenā ne puke ei ne Tamala a keke kolā ne fai ne ia kae avatu ki tena tuagane ko Amanono i te potu ‵moe. 11 I te avatuga ne tou fafine a meakai konā ke kai ne ia, ne ‵lave atu tou tagata ki a ia kae fai atu: “Vau ke ‵moe taua, e toku tuagane.” 12 Kae ne fai atu tou fafine: “Ikai, e toku tuagane! Sa fakamasiasi ne koe au, me e seai se mea penei e masani o tupu i Isalaelu.+ Sa fai ne koe te mea matagā tenei.+ 13 E mafai pefea o ola au mo te masiasi tenei? Kae ka fai koe pelā me se tagata matagā i Isalaelu. Fakamolemole faipati nei ki te tupu me ka se taofi ne ia au mai i a koe.” 14 Kae ne ita a ia ma fakalogo ki tou fafine, kae ne malosi atu tou tagata i a ia, tenā ne fakamasiasi ei ne tou tagata a ia mai te pukemālō ne ia. 15 Oti aka, kamata ei o takalialia a Amanono ki tou fafine kae ne takalialia malosi eiloa a ia ki ei, telā ko sili atu tena takalialia ki tou fafine i lō tena fiafaiga ki ei. Ne fai atu Amanono ki ei: “Tu ki luga; fano kea‵tea!” 16 Kae ne fai atu tou fafine ki a ia: “Ikai, e toku tuagane, me i te uga ne koe au ke fano i te taimi nei e sili atu i te masei i lō te mea ko oti ne fai ne koe ki a au!” Kae ne seki fia fakalogo eiloa a ia ki tou fafine.

17 I konā loa ne kalaga atu a ia ki tena tavini kae fai atu: “Ave te tino tenei kea‵tea mai oku mua, fakamolemole, kae ‵loka mai te mataloa i ana tua.” 18 (I te taimi nei a tou fafine e pei ki se gatu fakapito, me konā eiloa a gatu e pei ne tama fāfine a tupu kolā koi tamafine.) Tenā ne ave ei ne tena tavini a ia ki tua, kae ‵loka te mataloa i ana tua. 19 Ne tuku ne Tamala a lefu ki tena ulu,+ kae saesae tena gatu gali telā ne pei a ia ki ei; kae tuku ana lima ki tena ulu kae sasale o fano, kae tagi ki luga.

20 Tenā ne fesili atu ei a tena tuagane ko Apisaloma+ ki tou fafine: “A koe ne ‵nofo mo tou tuagane ko Amanono? Sa fai ne koe ki se tino a te mea tenā, e toku tuagane. A ia ko tou tuagane.+ Sa faka‵mafa tou loto ki ei.” Tenā ne nofo ei a Tamala i a ia eiloa i te fale o tena tuagane ko Apisaloma. 21 I te logoga a te Tupu ko Tavita i mea katoa konei, ne kaitaua malosi tou tagata.+ Kae ne seki fia faka‵mae ne ia a lagonaga o Amanono, i a ia e alofa ki ei, me i a ia ko tena toekimua. 22 Kae ne seki ai eiloa se pati a Apisaloma ne fai ki a Amanono, faitalia me se mea masei io me se mea ‵lei; me i a Apisaloma ne takalialia+ ki a Amanono me ne fakamasiasi ne ia tena tuagane ko Tamala.+

23 Mai tua o tausaga kātoa e lua, ne ‵nofo a tāgata ‵vele fulufulu o mamoe a Apisaloma i Pala-hasola, i tafa o Efalaima,+ kae ne ‵kami ne Apisaloma a tama‵liki katoa a te tupu.+ 24 Ne fanatu a Apisaloma ki te tupu ana muna: “A tau tavini ko ‵vele a fulufulu o ana mamoe. Fakamolemole ke na vau koe, e te tupu mo au tavini ke olo fakatasi mo au.” 25 Kae ne fai atu te tupu ki a Apisaloma: “Ikai, e taku tama. Kafai e olo katoa tatou, ka fakalavelave atu eiloa matou ki a koe.” E tiga eiloa ne finau atu faeloa a ia ne seki talia ne ia ke fano a ia, kae ne fakamanuia atu a ia ki tou tagata. 26 Tenā ne fai atu ei a Apisaloma: “Kafai e se vau koe, fakamolemole tuku mai toku taina ko Amanono ke olo matou.”+ Ne tali atu te tupu ki a ia: “Kaia e ‵tau ei a ia o olo mo koe?” 27 Kae ne finau atu faeloa a Apisaloma, tenā ne tuku ei ne ia a Amanono mo tama tāgata katoa a te tupu ke olo mo ia.

28 Ne fakatonu atu a Apisaloma ki ana tavini: “Onoono eiloa ki a Amanono, kafai ko fiafia malosi a ia ona ko te uaina, ka fai atu au ki a koutou, ‘Ta a Amanono!’ Ko ta ei ne koutou ke mate. Sa ma‵taku. E a, e se ko au tenei e fakatonu ne au koutou? Ke loto ma‵losi kae loto ‵toa.” 29 Tenā ne fai eiloa ne tavini a Apisaloma a mea kolā ne fakatonu atu ne Apisaloma ke fai ki a Amanono; kae ne ta‵fuke aka a nisi tama tāgata a te tupu, ‵sopo ki luga i olotou miula kae ‵tele. 30 Kae koi ‵tele atu latou i te lotou auala, ne oko atu te tala ki a Tavita: “A tama tāgata katoa a te tupu ko oti ne ‵ta ne Apisaloma, kae seai eiloa se tino ne sao.” 31 Ne tu aka te tupu kae saesae ana gatu kae takato i te laukele, kae ko ana tavini katoa ne ‵tu mai mo olotou gatu ko oti foki ne saesae.

32 Kae ne fai aka a Ionatapa+ te tama tagata a Simeai,+ te taina o Tavita: “Toku aliki, sa mafaufau me ne tamate ne latou a tama tāgata katoa a te tupu, me ko Amanono fua ko mate.+ Ne tupu te mea tenei i te fakatonuga a Apisaloma, telā ne fakaiku aka ne ia ke fai te mea tenei+ i te aso eiloa ne fakamasiasi ei ne Amanono a tena tuagane+ ko Tamala.+ 33 Nei la, e toku aliki, sa saga ki te tala telā e fai mai penei, ‘A tama tāgata katoa a te tupu ko ‵mate’; me ko Amanono fua ko mate.”

34 I te taimi tenā, a Apisaloma ko oti ne tele kea‵tea.+ Fakamuli ifo, ne kilo aka a mata o te tagata leoleo kae lavea ne ia a tino e tokouke e o‵mai i ana tua i te auala i tafa o te mauga. 35 Tenā ne fai atu ei a Ionatapa+ ki te tupu: “Kiloke! A tama tāgata a te tupu ko ‵foki mai. E pelā eiloa mo pati a tau tavini ne fai.” 36 I te otiga o ana pati ne fai, kae ulu mai a tama tāgata a te tupu, kae ‵tagi loa i luga; kae ne ‵tagi foki i ei a te tupu mo ana tavini katoa. 37 Kae ko Apisaloma ne tele ki a Talamai+ te tama tagata a Amiuta te tupu o Kesula. Ne tagi fanoanoa eiloa a Tavita ona ko tena tama i aso e uke. 38 I te teleatuga a Apisaloma ki Kesula,+ ne nofo a ia i konā i tausaga e tolu.

39 Fakamuli ifo, ne manako te Tupu ko Tavita o fano ki a Apisaloma, me ko ‵lei tena loto i* te mate o Amanono.