Se a te Malo o te Atua?

SE A te fekau tāua o te galuega talai a Iesu? Ko te Malo o te Atua, e ‵tusa loa mo pati a Iesu. (Luka 4:​43) Kafai ne fakalogo‵logo a tino ki a ia, e mautinoa eiloa me ne lagona ne latou a fakamatalaga e uke e uiga ki te Malo tenā. E mata, ne ‵numi latou? E mata, ne fesili atu latou ki a ia me se a te Malo tenā? Ikai. E seki fakaasi mai i tusi Evagelia a vaegā fesili penā. Tela la, e mata, a te Malo o te Atua se talitonuga masani ki tino konā?

A te tonuga loa, ne fakamatala mai i te Tusi Tapu, telā ne faka‵malu ne tino Iutaia i aso mua e pelā me tapu a te Malo tenā, mai te fakaasi atu i se auala manino kae mautinoa a te mea tenā mo mea kolā ka fakataunu i ei. I aso nei, e mafai ne tatou o tauloto a mea e uke atu e uiga ki te Malo i se auala tai ‵pau​—mai te fakaaogāga o te Tusi Tapu. Ke na onoono nei tatou ki manatu ‵tonu e fitu kolā e akoako mai ne te Tusi Tapu e uiga ki te Malo. A mea e tolu muamua ne avanoa faeloa ki tino Iutaia i aso o Iesu mo taimi mai mua atu i ei. Ako nisi mea e tolu ne fakaasi atu ne Keliso io me ko ana apositolo i te senitenali muamua. Ako te ‵toe mea ko manino mai eiloa i ‵tou taimi nei.

1. A te Malo o te Atua se malo tonu, telā ka tumau ki te se-gata-mai. Ne fakaasi mai i te valoaga muamua a te Tusi Tapu me ka uga mai ne te Atua se fakaola ki tino fakamaoni. Ka fakaseai ne ia telā e taku ko te “fanau,” a fakalavelave faiga‵ta kolā ne kamata mai te ‵tekeatuga o Atamu, Eva, mo Satani. (Kenese 3:​15) Mai tua ifo i ei, ne fai atu ne te tupu fakamaoni ko Tavita se mea fakafiafia e uiga ki te “fanau” tenei, io me ko te Mesia. Ka pule atu a ia ki luga i se Malo. E ‵kese eiloa te malo tenei mai nisi malo katoa. Ka tumau eiloa ki te se-gata-mai.​—2 Samuelu 7:​12-14.

2. Ka fakaseai ne te Malo o te Atua a pule­ga katoa a tino. Ne tuku atu ki te pelofeta ko Tanielu se fakaasiga telā ne lavea ne ia se fakasologa o malo ma‵losi o te lalolagi ke oko mai ki ‵tou taimi nei. Ke mafaufau ki te fakaotiga fakafiafia o te fakaasiga tenā: “I te taimi o takitaki [fakaoti] konā, kae ka fakatu ne te Atua o te lagi a te malo telā ka se toe gata mai. Ka se toe mafai o takavale a te malo tenā. Ka fakatakavale ne ia a malo katoa konā, kae ka tumau ki te se gata mai.” Tela la, ka fakaseai katoatoa atu a malo katoa o te lalolagi tenei​—fakatasi mo olotou taua, ‵tekemaiga mo faifaiga faivalevale​—ki te se-gata-mai. E pelā mo te mea e fakaasi mai i te valoaga a Tanielu, ko pili o pule mai te Malo o te Atua ki te lalolagi kātoa. (Tanielu 2:​44, 45) E pelā me se tinā mea tonu, ka tumau eiloa te malo tenei ki te se-gata-mai.

3. Ka fakagata ne te Malo o te Atua a taua, masaki, oge meakai, ke oko foki ki te mate. E fakaasi mai i valoaga fakaofoofogina i te Tusi Tapu a mea ka fai ne te Malo o te Atua i te lalolagi nei. Ka fakataunu katoa ne te malo tenā a mea kolā ne seki mafai lele loa o fai ne malo o tāgata i aso mua mo aso mai mua nei. Mafaufau la​—me ka fakaseai katoa a meatau ki te se-gata-mai! “E fakagata ne ia a taua i te lalolagi kātoa.” (Salamo 46:9) Ka se toe ai ne tokita, fakaimasaki, io me ko so se vaegā famai. “Ka seai eiloa se tino i luga i te ‵tou fenua e tagi i a ia e masaki.” (Isaia 33:24) Ka se toe ai se oge, te se lava o mea‵kai, io me ko te fiakai. “Ke fakamaumea te fenua i saito.” (Salamo 72:16) Ka seai ne mate, aitagi, tanuga, fale mate, io me ko logo‵maega kolā e maua mai ei. Ka fakaseai atu a te ‵tou fili masei, telā ko te mate. A te Atua “ka fakagata ne ia te mate ke se toe ai eiloa! Ka ‵solo ne ia a loimata mai i mata o tino katoa.”​—Isaia 25:8.

