E Ola te Muna a Ieova
Manatu Tāua Mai te Tusi ko Tagiga a Ielemia
NE LAVEA eiloa ne Ielemia te fakataunuga o te fekau o te fakamasinoga telā ne folafola atu ne ia i te 40 tausaga ko ‵teka. E pefea a lagonaga o te pelofeta i te taimi ne lavea ei ne ia te fakamaseiga o tena fa‵kai pele? Ne fai mai a te fakatomuaga i te Septuagint i te ‵gana Eleni e uiga ki te tusi ko Tagiga a Ielemia penei, “Ne sagasaga ifo a Ielemia o tagi mautuutu kae fai ana pati fanoanoa e uiga ki Ielusalema.” I te taimi ne ‵fatu i ei, telā ko te 607 T.L.M., kae koi masaua eiloa ne te pelofeta a te taimi ne ‵nofo ma‵taku ei latou i masina e 18 ke oko ki te ‵sunuga o Ielusalema, e fakamatala faka‵lei mai i te tusi ko Tagiga a Ielemia a te loto mafatia o Ielemia. (Ielemia 52:3-5, 12-14) E seai aka foki se isi fa‵kai ne ‵pau a pati fakafanoanoa kae fakaotia loto ne fai e uiga ki ei e pelā mo te fa‵kai tenei.
A te tusi ko Tagiga a Ielemia se fakasologa o lagi fakauiga e lima. A lagi e fa i te kamataga ne pese fanoanoa; a te lima se fakatagi, io me se ‵talo. A pese muamua e fa ne fuaiupu kolā e kamata ki mataimanu kese‵kese i te fakasologa o mataimanu e 22 i te ‵gana Epelu. E ui eiloa e 22 a fuaiupu i te lima o pese kolā e fetaui ‵lei mo te aofaki o mataimanu i te ‵gana Epelu, e se fakasolo eiloa a laina i ei i te fakasologa masani o mataimanu.—Tagiga a Ielemia 5:1.
“A OKU MATA KO ‵MAE I TE TAGIGA”
“Ielusalema te fa‵kai ne masani o ‵fonu sāle i tino, ko tu fakaalofa fua me ko seai ne tino i ei. Se fa‵kai ne fakaaloalogina ne te lalolagi, kae nei ko pelā me se fafine ko mate tena avaga. A te fa‵kai tafasili i te takutakua ko nofo pologa nei.” Konā eiloa a pati kamata o te tagi fanoanoa a te pelofeta ko Ielemia e uiga ki Ielusalema. Ne fai mai ne te pelofeta a te pogai o te fakalavelave tenei: “Ko te Aliki ne fakapuapuagā ne ia e ‵tusa eiloa mo ana agasala e uke ne fai.”—Tagiga a Ielemia 1:1, 5.
I tena fai mo fai se fafine ko fanoanoa i te mate o tena avaga mo ana tama‵liki, ne fesili mai a Ielusalema penei: “E seki ai eiloa se tino kai ‵mae penei mo au.” E uiga ki ana fili, ne ‵talo atu a tou fafine ki te Atua: “Fakasēaogā atu latou e ‵tusa mo olotou uiga ma‵sei; fakasala atu latou e penei mo tau fakasalaga ki a au ona ko aku agasala. Au ko tagi i toku fi‵ta, kae ko vāivāi foki toku loto.”—Tagiga a Ielemia 1:12, 22.
Ona ko te lasi o tena loto mafatia, ne fai mai a Ielemia: “Ne fakasēaogā ne [Ieova] a te malosi o Isalaelu i tena kaitaua, ne ita ma fesoasoani mai ki a matou i te taimi ne o‵mai ei omotou fili. Ne oso mai tena kaitaua ki a matou e pelā me se afi, tenā ne fakama‵sei ei a mea katoa.” Ke fakamatala mai te lasi o tena fanoanoa, ne fai mai te pelofeta: “A oku mata ko ‵mae i te tagiga; a toku agaga ko fanoanoa. Au ko vāivāi eiloa i te fanoanoa i te tāga mo te fakamaseiga ne oko ki oku tino mo toku fenua.” Ke oko foki loa ki tino kolā ne afe atu ki ei, ne fai mai latou mo te ofo: “‘Mea nei ko te fa‵kai telā e fai pelā me se fa‵kai gali?’ ‘Mea nei ko te fa‵kai telā e fakamatamata ki ei te lalolagi?’”—Tagiga a Ielemia 2:3, 11, 15.
