Iuni

Ne fakamanuia ne Ieova a Kelisiano i te senitenali muamua ona ko fakama‵fuliga ne fai ne latou e ‵tusa mo olotou fakanofonofoga. Ne fakasauagina sāle latou, kāti i nisi taimi kolā ne seki fakamoe‵moe latou ki ei. Mafaufau ki te mea ne tupu ki a Panapa mo te apositolo ko Paulo i te lā talaiga i te fakai ko Lusa. Muamua la, ne tali fiafia lāua ne tino kolā ne fakalogo‵logo ki a lāua. Kae fakamuli ifo, ne fakaoso ne tino ‵teke “a te vaitino” kae ko nisi o tino eiloa konā ne peipei ne latou a Paulo kae tuku atu a ia ke mate. (Galu. 14:19) Kae ne tumau eiloa a Panapa mo Paulo i te talai atu i nisi koga. Ne a mea ne iku mai i ei? Ne maua ne lāua a “soko e tokouke” kae ko lā pati mo te lā fakaakoakoga ne fakamalosi atu ki taina tali‵tonu. (Galu. 14:​21, 22.) Ne maua ne tino e tokouke a mea aoga me ne seki ‵fiu vave a Panapa mo Paulo faitalia a fakasauaga. Kafai e se ‵fiu vave tatou i te faiga o te galuega ne fakatonu mai a Ieova ke fai, ka maua eiloa ne tatou a fakamanuiaga. w23.04 16-17 ¶13-14

Ne fakafesagai te Tupu ko Tavita mo fili fakama‵taku e tokouke i tena olaga, kae ne ‵sala faeloa a ia ki a Ieova mo se fesoasoani e auala i ‵talo. Ne mautinoa i a Tavita me ne fakalogologo kae tali ne Ieova ana ‵talo. E mafai foki o maua ne koe te loto talitonu tenā. Te Tusi Tapu e fakatalitonu mai ki a tatou me e mafai ne Ieova o tuku mai a te poto mo te malosi e manakogina ne tatou ke kufaki. E mafai o fakaaoga ne ia ‵tou kāiga faka-te-agaga io me ko latou kolā e se tapuaki ki a ia i aso nei ke fesoasoani mai ki a tatou i nisi auala. E tiga eiloa e se tali mai faeloa ne Ieova a ‵tou ‵talo i te auala e fakamoe‵moe tatou ki ei, e iloa ne tatou me ka tali mai eiloa ne ia a ‵tou ‵talo. Ka tuku mai ne ia a mea eiloa kolā e ma‵nako tatou ki ei. Tela la, ke tumau i te ‵talo atu mo te fakatuanaki, mo te loto talitonu me ka tausi ne Ieova koe i te taimi nei kae ka “fakama‵lie ne [ia] a manakoga o mea ola katoa” i te lalolagi fou telā ko pili o oko mai.—Sala. 145:16. w23.05 8 ¶4; 13 ¶17-18

Se mea ‵lei ke saga tonu ki mea aoga e maua māfai ko taunu tou fakamoemoega. Ne a fakamanuiaga e mafai o saga tonu atu koe ki ei? Kafai tou fakamoemoega ko te taumafai ke faitau ki te Tusi Tapu io me ko ‵talo, mafaufau ki auala e mafai ne mea konā o fakamalosi aka tou fesokotakiga mo Ieova. (Sala. 145:​18, 19) Kafai tou fakamoemoega ko te ati akaga o se uiga faka-Kelisiano, saga ki te aoga o te mea tenā ki ou fesokotakiga mo nisi tino. (Ko. 3:14) Kaia e se tusi ei ne koe a pogai katoa e manako koe ke fakataunu tou fakamoemoega tenā? Onoono faeloa ki pogai konā. E ‵tau foki o ‵kau fakatasi mo tino kolā e fakamalosi ne latou koe. (Faata. 13:20) E tonu e isi eiloa ne aso ko seai se manakoga tonu i a tatou ke fakataunu ‵tou fakamoemoega. E mata, e fakauiga i ei me ko se mafai eiloa o kausaki tatou ki ‵tou fakamoemoega? Ikai. Koi mafai eiloa o ga‵lue tatou ke fakataunu ‵tou fakamoemoega faitalia me galo te manakoga tonu tenā i a tatou. E tiga loa e se faigofie te mea tenei, kae e aoga ‵ki eiloa a mea e iku mai i ei. w23.05 27-28 ¶5-8

Ona ko te iloa atu me pokotia tatou i ‵tou fakaikuga e fai e ‵tau o fakamalosi mai i ei ke fakaasi atu ‵tou agasala, faka‵tonu ‵tou mea ‵se, kae ‵kalo kea‵tea mai te ‵toe fai te mea ‵se tenā. A te fai faeloa penā ka fesoasoani mai ke tumau tatou i te fakatau‵telega ki te ola. Kafai ko oti ne fai ne koe se fakaikuga sē ‵lei, ke talia ne koe te tulaga ko oko koe ki ei. Sa fakamaumau ne koe ou taimi mo tou malosi o fakasakosako atu io me ‵losi ifo ki a koe io me ko nisi tino. I lō te fai penā, fakaasi atu au mea ‵se kae galue malosi o fai te ‵toe mea e mafai ne koe o fai. Kafai ko logosala ou lagonaga ona ko se mea ‵se ne fai ne koe, ke ‵talo atu ki a Ieova mo te loto maulalo, fakaasi atu ki ei tau mea ‵se, kae fakamolemole ki a ia ke fakamagalo mai koe. (Sala. 25:11; 51:​3, 4) Fakatoese atu ki tino ne agasala koe ki ei, kae ‵sala ki te fesoasoani o toeaina māfai e manakogina. (Iako. 5:​14, 15) Ke tauloto mai i au mea ‵se, kae ke mo a ma toe fai ne koe. Mai te fai penā, ka mautinoa i a koe me ka alofa fakamagalo a Ieova ki a koe kae fesoasoani atu.—Sala. 103:​8-13. w23.08 28-29 ¶8-9

