Isaia
19 Se fekau ‵mafa e uiga ki Aikupito:+
Kiloke! A Ieova e tele i luga i se kaumana makini kae e vau ki Aikupito.
A atua sē aoga o Aikupito ka pole‵pole i ana mua,+
Kae ko te loto o Aikupito ka liuvai.
2 “Ka fakamalosi aka ne au a tino Aikupito ke ‵teke atu ki tino Aikupito,
Kae ka taua latou i a latou eiloa,
Ko te tino e tokotasi ki tena taina mo tena tuakoi,
Ko fakai ki nisi fakai, ko malo ki nisi malo.
3 Kae ko tino Aikupito ka ‵numi valevale,
Kae ka faka‵numi ne au olotou palani.+
Ka ‵saga atu latou ki te fesoasoani mai i nisi atua,
Ki tino ‵lau mo tino e fesokotaki mo agaga o tino ‵mate mo tino fakamatala mea ‵tupu.+
4 Ka tuku atu ne au a Aikupito ki se matai faigata,
Kae ka pule atu ki a latou se tupu masei,”+ ko te folafolaga a te Aliki tonu, ko Ieova o kautau.
5 Ka ‵masa a vai o te tai,
Kae ko te vaitafe ka malō kae masa pakupaku.+
6 Kae ka manogi ‵pou a vaitafe;
A maga o te Naila o Aikupito ka gasolo o ‵masa kae malō.
Ka ‵pala katoa a mouku ‵loa mo nisi mouku aka.+
7 A lakau i tafa o te Vaitafe ko te Naila, i te gutu o te Naila,
Mo laukele katoa ne ‵toki i ei a fuaga i tafa o te Naila+ ka ‵masa pakupaku.+
Ka agina kea‵tea, kae ka ‵galo atu.
8 A tino faiika ka ‵tagi fanoanoa,
Ka ‵tagi a tino kolā e ‵pei olotou kafilo ki loto i te Naila,
Kae ka gasolo o mu‵tana a tino kolā e tatili i te vai.
9 Ka fakamasiasigina a tino kolā e ga‵lue ki filo mai te lakau ko te lino+ kolā ko oti ne faka‵tonu faka‵lei
Mo latou kolā e fai laugatu ‵kena ki te mea ‵laga laugatu.
10 Ka tuki palagina ana tino ‵laga laugatu;
Kae ka fanoa‵noa a tino galue ‵togi katoa.
11 A pelenise o Soani+ e va‵lea.
A toe tino fakatonutonu ‵poto a te Falao e tuku mai ne latou a pati fakatonutonu sē aoga.+
E mafai pefea o fai atu koe ki te Falao:
“Au se tino ne tupu mai i tino ‵poto,
Se tino ne tupu mai i tupu o aso mua”?
12 Kofea la otou tāgata ‵poto?+
Fai ke fakailoa atu ne latou ki a koe māfai e iloa ne latou a te mea ko oti ne fakaiku aka ne Ieova o kautau e uiga ki Aikupito.
13 A pelenise o Soani ko oti ne fai ne latou a faifaiga va‵lea;
A pelenise o Nafi*+ ko oti ne fakaloiloigina;
A takitaki o ana matakāiga ko oti ne takitaki ‵se ne latou a Aikupito.
14 Ko oti ne ‵ligi ne Ieova ki luga i a ia a te agaga o te ‵numi;+
Kae ko oti ne takitaki ‵se ne latou a Aikupito i so se mea e fai ne ia,
E pelā me se tino konā e ‵mole i ana luaga.
15 Kae ko Aikupito ka seai ne ana galuega e fai,
Faitalia me fai mō te ulu io me ko te felo, te somo io me ko te mouku loa.
16 I te aso tenā a Aikupito ka fai pelā me se fafine, e polepole kae mataku ona ko te lima fakamataku o Ieova o kautau telā e sisi aka o ‵teke ki ei.+ 17 Kae ko te laukele o Iuta ka fai mo mea e mataku ki ei a Aikupito. E ma‵taku latou māfai e taku atu a te igoa o Iuta ona ko te fakaikuga ko oti ne fai ne Ieova o kautau mō latou.+
18 I te aso tenā e lima a fakai i te fenua o Aikupito ka fai‵pati ki te ‵gana Kanana+ kae tauto atu me ka alofa tumau latou ki a Ieova o kautau. A te fakai e tasi ka taku ko Te Fakai o te Ofa ki Lalo.
19 I te aso tenā, ka isi se fatafaitaulaga ki a Ieova i te kogaloto o te fenua o Aikupito mo se pou ki a Ieova i tena tuakoi. 20 Ka fai a te mea tenā e pelā me se fakailoga kae se molimau ki a Ieova o kautau i te fenua o Aikupito; me ka ka‵laga atu latou ki a Ieova ona ko tino pule fakasaua, kae ka uga atu ne ia ki a latou se fakaola, se tino sili, telā ka faka‵sao ne ia latou. 21 Kae ka lauiloa a Ieova i tino Aikupito, kae ko tino Aikupito ka iloa ne latou a Ieova i te aso eiloa tenā, kae ka ofo atu ne latou a taulaga mo meaalofa kae fai se tautoga ki a Ieova kae fakataunu eiloa ne latou. 22 Ka ta ne Ieova a Aikupito,+ e ta kae faka‵lei foki a latou; kae ka ‵foki mai latou ki a Ieova, kae ka saga atu a ia ki olotou fakatagi kae faka‵lei aka latou.
23 I te aso tenā ka isi se auala lasi+ ki tua mo Aikupito ki Asulia. Tenā ko vau ei a Asulia ki loto i Aikupito, kae ko Aikupito ki loto i Asulia, kae ko Aikupito ka tavini fakatasi atu mo Asulia ki te Atua. 24 I te aso tenā a Isalaelu ka fai pelā me ko te tokotolu fakatasi mo Aikupito mo Asulia,+ se fakamanuiaga i te lalolagi kātoa, 25 me i a Ieova o kautau ko oti ne fakamanuia ne ia, ana muna: “Ke manuia oku tino, ko Aikupito, mo galuega a oku lima, ko Asulia, mo toku tofi, ko Isalaelu.”+