Esoto

8 Tenā ne fai atu ei a Ieova ki a Mose: “Fano ki loto i te Falao kae fai atu ki a ia, ‘Konei a pati a Ieova ne fai mai: “Uga atu oku tino ke olo ko te mea ke tavini mai latou ki a au.+ 2 Kafai e ita eiloa koe ma uga atu latou ke olo, ka fakamalaia ne au ou kogā fenua katoa ki lane.+ 3 Kae ka ‵fonu a te Vaitafe o te Naila i lane, kae ka olo aka latou kae ulu atu ki loto i tou fale, tou potu moe, ki luga i tou moega, ki loto i fale o au tavini mo fale o ou tino, ki loto i au ogaumu, e pelā foki mo au mea palu falaoa.*+ 4 Ka olo atu a lane ki luga i a koe, ou tino mo au tavini katoa.”’”

5 Fakamuli ifo, ne fai atu a Ieova ki a Mose: “Fai atu ki a Alona, ‘‵Fola tou lima mo tou tokotoko ki luga i vaitafe, tamā vaitafe o te Naila mo koga sua‵sua, kae fai ke olo aka a lane ki luga i te fenua o Aikupito.’” 6 Ne ‵fola atu te lima o Alona ki luga i vai o Aikupito, kae ne kamata o olo aka a lane kae ne ‵fonu eiloa te fenua o Aikupito. 7 Ne fai foki ne faitaulaga faivailakau a te mea tenā e auala i olotou poto ‵funa, kae ne fai foki ne latou ke olo aka a lane ki te fenua o Aikupito.+ 8 Tenā ne kalaga atu ei a te Falao ki a Mose mo Alona kae fai atu: “Fakatagi atu ki a Ieova ke ave kea‵tea a lane mai i a au mo oku tino,+ me ko manako au o uga atu a tino ke olo ko te mea ke mafai o ofo atu olotou taulaga ki a Ieova.” 9 Tenā ne fai atu ei a Mose ki te Falao: “E tuku atu ne au ki a koe a te tauliaga ke fakailoa mai ki a au a te taimi e ‵tau ei o fai ne au te fakatagi ke ave kea‵tea a lane mai i a koe, au tavini, ou tino mo otou fale. Ko lane fua i loto i te Vaitafe ko te Naila ka tuku.” 10 Ne fai atu a te Falao: “Ma taeao.” Kae ne fai atu a Mose: “Ka fai eiloa te mea tenā e fai mai ne koe, ko te mea ke iloa ne koe me seai eiloa se isi tino e ‵pau mo Ieova te motou Atua.+ 11 Ka olo eiloa kea‵tea a lane mai i a koe, otou fale, au tavini mo ou tino. Ka ‵nofo fua latou i loto i te Naila.”+

12 Ne tiakina ne Mose mo Alona a te Falao, kae ne fakatagi atu a Mose ki a Ieova e uiga ki lane kolā ne aumai ne Ia ki luga i te Falao.+ 13 Tenā ne fai ei ne Ieova te mea telā ne fakatagi atu ki ei a Mose, kae ne kamata o ‵mate a lane i loto i fale, i koga ateatea mo te vao. 14 Ne fakaputu aka ne latou a lane ki fakaputuga e uke, kae ne kamata o ‵pou a te fenua. 15 I te laveaga ne te Falao me ko seai ne lane, fakamakeke ei ne ia tena loto+ kae ita ma fakalogo ki a lāua, e pelā eiloa mo pati a Ieova.

16 Muna a Ieova ki a Mose: “Fai atu ki a Alona, ‘Sisi tou tokotoko kae ‵kini ki te ‵pefu o te laukele, kae e ‵tau o fai a mea konā e pelā me ne namu* i te fenua kātoa o Aikupito. 17 Ne fai ne lāua te mea tenā. Ne ‵fola te lima o Alona mo tena tokotoko kae ‵kini ki te ‵pefu o te laukele, kae ne o‵mai a namu ki luga i tāgata mo manu. Ne fai a ‵pefu katoa o te laukele mo fai a namu i te fenua kātoa o Aikupito.+ 18 Ne taumafai a faitaulaga faivailakau o fai te mea tenā ke aumai a namu e auala i olotou poto ‵funa,+ kae ne seki mafai ne latou. Kae ne o‵mai a namu ki luga i tāgata mo manu. 19 Ne fai atu a faitaulaga faivailakau ki te Falao: “A te mea tenā ko te matikao lima o te Atua!”+ Kae ne tumau eiloa te loto makeke o te Falao, kae ne seki fakalogo ki a lāua, e pelā eiloa mo pati a Ieova.