Ne maua ne te tupu ko Ioasa a mea aoga mai te fakaakoakoga ‵lei a Ieoiata. Ona ko te mea tenā, ne manako a te tupu foliki tenei o fakafiafia a Ieova. Kae mai tua o te matega a Ieoiata, ne fakalogo a Ioasa ki pelenise aposetate. (2 Nofo. 24:​4, 17, 18) E tiga eiloa ne logo‵mae malosi a Ieova i te mea tenei ne “uga atu faeloa ne ia a pelofeta ki a latou ke faka‵foki mai latou . . . , kae ne ita latou ma faka‵logo.” Ne seki faka‵logo foki latou ki te tamaliki tagata a Ieoiata ko Sakalia, telā se pelofeta mo se faitaulaga a Ieova kae ko te fakataina foki o Ioasa. A te ‵tonuga loa, ne fakatonu atu te tupu ko Ioasa ke tamate a Sakalia. (2 Nofo. 22:11; 24:​19-22) Ne seki ati aka ne Ioasa a te mataku tonu ki a Ieova. Ne fai mai a Ieova: “Latou kolā e se āva mai ki a au ka fakamasiasigina.” (1 Samu. 2:30) Fakamuli ifo, ne fakatakavale ne se kautau foliki mai Sulia a te “kautau lasi ‵ki” a Ioasa kae fai ne latou ke “pakia malosi” tou tagata. (2 Nofo. 24:​24, 25) Ne tamate a Ioasa ne ana tavini ona ko te tamatega ne ia a Sakalia. w23.06 18-19 ¶16-17

Ne nofo atu te apositolo ko Paulo mō se vaitaimi i Efeso, o talai kae akoako atu te tala ‵lei. (Galu. 19:​1, 8-10; 20:​20, 21) Ne alofa malosi a ia ki ana taina kae ne manako o fesoasoani ki a latou ke tumau i te fakamaoni ki a Ieova. Ne ‵nofo pologa te kau Efeso kolā ne tusi ki ei a Paulo, ki talitonuga ‵se fakalotu mo faifaiga faivailakau. Ne lauiloa a Efeso i amioga fakatauavaga sē ‵tau mo amioga mata‵fatu mo te sē āva. Ne aofia faeloa a tala e uiga ki faifaiga fakatauavaga sē ‵tau i olotou koniseti mo fakafiafiaga fakalotu. (Efe. 5:3) A te tokoukega o tino o te fakai e “se iloa ne latou o ‵ma,” se tugapati telā e fakauiga ki te “se lagona se ‵mae.” (Efe. 4:​17-19) Mai mua o tauloto ki tulaga o Ieova e uiga ki te mea tonu io me ko te mea ‵se, ne seki ga‵lue a loto lagona o te kau Efeso. Tenā ne mafai ei o fakamatala mai ne Paulo me i a latou e “‵nofo olotou mafaufau i te pouliga, kae e ‵mao latou mai te olaga telā e maua mai i te Atua.” Kae ko nisi tino Efeso ne seki tumau i te pouliga. w24.03 20 ¶2, 4; 21 ¶5-6

A te galuega a Kitiona e pelā me se famasino e manakogina i ei a galuega e uke. I te taimi ne ‵tele kea‵tea ei i te po a tino Mitiana mai te taua, ne afuli ne Kitiona latou mai te Vanu o Ieseleelu ke oko atu eiloa ki te Vaitafe o te Iolitana. (Fama. 7:22) E mata, ne gata a Kitiona i te Iolitana? Ikai! E tiga loa ne fi‵ta latou, ne olo atu eiloa a ia mo ana tāgata e toko 300 ki te suā feitu kae toe ‵tele o afuli te fili. Fakamuli loa, ne ‵poa ne latou a tino Mitiana, fakatakavale ei ne latou. (Fama. 8:​4-12) Ne talitonu a Kitiona me ka tuku atu ne Ieova te malosi ki a ia, kae tenā eiloa te mea ne tupu. (Fama. 6:​14, 34) E tasi te taimi, ne ‵tele a Kitiona mo ana tāgata i lalo o afuli a tupu o Mitiana e tokolua kolā kāti ne ‵tele i lā kamela. (Fama. 8:​12, 21) Kae mai te fesoasoani o te Atua, ne manumalo a tino Isalaelu konā. E mafai foki o fakalago‵lago a toeaina ki a Ieova, telā “e se mafai a ia o fi‵ta io me vāivāi.” Ka tuku atu ne ia te malosi ki a latou māfai e ma‵nako latou ki ei.—Isa. 40:​28, 29. w23.06 6 ¶14, 16

