Esoto

9 Ne fai atu a Ieova ki a Mose: “Fano ki loto i te Falao kae fai atu ki a ia, ‘Konei a pati a Ieova te Atua o tino Epelu ne fai mai: “Uga atu oku tino ke olo ko te mea ke tavini mai latou ki a au.+ 2 Kae kafai e ita koe ma uga atu latou ke olo kae taofi faeloa ne koe latou, 3 kiloke! ka ‵kapa atu te lima o Ieova+ ki luga i otou lafu manu. Ki luga i solofanua, asini, kamela, lafu pulumakau mo lafu mamoe, ka poko eiloa se mala fakamataku.+ 4 Kae ka faka‵kese eiloa ne Ieova a lafu manu a tino Isalaelu mo lafu manu a tino Aikupito, kae ka seai eiloa se manu a se tino Isalaelu e mate.”’”+ 5 E se gata i ei, ne fakatoka ne Ieova te taimi tonu e tupu ei te mea tenei, ana muna: “I te aso taeao ka fai ne Ieova a te mea tenei i luga i te fenua.”

6 Kae ne fai eiloa ne Ieova a te mea tenei i te aso mai tua ifo, ne kamata o ‵mate a lafu manu+ katoa a tino Aikupito, kae e seai eiloa se manu e tasi i lafu manu a tino Isalaelu ne mate. 7 I te taimi ne uga atu ei ne te Falao ana tavini ke onoono ki ei, kiloke! e seai eiloa se manu e tasi i lafu manu a tino Isalaelu ne mate. E tiga te feitu tenā, ne tumau eiloa te loto makeke o te Falao, kae ne seki uga atu ne ia a tino ke olo.+

8 Tenā ne fai atu ei a Ieova ki a Mose mo Alona: “Faka‵fonu oulua lima ki lefu mai se ogaumu, kae ‵tau o ‵pei ne Mose a lefu konā ki luga i te ea i mua o te Falao. 9 Kae ka fai e pelā me se ‵pefu manifinifi i luga i te fenua kātoa o Aikupito, kae ka fai mo fai ne fakafoa i luga i tino mo manu i te fenua kātoa o Aikupito.”

10 Ne puke ne lāua a lefu mai se ogaumu kae olo atu ki mua o te Falao, ne ‵pei aka ne Mose a lefu konā ki luga i te ea, kae ne fai eiloa mo fai ne fakafoa i luga i tino mo manu. 11 Ne seki mafai ne faitaulaga faivailakau o olo atu ki mua o Mose ona ko fakafoa, me ko ‵sae aka i luga i faitaulaga faivailakau mo tino Aikupito katoa.+ 12 Kae ne talia ne Ieova a te loto o te Falao ke makeke, kae ne seki fakalogo a ia ki a lāua, e pelā eiloa mo pati a Ieova ki a Mose.+

13 Tenā ne fai atu ei a Ieova ki a Mose: “Ala ‵malu i te taeao kae fanatu ki mua o te Falao kae fai atu ki a ia, ‘Konei a pati a Ieova te Atua o tino Epelu ne fai mai: “Uga atu oku tino ke olo ko te mea ke tavini mai latou ki a au. 14 Me nei la ka fakaoko atu ne au aku mala katoa ki a koe, au tavini, mo ou tino, ko te mea ke iloa ne koe me seai eiloa se tino e ‵pau mo au i te lalolagi kātoa.+ 15 Me ko oti ne ‵tau o ‵fola atu toku lima i te taimi tenei o ‵ta koutou mo ou tino ki se mala fakamataku, kae ‵fulu faka‵ma* koutou mai luga i te lalolagi. 16 Kae ko te pogai eiloa tenei ne tausi ei ne au a koe ke ola: ke fakaasi atu ki a koe a toku ‵mana kae ke folafola atu toku igoa i te lalolagi kātoa.+ 17 E a, koi fai eiloa ne koe a faifaiga matagā ki oku tino mai te sē uga atu o latou ke olo? 18 Ka faka‵to ifo ne au se vaiua fatu fakamataku ma taeao i te taimi penei, se mea telā e seki tupu aka eiloa i Aikupito mai te kamataga ke oko mai eiloa ki te taimi nei. 19 Tela la, fakatonu atu ke aumai otou lafu manu katoa mo otou mea katoa i te vao ki loto i fale. A tino mo manu kolā e ‵nofo atu i te vao kae seki aumai ki loto i te fale ka ‵mate eiloa māfai e ‵to a te vaiua fatu ki luga i a latou.”’”