Tali ki Fesili Faka-te-Tusi Tapu:
1:15—Ne ‘nutipala pefea ne Ieova a tino o Iuta e pelā me ne vine e ‵kumi i te koga ‵tau vine’? I te fakamaseiga o te fa‵kai telā ne fakamatala mai e pelā me se tamafine, ne fakama‵ligi ne tino Papelonia a toto e uke i ei telā ne fakatusa ei ki vine kolā e ‵tau i se koga ‵tau vine. Ne ‵valo mai ne Ieova te mea tenei kae talia foki ne ia ke tupu te mea tenā, tela la, ne mafai ei o fai atu me ko oti ne ‘nutipala ne ia te koga ‵tau uaina.’
2:1, NW—I te auala fea ne ‘‵pei ifo ei te gali o Isalaelu mai te lagi ki te lalolagi’? Ona ko “te lagi e maluga atu i te lalolagi,” a te fakamalaloga o mea ma‵luga e fakasino atu i nisi taimi ki te lotou “‵pei ifo mai te lagi ki te lalolagi.” “A te gali o Isalaelu”—ko te ‵malu mo te malosi ne maua ne ia a koi maua ne ia a fakamanuiaga a Ieova—ne ‵pei ifo ki lalo i te taimi ne fakamasei i ei a Ielusalema mo te fakamaofaga o Iuta.—Isaia 55:9.
2:1, 6, NW—Se a te “mea tuku vae” mo te “fale” o Ieova? Ne usu mai te faisalamo: “Tatou ka olo ki te fale o te Aliki; o tapuaki atu i mua o tena nofogaaliki io me ko tena mea tuku vae.” (Salamo 132:7) Tela la, a te “mea tuku vae” telā e faipati ki ei te Tagiga a Ielemia 2:1 e fakasino atu eiloa ki te faletapuaki o Ieova, io me ko tena faletapu. Ne ‘‵sunu ne te kau Papelonia a te faletapu o Ieova’ e pelā fua me se tamā fale fakamalumalu i se fatoaga.—Ielemia 52:12, 13.
2:16, 17, NW—E mata, e se ‵tau o kamata te fuaiupu e 16 ki te mataimanu Epelu ko te ayin kae ko te fuaiupu e 17 ki te mataimanu ko te pe ke tautali atu ei ki te fakasologa o mataimanu i te ‵gana Epelu? I te ‵fatuga o fakalagi i te auala tenei, e masani eiloa o tau‵tali a tino ‵fatu pese ki te fakasologa o mataimanu. Kae ne seki fai ne latou penā māfai e se ‵tagi ‵lei te fuaiupu. Ne tāua atu ki a latou ke maina ‵lei te manatu i te fuaiupu i lō te tautali atu fua ki se tulafono telā ne fai i ei ke faigofie o masaua a kupu i ei. A te ‵toe fakafokiga o mataimanu e lua konā e maua atu foki i te pese e 3 mo te 4 o te tusi ko Tagiga a Ielemia.—Tagiga a Ielemia 3:46, 49; 4:16, 17.
2:17—Se a te “folafolaga” ne fakataunu ne Ieova e uiga ki Ielusalema? E manino ‵lei me ne fakasino atu a te fuaiupu tenei ki te Levitiko 26:17, telā e fai mai penei: “Ka fulitua atu au ki a koutou ko te mea ke takavale koutou, ka ko latou kolā e takalia‵lia i a koutou ka mai o pule koutou. A koutou ka sōna tele, seai se tino e afuli ne ia koutou, me i a koutou ko oko eiloa i te ma‵taku.”
Akoakoga mō Tatou:
1:1-9. Ne tagi mautuutu a Ielusalema i te po kae ne ‵sofi ifo ana loimata ki ana kalafou. Ko maofa valevale a mataloa o ana ‵pui kae ko ana faitaulaga ko ‵fonu i te fanoanoa. Ko loto mafatia ana tamafine, kae ko fanoanoa malosi a ia. Kaia? Me ko oti ne fai ne Ielusalema se matugā agasala matagā. Ko ‵fonu eiloa a ia i te agasala. A fuataga o te ofa tulafono e se ko te fiafia, kae ko loimata, ko te manava fi‵ta mo te fanoanoa.
1:18. E amiotonu kae faimeatonu a Ieova māfai ko fakasala ne ia a tino ofa tulafono.
2:20. Ne fakailoa atu ki tino Isalaelu me kafai e se faka‵logo latou ki te leo o Ieova, ka oko atu ki a latou a puapuagā, kolā e aofia i ei te ‵kai ne latou ‘olotou tama‵liki.’ (Teutelonome 28:15, 45, 53) Ko tafaga la te masei ke filifili aka ke se fakalogo koe ki te Atua!
