Te ‵Sala Atu ki se Takitakiga Aoga
KAFAI e ‵sala atu koe ki ne takitakiga, e uke ‵ki eiloa a vaegā takitakiga ka maua ne koe. A tusi mo ata fesoasoani kolā e faite sāle, se pisinisi lasi e tasi i te lalolagi telā e gasolo malosi aka faeloa ki luga. I koga kese‵kese pelā mo Peletania, Latina Amelika, Tiapani, mo te Iunaite Sitete, e fai a tusi fesoasoani konei e pelā me ko toe tusi ‵lei ke fakatau atu. Ko kamata foki o lauiloa a vitio, tamā fono, mo polokalame i TV e uiga ki manatu fesoasoani totino. E faka‵na eiloa olotou kilokiloga ki te manatu me e mafai eiloa o faka‵lei aka ne koe ou fakalavelave, e aunoa mo te fanatu ki se tino apo i te iloiloga o mea faka-te-mafaufau, se tino fakatonutonu i te olaga fakatauavaga, io me se faifeau. Ne a mataupu e aofia i manatu konei?
A te fakataunuga o manakoga totino o te tino, ikuga fakamalie loto o te alofa, mo te auala e puti aka ei a tama‵liki e aofia i toe mataupu lauiloa masani. E aofia foki i nisi mataupu masani ko te fakafesagai atu ki te loto mafatia, te fanoanoa, mo ikuga o te ‵talaga o avaga. E tai lasi foki a te ma‵nako o tino e tokouke ki manatu fakatonutonu e uiga ki te gafula, te ‵pusi, mo te inu malosi. E mata, e aoga a manatu fesoasoani konā? I nisi taimi, e aoga, kae i te lasiga o taimi e se penā loa. Tela la, se faiga poto ke mafaufau ki te manatu fakatonutonu i te Tusi Tapu: “A tino va‵lea e tali‵tonu i so se mea; a tino poto e onoono faka‵lei eiloa ki olotou mea e fai.”—Faataoto 14:15.
A tusi fesoasoani kolā e maua i ei a manatu fakatonutonu o nisi tino e ‵kese ‵mao eiloa mai i tusi kolā e maua i ei a mea tau akoakoga ke apo koe i mea tau pei ata, mea tau tupe, io me ko ‵gana. A vaegā tusi penā e mafai o ma‵goi kae aoga ke fai ki ei a vaegā kōsi aoga kolā e se uke au tupe e fakamāumāu ki ei. A ko tusi kolā e maua i ei ne koe a manatu fesoasoani—faitalia me ko mea fakapisinisi, fakaipoipoga, te tausiga o tama‵liki, io me ko mea tau te mafaufau—e ‵kese ‵ki eiloa a vaegā tusi penā. E masani sāle o fakasino tonu mai ne latou se vaegā olaga ke ola i ei mai i olotou kilokiloga totino eiloa. Tela la, se mea poto ke fesili ifo penei: Ko oi e tuku mai ne ia a manatu fakatonutonu konei? Kae se a te mea e fakavae ki ei ana fakamatalaga?
E se fakavae faeloa ne tino ‵poto olotou manatu ki fakamaoniga kolā ko oti ne fakatalitonu aka. E mafai o tuku mai ne nisi tino olotou manatu fakatonutonu kolā e fia‵fia ki ei te tokoukega o tino o ‵togi, i te iloa atu me e maua a tupe e uke mai i te faiatuga o mea kolā e ma‵nako a tino o faka‵logo ki ei. Me i se fenua e tasi, ne maua eiloa ne te kamupane telā e tuku atu ne latou a vaegā manatu fesoasoani penā, a tupe e sili atu i te valu piliona i tausaga takitasi!
E Pefea te Aoga o Vaegā Fesoasoani Penei ki te Tino?
Kafai e ‵sala atu koe ki vaegā fesoasoani penā mai i tino, e fakamoemoe eiloa koe ke maua ne manatu fesoasoani aoga. Kae i nisi taimi a mea e maua ne koe i ei, e se ne mea ‵tonu. A te ‵tonuga loa, e masani sāle o fai mai a tino penā: ‘Kafai e mafaufau koe ki mea aoga, ka manumalo eiloa koe i tou fakalavelave. Faitalia me ne a mea e manako koe ki ei, tupe, malosi ‵lei, se va fakataugasoa fiafia, ka maua eiloa ne koe māfai e penā foki eiloa tou fakamoemoega.’ E mata, e aoga a te vaegā manatu fakatonutonu tenā? E mata, ka fesoasoani atu eiloa ki a koe māfai e fakafesagai atu koe ki mea fakafanoanoa o te olaga nei?
Mafaufau ki tusi e uiga ki va fakataugasoa mo fesokotakiga i va o tauavaga. E mata, e fesoasoani atu ki tino ke ati aka a kāiga fia‵fia kae tumau? E se penā eiloa. E ‵tusa mo te lipoti a se fafine e tokotasi, a tino kolā ne tusi ne latou a tusi e maua i ei a fakamatalaga e uiga ki te alofa, e lasi ‵ki a te ma‵nako o tino ki ei i Latina Amelika “me e fakamasani ne ia a te tino faitau ki auala e ati aka ei a va fakataugasoa ‵lei mo te loto talitonu ki a ia eiloa.” E fai mai a te tino tusitala me i te vaegā fesokotakiga telā e se galue ‵lei e fai pelā me ko fakaseaoga i ei ne te tino a ia eiloa. A te fekau telā e fakatāua ne latou ko te faiga o so se mea telā e maua ei ne ia se lagonaga ‵lei i lō te saga atu fua ki fakalavelave kae taumafai o faka‵lei aka ne ia.
E tonu, e mafai foki o aofia i tusi fesoasoani konā ne manatu aoga. Kae e mafai foki o maua i ei a manatu fesoasoani fakama‵taku. E mafai o tuku atu ne se tino poto a manatu fesoasoani ki se mataupu telā e masani ‵lei a ia ki ei kae kāti e mafai o fai ana manatu fakatonutonu e uiga loa ki te suā mataupu ke momea aka ei te masei o te tulaga tenā. E tai faigata eiloa mo tatou o ‵sala atu ki se fesoasoani penei, me e masani o fe‵paki olotou manatu kolā e tuku mai i tusi konei. I ōi a manatu fakatonutonu e mafai o talitonu koe ki ei? Fesili ifo penei: ‘E mata, ne iloilo faka‵lei aka a manatu fakatonutonu konā, io me ko manatu fua o te tino tusitala? E pefea te lasi o te fakamalosiga ke kausaki atu ki te maumea io me ko tulaga ma‵luga ki te fakamaoni o te tino tusitala?’
E tasi te tusi telā ne fakamaoni aka tena aoga i se taimi leva ‵ki ko te Tusi Tapu. E tuku mai i ei a manatu fakatonutonu aoga ki mataupu e uke e uiga ki manatu fesoasoani mo nisi mataupu aka foki. Ne fakamalosi aka ei a te fia miliona o tino ke gasue‵sue e ‵tusa loa mo pati fakatonutonu konei: “E ‵tau o faka‵fou otou loto mo otou mafaufau kātoa. E ‵tau mo koutou o ‵pei ki te foitino fou.” (Efeso 4:23, 24) E tuku mai i te Tusi Tapu a te malamalama tonu ki pogai o ‵tou fakalavelave kae e akoako mai foki i ei a te auala ke fakafesagai atu ki ei. E sili atu i te ‵lei, me e tuku mai i ei a pogai tāua kae aoga mō te faiga o te mea tonu. Ka fakamatala mai i te suā mataupu a te auala e fai ei a te mea tenei.