Iosua

14 Konei a laukele ne maua ne tino Isalaelu ke fai mo olotou tofi i te fenua ko Kanana, kolā ne tuku atu ne Eleasalo te faitaulaga mo Iosua te tama tagata a Nuno mo ulu o kāiga o matakāiga o Isalaelu i olotou tamana ke fai mō latou.+ 2 Ne fai olotou tofi e auala i se vili,+ e pelā eiloa mo te fakatonuga a Ieova ne fai e auala i a Mose mō matakāiga e iva mo te āfa.+ 3 Ko oti ne tuku ne Mose a te tofi o nisi matakāiga e lua mo te āfa i te suā feitu o te Iolitana,+ kae e seai se tofi o tino Levi ne tuku atu ne ia.+ 4 A tino kolā ne ‵tupu mai i a Iosefa e lua matakāiga i ei,+ ko Manase mo Efalaima;+ kae e seai se tusaga o laukele ne tuku atu ne lāua ki tino Levi, kae na ko fakai+ fua ke ‵nofo latou i ei mo laukele moukuā ma olotou lafu manu mo olotou mea totino.+ 5 Tenā ne vaevae ei ne tino Isalaelu a te laukele e pelā eiloa mo te fakatonuga a Ieova ne fai ki a Mose.

6 Tenā ne olo atu ei a tāgata o Iuta ki a Iosua i Kilikala,+ kae ne fai atu a Kalepo+ te tama tagata a Iefune te tino Kinasa ki a ia: “E iloa ‵lei ne koe a pati ne fai atu ne Ieova+ ki a Mose te tagata o te Atua tonu+ e uiga ki a tāua i Katesa-panea.+ 7 Ko 40 oku tausaga i te taimi ne uga atu ei au ne Mose te tavini a Ieova ki Katesa-panea o iloilo aka a te fenua,+ kae ne foki mai au mo se lipoti tonu.*+ 8 E tiga eiloa ne fai ne oku taina kolā ne olo tasi mo au ke loto vāi‵vai a tino, ne tautali eiloa au i a Ieova toku Atua mo te loto kātoa.+ 9 Ne tauto mai a Mose i te aso tenā, ana muna: ‘A te fenua telā ne sasale koe i ei ka fai pelā me se tofi tumau o koe mo au tama tāgata, me i a koe ne tautali i a Ieova toku Atua mo te loto kātoa.’+ 10 Kae nei la, e ‵tusa mo tena tautoga,+ ko oti eiloa ne tausi ne Ieova toku ola+ i loto i tausaga e 45 talu mai te taimi ne fai ei ne Ieova te tautoga tenei ki a Mose kae koi sa‵sale a tino Isalaelu i te koga lavaki;+ kae nei la koi ola eiloa au ke oko ki te aso nei, kae ko 85 oku tausaga. 11 Kae i te aso nei koi malosi eiloa au e pelā mo te aso ne uga atu ei au ne Mose. Koi ‵pau eiloa toku malosi i te taimi nei mo te taimi tenā, ke fano ki te taua kae fai foki a nisi mea. 12 Tela la, tuku mai ki a au a te koga maugā telā ne tauto mai ei a Ieova i te aso tenā. E tiga eiloa ne ‵logo koutou i te aso tenā me e isi ne tino Anakima+ i konā mo olotou fakai ‵lasi e puipui faka‵lei,+ kae ko Ieova ka fakatasi mai eiloa ki a au,+ kae ka afuli ne au latou kea‵tea, e ‵tusa eiloa mo te tautoga a Ieova.”+

13 Tenā ne fakamanuia ei ne Iosua a Kalepo te tama tagata a Iefune kae tuku atu a Hepelona ki a ia mo fai tena tofi.+ 14 Tenā te pogai ne tuku ei a Hepelona ki a Kalepo te tama tagata a Iefune te tino Kinasa mo fai tena tofi ke oko mai ki te aso nei, me i a ia ne tautali i a Ieova te Atua o Isalaelu mo te loto kātoa.+ 15 A te igoa muamua o Hepelona ko Kiliata-alapa+ (Alapa ko te tagata sili mai tāgata Anakima). Kae ne seki toe ai eiloa ne taua i te fenua.+