Te Lua Samuelu
17 Ne fai atu a Aitofele ki a Apisaloma: “Fakamolemole tuku mai ke filifili ne au ne tāgata e toko 12,000 ke ‵tu o afuli a Tavita i te po nei. 2 Ka fanatu au ki a ia i te taimi ko vāivāi ei a ia kae ko seai sena malosi,*+ ka fai ne au a ia ke polepole i te mataku; kae ko tino katoa kolā e ‵kau mo ia ka ‵tele, kae ko te tupu fua ka tamate ne au.+ 3 Tenā ko faka‵foki mai ei ne au a tino katoa ki a koe. A te ‵foki mai o tino katoa e fakalagolago ki te mea ka tupu ki te tagata e salasala koe ki ei. Tenā ko filemu i ei a tino katoa.” 4 Ne ‵lei ‵ki te manatu tenā i te kilokiloga a Apisaloma mo toeaina katoa o Isalaelu.
5 Kae ne fai atu a Apisaloma: “Fakamolemole, ‵kami mai foki a Husai te tino Alaki,+ ke faka‵logo aka tatou me ne a ana pati.” 6 Tenā ne fanatu ei a Husai ki a Apisaloma. Ne fai atu a Apisaloma ki ei: “Tenei te manatu ne fai mai ne Aitofele. E mata, e ‵tau o tau‵tali tatou i ei? Kafai e se ‵tau, fai mai la te mea e ‵tau o fai.” 7 I konā loa, ne fai atu a Husai ki a Apisaloma: “A te manatu ne fai mai ne Aitofele e se ‵lei i te taimi nei!”+
8 Muna a Husai: “E iloa ‵lei ne koe i tou tamana mo ana tāgata ne tino ‵mafi,+ kae ko oko eiloa i te lotou kaitaua, e pelā me se pea telā ko ‵galo ana tama i te vao.+ E se gata i ei, a tou tamana se toa,+ kae e se ‵moe fakatasi mo ana tino i te po. 9 I te taimi eiloa tenei e ‵muni tou tagata i se ana io me se isi koga aka;+ kae kafai e taua muamua mai a ia, ka fai aka a tino kolā ne ‵logo i te mea tenā, ‘A tino ne tau‵tali i a Apisaloma ko takavale!’ 10 Ke oko eiloa ki te tagata loto toa telā e ‵pau tena loto mo te loto o se leona+ ka vāivāi i te mataku, me e iloa ne tino Isalaelu katoa i tou tamana se tagata mafi+ kae ko tāgata kolā e ‵kau mo ia e loto ‵toa. 11 Tenei toku manatu e fai atu: Fakamaopoopo mai a tino Isalaelu katoa ki a koe, mai Tanu ke oko ki Pelesepa,+ ke tokouke e pelā eiloa mo one i te tai+, kae e ‵tau o ‵taki atu ne koe latou ki te taua. 12 Ka olo atu tatou o taua ki a ia i so se koga e maua ne tatou a ia i ei, kae ka taua atu tatou ki a ia e pelā eiloa mo te ‵sau telā e ‵to ki luga i te laukele; kae ka seai eiloa se tino i a latou e sao, e aofia i ei tou tamana mo se tagata telā e ‵kau mo ia. 13 Kafai e tele a ia ki se fakai, ka ave ne tino Isalaelu katoa a lōpu ki te fakai tenā, kae ka ‵futi mai ne tatou ki lalo i te vanu ke oko ki te taimi ko seai loa se tamā fatu e ‵toe i ei.”
