Te Lua Samuelu
16 I te taimi ne seke malie atu ei a Tavita mo te taulu o te mauga,+ ne fakafetaui atu a Sipa,+ te tavini fesoasoani a Mefiposeta+ ki a ia i konā mo asini e lua e fakauta ki falaoa e 200, keke vine ma‵lo e 100, keke ne fai ki fuagalakau* o te ‵tau vela e 100, mo te tiā uaina lasi.+ 2 Tenā ne fai atu ei te tupu ki a Sipa: “Kaia ne aumai ei ne koe a mea konei?” Ne tali atu a Sipa: “Ne aumai a asini mo ‵sopo a kāiga o te tupu, a falaoa mo fuagalakau o te ‵tau vela mo ‵kai a tamataene, kae ko uaina mo inu ki ei a tino kolā ko fi‵ta i te koga lavaki.”+ 3 Ne fai atu a te tupu: “Kae tefea te tama tagata* a tou matai?”+ I konā loa, fai atu ei a Sipa ki te tupu: “Telā e nofo i Ielusalema, me ne fai mai a ia, ‘I te aso nei ka toe fakafoki mai ne tino Isalaelu a te pulega fakatupu a toku tamana ki a au.’”+ 4 Tenā ne fai atu ei te tupu ki a Sipa: “Kiloke! A mea katoa a Mefiposeta i a koe.”+ Ne tali atu a Sipa: “Ko ifo atu au i ou mua. Ke talia mai ne koe au, e toku aliki te tupu.”+
5 I te okoatuga a te Tupu ko Tavita ki Paulima, e isi se tagata mai te kāiga o Saulo e igoa ki a Simei,+ te tama tagata a Kela, ne vau ki tua kae fai atu a pati fakamalaia i te taimi ne sasale atu ei a ia.+ 6 Ne peipei ne ia a Tavita ki fatu, e pelā foki mo tavini katoa a te Tupu ko Tavita, mo tino katoa mo tāgata ‵mafi i tena feitu fakaatamai mo tena feitu fakamaui. 7 Konei a pati fakamalaia ne fai atu ne Simei: “Fano kea‵tea, fano kea‵tea, te tagata tatino! Te tagata e seai sena aoga! 8 Ko oti ne toe taui atu ne Ieova ki a koe e ‵tusa mo te tamatega o tino i te kāiga o Saulo kae ave kea‵tea ne koe te malo mai i a ia. Tela la, ko oti ne ave ne Ieova te malo ki tau tama tagata ko Apisaloma. Nei la, ko oko atu ki a koe a puapuaga i a koe se tagata tatino!”+
9 Tenā ne fai atu ei a Apisai te tama tagata a Seluia+ ki te tupu: “Kaia e fai ei ne te kuli mate+ tenei a pati fakamalaia ki toku aliki te tupu?+ Fakamolemole, tuku mai ke fano au o ‵kati kea‵tea tena ulu.”+ 10 Kae ne fai atu te tupu: “Ne a aku mea ka fai ki a koulua, tama tāgata a Seluia?+ Tuku malie ei ke fakamalaia ne ia au+ me ko oti ne fai a Ieova ki a ia,+ ‘Fakamalaia atu a Tavita!’ Tela la, ko oi te tino e ‵tau o fai atu penei, ‘Kaia e fai ei ne koe te mea tenei?’” 11 Tenā ne fai atu ei a Tavita ki a Apisai mo ana tavini katoa: “A taku tama tagata tonu telā ne vau mai toku foitino, e taumafai o tamate au,+ kae e se tioa eiloa o amio penei te tino Peniamina+ tenā! Tuku ei ke fakamalaia ne ia au, me ko Ieova ne fai atu ki a ia ke fai te mea tenā! 12 Kāti ka lavea ne Ieova toku puapuaga,+ kae ka toe fakafoki mai ne Ieova tena aga‵lei ki a au i lō pati fakamalaia kolā ne fai mai ki a au i te aso nei.”+ 13 Tenā ne sa‵sale ifo eiloa a Tavita mo ana tāgata i te auala kae ko Simei e sasale i tafa o te mauga i ana feitu, kae fai atu ana pati fakamalaia+ kae peipei atu a fatu mo ‵pefu e uke.
14 E seki leva kae oko atu te tupu mo ana tino katoa ki te koga e olo latou ki ei kae ko fi‵ta valevale, tenā ne malō‵lo ei latou i konā.
15 I te taimi tenā ne oko atu ei a Apisaloma mo tino Isalaelu katoa ki Ielusalema, kae ko Aitofele+ ne nofo atu foki i konā. 16 I te fanatuga a Husai+ te tino Alaki,+ ko te taugasoa o Tavita, ki a Apisaloma, ne fai atu a Husai ki a Apisaloma: “Ke ola leva te tupu!+ Ke ola leva te tupu!” 17 Tenā ne fai atu ei a Apisaloma ki a Husai: “Tenei tou alofa fakamaoni ki tou taugasoa? Kaia ne seki olo tasi ei koe mo tou taugasoa?” 18 Kae ne fai atu a Husai ki a Apisaloma: “Ikai, au e kau i te feitu o te tino telā ko oti ne filifili ne Ieova, ko tino konei, mo tino Isalaelu katoa. Au e ‵nofo mo te tino tenā. 19 Kae toe fai atu au, Ko oi e ‵tau o tavini au ki ei? E a, e se ko tena tama tagata? E pelā eiloa mo au ne tavini atu ki tou tamana, ka tavini foki au ki a koe.”+
20 Tenā ne fai atu ei a Apisaloma ki a Aitofele: “Fai mai ki a au tou manatu.*+ Ne a ‵tou mea e ‵tau o fai?” 21 I konā loa ne fai atu a Aitofele ki a Apisaloma: “Fai ke ‵moe fakatasi koe mo avaga fakasalasala a tou tamana,+ ko latou kolā ne tiaki ne ia ke tausi te fale.*+ Tenā ka ‵logo ei a tino Isalaelu katoa me ko oti ne fai ne koe se mea ke takalialia malosi tou tamana ki a koe, kae ka fakamalosi atu i ei ki tino kolā e ‵lago ki a koe.” 22 Tenā ne fakatu ei ne latou se faleie mō Apisaloma i luga i te tuafale,+ kae ne ‵moe i ei a Apisaloma mo avaga fakasalasala a tena tamana+ i mua o tino Isalaelu katoa.+
23 I aso konā, ne ma‵natu aka a tino i pati kolā e fai atu ne Aitofele+ ne pati mai te Atua tonu. Tenā te pogai ne fakatāua ei a manatu o Aitofele, ne Tavita e pelā foki mo Apisaloma.