Esoto

6 Ne fai atu a Ieova ki a Mose: “Ka lavea eiloa ne koe a te mea telā ka fai ne au ki te Falao.+ Ka faimālō eiloa a ia e auala i toku ‵mana ke uga atu latou kea‵tea, kae ka faimālō a ia e auala i toku ‵mana ke afuli latou kea‵tea mai tena fenua.”+

2 Tenā ne fai atu ei te Atua ki a Mose: “Au ko Ieova. 3 Kae ko au ne fakasae sāle atu ki a Apelaamo, Isaako mo Iakopo e pelā me ko te Atua Malosi Katoatoa,+ kae e pelā mo toku igoa ko Ieova+ ne seki fakailoa atu ne au ki a latou.+ 4 Ne fai foki ne au taku feagaiga mo latou ke tuku atu ki a latou te fenua o Kanana, te fenua telā ne ‵nofo ei latou e pelā me ne tino fakaa‵tea.+ 5 Nei la, ko oti ne lagona ne au a te mā‵nava fi‵ta o tino Isalaelu, kolā e fakapologa ne tino Aikupito, kae ko masaua ne au taku feagaiga.+

6 “Tela la, fai atu ki tino Isalaelu: ‘Au ko Ieova, kae ka aumai ne au koutou kea‵tea mai lalo i amoga ‵mafa a tino Aikupito kae faka‵sao koutou mai te ‵nofo pologa,+ kae ka puke ne au koutou ki toku lima mafi* kae fakasala a tino Aikupito.+ 7 Kae ka puke ne au koutou mo fai oku tino, kae ka fai au mo otou Atua,+ kae ka iloa ei ne koutou i a au ko Ieova te otou Atua telā ka aumai ne ia koutou kea‵tea mai lalo i amoga ‵mafa a tino Aikupito. 8 Kae ka aumai ne au koutou ki loto i te fenua telā ne tauto* au ke tuku atu ki a Apelaamo, Isaako mo Iakopo; kae ka tuku atu ne au mō koutou a te fenua tenā.+ Au ko Ieova.’”+

9 Fakamuli ifo, ne fai atu ne Mose te fekau tenei ki tino Isalaelu, kae ne seki faka‵logo latou ki a Mose ona ko te lotou loto vāi‵vai mo faifaiga ma‵sei ne fai ki a latou e pelā me ne pologa.+

10 Tenā ne faipati atu ei a Ieova ki a Mose: 11 “Fano ki loto kae fai atu ki te Falao, te tupu o Aikupito, me e ‵tau o uga atu ne ia a tino Isalaelu ke olo kea‵tea mai tena fenua.” 12 Kae ne tali atu a Mose ki a Ieova: “Kiloke! A tino Isalaelu e seki faka‵logo mai ki a au;+ e mafai la pefea o fakalogo mai a te Falao ki a au, i a au e se apo i te faipati?”*+ 13 Kae ne toe fai atu ne Ieova ki a Mose mo Alona a fakatonuga kolā e ‵tau o tuku atu ki tino Isalaelu mo te Falao, te tupu o Aikupito, ko te mea ke aumai kea‵tea a tino Isalaelu mai te fenua o Aikupito.

14 Konei a ulu o kāiga o olotou tamana: A tama tāgata a Leupena, te toekimua a Isalaelu,+ ko Hanoka, Palu, Eselona mo Kami.+ Konei a kāiga o Leupena.

15 A tama tāgata a Simeona ko Lemuelu, Iamina, Ohata, Iakini, Sioala mo Saula te tama tagata a te fafine Kanana.+ Konei a kāiga o Simeona.

16 Konei a igoa o tama tāgata a Levi+ e ‵tusa mo te fakasologa o olotou kāiga: ko Kelesona, Koate mo Melali.+ A te leva o te olaga o Levi e 137 tausaga.

17 A tama tāgata a Kelesona ko Lipini mo Simei, e ‵tusa mo lā kāiga.+

18 A tama tāgata a Koate ko Amalamo, Isala, Hepelona mo Usieli.+ A te leva o te olaga o Koate e 133 tausaga.

19 A tama tāgata a Melali ko Mali mo Musi.

Konei a kāiga o tino Levi, e ‵tusa mo te fakasologa o olotou kāiga.+

20 Ne puke ne Amalamo a Iokapeta, te tuagane o tena tamana, mo fai tena avaga.+ Ne fai ana tama ko Alona mo Mose.+ A te leva o te olaga o Amalamo e 137 tausaga.

21 A tama tāgata a Isala ko Kola,+ Nefeku mo Sikeli.

22 A tama tāgata a Usieli ko Misaeli, Elisafana+ mo Siteli.

23 Ne puke ne Alona a Elisepa, te tama fafine a Aminatapu, te tuagane o Nasona,+ mo fai tena avaga. Ne fai ana tama ko Natapu, Apiu, Eleasalo mo Itamala.+

24 A tama tāgata a Kola ko Asili, Elekana mo Apiasafa.+ Konei a kāiga o tino Kola.+

25 Ne puke ne Eleasalo,+ te tama tagata a Alona, se tokotasi o tama fāfine a Putieli mo fai tena avaga. Ne fai tena tama ko Fineaso.+

Konei a ulu o kāiga o tino Levi i olotou tamana, e ‵tusa mo olotou kāiga.+

26 Konei a Alona mo Mose kolā ne faipati a Ieova ki ei: “Aumai kea‵tea a tino Isalaelu mai te fenua o Aikupito i potukau.”*+ 27 Ko lāua kolā ne fai‵pati atu ki te Falao, te tupu o Aikupito, ke aumai kea‵tea a tino Isalaelu mai i Aikupito. Ko Mose eiloa mo Alona+ konei.

28 I te aso tenā, i te taimi ne faipati atu ei a Ieova ki a Mose i te fenua o Aikupito, 29 ne fai atu a Ieova ki a Mose: “Au ko Ieova. Faipati atu ki te Falao, te tupu o Aikupito, a mea katoa e faipati atu ne au ki a koe.” 30 Tenā ne fai atu ei a Mose ki a Ieova: “Kiloke! Au e se apo i te faipati,* tela la, e mafai pefea o fakalogo mai te Falao ki a au?”+