20 A tavini a te Falao kolā ne ma‵taku ki pati a Ieova ne aumai fakavave olotou tavini mo olotou lafu manu ki loto i fale, 21 kae ko tino kolā ne seki ma‵taku ki pati a Ieova ne tiaki atu eiloa olotou tavini mo olotou lafu manu i te vao.

22 Ne fai atu a Ieova ki a Mose: “Sisi aka tou lima ki te lagi, ko te mea ke ‵to ifo te vaiua fatu ki luga i te fenua kātoa o Aikupito,+ ki luga i tāgata mo manu mo lakau katoa o te vao i te fenua o Aikupito.”+ 23 Tela la, ne sisi aka ne Mose tena tokotoko ki luga i te lagi, kae ne fai ne Ieova ke ‵pa fa‵tili kae ‵to te vaiua fatu, kae ne tō ifo te afi* ki te lalolagi, kae ne fai faeloa ne Ieova ke ‵to te vaiua fatu ki luga i te fenua o Aikupito. 24 Ne ‵to te vaiua fatu, kae ne ‵lapa a uila i loto i te vaiua fatu. Ko oko eiloa i te ‵lotu; ne seki tupu eiloa se mea penei i te fenua o Aikupito talu mai te taimi ne fai ei mo fai se fenua.+ 25 Ne ‵to ifo te vaiua fatu ki luga i mea katoa i te fenua o Aikupito, mai tāgata ki manu; kae ne fakamasei kae fati‵fati valevale i ei a lakau katoa.+ 26 Ko te kogā fenua fua o Kosena, telā e ‵nofo i ei a tino Isalaelu, ne seki ‵to te vaiua fatu i ei.+

27 Ne uga te fekau a te Falao ki a Mose mo Alona ke olo atu kae fai atu ki a lāua: “Au ko agasala i te taimi tenei. A Ieova e amiotonu, kae ko au mo oku tino e ‵se. 28 Fakatagi atu ki a Ieova ke fakagata te ‵pa o fa‵tili mo te vaiua fatu a te Atua. Ko talia ei ne au ke uga atu koutou ke olo, kae ka se toe ‵nofo eiloa koutou.” 29 Ne fai atu a Mose ki a ia: “I te taimi eiloa e fano ei au ki tua mo te fakai, ka sisi aka oku lima ki a Ieova. Ka gata ei te ‵pa o fa‵tili mo te vaiua fatu ka se toe ‵to, ko te mea ke iloa ne koe i te lalolagi e o Ieova.+ 30 Kae e pelā mo koe mo au tavini, ko leva ne iloa ne au me e se mafai o ma‵taku koutou ki a Ieova te Atua.”

31 I te taimi nei, ko oti ne fakamaseigina a lakau ko te lino* mo kalite, me ko pili o ‵lei ma tau te kalite kae ko te lino ko oti ne kamata o ‵somo ana pula. 32 Kae ko te saito mo te sipele* ne seki fakamaseigina, me e ‵fua fakamuli.* 33 Ne fano a Mose ki tua mo te fakai mai i te Falao kae sisi aka ana lima ki luga i a Ieova, gata ei a te ‵pa o fa‵tili mo te ‵to o te vaiua fatu kae ne gata foki i ei te ‵to ifo o te vaiua ki te laukele.+ 34 I te taimi ne lavea ei ne te Falao me ko se ‵to te vaiua, mo te vaiua fatu, kae ko se ‵pa foki a fa‵tili, ne toe agasala foki a ia kae fakamakeke tena loto,+ ko ia e pelā foki mo ana tavini. 35 Kae ne tumau eiloa te loto makeke o te Falao, kae ne seki uga ne ia a tino Isalaelu ke olo, e pelā eiloa mo pati a Ieova ne fai e auala i a Mose.+