Te Lua Samuelu

14 Ne iloa ne Ioapo te tama tagata a Seluia+ me i te loto o te tupu e tuku loa i a Apisaloma.+ 2 Tenā ne uga ei ne Ioapo se fekau ki Tekoa+ o ‵kami mai se fafine poto mai i konā kae fai atu ki ei: “Fakamolemole, fai pelā i a koe e fanoanoa, kae pei ki gatu o te fanoanoa, kae sa ‵mili tou foitino ki sinu.+ Fai pelā me se fafine ko leva ne fanoanoa i te mate o se tino. 3 Tenā ko fano ei koe o faipati ki te tupu penei.” Tenā ne fai atu ei ne Ioapo a pati e ‵tau o fai ne ia.

4 Ne fanatu te fafine Tekoa ki loto i te tupu kae punou ifo ki lalo kae fai atu: “Fesoasoani mai ki a au, e te tupu!” 5 Ne tali atu te tupu ki tou fafine: “Se a te fakalavelave?” Tenā ne fai atu ei tou fafine: “Au nei se fafine ko mate taku avaga. 6 Kae ko au, tau tavini, e tokolua aku tama tāgata, kae ne taua lāua i te vao. E seai se tino ne mafai o ‵vae ne ia lāua, kae ne ta ne te tamaliki e tokotasi a te suā tamaliki, tamate ei ne ia. 7 Nei la, a te kāiga kātoa ko ita mai ki a au, tau tavini, kae fai mai latou penei, ‘Tuku mai a te tamaliki telā ne ta ne ia tena taina, ke tamate ne matou ona ko te tamatega ne ia o tena taina,+ faitalia me iku atu ki te seai o sou sui!’ E ma‵nako latou o tamate taku tama tagata tenei koi ‵toe, e pelā eiloa mo se tino e tamate ne ia se kalokaloafi telā koi ka, kae tuku i ei ke se ola te igoa o taku avaga io me seai sena sui i te lalolagi nei.”

8 Tenā ne fai atu ei te tupu ki te fafine: “Fano ki tou fale, kae ka fai ne au se fakatonuga e uiga mō koe.” 9 Kae ne fai atu te fafine Tekoa ki te tupu: “Toku aliki te tupu, ke i luga i a au mo te kāiga o toku tamana a te ‵se, kae ko te tupu mo tena nofogaaliki e se ‵se.” 10 Tenā ne fai atu ei te tupu: “Kafai e isi se tino e fai atu sena pati ki a koe, aumai a ia ki a au, kae ka se toe fakalavelave atu a ia ki a koe.” 11 Kae ne fai atu tou fafine: “Fakamolemole, ke masaua ne te tupu a Ieova tou Atua, ko te mea ke se fakamasei kae fakaseai taku tama tagata ne te tino telā e taui ne ia te toto.”+ Kae ne fai atu tou tagata: “E pelā eiloa mo Ieova e ola,+ ka seai eiloa se laulu o tau tama tagata e to ki te laukele.” 12 Ne fai atu te fafine: “Talia mai ke faipati atu tau tavini ki toku aliki te tupu.” Kae ne fai atu tou tagata: “Faipati mai!”

13 Ne fai atu te fafine: “Kaia la ne mafaufau ei koe ke fai se vaegā mea penei ki tino o te Atua?+ Kafai e faipati mai te tupu penei, ko fai ne ia a ia eiloa ke agasala, me e se fakafoki mai ne te tupu a tena tama tagata telā ne ‵tuli ne ia.+ 14 A tatou ka ‵mate eiloa kae fai pelā me ne vai ne ‵ligi ki te laukele kae e se mafai o toe maua mai. Kae ko te Atua e se mafai o ave kea‵tea ne ia se ola, kae e mafaufau a ia ki pogai e se ‵tau ei mo se tino telā ne ‵tuli kea‵tea o tumau i te tulaga tenā. 15 Au ne vau o fai atu a pati konei ki toku aliki te tupu me i a au ko mataku ne fai ne tino. Tenā ne fai atu ei tau tavini, ‘Talia mai ke faipati au ki te tupu, fakamolemole. E se taumate ka fakataunu ne te tupu a te manakoga o tena tavini. 16 Kāti ka fakalogologo mai a te tupu kae fakasao tena pologa mai lima o te tagata telā e ‵sala o fakaseai au mo taku tama tagata e tokotasi mai te tofi ne tuku mai ne te Atua ki a māua.’+ 17 Tenā ne fai atu ei tau tavini, ‘Talosia ke maua ne au se saogalemu mai pati a toku aliki te tupu,’ me i toku aliki te tupu e pelā me se agelu a te Atua tonu telā e mafai o faka‵kese ne ia te mea ‵lei mai te mea masei. Ke fakatasi atu ki a koe a Ieova tou Atua.”