‘NE LAGONA EILOA NE KOE TAKU FAKAMOLEMOLE’
I te Tagiga a Ielemia mataupu e 3, ne faipati i ei e uiga ki te malo o Isalaelu e pelā me se “tino” malosi. Faitalia tena fepaki mo mea faiga‵ta, ne usu mai te tagata tenā, penei: “A te Aliki e atafai ki a latou kolā e tali‵tonu ki a ia.” I tena ‵talo ki te Atua tonu, ne fai atu a ia: “I te taimi ne fakamolemole atu ei au ke fakalogo mai koe ki taku tagi, kae ne lagona eiloa ne koe.” I tena fakamolemole ki a Ieova ke saga atu ki mea fakamasiasi a te fili, ne fai atu a ia: “Te Aliki, fakasala atu latou e ‵tusa mo olotou mea ne fai.”—Tagiga a Ielemia 3:1, 25, 56, 64.
Ne fakaasi mai ne Ielemia ana lagonaga e uiga ki mea ma‵sei ne ‵tupu i te 18 masina ne nikoi ei ne kautau a Ielusalema kae fai mai ana pati: “A oku tino ko silia atu te fakasalaga o latou i lō tino o Sotoma, kolā ne fakamalaia ne te Atua.” Ne fakaopoopo mai a Ielemia: “A tino ne ‵mate i te taua e ‵lei atu i tino ne ‵mate fakamuli, kolā ne ‵mate eiloa i te fia‵kai.”—Tagiga a Ielemia 4:6, 9.
E fakaasi mai i te lima o fakalagi, a tino Ielusalema e pelā me e fai‵pati. Ne fai mai latou: “Te Aliki, masaua te mea ne tupu ki a matou. Kilo mai ki a matou, ke lavea ne koe te motou masiasi.” I te taimi ne fakamatala ei ne latou olotou puapuagā, ne fakatagi mai latou: “A koe ko te tupu ki te se gata mai, kae ka pule koe ki te se gata mai. Te Aliki! Toe faka‵foki mai matou ki a koe! Toe puke atu matou ki a koe! Kae fakafou te olaga takutakua ne ‵nofo muamua matou i ei.”—Tagiga a Ielemia 5:1, 19, 21.
Tali ki Fesili Faka-te-Tusi Tapu:
3:16—Se a te mea e fakasino atu ki ei te tugāpati: “Kae fatifati ne ia oku nifo i kilikili”? E fai mai se tusi e tasi penei: “I te taimi ne ave fakapagota ei latou, ne faimālōgina te kau Iuta ke tao olotou falaoa i poko kolā ne keli i te laukele, ne palutaki ei olotou falaoa mo one mo kilikili.” Kafai e ‵kai ki falaoa konā, e mafai o matifitifi i ei a nifo o se tino.
4:3, 10—Kaia ne fakatusa ei ne Ielemia a “[ona] tino” ki “ositelite” o te vao? A te ositelite “e fai ana faiga [ki ana tama] e pelā eiloa me e se o ia a fua,” ko pati i te Iopu 39:16. Kafai ko ‵foa a fua, ko olo ei te mātua mo nisi ositelite fāfine kae nofo te ositelite tagata o tausi a punua. Kae ne a mea e ‵tupu mafai ko fe‵paki latou mo mea fakama‵taku? E ‵tele tokolua kea‵tea te tagata mo te fafine mai te ofaga kae tiakina a lā punua. I te taimi ne nikoi ei ne kautau a Papelonia, ne gasolo aka ei o masei ‵ki te oge meakai i Ielusalema telā ne fai i ei a mātua kolā ne masani o a‵lofa ki olotou tama ke fakasauā atu ki a latou, e pelā eiloa mo ositelite i te vao. E ‵kese ‵ki eiloa te mea tenei mo te atafai telā e fakaasi atu ne kuli vao ki olotou tama.
5:7—E mata, e fakasala ne Ieova a tino ona ko agasala a olotou tupuga? Ikai, e se fakasala ‵tonu ne Ieova a tino ona ko agasala a olotou tupuga. E fai mai te Tusi Tapu, “Ko ‵tau i a tatou takitokotasi o avatu se tala o ia ki te Atua.” (Loma 14:12) Kae, e mafai o tumau a ikuga o agasala i se vaitaimi kae pokotia i ei a tupulaga fakamuli ifo. E pelā mo te ‵fuliatuga o tino Isalaelu o ifo ki tupua ne fai i ei ke faigata ki tino Isalaelu fakamaoni i kautama fakamuli ke tau‵tali atu i auala o te amiotonu.—Esoto 20:5.
Akoakoga mō Tatou:
3:8, 43, 44. I te taimi ne fepaki ei Ielusalema mo te fakalavelave, ne ita a Ieova ma fakalogo ki te fakatagi a tino o te fa‵kai mō se fesoasoani. Kaia? Me ne seki faka‵logo a tino, kae seki sala‵mo foki. Kafai e ma‵nako tatou ke tali mai a Ieova ki ‵tou ‵talo, e ‵tau o faka‵logo tatou ki a ia.—Faataoto 28:9.