E mafai o maua ne tatou te tokagamalie i te loto faitalia me se a te tofotofoga e fakafesagai mo tatou. Tela la, ke talitonu ki a Ieova. Mafaufau ki te auala ne manuia ei a Palaka ona ko te talitonu ki te takitakiga a Ieova. E tiga eiloa ne seki lavea atu se talita io me se tao i te fenua kātoa, ne fakatonu atu a Ieova ki tou tagata ke fano o taua atu ki kautau a te takitaki kautau o Kanana ko Sesela kolā ne fakatoka faka‵lei. (Fama. 5:8) Ne fai atu te pelofeta fafine ko Tepola ki a Palaka ke fano ki lalo i te koga laugatasi o fakafetaui ki a Sesela mo ana kaliota tau e 900. E tiga loa ka faigata ‵ki ki te kau Isalaelu ke taua atu ki kaliota ma‵kini i te koga laugatasi tenā, kae ne fakalogo eiloa a Palaka. I te oloifoga a sotia mai te Mauga o Tapola, ne faka‵to ne Ieova a vaiua mai te lagi. Ne ‵lave a kaliota a Sesela i pela, kae ne tuku atu ne Ieova a te manumalo ki a Palaka. (Fama. 4:​1-7, 10, 13-16) I se auala tai ‵pau, ka tuku mai ne Ieova ki a tatou a te manumalo māfai e tali‵tonu tatou ki a ia penā foki a fakatonuga e tuku mai ne ia e auala i ana sui. w23.07 19 ¶17-18

E tāua te kufaki ki te ‵tou fakaolataga. E pelā mo tavini fakamaoni i aso mua, e ‵tau o ‵nofo fakatalitali tatou ki te Atua ke fakataunu ana folafolaga. (Epe. 6:​11, 12) E fakatusa i te Tusi Tapu a ‵tou tulaga ki se tino fai fatoaga. (Iako. 5:​7, 8.) E galue malosi te tino fai fatoaga o ‵toki kae fakasiusiu ana lakau, kae e se iloa tonu ne ia te taimi ka ola aka i ei. Tela la, e nofo fakatalitali mo te kufaki a te tino fai fatoaga, mo te talitonu me isi se taimi ka tau ne ia a fuataga o ana lakau. E penā foki tatou, e ga‵lue malosi tatou i te feitu faka-te-agaga, faitalia me “e se iloa ne [tatou] a te aso e vau ei te [‵tou] Aliki.” (Mata. 24:42) E ‵nofo fakatalitali tatou mo te kufaki, kae loto tali‵tonu me ka fakataunu eiloa ne Ieova i tena taimi tonu ana tautoga katoa. Kafai e galo i a tatou te kufaki, ka fai ei ke fi‵ta tatou i te faka‵tali kae kamata o tapeapea kea‵tea mo te munatonu. E mafai foki o fai ei ke kamata tatou o kausaki atu ki mea kolā e fakafiafia mai ki a tatou i te taimi nei. Kae kafai tatou e kufaki, e mafai eiloa o lotomau tatou ki te gataga kae ‵sao atu i ei.—Mika 7:7. w23.08 22 ¶7

Mai i te fakatusatusa aka o te valoaga i te Tanielu 2:​41-43 mo nisi valoaga i te tusi o Tanielu mo Fakaasiga, e malamalama tatou me i vae e fakasino atu ki Peletania mo Amelika, telā ko te malo pule i te lalolagi i aso nei. Ne fai mai a Tanielu me “i te vaega e tasi o te malo e malosi kae ko te suā vaega e vāivāi.” Kaia e vāivāi ei? Me i tino kolā e fakasino ki te kele malū e manatu mā‵mā ki te malosi o te malo tenei e pelā me se fiti. E tauloto ne tatou a muna‵tonu tāua mai te fakamatalaga a Tanielu e uiga ki te tupua i te moemiti. Muamua la, ne lavea atu a te malosi o te Malo Pule o Peletania mo Amelika i nisi auala. E pelā mo te manumalo ne maua ne lāua i te Taua Muamua mo te Taua i te Lua a te Lalolagi. Kae ne vāivāi a te malo pule tenei kae ka tumau eiloa penā ona ko taua i vā o ana tino penā foki mo te malo. Te lua, tenei eiloa te ‵toe malo pule ke pule mai mai mua o fakaseai atu ne te Malo o te Atua a malo katoa o tāgata. w23.08 10-11 ¶12-13

I nisi taimi, ne loto mafatia a Tavita i fakalavelave mo mea faiga‵ta ne fepaki mo ia. (Sala. 18:​4, 5) Kae ne maua faeloa ne ia te malosi fou ona ko te alofa atafai o Ieova. Ne ‵taki ne Ieova a tena taugasoa loto mafatia ki “laukele moukuā” mo “koga malō‵lo e uke a vai i ei.” Tenā ne toe maua ei ne Tavita a te malosi ke tumau i te tavini atu ki a Ieova mo te fiafia. (Sala. 18:​28-32; 23:2) E penā foki i aso nei, “ona ko te alofa fakamaoni o Ieova, ne seki fakaseai atu ei ne ia tatou” i taimi e fe‵paki ei mo tulaga faiga‵ta i te olaga. (Tagi. 3:22; Ko. 1:11) Ne tu atu faeloa a te ola o Tavita i se tulaga fakamataku, kae ne tokouke ‵ki ana fili ma‵losi. Kae ona ko te alofa o Ieova, ne maua ei ne ia te tokagamalie mo se puipuiga. Ne lagona ne Tavita a te ‵kau fakatasi atu o Ieova ki a ia i taimi katoa, kae ne fai ei ke malosi tena loto talitonu ki a ia. Tenā ne mafai ei o usu atu a ia, penei: “Ne fakasao ne [Ieova] au mai mea katoa e mataku au ki ei.” (Sala. 34:4) Ne mataku tonu eiloa a Tavita, kae ne iloa ne ia me sili atu a te alofa o Ieova ki a ia i lō a mea ne mataku a ia i ei. w24.01 30 ¶15-17

