Iosua

22 Ne fakamaopoopo mai ne Iosua a tino Leupena, tino Kato, mo te āfa o te matakāiga o Manase 2 kae fai atu ki a latou: “Ko oti ne fai ne koutou a mea katoa ne fakatonu atu ne Mose te tavini a Ieova ki a koutou,+ kae ko oti ne faka‵logo koutou ki toku leo e auala i mea katoa ne fakatonu atu ne au ki a koutou.+ 3 Ne seki fakapuli ne koutou otou taina i taimi katoa konei, ke oko mai ki te aso nei;+ kae ne faka‵logo koutou ki te fakatonuga ne tuku atu ne Ieova te otou Atua.+ 4 Nei la, ko oti ne tuku atu ne Ieova te otou Atua se malōlōga ki otou taina, e pelā eiloa mo tena tautoga ki a latou.+ Tela la, ko mafai nei ne koutou o ‵foki ki otou faleie i te fenua telā ne tuku atu ne Mose, te tavini a Ieova ki a koutou ke fai mō koutou i te suā feitu* o te Iolitana.+ 5 Ke fakaeteete kae ke faka‵logo faka‵lei eiloa koutou ki te fakatonuga mo te Tulafono ne tuku atu ne Mose te tavini a Ieova ki a koutou,+ e auala i te a‵lofa ki a Ieova te otou Atua,+ te sa‵sale i ana auala katoa,+ te tausi ki ana fakatonuga,+ te ‵piki ‵mau ki a ia,+ mo te tavini atu ki a ia+ mo otou loto kātoa mo otou ola kātoa.”*+

6 Tenā ne fakamanuia ei ne Iosua latou kae tuku atu ke olo, kae ne olo ei latou ki olotou faleie. 7 Ne tuku atu ne Mose ki te āfa o te matakāiga o Manase se tofi i Pasana,+ kae ki te suā āfa o te matakāiga ne tuku atu ne Iosua ki a latou a laukele i te feitu ki togala o te Iolitana,+ fakatasi mo olotou taina. Kae i te taimi ne uga ei ne Iosua latou ke olo ki olotou faleie, ne fakamanuia ne ia latou 8 kae fai atu ki a latou: “‵Foki ki otou faleie mo koloa e uke, mo lafu manu e uke, fakatasi mo siliva mo aulo, kopa mo fiti mo gatu e uke ‵ki.+ Puke otou vaega i mea ‵toe+ a otou fili i te taua, fakatasi mo mea ma otou taina.”

9 Mai tua ifo ne tiaki ne tino Leupena, tino Kato mo te āfa o te matakāiga o Manase a nisi tino Isalaelu i Sailo i te fenua o Kanana, kae ‵foki atu latou ki Kileata,+ ko te fenua ne tuku atu mō latou kae ne ‵nofo latou i ei e ‵tusa mo te fakatonuga a Ieova e auala i a Mose.+ 10 I te lotou okoatuga ki kogā koga o te Iolitana i te fenua o Kanana, ne faite ne tino Leupena, tino Kato mo te āfa o te matakāiga o Manase se fatafaitaulaga i konā i tafa o te Iolitana, se fatafaitaulaga lasi kae gali. 11 Fakamuli ifo, ne ‵logo a nisi tino Isalaelu i te mea tenā+ kae fai atu: “Kiloke! Ko oti ne faite ne tino Leupena, tino Kato mo te āfa o te matakāiga o Manase se fatafaitaulaga i te tuakoi o Kanana i kogā koga o te Iolitana i te feitu o tino Isalaelu.” 12 I te taimi ne ‵logo ei a tino Isalaelu e uiga ki te mea tenā, ne maopoopo a te fakapotopotoga kātoa o tino Isalaelu i Sailo+ ke olo atu o taua ki a latou.

13 Tenā ne uga atu ei ne tino Isalaelu a Fineaso,+ te tama tagata a Eleasalo te faitaulaga ki tino Leupena, tino Kato mo te āfa o te matakāiga o Manase i te fenua ko Kileata, 14 kae e tokosefulu a takitaki ne olo fakatasi mo ia, e tokotasi te takitaki mai kāiga takitasi i olotou tamana mai i matakāiga katoa o Isalaelu, kae ko latou ko ulu o kāiga takitasi i olotou tamana mai te fia afe* o tino Isalaelu.+ 15 I te lotou okoatuga ki tino Leupena, tino Kato mo te āfa o te matakāiga o Manase i te fenua ko Kileata, olotou muna ki a latou:

16 “Konei a pati ne fai mai ne te fakapotopotoga kātoa a Ieova: ‘Se a te faifaiga sē fakamaoni+ tenei ko fai ne koutou ki te Atua o Isalaelu? Ko oti ne fulitua koutou o se tau‵tali ki a Ieova i te aso nei e auala i te faitega o se fatafaitaulaga kae ‵teke atu ki a Ieova.+ 17 E a, e seki lava loa tatou i te mea ‵se telā ne fai i Peolo? E seki faka‵ma ne tatou a tatou eiloa mai te mea tenā ke oko mai ki te aso nei, faitalia me isi se mala ne oko mai ki te fakapotopotoga a Ieova.+ 18 Kae ko toe fulitua koutou i te aso nei o se tau‵tali ki a Ieova! Kafai e ‵teke koutou ki a Ieova i te aso nei, kae i te aso ma taeao ko kaitaua ei a ia ki te fakapotopotoga kātoa o tino Isalaelu.+ 19 Nei la, kafai e se ‵ma a te fenua telā ne tofi mō koutou, olo atu la ki te suā feitu ki te fenua o te tofi o Ieova+ telā e tu i ei te faleie tapu o Ieova+ ke ‵nofo fakatasi tatou, kae ke mo a eiloa e ‵teke koutou ki a Ieova, kae sa fai foki ne koutou ke ‵teke matou e auala i te faitega ne koutou se fatafaitaulaga i tafa o te fatafaitaulaga a Ieova te ‵tou Atua.+ 20 I te taimi ne fai ei ne Akana+ te tama tagata a Tila se faifaiga sē fakamaoni e uiga ki se mea telā ne ‵tau o fakaseai katoatoa atu, e a, e seki oko atu te kaitaua o te Atua ki te fakapotopotoga kātoa o tino Isalaelu?+ Kae e se ko ia fua te tino ne mate ona ko tena mea ‵se ne fai.’”+

