Mataupu e 98

Ne Kinau a Soko Kae ko Pili Mai te Mate o Iesu

NE ‵TU pili atu a Iesu mo ana soko ki te vaitafe ko te Iolitana, ko te koga telā ka olo atu ei latou mai te kogā laukele o Pelea ki Iuta. E tokouke a nisi tino ne faima‵laga fakatasi atu mo latou ki te Paseka i te 33 T.A., telā ka fai ne latou i te suā vaiaso.

Ne sasale atu a Iesu i mua o ana soko, kae ne ofo masei latou i tena loto toa. Masaua la me i ne nāi vaiaso mai mua atu i ei i te taimi ne mate ei a Lasalo, ne fanatu a Iesu mai Pelea ki Iuta, kae ne fakamalosi atu penei a Toma ki nisi tino: “‵Tou olo katoa ­fakatasi mo te Faiakoga, ke ‵mate fakatasi tatou mo ia.” Kae ke masaua foki me i te taimi ko oti ne toe fakatu aka ei ne Iesu a Lasalo, ne fai ne te Fono Maluga io me ko te Sanetulini te lotou aofaga ke tamate a ia. E se tioa eiloa o ma‵taku ana soko i te taimi ne toe olo atu ei latou ki Iuta.

Ke fakatokatoka latou ki mea kolā ka oko mai, ne ave ne Iesu te toko 12 ki se koga ke ‵nofo latou i a latou eiloa, ana muna: “Faka‵logo mai, a tatou e olo atu ki Ielusalema, ko tuku atu ei au, te Tama a te Tagata, ki lima o faitaulaga sili mo faiakoga o te Tulafono. E fakasala ne latou au ki te mate. E tuku atu foki au ki tino o fenua fakaatea. E fakatauemu mai ki a au, e ‵kini au, e fakasataulo au, kae i te tolu o aso ka toetu mai ei au mai te mate.”

Tenā loa te tolu o taimi i masina konā ne faipati ei a Iesu ki ana soko e uiga mō tena mate mo tena toetu. Kae e tiga eiloa ne fakalogo‵logo latou ki a ia, ne seki maina latou i ei. Kāti ne fai penā me ne tali‵tonu latou me ka toe fakatu aka i te lalolagi nei a te malo o Isalaelu, kae ne fakamoe‵moe latou ke ‵kau atu ki te ‵malu mo te tulaga taulia i te malo faka-te-lalolagi tenā fakatasi mo Keliso.

Ne aofia i a latou kolā ne faima‵laga atu ki te Paseka, ko ­Salome, te mātua o te avā apositolo ko Iakopo mo Ioane. Ne fakaigoa ne Iesu a tāgata konā ko “tama a te fatili,” kāti, e se taumate, ne fai penā ona ko lā uiga kaitaūa. I se taimi tai mata leva ne seki taofi aka ei ne laua te lā manakoga ke takutakua laua i te Malo o Keliso, kae ne fakailoa atu ne laua te lā manakoga tenā ki te lā mātua. I konā loa ne fakapilipili atu a ia ki a Iesu e uiga mō laua, ne punou ifo i ona mua, kae ne fai atu ne ia te fakamolemole.

Ne fesili atu a Iesu penei: “Se a te mea e manako koe ki ei?”

“Fai ake sau feagaiga ki aku tama tāgata konei e tokolua, ke nofo te suā tino i tou feitu fakaatamai, ka ko te suā tino i tou feitu fakamaui i te taimi e fai ei koe mo Tupu.”

Me ne maina a Iesu i te mafuaga o te fakamolemole tenā, ne fai atu ei a ia penei ki a Iakopo mo Ioane: “E se iloa ne koulua a te mea tenā e fesili mai ei koulua? E a, e ­mafai ne koulua o inu ki te ipu telā ka inu ei au?”

“E mafai ne maua,” ko te lā tali. E tiga eiloa ne fatoā fai atu a Iesu ki a laua me ka fepaki a ia mo fakasauāga fakama‵taku kae fakamuli loa ka fakasala a ia ki te mate, kāti e se maina laua me tenā te mea ne fakauiga a ia ki ei i te “ipu” telā e ‵tau o inu a ia ki ei.

Kae e tiga eiloa te feitu tenā, ne fai atu penei a Iesu ki a laua: “E inu eiloa koulua i taku ipu, ka ko ia telā ka nofo i toku feitu fakaatamai mo ia foki ka nofo i toku feitu fakamaui; e seai la saku pule i ei, na ko latou eiloa ko oti ne fakatoka ne toku Tamana mō latou a te koga tenā.”

Fakamuli ifo ko iloa ne nisi apositolo e tinogafulu a te mea telā ne fakamolemole ki ei a Iakopo mo Ioane, kae ne kaitaūa ei latou. Kāti ne fai‵pati malosi a Iakopo mo Ioane i te kinauga mua telā ne fai ne te kau apositolo me ko oi te ‵toe tino sili. A te lā fakamolemole i te taimi tenā ne fakaasi mai i ei me ne seki fakaaogā ne laua a pati fakatonutonu kolā ne avatu ne Iesu e uiga ki te mea tenā. Se mea fakafanoanoa me ne malosi ‵ki eiloa te lā manakoga ke takutakua laua.

Tela la, ke ‵teu aka te kinauga tenā, penā foki loa mo te loto masei telā ne mafua mai i ei, ne kalaga atu a Iesu ki te toko 12 ke maopoopo mai katoa. Ne fakatonutonu atu a ia ki a latou mo te alofa, ana muna: “E iloa ne koutou me i pule e isi se lotou malosi o pule ki tino, a takitaki foki e isi se lotou malosi i a latou o fakatonu a tino. Tenei la, e se tenā te auala mō koutou. Kafai se tino i a koutou e manako ke sili a ia, e ‵tau a ia o fai mo tavini a koutou.”

Ne fai ne Iesu te fakaakoakoga telā e ‵tau o fakaakoako latou ki ei, kae ne fakamatala mai ne ia penei: “E pelā mo te Tama a te Tagata, e seki vau au ke tavini mai a tino ki a au, kae ke tavini atu au; ke tuku atu foki a toku ola mō tino e tokouke.” Ne seki tavini atu fua a Iesu ki nisi tino kae ne oko atu tena taviniga ki a latou ke oko eiloa ki tena mate mō tino katoa! Ne ‵tau o maua ne te kau soko te uiga faka-Keliso telā ko te fia tavini atu ki tino i lō te manako ke tavini mai a tino kae ke fai latou e pelā me ne tino ma‵lalo i lō te fia oko atu ki tulaga takutakua. Mataio 20:17-28; Maleko 3:17; 9:33-37; 10:32-45; Luka 18:31-34; Ioane 11:16.

▪ Kaia ne ma‵taku ei te kau soko?

▪ Ne fakatokatoka pefea ne Iesu ana soko mō mea kolā ne ta‵kato mai i olotou mua?

▪ Se a te fakamolemole ne fai atu ki a Iesu, kae ne a mea ne oko atu i ei ki nisi apositolo?

▪ Ne ‵teu aka pefea ne Iesu te fakalavelave i va o ana apositolo?