Tauloto mai fakaikuga sē ‵lei a Ioasa. Mai tua o te matega o te Faitaulaga Sili ko Ieoiata, ne filifili ne Ioasa a taugasoa ma‵sei. (2 Nofo. 24:​17,18) Ne fakaiku aka ke fakalogo a ia ki pelenise o Iuta kolā ne seki a‵lofa ki a Ieova. Kāti e ‵lago koe ki te manatu me e ‵tau o ‵kalo kea‵tea a Ioasa mai fakalavelave. I lō te fai penā, ne fakalogologo a ia ki manatu fakatonutonu a ana taugasoa. A te ‵tonuga loa, i te taimi ne taumafai ei te fakataina o Ioasa ko Sakalia o faka‵tonu aka a ia, ne fakatonu atu tou tagata ke tamate. (2 Nofo. 24:​20, 21; Mata. 23:35) Se mea valea kae masei a tena mea ne fai! Ne ‵lei eiloa te olaga o Ioasa i te kamataga, kae se mea fakafanoanoa me ne fai fakamuli a ia e pelā me se aposetate mo se tino tatino. I te fakaotiga, ne tamate eiloa a ia ne ana tavini. (2 Nofo. 24:​22-25) E mautinoa eiloa me ka ‵kese ‵ki a tena olaga moi ne tumau a ia i te fakalogo ki a Ieova mo tino kolā e a‵lofa ki a ia! w23.09 9 ¶6

Ne iloa ne Iesu me e mafai eiloa o tumau a te apositolo ko Petelu i te fakamaoni. Telā ne fai atu ei a Iesu mo te atafai ki a Petelu ke “sa mataku.” A te lasi o te loto talitonu o Iesu ki a Petelu ne fai ei ke ‵fuli te olaga o Petelu. Fakamuli ifo, ne tiakina ne Petelu mo tena taina ko Anitelea te lā pisinisi faika kae fai pelā me ne soko o te Mesia, se fakaikuga telā ne maua mai ei a fakamanuiaga e uke. (Male. 1:​16-18) E uke ‵ki a tala ‵gali o Petelu e pelā me se soko o Keliso. Ne lavea ne ia a Iesu e faka‵lei ne ia a tino ma‵saki, ‵tuli kea‵tea a temoni, kae faka‵tu aka a tino ‵mate. (Mata. 8:​14-17; Male. 5:​37, 41, 42) Ne lavea foki ne Petelu a te fakaasiga e uiga ki te tulaga o Iesu e pelā me ko te Tupu i te Malo o te Atua i aso mai mua, se mea telā ne lasi ‵ki tena aoga ki a ia. (Male. 9:​1-8; 2 Pe. 1:​16-18) Ao, ne lavea ne Petelu a mea kolā ne seki fakamoemoe a ia ki ei. Kāti ne fiafia eiloa a ia me ne seki talia ne ia ana lagonaga sē aoga e uiga ki a ia kolā ne mafai o fai ei ke ‵galo i a ia a fakamanuiaga konei! w23.09 21 ¶4-5

I tena tusi muamua, ne fakaaoga ne te apositolo ko Petelu te tugapati ko te “fakatau a‵lofa.” A te vaegā alofa tenā e ‵tao ne ia a “agasala e uke,” kae e se ko nai agasala fua. (1 Pe. 4:8) Kāti ne masaua ne Petelu a te akoakoga e uiga ki te alofa fakamagalo telā ne akoako atu ne Iesu i se fia tausaga mai mua. I te taimi tenā, kāti ne mafaufau a Petelu me ko oko loa a ia i te kaimalie i te faiatuga me ka fakamagalo ne ia tena taina “fakafitu taimi.” Kae ne akoako ne Iesu a ia—mo tatou—ke fakamagalo atu “faka-77 taimi,” e fakauiga i ei me seai se tapulā ki ei. (Mata. 18:​21, 22) Kafai e faigata ki a koe ke fakagalue a pati fakatonutonu konei, ke loto malosi! Ne faigata ki tavini sē ‵lei katoatoa a Ieova ke fakaasi atu te loto fakamagalo i nisi taimi. A te ‵toe mea tāua i te taimi nei ko te fai o mea e ‵tau o fai ke fakamagalo tou taina kae ke maua se va filemu mo ia. w23.09 29 ¶12

I te tinae o te ika, ne loto talitonu a Iona me ka fakalogologo a Ieova ki tena ‵talo e fai atu mo te loto maulalo mo te loto salamō kae ka fesoasoani atu eiloa a Ieova. Fakamuli ifo, ne luaki a Iona ki tua i te laukele malō, kae ne toka o talia kae fakataunu ne ia a tena suā tōfiga. (Iona 2:10–3:4) Kafai e fepaki koe mo se fakalavelave, e mata, ka se mafai ne koe o fakaasi atu ou lagonaga i au ‵talo ki a Ieova ona ko te lasi o te manavase? Io me ko fi‵ta koe ke fai au sukesukega? Masaua me e malamalama faka‵lei a Ieova i tou tulaga. Tela la, kafai foki loa e fai atu ne koe se ‵talo faigofie, e mafai o talitonu koe me ka tuku atu ne ia a te mea eiloa telā e manakogina ne koe. (Efe. 3:20) Kafai e faigata ki a koe ke faitau kae fai au sukesukega ona ko masaki, fi‵ta, io me manavase, e mafai o fakalogologo koe ki se faitauga ki te Tusi Tapu io me ko ‵tou tusi kolā ne puke. E mafai foki o fesoasoani atu a te fakalogologo ki ‵tou pese io me se vitio mai te jw.org. E manako a Ieova o fakamalosi koe kae ka fai eiloa penā māfai e ‵talo atu koe ki a ia, ko ‵sala atu ei ki tali o au ‵talo i te Tusi Tapu mo nisi tusi kolā ne fakatoka ne ia. w23.10 13 ¶6; 14 ¶9