18 Ne tali atu te tupu ki te fafine: “Fakamolemole sa ‵funa ne koe mai i a au so se mea e fesili atu au ki ei.” Ne tali atu te fafine: “Fakamolemole e toku aliki te tupu, faipati mai.” 19 Tenā ne fesili atu ei te tupu: “E mata, ko Ioapo ne fai atu ne ia a mea katoa konei ki a koe?”+ Ne tali atu te fafine: “E pelā eiloa mo koe e ola, e toku aliki te tupu, e ‵tusa mo pati a toku aliki te tupu, ko tau tavini eiloa ko Ioapo ne fakatonu ne ia au kae fai mai ne ia a pati katoa kolā ne fai atu ne tau tavini. 20 A tau tavini ko Ioapo ne fai ne ia te mea tenei ke ‵fuli aka ei te tulaga o mea, kae ko toku aliki e poto e pelā mo te agelu a te Atua tonu kae iloa ne ia a mea katoa e ‵tupu i te fenua.”

21 Tenā ne fai atu ei te tupu ki a Ioapo: “Ko ‵lei la, ko fai ne au te mea tenei.+ Fano o puke mai te tamataene ko Apisaloma.”+ 22 I konā ne totuli ifo a Ioapo kae punou ki lalo kae tavae atu ki te tupu. Ne fai atu a Ioapo: “I te aso nei, ko iloa ne tau tavini me fiafia mai koe ki a au, e toku aliki te tupu, me ne fai ne te tupu te manakoga o tena tavini.” 23 Tenā ne tu aka ei a Ioapo o fano ki Kesula+ o aumai a Apisaloma ki Ielusalema. 24 Kae ne fai atu te tupu: “Fai ki ei ke foki ki tena fale, kae e se ‵tau o lavea ne ia oku mata.” Tenā ne foki mai ei a Apisaloma ki tena fale, kae ne seki lavea eiloa ne ia a mata o te tupu.

25 E seai eiloa se tagata i Isalaelu kātoa e ‵pau tena tinogali mo Apisaloma. Mai tena alofivae ke oko ki tena ulu, e seai eiloa se pona i ei. 26 Kafai e ‵vele tena ulu​—e ‵tau o ‵vele ne ia i te fakaotiga o tausaga katoa ona ko te ‵mafa o tena laulu​—a te ‵mafa o tena laulu e 200 sekela* i te fua a te tupu.* 27 E tokotolu tama tāgata+ a Apisaloma kae tokotasi tena tama fafine, a tena igoa ko Tamala. A ia se fafine tinogali.

28 Ne nofo a Apisaloma i Ielusalema i tausaga kātoa e lua, kae ne seki lavea eiloa ne ia a mata o te tupu.+ 29 Ne ‵kami mai ne Apisaloma a Ioapo ko te mea ke ave aka a ia ki te tupu, kae ne seki vau a Ioapo. Tenā ne toe ‵kami mai ne ia i te lua o taimi, kae ne ita foki ma vau ki a ia. 30 Fakamuli loa, ne fai atu a ia ki ana tavini: “A te manafa o Ioapo telā e pili ki toku manafa e isi ne kalite i ei. Olo o ‵sunu ki te afi.” Tenā ne ‵sunu ei ne tavini a Apisaloma a te manafa tenā ki te afi. 31 Ona ko te mea tenā, ne tu aka a Ioapo kae fanatu ki te fale o Apisaloma kae fai atu ki ei: “Kaia ne ‵sunu ei ne au tavini toku manafa ki te afi?” 32 Ne tali atu a Apisaloma ki a Ioapo: “Kiloke! Au ne uga atu taku fekau ki a koe penei, ‘Vau ke uga ne au koe ki te tupu o fesili atu ki ei: “Kaia ne puke mai ei au mai Kesula?+ E ‵lei atu moi ne nofo au i konā. Nei la, au e manako ke lavea ne au a mata o te tupu, kae kafai e isi saku mea ‵se, ko tamate ei ne ia au.”’”

33 Tenā ne fanatu ei a Ioapo ki loto i te tupu kae fai atu a mea konā ki a ia. Oti aka, kalaga atu ei a ia ki a Apisaloma telā ne fanatu ki mua o te tupu kae totuli ifo i ana mua, kae punou ifo ki lalo i mua o te tupu. Tenā ne sogi atu ei te tupu ki a Apisaloma.+