14 Tenā ne fai atu ei a Apisaloma mo tāgata Isalaelu katoa: “E ‵lei atu te manatu o Husai te tino Alaki+ i lō te manatu o Aitofele!” Me ko oti ne fakaiku* aka ne Ieova ke fakaseaoga a te manatu gali o Aitofele,+ ko te mea ke mafai o fakaoko atu ne Ieova a puapuaga ki a Apisaloma.+
15 Fakamuli ifo, ne fai atu a Husai ki faitaulaga ko Satoka mo Aviata:+ “Tenei te manatu o Aitofele ki a Apisaloma mo toeaina o Isalaelu, kae tenei te manatu ne fai atu ne au. 16 Nei la, uga fakavave atu se fekau ki a Tavita kae fakailoa atu ki ei: ‘Sa ‵nofo i te asaga* o te koga lavaki i te po nei, kae na olo atu ki te suā feitu, i te mea ma fakaseai* ei a te tupu mo tino katoa kolā e ‵kau i a ia.’”+
17 A Ionatana+ mo Aimaasu+ e ‵nofo i Enelokelo;+ tenā ne fanatu ei se tavini fafine kae fai atu ki a lāua kae ne olo ei lāua o fakailoa atu ki te Tupu ko Tavita, me e se ma‵nako lāua ke lavea mai ne tino i a lāua e ulu atu ki loto i te fakai. 18 Kae ne lavea lāua ne se tamataene kae fakailoa atu ne ia ki a Apisaloma. Tenā ne ‵tele fakavave ei te tokolua konei kae oko atu ki te fale o se tagata Paulima+ telā e isi sena vaikeli. Olo ifo ei lāua ki loto i ei, 19 kae ne ‵fola ne te avaga a te tagata tenā se laugatu mai luga i te vaikeli kae tuku ki ei a fuaga saito kolā ko oti ne tuki; e seai se tino e iloa ne ia te mea tenā. 20 Ne oko atu a tavini a Apisaloma ki te fafine tenā i tena fale kae fesili atu ki ei: “Kofea a Aimaasu mo Ionatana?” Ne tali atu te fafine: “Ko ‵seke o olo ki te vaitafe.”+ Tenā ne salasala ei a tāgata konā ki a lāua kae seki maua ne latou, toe ‵foki atu ei ki Ielusalema.
21 I te ologa a tāgata konei, ne olo aka lāua mai lalo i te vaikeli kae ‵tele atu o fakailoa ki te Tupu ko Tavita. Ne fai atu lāua ki a ia: “‵Tu ki luga kae olo fakavave ki te suā feitu o te vaitafe, me tenei te manatu o Aitofele ne fai e uiga ki a koutou.”+ 22 I konā eiloa, ne ‵tu aka a Tavita mo ana tino katoa kae olo atu ki te suā feitu o te Iolitana. I te vaveao ko seai eiloa se tino ne ‵toe kae seki fanatu ki te suā feitu o te Iolitana.
23 I te iloaga ne Aitofele me ne seki fakaaoga tena manatu, ne fakatoka tena asini kae fanatu ki tena fale i tena fakai.+ I te otiga ne fai atu ne ia a fakatonuga ki tino i tena kāiga,+ ko te mea eiloa ko fano o noua.+ Tenā ne mate ei a ia kae tanu i te koga e tanu i ei ana tupuga.
24 I te taimi tenā, ne fanatu a Tavita ki Manaima,+ kae ko Apisaloma ne olo atu ki te suā feitu o te Iolitana fakatasi mo tāgata Isalaelu katoa. 25 Ne fai ne Apisaloma a Amasa+ ke fai mo takitaki o tena kautau e sui ei a Ioapo;+ Amasa ko te tama tagata a te tagata e igoa ki a Ietila te tino Isalaelu, telā ne ‵moe fakatasi mo Apikaila+ te tama fafine a Nahasa, te tuagane o Seluia, te mātua o Ioapo. 26 Ne ma‵nava a tino Isalaelu mo Apisaloma i te fenua ko Kileata.+
27 I te taimi ne oko atu ei a Tavita ki Manaima, a Sopi te tama tagata a Nahasa mai Lāpa+ o tino Amoni, Makila+ te tama tagata a Amielu mai Lotepa, mo Pasilai+ te tino Kileata mai Lokelima 28 ne aumai ne latou a moega, pesini, ulo kele, saito, kalite, falaoa ‵mata, saito tao, piini, lenitili, saito ma‵lō, 29 hani, pata, mamoe mo susu ma‵keke. Ne aumai ne latou a mea katoa konei ki a Tavita mo ana tino ke ‵kai,+ me ne fai mai latou: “A tino ko fia‵kai kae ko fi‵ta kae fiainu foki i te koga lavaki.”+