A te faleie tapu mo faletapu kolā ne faite fakamuli i Ielusalema e tai ‵pau eiloa te faitega o mea i loto. E lua a potu i loto i ei—“te Potu Tapu” mo “te Potu Tafasili i te Tapu”—telā e ‵vae ne se ‵pui laugatu. (Epe. 9:​2-5; Eso. 26:​31-33) I loto i te Potu Tapu e tuku i ei se tugamoli aulo, se fatafaitaulaga mo ‵sunu a mea ma‵nogi, mo se taipola o falaoa ne ofo atu ki te Atua. A tino fua kolā ne talia ke ulu ki loto i te Potu Tapu ke fai olotou tiute fakafaitaulaga i ei ko “faitaulaga kolā ne fakaekegina.” (Nume. 3:​3, 7, 10) A te Potu Tafasili i te Tapu ne tuku i ei te pusa o te feagaiga e faite ki aulo telā se fakaasiga me nofo atu a Ieova i konā. (Eso. 25:​21, 22) Ko te faitaulaga sili fua e talia ke fano ki suā feitu o te ‵pui laugatu ki loto i te Potu Tafasili i te Tapu fakatasi i te tausaga i te Aso o te Faka‵māga. (Levi. 16:​2, 17) I tausaga katoa, e ulu atu a ia ki loto mo toto o manu ke fai te faka‵māga o ana agasala e penā foki mo agasala a tino o te fenua kātoa. Fakamuli loa, ne fakaasi manino atu ne Ieova e auala i tena agaga tapu a te uiga tonu o mea konei i loto i te faleie tapu.—Epe. 9:​6, 7. w23.10 27 ¶12

E sae mafai faeloa i te Muna a te Atua a te fakatonuga ke “alofa te suā tino ki te suā tino.” (Ioa. 15:12; Loma 13:8; 1 Tesa. 4:9; 1 Pe. 1:22; 1 Ioa. 4:11) Kae ko te alofa se lagonaga i ‵tou loto telā e se mafai o lavea ne se tino. Tela la, e mafai pefea o fai ke lavea a te ‵tou a‵lofa te suā tino ki te suā tino? E auala i ‵tou pati mo faiga. E uke a auala e mafai o fakaasi atu ei te ‵tou a‵lofa ki taina mo tuagane. Konei a nisi fakaakoakoga: “Fai‵pati ki te mea tonu te suā tino ki te suā tino.” (Saka. 8:16) “Tausi te filemu i te va o koutou.” (Male. 9:50) Ke mua “o fakaasi atu te āva o te suā tino ki te suā tino.” (Loma 12:10) “Ke fakatau talia ne koutou te suā tino mo te suā tino.” (Loma 15:7) Ke tumau i te “fakatau fakamagalo atu te suā tino ki te suā tino.” (Ko. 3:13) “Tumau i te fakatau amo otou amoga ‵mafa.” (Kala. 6:2) “Tumau i te fakamafanafana atu te suā tino ki te suā tino.” (1 Tesa. 4:18) “Tumau i te fakamalosi atu te suā tino ki te suā tino.” (1 Tesa. 5:11) “‵Talo te suā tino mō te suā tino.”—Iako. 5:16. w23.11 9 ¶7-8

I aso takitasi, e manakogina ke malosi ‵tou fakatuanaki ke fai a fakaikuga. E pelā mo fakaikuga ki te filifiliga o ‵tou taugasoa, fakafiafiaga, akoakoga, tino ke avaga ki ei, te faiga o tama‵liki mo galuega ‵togi. Se mea ‵lei ke fesili ifo tatou: ‘E mata, e fakaasi atu i aku fakaikuga a toku talitonu me i te olaga tenei ka se tumau kae ko pili fua o sui ki te lalolagi fou a te Atua? Io me e fakavae aku fakaikuga ki mea e fai ne tino kolā e tali‵tonu me i te mate ko te fakaotiga o mea katoa?’ (Mata. 6:​19, 20; Luka 12:​16-21) Ka fai eiloa ne tatou a toe fakaikuga ‵lei māfai e malosi ‵tou fakatuanaki ki te pili mai o te lalolagi fou. E fe‵paki foki tatou mo tulaga faiga‵ta kolā e manakogina i ei ke malosi ‵tou fakatuanaki. Kāti e fe‵paki tatou mo fakasauaga, se masaki tumau, io me ko nisi mea kolā e fai ei tatou ke loto vāi‵vai. Muamua la, kāti ka mafau‵fau tatou me mafai eiloa ne tatou o kufaki a ‵tou fakalavelave. Kae pelā mo te masani, e tumau sāle a fakalavelave penei i se taimi leva, tenā ko manakogina i ei ke malosi ‵tou fakatuanaki o kufaki kae tumau i te tavini atu ki a Ieova mo te fiafia.—1 Pe. 1:​6, 7. w23.04 27 ¶4-5