21 Ona ko te mea tenei, ne tali atu ei a tino Leupena, tino Kato mo te āfa o te matakāiga o Manase ki ulu o te fia afe* o tino Isalaelu:+ 22 “Te Atua o atua ko Ieova!* Te Atua o atua ko Ieova!+ E iloa ne ia, kae ka iloa foki ne Isalaelu. Kafai ne ‵teke kae e se fakamaoni matou ki a Ieova, sa faka‵sao la matou i te aso nei. 23 Kafai e faite ne matou se fatafaitaulaga ke fulitua ei matou o se tau‵tali i a Ieova kae ke ofo atu a taulaga ‵sunu, taulaga meakai mo taulaga ‵kai fakatasi i luga i ei, ka fakaoko mai eiloa ne Ieova te taui tonu o te agasala tenā.+ 24 Ikai, ne fai ne matou a te mea tenei i se isi pogai, me ne fai aka matou, ‘I aso mai mua ka fai mai otou tama tāgata ki omotou tama tāgata: “Se a te otou mea e fai ki a Ieova te Atua o Isalaelu? 25 Ko oti ne fai ne Ieova a te Iolitana mo fai te tuakoi i te va o matou mo koutou, tino Leupena mo tino Kato. E seai eiloa se otou vaega mai i a Ieova.” Kae ka taofi aka ne otou tama tāgata omotou tama tāgata mai te tapuaki* atu ki a Ieova.’

26 “Tenā ne fai aka ei matou, ‘Ke na gasue‵sue nei tatou o faite se fatafaitaulaga, e se mo fai a taulaga ‵sunu io me ko nisi taulaga aka, 27 kae ke fai mo molimau i te va o koutou mo matou+ mo tino e ‵tupu mai i a tatou me ka fai eiloa ne matou a te motou taviniga ki a Ieova i ana mua e auala i omotou taulaga ‵sunu mo omotou nisi taulaga mo omotou taulaga ‵kai fakatasi,+ ko te mea ke se mafai o fai mai otou tama tāgata ki omotou tama tāgata i aso mai mua penei: “E seai se otou vaega mai i a Ieova.”’ 28 Tenā ne fai atu ei matou, ‘Kafai e fai mai ne latou a pati konā ki a tatou mo tino ka ‵tupu mai i a tatou i aso mai mua, ko fai atu ei tatou: “‵Kilo ki te fakatusa o te fatafaitaulaga a Ieova telā ne faite ne omotou tupuga, e se mo fai a taulaga ‵sunu io me ko nisi taulaga aka kae mo fai se molimau i te va o koutou mo matou.”’ 29 E seki mafau‵fau eiloa matou o ‵teke atu ki a Ieova kae fulitua o se tau‵tali i a Ieova+ i te aso nei e auala i te faitega o se fatafaitaulaga mo fai a taulaga ‵sunu, taulaga meakai mo nisi taulaga aka, i tafa o te fatafaitaulaga a Ieova te ‵tou Atua telā e tu i mua o tena faleie tapu!”+

30 I te taimi ne ‵logo ei a Fineaso te faitaulaga, takitaki o te fakapotopotoga, mo ulu o te fia afe* o tino Isalaelu kolā ne olo fakatasi atu mo ia i pati ne fai ne tino ne ‵tupu mai i a Leupena, Kato mo Manase, ne lotoma‵lie a latou.+ 31 Tenā ne fai atu ei a Fineaso te tama tagata a Eleasalo te faitaulaga ki tino kolā ne ‵tupu mai i a Leupena, Kato mo Manase: “Ko iloa ne tatou i te aso nei me e fakatasi mai eiloa a Ieova ki a tatou, me ne seki fai ne koutou te faifaiga sē fakamaoni tenei ki a Ieova. Nei la, ko oti ne faka‵sao ne koutou a tino Isalaelu mai lima o Ieova.”

32 Tenā ne toe ‵foki atu ei a Fineaso te tama tagata a Eleasalo te faitaulaga fakatasi mo takitaki mai i tino Leupena mo tino Kato i te fenua ko Kileata ki te fenua ko Kanana, kae avatu ne latou a te tala tenā ki nisi tino Isalaelu. 33 Kae ne lotoma‵lie a tino Isalaelu ki te lipoti tenā. Tenā ne ‵viki atu ei a tino Isalaelu ki te Atua, kae ne seki toe fai‵pati eiloa latou ke olo o taua ki tino Leupena mo tino Kato o fakaseai a te fenua e ‵nofo ei latou.

34 Tenā ne fakaigoa ei ne tino Leupena mo tino Kato a te fatafaitaulaga,* me ne fai pelā me “se molimau i te va o tatou me i a Ieova ko te Atua tonu.”