Te ‵Sala Atu ki Tali Mautinoa

E puipui pefea ne au toku ola?

Ne a aku mea e mafai o fai ke maua ei ne toku kāiga se olaga fiafia?

Ne a aku mea e mafai o fai ke tumau au i taku galuega?

E MATA, ko oti ne ‵sili ifo ne koe se fesili penei i fesili konei ki a koe eiloa? E mata, ne maua ne koe ne tali aogā ki ei? I tausaga takitasi, e nofo pelā ki se 2,000 o tusi kese‵kese e ‵lomi kolā e tuku mai i ei a pati fakatonutonu ki mea konei mo nisi mataupu tāua aka foki. I Peletania, e fakamāumāu ne tino fai‵tau kāti se 80 miliona pauni (kāti se $150 miliona, tupe Amelika) i tausaga takitasi, ki te ‵togiga o tusi kolā e tuku mai i ei a manatu fakatonutonu e uiga ki te fakafesagai atu ki fakalavelave o te olaga. I te Iunaite Sitete, e nofo ki se $600 miliona e maua i te tausaga mai te fakatauatuga o tusi fesoasoani penā. E se ko koe fua tokotasi e ‵sala atu ki fakatakitakiga ‵lei i te fakafesagai atu ki te olaga i aso takitasi.

E uiga ki manatu fakatonutonu kolā e maua i tusi e uke konei, ne fai mai se tino tusitala penei: “E fakafokifoki fua ne tusi ‵fou e uke a mea kolā ko oti foki ne ‵lomi mua mai.” A te ‵tonuga loa, a te ukega o manatu fakatonutonu i loto i tusi konei e fakaasi mai fua i ei a te poto telā e maua atu i te ‵toe tusi leva eiloa i te lalolagi nei. A te tusi tenei ko te ‵toe tusi lauiloa eiloa telā ko salalau atu i te lalolagi kātoa. Ko oti ne ‵fuli aka a te tusi kātoa io me ko nisi vaega i ei ki ‵gana e nofo pelā ki se 2,400. E sili atu i te 4.6 piliona a ‵kopi o te tusi tenei ko oti ne ‵lomi i te lalolagi kātoa. A te tusi tenei ko te Tusi Tapu.

E fakamatala manino mai te Tusi Tapu: “Me i Tusitusiga Tapu katoa ne aumai mai te Atua, kae aogā ki te akoakoga o te mea tonu, ki te polopoloki, ki te fakatonu o te mea ‵se, mo te akoako atu ki te olaga ‵lei.” (2 Timoteo 3:​16) E tonu, ne seki ‵lomi a te Tusi Tapu e pelā me se tusi fesoasoani mō tino taki tokotasi. A tena ‵toe pogai tāua ko te fakaasimaiga o te loto o te Atua e uiga ki tino. Kae, e maua atu foki i te Tusi Tapu a fakamatalaga e uke ki te auala e fakafesagai atu ei ki fakalavelave masani kolā e fe‵paki mo tatou katoa, kae folafola mai foki i ei me i tino kolā e tau‵tali i fakatakitakiga i ei ka maua ne latou a mea aogā. (Isaia 48:​17, 18) Kafai e fakagalue a fakatakitakiga i ei ka aogā eiloa, faitalia te fenua, te matakāiga, tuu mo aganuu io me ko te tulaga o ana akoakoga. Kaia e se mafaufau ei ki te suā mataupu kae fakaiku aka me e mata, e aogā a pati i te Tusi Tapu ki mataupu e pelā mo te olaga ‵lei, te kāiga, mo galuega ‵togi?