3:20. A Ieova, “te pule tafasili i te lalolagi kātoa,” e maluga ‵ki kae e punou ifo “ke lavea ne ia te lagi mo te lalolagi.” (Salamo 83:18; 113:6) Kae, ne iloa ‵lei ne Ielemia a te loto fiafia o te Toe Tino Maluga ke punou ifo ki lalo i tino, ko tena uiga ko te fakamalalo ifo o ia ke ‵pau mo latou ko te mea ke fakamalosi atu ki a latou. Ko tafaga te ‵tou fia‵fia ke iloa atu me e se gata fua i te malosi mo te poto katoatoa a te Atua tonu, kae e loto maulalo foki!
3:21-26, 28-33. E kufaki pefea ne tatou a logomaega faiga‵ta? E fakaasi mai ne Ielemia ki a tatou. E se ‵tau o puli i a tatou me e ‵fonu a Ieova i te alofa kaimalie kae lasi tena alofa fakamagalo. E ‵tau foki o masaua i a tatou me i te ‵tou ola mai ki te aso nei se pogai tāua e tasi e se ‵tau ei o ‵fiu tatou kae e ‵tau o loto kufaki kae ‵nofo fakatalitali tatou, e aunoa mo te fameo, ki te fakaolataga a Ieova. E se gata i ei, e ‵tau o talia ne tatou mo te loto maulalo a tofotofoga, mo te iloa me i so se mea telā e talia ne te Atua ke tupu ne fai eiloa ne ia mō se pogai ‵lei.
3:27, NW. A te fakafesagai atu ki tofotofoga o te fakatuanaki i te taimi koi talavou ei e mafai o fakauiga ki te kufaki i mea faiga‵ta mo fakatauemuga. Kae se mea ‵lei mō ‘kautama tuputupu ke amo olotou amoga i te taimi koi talavou ei.’ Kaia? Me kafai e mafai o amo se amoga o te logo‵mae a koi foliki se tino e fakatoka ei te tino tenā ke fakafesagai atu ki fakalavelave i tausaga fakamuli.
3:39-42. A ‘te muimui’ mafai ko logo‵mae tatou i ‵tou agasala e se se mea poto. I lō te fameo ki ikuga o au mea ‵se ne fai, ‘ke na sukesuke ifo tatou ki ‵tou amioga kae ke ‵foki atu tatou ki a Ieova.’ Se mea poto ke sala‵mo kae fakatonutonu aka a ‵tou auala.
Ke Fai a Ieova mo Fai te Tino e Talitonu Koe ki ei
E fakaasi mai i te tusi ko Tagiga a Ielemia a te kilokiloga a Ieova ki Ielusalema mo te fenua o Iuta mai tua o te ‵sunuga mo te lepega ne te kau Papelonia a te fa‵kai. A tala o agasala kolā ne fakamau ki loto i ei, e fakaasi manino mai i ei me mai te kilokiloga a Ieova, te pogai o te fakalavelave ne māfua mai eiloa i agasala a tino. E aofia foki i pese konei a fakalagi kolā e fakamatala mai i ei te fakamoemoe ki a Ieova mo te manakoga ke ‵fuli atu ki te auala tonu. E ui eiloa e se konei a lagonaga o te tokoukega o tino i aso o Ielemia, ne fakasino mai eiloa a pati konā ki lagonaga o Ielemia mo te toega o tino kolā ne sala‵mo.
E tuku mai i te iloiloga a Ieova e uiga ki te tulaga o Ielusalema telā e fakamatala mai i te tusi ko Tagiga a Ielemia a akoakoga tāua e lua. A te mea muamua, a te fakamaseiga o Ielusalema mo te fakamaofaga o Iuta ne fakamalosi mai ke faka‵logo ki a Ieova kae e fai mo fai se fakailoaga ke mo a eiloa e manatu māmā ki te faiga o te loto o te Atua. (1 Kolinito 10:11) A te lua o akoakoga e maua mai i te fakaakoakoga a Ielemia. (Loma 15:4) Ke oko eiloa ki toe tulaga faiga‵ta, ne ‵fuli atu eiloa a te pelofeta loto mafatia tenei ki a Ieova mō se fakaolataga. E pefea la te tāua ke tali‵tonu katoatoa tatou ki a Ieova mo tena Muna kae tali‵tonu katoatoa ki a Ia!—Epelu 4:12.
[Fakamatalaga o te Ata i te itulau e 9]
Ne lavea eiloa ne te pelofeta ko Ielemia a te fakataunuga o te fekau o te fakamasinoga telā ne folafola ne ia
[Fakamatalaga o te Ata i te itulau e 10]
Ne tofotofogina a te fakatuanaki o tāgata Kolea konei ona ko te lotou tulaga faka-Kelisiano i te sē ‵kau atu ki se feitu