Mataupu e 108

Ne Seki Mafai o ‵Po ne Latou a Iesu

KO OTI ne akoako atu a Iesu i te fale­tapu kae ne fai atu ne ia a tala faka­tusa e tolu ki ana fili fakalotu ke fakaasi faka‵sau atu ei te lotou ma‵sei. Ne kaitaūa te kau Falesaio kae ne ma‵natu aka ke faka­togafiti ne latou a ia ke faipati atu ne ia se mea telā ka mafai ei o puke faka­pagota ne latou a ia. Ne uga mai ne latou a nisi tino mai i olotou soko fakatasi mo nisi tino o te kau a Helota ki a Iesu, ke taumafai o faka‵se a ia.

“Te Faiakoga, e iloa ne matou i a koe se tino fakamaoni. E akoako atu ne koe a te mea tonu e uiga mō te loto o te Atua ki tino, kae e se saga eiloa koe ki manatu o tino, me i a koe e se fakailoga tino. Fakaasi mai nei ki a matou a tou taofi. E tapu i te Tulafono o ‵togi lafoga ki a Kaisala me ikai?”

Ne seki ‵segi a Iesu i olotou pati takolekole. E iloa ne ia me kafai e fai atu a ia ‘Ikai, e se ‵tau o ‵togi te lafoga tenei,’ ka taia a ia i te agasala ko te ‵teke ki te malo o Loma. Kae kafai e fai atu a ia, ‘Ao, e ‵tau eiloa o ‵togi,’ ka takalia‵lia ki a ia a te kau Iutaia kolā e se fia ‵nofo mai lalo i te pulega a Loma. Tela la, ne tali atu a ia: “Kaia e tofotofo ei ne koutou au, koutou tino ‵loi? Fakaasi mai te tupe.”

Ne avatu ne latou a te tupe. Ne fesili atu a Iesu ki a latou, “I oi te ata mo te igoa tenei?”

Ne tali mai latou: “I o Kaisala.”

Telā, muna atu ei a Iesu ki a latou: “Ko ‵lei la, e ‵tau mo koutou o fai te otou tiute ki te Malo, pelā foki mo te otou tiute ki te Atua.” I te lagonaga ne latou a pati konei, ko oko eiloa i te lotou ofo. Tuku ei ne latou a Iesu kae olo keatea.

I te laveaatuga o te takavale o te kau Falesaio i te faiga o se mea ke ‵teke atu ki a Iesu, a te kau Satukaio, kolā e fai mai me e seai se toetu, ne olo atu ki a Iesu kae ne fesili atu penei: “Te Faiakoga, e penei te akoakoga a Mose: ‘Kafai e mate se tagata kae se afu, e ‵tau mo tena taina o avaga mo tena avaga, ko te mea ke maua ne tamaliki mō sui te tino telā ne mate.’ E isi se tautaina e tokofitu. Ne avaga te toekimua kae ne mate sē afu, telā tuku atu ei tena avaga ke avaga mo tena taina. Ne ­avaga foki ki ei a te tokolua, te tokotolu ke oko eiloa ki te tokofitu. Ka ko te fafine ne mate fakamuli atu. Nei la, kafai e oko ki te aso o te toetu, ko oi te tino i a latou e avaga mo ia, me i a latou ne a‵vaga katoa ki ei.”

Kae ne tali atu penei a Iesu ki a latou: “E ‵se koutou. E se maina koutou i Tusi io me ko te ‵mana o te Atua. Me kafai e toe‵tu mai a tino e ‵pau latou mo agelu i te lagi, e se a‵vaga. Kae e pelā mo te toetu; e seki faitau ­eiloa ne koutou a muna ko oti ne fai atu ne te Atua ki a koutou? Ana muna, ‘Au ko te Atua o Apelaamo, ko te Atua o Isaako mo te Atua o Iakopo.’ Ko tena uiga, a ia ko te Atua o tino ola, kae se se Atua o tino ‵mate. Ko oko eiloa i te otou ‵se.

I te lagonaga ne tino ana akoakoga, ne ofo latou i ei. Ke oko foki loa ki nisi faiakoga o te tulafono ne taku ‵tonu atu penei: “Te Faiakoga, ko oko eiloa i te ‵lei o tau faipatiga.”

Ne maopoopo fakatasi a Falesaio i te lagonaga ne latou i Satu­kaio ne se mafai o tali a fesili a Iesu. E tokotasi o latou, se faiakoga o te Tulafono, ne taumafai o fesili tofotofo ki a Iesu: “Te Faiakoga, se a te fakatonuga tafa sili i te Tulafono?”

Ne tali atu a Iesu: “‘E ‵tau mo koe o alofa ki a Ieova tou Atua mo tou loto kātoa, mo tou agaga kātoa, mo tou mafaufau kātoa.’ Tenā te tulafono tafa sili mo te aogā. Ko te lua o tulafono tafa sili i te aogā tenei: ‘E ‵tau mo koe o alofa ki tou tuakoi e pelā eiloa mo koe ki a koe.’ A te katoatoaga o te Tulafono a Mose mo akoakoga a pelofeta, e fakavae i luga i tulafono konei e lua.”

Ne fai mai a te faiakoga o te Tulafono ki a Iesu: “Fakafetai te Faiakoga! E tonu au muna, me ko Ieova fua te Atua kae seai ake se isi atua na ko ia eiloa e tokotasi. E ‵tau mo te tino o alofa ki te Atua mo tena loto kātoa, mo tena mafaufau kātoa, mo tena malosi kātoa. E ‵tau foki mo ia o alofa ki tena tuakoi e pelā mo ia ki a ia eiloa. E sili te fakalogo ki tulafono konei e lua, i lo te aumai o manu vaefa o ‵sunu i fata faitaulaga ke fai mo taulaga ‵sunu ki te Atua.”

Ne iloa ne Iesu te ‵lei o tena tali, telā fai atu ei a ia ki a ia penei: “E se ‵mao koe mai i te Malo o te Atua.”

Ko ‵tusa nei mo te tolu o aso​—te Aso Sa, te Aso Gafua, mo te Aso Lua​—ne akoako atu ei a Iesu i te faletapu. Ne fakalogo‵logo a tino ki a ia mo te fia‵fia, kae ne kaitaūa a takitaki lotu kae ne ma‵nako foki latou o tamate a ia. Mataio 22:15-40; Maleko 12:13-34; Luka 20:20-40.

▪ Se a te togafiti ne fai ne Falesaio ke ‵po ei ne latou a Iesu, kae ne a mea ne mafai o ‵tupu moi ne tali atu a ia, ao io me ikai?

▪ Ne fakatakavale pefea ne Iesu te togafiti a te kau Satukaio ke ‵po ne latou a ia?

▪ Se a te suā tofotofoga ne fai ne Falesaio ki a Iesu kae se a te mea ne iku mai i ei?

▪ I tena taviniga fakaoti i Ielusalema, e fia aso ne akoako atu ei a Iesu i te faletapu, kae se a te mea ne iku mai i ei?