Te Lua Samuelu

15 I te otiga o mea katoa konei, ne maua ne Apisaloma se kaliota mo solofanua mo tāgata e toko 50 ke ‵tele i ana mua.+ 2 Kae ko Apisaloma e ala ‵malu sāle o tu i te feitu o te auala ki te mataloa o te fakai. So se tagata e fanatu ki te tupu o fai +sena tagi ke fai se fakamasinoga,+ e kalaga atu a Apisaloma ki a ia kae fai atu: “Ko te fakai fea ne vau ei koe?” kae ka tali atu a ia: “A tau tavini se tino mai se matakāiga e tasi o Isalaelu.” 3 Kae fai atu a Apisaloma ki ei: “Kiloke, e ‵tonu kae ‵sao eiloa au mea konā, kae e seai se tino mai te tupu e toka o fakalogo ki tau tagi.” 4 Ko toe fai atu ei a Apisaloma: “Aku muna eiloa ke fai au mo famasino o te fenua! Ko te mea ke o‵mai ki a au a tāgata katoa kolā e isi ne olotou tagi io me ne fakamasinoga e ‵tau o fai, ko fai ei ne au ke maua ne latou te fakamasinoga tonu.”

5 Kae kafai e fakapilipili atu se tagata o ifo atu ki a ia, e ‵kapa atu te lima o Apisaloma o puke ki ei kae sogi atu ki a ia.+ 6 Ne fai faeloa ne Apisaloma a te mea tenei ki tino Isalaelu katoa kolā e olo atu ki te tupu ke fai olotou fakamasinoga; tenā ne ‵futi lēmū mai eiloa ne Apisaloma a loto o tino Isalaelu.+

7 I te fakaotiga o tausaga e fa,* ne fai atu a Apisaloma ki te tupu: “Fakamolemole, talia mai au ke fano ki Hepelona+ ke fakataunu taku tautoga ne fai ki a Ieova. 8 Me i tau tavini ne fai tena tautoga+ tāua tenei i te taimi ne nofo ei au i Kesula+ i Sulia: ‘Kafai e toe fakafoki au ne Ieova ki Ielusalema, ka ofo atu eiloa ne au se taulaga ki a* Ieova.’” 9 Ne fai atu te tupu ki a ia: “Fano mo te filemu.” Tenā ne tu aka ei a ia kae fano ki Hepelona.

10 Ne uga atu ne Apisaloma a sipai ki matakāiga katoa o Isalaelu, ana muna: “I te taimi eiloa e lagona ei ne koutou a te ‵tagi o te pu, ke fai atu koutou penei, ‘A Apisaloma ko fai nei mo tupu i Hepelona!’”+ 11 E isi ne tāgata e toko 200 ne ‵kami ke olo mo Apisaloma e aunoa mo se mea a latou e iloa, e se iloa ne latou a mea kolā ko ‵tupu. 12 E se gata i ei, i te taimi ne ofo atu ei tena taulaga, ne uga te fekau a Apisaloma ke fanatu a Aitofele+ te tagata Kilo, te tino fakatonutonu+ a Tavita, mai tena fakai ko Kilo.+ Ne gasolo aka o ‵lei tena togafiti, kae ne gasolo foki o tokouke a tino e ‵lago atu ki a Apisaloma.+

13 Fakamuli ifo, ne vau se avefekau ki a Tavita, kae fai atu: “A loto o tino Isalaelu ko ‵fuli katoa ki a Apisaloma.” 14 I konā eiloa ne fai atu a Tavita ki ana tavini katoa i Ielusalema: “‵Tu ki luga, tatou ka ‵tele kea‵tea,+ me seai se tino e mafai o sao i a Apisaloma! Ke vave, i te mea ma puke fakavave ne ia tatou kae fakaseai tatou kae fakamasei ‵tou fakai ki te pelu!”+ 15 Ne tali atu a tavini a te tupu ki te tupu: “So se mea telā e fakaiku aka ne toku aliki te tupu, e toka eiloa au tavini o fai.”+ 16 Tenā ne fano ei te tupu kae tau‵tali atu tena kāiga, kae ne tiakina ne te tupu ana avaga fakasalasala+ e tokosefulu ke tausi te fale.* 17 Kae ne fano eiloa te tupu i tena auala, kae ko tino ne tau‵tali atu i a ia, kae ne malō‵lo malie latou i Petameka.

