Esoto

7 Tenā ne fai atu ei a Ieova ki a Mose: “Kiloke, ko oti ne fai ne au a koe e pelā me se Atua ki te Falao, kae ko tou taina ko Alona ka fai mo fai tau pelofeta.+ 2 Ke faipati ne koe a mea katoa kolā ka fakatonu atu ne au ki a koe. Ka faipati atu tou taina ko Alona ki te Falao, kae ka uga eiloa ne ia a tino Isalaelu ke olo kea‵tea mai tena fenua. 3 Kae e pelā mo au, ka talia ne au ke makeke te loto o te Falao,+ kae ka fakauke ne au aku fakailoga mo aku vavega i luga i te fenua o Aikupito.+ 4 Ka se fakalogo atu eiloa a te Falao ki a koulua, kae ka puke atu toku lima ki Aikupito o aumai oku tino e tokouke,* ko oku tino Isalaelu, kea‵tea mo te fenua o Aikupito e auala i fakasalaga ‵mafa.+ 5 Kae ka iloa ‵lei ne tino Aikupito i a au ko Ieova+ māfai e ‵fola atu toku lima o taua ki Aikupito kae aumai a tino Isalaelu kea‵tea mai i a latou.” 6 Ne fai ne Mose mo Alona a mea kolā ne fakatonu atu ne Ieova ki a lāua; ne fai eiloa ne lāua a mea katoa. 7 Ko 80 tausaga o Mose kae ko Alona ko 83 ana tausaga i te taimi ne fai‵pati atu ei lāua ki te Falao.+

8 Muna a Ieova ki a Mose mo Alona: 9 “Kafai e fai atu te Falao ki a koulua, ‘Fai aka se vavega,’ ko fai atu ei koe ki a Alona, ‘Puke tou tokotoko kae ‵pei ki lalo i mua o te Falao.’ Ko fai ei te tokotoko mo fai se gata lasi.”+ 10 Ne olo a Mose mo Alona ki loto i te Falao kae ne fai katoa ne lāua a mea kolā ne fakatonu atu ne Ieova. Ne ‵pei ne Alona a tena tokotoko ki lalo i mua o te Falao mo ana tavini kae ne fai te tokotoko mo fai se gata lasi. 11 Kae ne ‵kami mai ne te Falao a tāgata ‵poto mo tino fai tapune, kae ne fai foki ne faitaulaga faivailakau o Aikupito+ a te mea eiloa tenā ki olotou mea faivailakau.*+ 12 Ne ‵pei ne tino taki tokotasi olotou tokotoko ki lalo, kae ne fai a tokotoko konā mo fai ne gata ‵lasi; kae ne folo ne te tokotoko o Alona olotou tokotoko katoa. 13 Kae ne tumau eiloa te loto makeke o te Falao,+ kae ne seki fakalogo a ia ki a lāua, e pelā eiloa mo pati a Ieova.

14 Tenā ne fai atu ei a Ieova ki a Mose: “A te Falao ko oko eiloa i te loto makeke.+ E ita tou tagata ma uga a tino ke olo kea‵tea. 15 Fano ki te Falao ma taeao. Kiloke! Ka fanaifo tou tagata ki te vaitafe! Kae e ‵tau o tu atu koe i konā o fakafetaui ki a ia i te kaugutu o te Vaitafe o te Naila; kae puke i tou lima a te tokotoko telā ne liu gata.+ 16 Kae e ‵tau o fai atu koe ki a ia, ‘Au ne uga mai ne Ieova te Atua o tino Epelu ke fai atu ki a koe+ penei: “Uga atu oku tino ke olo kea‵tea ko te mea ke tavini mai ki a au i te koga lavaki,” kae e seki fakalogo eiloa koe ke oko mai ki te taimi nei. 17 Konei la a pati a Ieova ne fai mai: “E auala i te mea tenei ka iloa ei ne koe i a au ko Ieova.+ Ka ‵kini nei ne au a te vai i loto i te Vaitafe o te Naila ki te tokotoko tenei i toku lima, kae ka liu toto a te vai. 18 Kae ka ‵mate a ika i loto i te Naila kae manogi ‵pou a te Naila, kae ka se mafai ne tino Aikupito o inu ki vai mai te Naila.”’”

19 Tenā ne fai atu ei a Ieova ki a Mose: “Fai atu ki a Alona, ‘Puke tou tokotoko kae ‵fola atu tou lima ki luga i vai o Aikupito,+ ki luga i ana vaitafe, ki luga i ana tamā vaitafe,* ki luga i ana koga sua‵sua,+ kae ki luga foki i ana koga tausi vai katoa ko te mea ke liu toto.’ Ka liu toto a vai katoa i te fenua o Aikupito, ke oko ki vai i loto i meāfale kolā e faite ki lakau mo fatu.” 20 Ne fai ne Mose mo Alona a fakatonuga katoa a Ieova i te taimi eiloa tenā. Ne sisi aka ne ia a te tokotoko kae ‵kini atu te vai i loto i te Vaitafe ko te Naila i mua o te Falao mo ana tavini, kae ne liu toto a vai katoa i loto i te vaitafe.+ 21 Ne ‵mate katoa a ika+ i loto i te vaitafe kae ne kamata o ‵pou te vaitafe, kae ne seki mafai ne tino Aikupito o inu ki vai mai te Naila,+ kae ne ‵fonu a te fenua o Aikupito i toto.

22 Kae ne fai foki a te mea tenā ne faitaulaga faivailakau o Aikupito ki olotou poto ‵funa.+ Tela la, ne tumau eiloa te loto makeke o te Falao, kae ne seki fakalogo a ia ki a lāua e pelā eiloa mo pati a Ieova.+ 23 Tenā ne foki atu ei a te Falao ki tena fale, kae ne seki saga atu ki te mea tenā. 24 Ne keli ne tino Aikupito katoa a vaikeli i feitu katoa o te Naila ke maua ne vai mo inu, me ko se mafai ne latou o inu ki vai mai te Naila. 25 Kae ne oti atu a aso e fitu talu mai te taimi ne ‵kini ei ne Ieova a te Naila.