E fakamoemoe a Ieova ke gasue‵sue tatou e ‵tusa mo ‵tou ‵talo. Kāti e fakamolemole atu se taina ki a Ieova ke fesoasoani atu ke talia tena fanoiga ke malōlō mai tena galuega ‵togi ke kau atu ki se fono lasi. Ka tali mai pefea ne Ieova te ‵talo tenā? Ka mafai o tuku atu ne ia a te loto malosi ki te taina tenā ke mafai o fanatu ki tena pule. Kae koi ‵tau eiloa mo ia o fai tena fanoiga. Kāti ka manakogina ke fokifoki atu a ia o fai tena fanoiga. Kāti e ‵tau o loto fiafia a ia ke sui ana taimi ga‵lue mo se isi tino i te galuega io me malōlō a ia kae seai sena peofuga. E fakamoemoe a Ieova ke ‵talo atu faeloa tatou e uiga ki mea e manavase ki ei. E fakaasi mai i pati a Iesu me e isi ne fakatagi a tatou ka se tali mai i te taimi eiloa tenā. (Luka 11:9) Tela la, ke mo a ma ‵fiu vave! ‵Talo malosi kae ke ‵talo faeloa. (Luka 18:​1-7) Kafai e fai tatou penā,ko fakaasi atu ne tatou ki a Ieova a te tāua o te fakatagi tenā. Ko fakaasi atu foki ne tatou a te ‵tou fakatuanaki me mafai eiloa o fesoasoani mai a ia ki a tatou. w23.11 22 ¶10-11

Ieova ne tauto ki tena taugasoa ko Apelaamo me ka maua ne atufenua katoa o te lalolagi a fakamanuiaga e auala i tena tama. (Kene. 15:5; 22:18) Ona ko te lasi o te fakatuanaki o Apelaamo ki te Atua, ne talitonu katoatoa a ia me ka taunu eiloa a te folafolaga a te Atua. Kae i te taimi ko 100 ei tausaga o Apelaamo kae ko 90 tausaga o tena avaga, ne seki ai eiloa se lā tama tagata. (Kene. 21:​1-7) Kae ne fai mai te Tusi Tapu: “Ne fakavae eiloa tena fakamoemoega [o Apelaamo] ki tena fakatuanaki me ka fai a ia mo fai te tamana o atufenua e uke e ‵tusa mo pati kolā ko oti ne fai atu.” (Loma 4:18) E iloa ne koe me ne taunu eiloa te fakamoemoega o Apelaamo. Ne fai eiloa a ia mo tamana o te tamaliki telā ko leva ne nofo fakatalitali a ia ki ei, ko Isaako. Kaia ne lasi katoa i ei te loto talitonu o Apelaamo? Ona ko te pili o tena va fakataugasoa mo Ieova, “ne talitonu katoatoa” a Apelaamo me ka fakataunu eiloa ne te Atua a te mea telā ne folafola atu ne Ia. (Loma 4:21) Ne talia ne Ieova a Apelaamo kae taku ne ia me e amiotonu ona ko tena fakatuanaki.—Iako. 2:23. w23.12 8 ¶1-2

A te talavou telā e fakatuagagina e galue malosi o fai ana tiute. Mafaufau ki te fakaakoakoga ‵lei katoatoa a Iesu. Ne seki fakatamala a ia o fai ana tiute. Ne fai ne ia a galuega katoa ne tuku atu ne Ieova ki a ia, faitalia te faigata ki a ia ke fai penā. Ne alofa a ia ki tino—maise ana soko—kae ne loto fiafia o tuku atu tena ola mō latou. (Ioa. 13:1) Ke fakaakoako ki a Iesu mai te galue malosi o fai so se galuega ne tuku atu ki a koe. Kafai e se iloa ne koe o fai, ke loto maulalo kae ‵sala ki te fesoasoani o taina ma‵tua. Sa taumafai o fai fakapateletele au galuega. (Loma 12:11) Kae fakaoti tau galuega, e pelā eiloa me fai ne koe “mō Ieova, kae e se mō tino.” (Ko. 3:23) E tonu, a koe e se ‵lei katoatoa, tela la, ke agamalu kae fakaasi atu so se mea ‵se ne fai ne koe.—Faata. 11:2. w23.12 26 ¶8

Se mea fakafiafia ke papatiso se tino kae fai mo vaega o te kāiga o Ieova. Ka lotoma‵lie eiloa a tino kolā e maua ne latou te tauliaga tenā ki te faisalamo ko Tavita, telā ne fai mai: “E fiafia a te tino telā e filifili kae fakapilipili mai ne koe [Ieova] ke nofo i ou koga ateatea.” (Sala. 65:4) E se aumai ne Ieova so se tino ki ana koga ateatea. E filifili Ne ia latou kolā e fakamaoni mai me e ma‵nako ke maua ne latou se va fakataugasoa ‵pili mo ia. (Iako. 4:8) Kafai e tuku atu koe ki a Ieova kae papatiso, e mautinoa i a koe me fakamuli ifo, ka “‵ligi atu [ne ia] ki luga i a [koe] a fakamanuiaga ke oko eiloa ki te taimi ko seai se mea koi manakogina.” (Mala. 3:10; Iele. 17:8) A te papatisoga ko te kamataga fua. Ka manako eiloa koe o fai te ‵toe mea e mafai ke ola e ‵tusa mo tau tautoga ne fai i tau tukuatuga, faitalia foki loa a tofotofoga o te fakatuanaki e fepaki mo koe. (Fai. 5:​4, 5.) E pelā me se soko o Iesu, ka taumafai koe o tautali i tena fakaakoakoga kae fakalogo ki ana tulafono. Mata. 28:​19, 20; 1 Pe. 2:21. w24.03 8 ¶1-3