18 Ne olo atu foki ana tavini katoa i a ia mo tino Keleti katoa, tino Peletite,+ mo tino Kata,+ e toko 600 tāgata ne tau‵tali atu i a ia mai Kata,+ ne olo atu latou i tafa o te tupu. 19 Tenā ne fai atu ei te tupu ki a Itai+ te tino Kata: “Kaia e vau ei koe i a matou? Foki o ‵nofo mo te tupu fou, me i a koe se tino fakaa‵tea kae ne sola mai foki koe mai tou fenua. 20 A koe ne vau fua i te aso anafi, kae i te aso nei, e a, ka talia fua ne au koe ke vau i a matou, ke fano i so se taimi e fano ei au mo so se koga e fano au ki ei? Foki kae puke atu ou taina, kae ke fakaasi atu ne Ieova te alofa fakamaoni mo te fakamaoni+ ki a koe!” 21 Kae ne tali atu a Itai ki te tupu: “E pelā eiloa mo Ieova e ola kae pelā foki mo toku aliki te tupu e ola, i so se koga e nofo i ei toku aliki te tupu, faitalia me ko te mate io me ko te ola, e nofo eiloa tau tavini i konā!+ 22 I konā eiloa, ne fai atu a Tavita ki a Itai:+ “Fano kae mua atu ki te suā feitu.” Tenā ne mua atu ei a Itai te tino Kata ki te suā feitu, fakatasi mo ana tāgata katoa mo tama‵liki.

23 A tino katoa i te fenua ne ‵tagi malosi kae olo atu ki te suā feitu o te Vanu o Ketalono,+ kae ko te tupu ne tu i tafa o te vanu; kae ko tino katoa ne olo atu ki te suā feitu ki te auala telā e fano ki te koga lavaki. 24 Ne nofo atu foki a Satoka+ i konā kae ne ‵nofo fakatasi mo ia a tino Levi+ katoa kolā e sau ne latou te pusa+ o te feagaiga a te Atua tonu;+ kae ne tuku ifo ne latou a te Pusa a te Atua tonu ki lalo; kae ko Aviata+ ne fanatu ki konā kae koi olo atu eiloa a tino ki te suā feitu o te fakai. 25 Kae ne fai atu te tupu ki a Satoka: “Puke te Pusa a te Atua tonu o fakafoki ki te fakai.+ Kafai e fiafia mai a Ieova ki a au, ka fakafoki mai ne ia au ke lavea ne au te pusa mo te koga e tuku i ei.+ 26 Kae kafai e fai mai a ia, ‘Au e se fiafia ki a koe,’ ko fai ei ne ia ki a au so se mea telā e ‵lei i tena kilokiloga.” 27 Ne fai atu te tupu ki a Satoka te faitaulaga: “E a, a koe e sē se tagata e lavea ne ia a fakaasiga?+ Foki ki te fakai mo te filemu, kae puke atu a tama tāgata e tokolua a koulua, ko Aimaasu tau tama tagata mo Ionatana+ te tama tagata a Aviata. 28 Kiloke, au ka faka‵tali i te asaga i te koga lavaki ke maua ne au se tala mai i a koe.”+ 29 Tenā ne puke ei ne Satoka mo Aviata a te Pusa a te Atua tonu o fakafoki ki Ielusalema, kae ‵nofo atu lāua i konā.

30 I te fanakaga a Tavita ki luga i te Mauga o Olive,+ ne tagi mautuutu a ia; ne pulou tena ulu, ne sasale kae seai ne ana taka. A tino katoa kolā ne olo mo ia ne pulou foki olotou ulu kae ‵tagi mautuutu i te lotou oloakaga. 31 Ne fakailoa atu ki a Tavita penei: “A Aitofele e aofia i a latou kolā e ‵kau+ mo Apisaloma.”+ I konā loa ne fai atu ei a Tavita: “Ieova,+ fakamolemole ‵fuli aka a pati fakatonutonu a Aitofele ki mea sē aoga!”+

32 I te okoatuga a Tavita ki te taulu o te mauga te koga e masani o ifo a tino i ei ki te Atua, ne fakafetaui atu a Husai+ te tino Alaki+ ki a ia i konā, mo tena gatu ‵loa e masaesae mo ‵pefu i tena ulu. 33 Kae ne fai atu a Tavita ki a ia: “Kafai e vau koe ke olo tāua ki te suā feitu, ka fai koe mo fai se amoga ‵mafa ki a au. 34 Kae kafai e foki koe ki te fakai kae fai atu koe ki a Apisaloma penei, ‘Au ko tau tavini, e te Tupu. Au ko te tavini a tou tamana i aso mua, kae nei ko fai au mo au tavini,’+ tenā ko mafai ei ne koe o fakaseaoga a pati fakatonutonu a Aitofele ona ko au.+ 35 E a, e se ‵nofo foki a faitaulaga ko Satoka mo Aviata i te fakai fakatasi mo koe? E ‵tau mo koe o fai ki faitaulaga ko Satoka mo Aviata a mea katoa e lagona ne koe i te fale o te tupu.+ 36 Kiloke! A lā tama tāgata e tokolua, ko Aimaasu+ te tama a Satoka mo Ionatana+ te tama a Aviata konā e ‵nofo mo lāua, kae fakailoa mai ki a au so se mea e logo koe i ei e auala i a lāua.” 37 Tenā ne fano ei a Husai te taugasoa+ o Tavita ki te fakai, kae ko Apisaloma ne fanatu ki Ielusalema.