20 Tenā ne fai atu ei a Ieova ki a Mose: “Ala ‵malu i te taeao kae fanatu ki mua o te Falao. Kiloke! Ka fanaifo a ia ki te vaitafe! Kae e ‵tau o fai atu koe ki a ia, ‘Konei a pati a Ieova ne fai mai: “Uga atu oku tino ke olo ko te mea ke tavini mai latou ki a au. 21 Kae kafai e se uga ne koe oku tino ke olo kea‵tea, ka uga atu ne au ki luga i a koe, au tavini, ou tino, kae ki loto foki i otou fale a lagofufu;* kae ka ‵fonu a fale o tino Aikupito i lagofufu, kae ka ‵fonu foki te laukele telā e ‵tu ei latou* i lagofufu. 22 I te aso tenā ka ‵vae ne au kea‵tea a te fenua o Kosena telā e ‵nofo i ei oku tino. Ka seai ne lagofufu i te koga tenā,+ kae e auala i te mea tenei, ka iloa ei ne koe i a au, Ieova, e nofo i te fenua tenei.+ 23 Kae ka fai ne au ke ‵kese te tulaga o oku tino mo ou tino. Ka matea ne koe te fakailoga tenei ma taeao.”’”

24 Kae tenā eiloa te mea ne fai ne Ieova, kae ne kamata o ulu atu a mumuga lagofufu ki te fale o te Falao mo fale o ana tavini mo te fenua kātoa o Aikupito.+ Ne fakamasei a te fenua kātoa ne lagofufu.+ 25 Fakamuli loa, ne kalaga atu a te Falao ki a Mose mo Alona ana muna: “Olo o ofo atu otou taulaga ki te Atua i te fenua tenei.” 26 Kae ne fai atu a Mose: “E se ‵tau o fai a te mea tenā me i te mea telā ka ofo atu ne matou ki a Ieova te motou Atua se mea fakatakalialia ki tino Aikupito.+ Kafai e ofo atu ne matou se taulaga telā e takalia‵lia ki ei a tino Aikupito i mua eiloa o latou, e a, ka se peipei matou ne latou ki fatu? 27 Ka ma‵laga atu matou ki te koga lavaki i aso e tolu, kae ka ofo atu ne matou i konā te taulaga ki a Ieova te motou Atua e pelā eiloa mo ana pati ne fai mai ki a matou.”+

28 Muna a te Falao: “Ka uga atu ne au koutou ke olo o ofo atu otou taulaga ki a Ieova te otou Atua i te koga lavaki. Kae e se ‵tau o olo koutou ke ‵mao. Fakatagi atu ki a ia mō au.”+ 29 Tenā ne fai atu ei a Mose: “Au nei ka fano kea‵tea mai i a koe, ka fakatagi atu au ki a Ieova kae ka olo kea‵tea a lagofufu mai i te Falao, ana tavini mo ana tino ma taeao. Kae e ‵tau o fakagata ne te Falao tena faitogafiti* ki a matou mai te ita ma uga atu a tino ke olo o ofo atu a taulaga ki a Ieova.”+ 30 Tenā ne tiaki ei ne Mose a te Falao kae fakatagi atu ki a Ieova.+ 31 Ne fai ne Ieova a te mea telā ne fai atu a Mose ki ei, kae ne olo kea‵tea a lagofufu mai i te Falao, ana tavini mo ana tino. E seai eiloa se lagofufu e tasi ne ‵toe. 32 Kae ne toe fakamakeke foki ne te Falao a tena loto kae ne seki uga atu ne ia a tino Isalaelu ke olo.