Kae e a māfai e se gali ke fakamāumāu fakatasi ne koulua a taimi mō koulua eiloa? Ne a mea e mafai o fai ne koulua? Mafaufau ki te afi. Kafai ko kamata o ‵ka, e se ‵ka malosi mai. E manakogina ke tafu ki fafie ko te mea ke ‵ka malosi. I se auala tai ‵pau, kaia e se kamata ei koulua o fakamāumāu ne mu taimi i a koulua eiloa i aso takitasi? Fakamautinoa me fai ne koulua se mea telā e fia‵fia fakatasi koulua ki ei. (Iako. 3:18) Mai te fai penā, ka mafai eiloa o toe fakamalosi aka a te alofa i te va o koulua. E tāua ‵ki te āva i loto i te olaga avaga. E tai pelā mo te ea ko te okesene telā e fai ne ia ke ‵ka malosi te afi. E aunoa mo te ea tenā, ka mate vave i ei te afi. I se auala tai ‵pau, kafai e se āva te tauavaga ka lavea ne lāua te gasolo vave o matafitafi atu te alofa i te va o lāua. I te suā feitu, a te tauavaga kolā e taumafai malosi o fakatau fakaasi atu te āva e ga‵lue tasi o fakamalosi aka te alofa i te va o lāua. Kae ke masaua, me i te mea tāua ko te lavea mai ne tau avaga me āva koe ki a ia, kae e se ko te nofo fua koe mo te mafaufau me i a koe e āva ki a ia. w23.05 22 ¶9; 24 ¶14-15

I te Tusi Tapu, e fai‵pati a tavini fakamaoni a te Atua ki taimi ne loto mafatia kae ma‵taku latou ona ko olotou fili mo nisi tofotofoga. (Sala. 18:4; 55:​1, 5) I se auala tai ‵pau, e mafai o fakafesagai tatou mo ‵tekemaiga i te akoga, i te koga ga‵lue, mai ‵tou kāiga, io me mai te malo. E mafai foki o ma‵taku tatou i te mate ona ko se masaki. I taimi penā, e mafai o se iloa ne tatou me se a te mea e ‵tau o fai e pelā loa mo se tamā tamaliki. E mafai pefea o fesoasoani mai a Ieova ki a tatou i taimi penā? E fakamafanafana kae fakafiafia ne ia tatou. Tela la, ke fakamāumāu faeloa ‵tou taimi mo Ieova—mai te ‵talo atu ki a ia kae faitau tena Muna. (Sala. 77:​1, 12-14) Me kafai ko loto mafatia koe, kāti a te mea muamua ka mafaufau koe ki ei ko te ‵sala atu ki te fesoasoani o ‵tou Tamana faka-te-lagi. Fakaasi atu ki a Ieova a mea e mataku kae manavase koe ki ei. Kae tuku ke faipati kae fakamafanafana ne ia koe e auala i te Tusi Tapu—Sala. 119:28. w24.01 24-25 ¶14-16

E tāua ‵ki ke ati aka se manakoga tonu ko te mea ke taunu ou fakamoemoega faka-te-agaga. A te tino telā e isi se manakoga tonu i a ia ka galue malosi eiloa ke fakataunu tena fakamoemoega. Ko te lasi o te manakoga tonu i a tatou, ko te taunu foki o ‵tou fakamoemoega. Tela la, se a te mea e mafai ne koe o fai ke isi se manakoga tonu i a koe? ‵Talo ke momea aka te lasi o te manakoga tonu i a koe. E auala i tena agaga tapu, e mafai o fai ne Ieova ke lasi te manakoga tonu i a koe ke kausaki ke taunu tou fakamoemoega. Nisi taimi e fakatoka ne tatou ‵tou fakamoemoega me iloa ne tatou me se mea loa e ‵tau o fai, kae se mea ‵lei tenā. Kae kāti e seai se manakoga i a tatou ke kausaki atu ki ei. Mafaufau ‵loto ki mea ne fai ne Ieova mō koe. (Sala. 143:5) Ne mafaufau ‵loto te apositolo ko Paulo ki te alofa tauanoa o Ieova ki a ia, kae ne fakamalosi aka ei ke galue malosi a ia mō Ieova. (1 Koli. 15:​9, 10; 1 Timo. 1:​12-14) I se auala tai ‵pau, ko te uke o taimi e mafaufau ‵loto koe ki mea ne fai ne Ieova mō koe, ko te lasi foki te fakamalosiga e maua ne koe ke kausaki malosi ke taunu tou fakamoemoega.—Sala. 116:12. w23.05 27 ¶3-5

E fakafiafia ne tatou a te ‵tou Tamana i te lagi māfai e ‵viki atu tatou ki tena igoa. (Sala. 119:108) E mata, e fakauiga i ei me i te Atua malosi katoatoa e ‵pau mo tino sē ‵lei katoatoa kolā e ma‵nako ke maua ne latou a vikiga mai tino ke fakamalosi aka ei latou io me maua a lagonaga tokagamalie? Ikai. Kafai e ‵viki atu tatou ki ‵tou Tamana i te lagi, ko fesoasoani tatou o ‵teke a so se loi telā e fai e uiga ki a tatou. E fai mai Satani me e seai se tino e mafai o ‵pulu mo te fakamaoni ne ia te igoa o te Atua. Kae seai foki se tino e mafai o tumau i te fakamaoni. Ana muna me ka fulitua atu tatou katoa ki te Atua māfai e mafau‵fau ifo tatou me tenā te mea e ‵tau o fai. (Iopu 1:​9-11; 2:4) Kae ne fakamaoni atu ne Iopu me i a Satani se tino loi. Kae pefea koe? E maua ne tatou katoa te tauliaga ke ‵pulu te igoa o te ‵tou Tamana kae fakafiafia a ia mai te tavini atu mo te fakamaoni ki a ia. (Faata. 27:11) Se tauliaga gali eiloa mō tatou ke fai penā. w24.02 8-9 ¶3-5

Mai tua o aso o Mose mo Iosua, ne‵tofi aka ne Ieova a famasino ke takitaki ana tino. I te taimi ne pule mai ei a tupu ne ‵tofi ne Ieova a pelofeta ke takitaki ana tino. Ne faka‵logo eiloa a tupu fakamaoni ki pati fakatonutonu a te kau pelofeta. E pelā mo te tupu ko Tavita ne talia ne ia mo te loto maulalo a pati fakatonutonu mai te pelofeta ko Natano. (2 Samu. 12:​7, 13; 1 Nofo. 17:​3, 4) Ne fakalagolago a te tupu ko Iosefatu ki te takitakiga a te pelofeta ko Iasielu kae ne fakamalosi atu a ia ki tino o Iuta ke “fakatuanaki ki . . . pelofeta” a te Atua. (2 Nofo. 20:​14, 15) I te taimi ne puapuaga ei, ne ‵sala atu a te tupu ko Hesekia ki te pelofeta ko Isaia mō se fesoasoani. (Isa. 37:​1-6) I taimi katoa ne tau‵tali a tupu i te takitakiga a Ieova, ne maua ne latou a fakamanuiagina kae ne puipui ei a te fenua kātoa. (2 Nofo. 20:​29, 30; 32:22) Ne ‵lavea ‵lei me ne fakaaoga ne Ieova ana pelofeta ke takitaki ana tino. w24.02 21 ¶8

E manako a Satani ke fai taugasoa tatou ki tino kolā e fakamalosi ne latou a tatou ke se tau‵tali ki tulaga o Ieova. A ‵tou taugasoa e se aofia fua i ei a tino kolā e ‵kau fakatasi tatou. Kae aofia foki i ei a latou kolā e fesokotaki mo tatou i te itaneti. E ‵tau o ‵teke atu tatou ki mafaufauga o tino o te lalolagi me i amioga ma‵sei e ‵lei eiloa. E iloa ne tatou me e se tonu te mea tenā. (Efe. 4:​19, 20) Se mea ‵lei ke fesili ifo tatou penei: ‘E mata, e fakaeteete au ke mo a ma sōna ‵kau fakatasi mo tino ga‵lue, tama‵liki i te akoga io me ko tino kolā e se āva ki tulaga amio‵tonu o Ieova? E mata, e loto malosi au o tautali ki tulaga o Ieova faitalia me fai mai a tino i au e loto makeke?’ E pelā mo te mea e fakaasi mai i te 2 Timoteo 2:​20-22, kāti e ‵tau foki o fakaeteete tatou māfai e filifili a ‵tou taugasoa i te fakapotopotoga Kelisiano. Ke masaua me i nisi tino e se fesoasoani mai ke tumau tatou i te fakamaoni i te ‵tou taviniga ki a Ieova. w24.03 22-23 ¶11-12

Kai fakaataata aka eiloa ne koe i tou mafaufau me ko Ieova se vaegā tino pefea? E tiga eiloa e se lavea ne tatou a Ieova, e fakamatala mai ne te Tusi Tapu a ia i auala kese‵kese. A Ieova e taku ki “se la mo se talita” mo “se afi ‵ka ulaula.” (Sala. 84:11; Epe. 12:29) Ne fakamatala mai ne Esekielu a Ieova e pelā me se fatu safaila, e malapulapu pelā me se aulo palu tasi mo te siliva, mo se nuanua maina. (Eseki. 1:​26-28) Kāti ka faigata ke tali‵tonu tatou me e alofa mai a Ieova ona ko te mea e se lavea ne tatou a ia. E mafau‵fau a nisi tino me e se mafai o alofa a Ieova ki a latou ona ko mea ne ‵tupu ki olotou olaga i aso mua. E malamalama a Ieova i vaegā lagonaga penā mo te auala e pokotia i ei tatou. Ke fesoasoani mai ki a tatou, e fakaasi mai ne ia ana uiga ‵gali i tena Muna. A te ‵toe pati ‵lei e tasi telā e mafai o fakamatala ki ei a Ieova ko te alofa. (1 Ioa. 4:8) E fakamatala katoatoa mai ne te alofa a ia. E fai ne ia a mea katoa ona ko tena alofa. A te alofa o te Atua e kaimalie kae malosi telā e fakaasi atu foki ne ia ki tino kolā e se a‵lofa ki a ia.—Mata. 5:​44, 45. w24.01 26 ¶1-3

Ne ‵tofi ne Ieova a Mose ke ‵taki ne ia a tino Isalaelu ki tua mo Aikupito,kae Ne tuku atu ne ia se pou kaumana i te ao mo se pou afi i te po. (Eso. 13:21) Ne tautali a Mose i te pou kaumana telā ne ‵taki ne ia latou mo tino Isalaelu ki te Tai Kula. Ne pole‵pole i te ma‵taku a tino me ne mafau‵fau latou me ka ‵poa aka latou i te vasia o te Tai Kula mo te kautau Aikupito i olotou tua. Kae e ‵se eiloa latou. Ne manako tonu eiloa a Ieova ke takitaki ne Mose ana tino ki te koga tenā. (Eso. 14:2) Tenā ne faka‵sao ei ne te Atua a latou i te ‵toe auala fakaofoofogia eiloa. (Eso. 14:​26-28) Mai konā eiloa mo tausaga e 40 ki tua ifo, ne tumau a Mose i te fakalagolago ki te pou kaumana ke takitaki ei a tino o te Atua i loto i te koga lavaki. (Eso. 33:​7, 9,10) Ne faipati atu a Ieova ki a Mose mai te pou kaumana tenā, kae fakaoko atu ne Mose Ana fakatonuga ki tino Isalaelu. Ne lavea faka‵lei eiloa ne te kau Isalaelu me ne fakaaoga ne Ieova a Mose ke takitaki latou. w24.02 21 ¶4-5