4. Ne filifili ne te Atua te Pule i te Malo o te Atua. Ne seki filifili aka fua ne te Mesia a ia eiloa ke fai mo pule, kae ne seki filifili aka foki a ia ne tino se ‵lei katoatoa. Ne filifili eiloa a ia ne Ieova te Atua. E fakasino atu loa ana ‵tofi ko te Mesia mo te Keliso me ne filifili aka a ia ne te Atua. E fakauiga loa a pati e lua konā ki te “Tino Fakaekegina.” Tela la, ko oti ne fakaeke ne Ieova a te Tupu tenei ki tena tofiga fakapito. E fai mai te Atua e uiga ki a ia: “Tenei taku tavini, telā ne fai ne au ke malosi ko ia telā ne filifili ne au, kae e fiafia foki au ki a ia. Ne faka‵fonu ne au a ia ki toku agaga, kae ka aumai ne ia te fai mea tonu ki malo katoa.” (Isaia 42:1; Mataio 12:​17, 18) Ko oi la e iloa ‵lei atu ne ia a te vaegā Pule telā e ‵tau o maua ne tatou i tafa o te Tino telā ne faite ne ia tatou?

5. Ko oti ne fakaasi mai ne te Pule o te Malo o te Atua a tena tāua ki tino katoa. Ko oti ne fakamaoni aka me i a Iesu te Nasaleta ko te Mesia telā ne folafola mai. Ne fanau mai a ia i te kāiga telā ne filifili ne te Atua. (Kenese 22:18; 1 Nofoaiga Tupu 17:11; Mataio 1:1) I tena nofoga i te lalolagi nei, ne fakataunu ne ia a valoaga e uke e uiga ki te Mesia kolā ko leva ne ‵valo mai i te fia o senitenali mua. Ne fakaasi mai foki mai te lagi i a ia ko te Mesia. E pefea la? E tonu, ne faipati mai te Atua mai te lagi ke fakasino atu ki a ia e pelā me ko Tena Tama; ne fakasino atu foki a agelu ki a Iesu e pelā me ko te Mesia telā ne folafola mai; kae ne fai ne Iesu a vavega​—i nisi taimi i mua o te fia selau ke oko ki te fia afe o molimau​—e mautinoa me ne fai e auala i te ‵mana o te Atua.a Ne fakaasi mai faeloa ne Iesu me ko ia se vaegā Pule pefea. Ne seki maua fua ne ia te ‵mana ke fesoasoani atu ki tino kae e manako foki a ia ke fai penā. (Mataio 8:​1-3) Ne kaimalie a ia, loto alofa, loto toa, kae loto maulalo. E tuku mai i te Tusi Tapu a fakamatalaga e uiga ki tena olaga kātoa i te lalolagi, ke fai‵tau ne tino katoa.

6. E toko 144,000 a tino e pule fakatasi mo te Keliso i te Malo o te Atua. Ne fai mai a Iesu me i nisi tino aka, e aofia i ei ana apositolo, ka pule fakatasi mo ia i te lagi. E taku ne ia te potukau tenei ko te “lafu foliki.” (Luka 12:32) Fakamuli ifo, ne fai atu ki te apositolo ko Ioane me i te aofaki o te lafu foliki tenei e ‵tusa mo te 144,000. E isi se galuega fakaofoofogina ka fai ne latou i te lagi, mai te pule fakatasi mo Keliso e pelā me ne tupu mo faitaulaga.​—Fakaasiga 5:​9, 10; 14:​1, 3.

7. Ko pule nei a te Malo o te Atua i te lagi, kae ko toka o pule mai ki te lalolagi kātoa. A te ‵toe munatonu tenei se mea fakaofoofogina e tasi telā e mafai o tauloto ne tatou. E tuku mai i te Tusi Tapu a fakamaoniga e uke me ko oti ne tuku atu ki a Iesu a te pule­ga e pelā me ko te Tupu i te lagi. Ko pule nei a ia i konā, i te vaitaimi eiloa tenei, kae i se taimi pili mai mua nei ka fakaoko mai ei ne ia tena pulega ki mea katoa i te lalolagi kae fakataunu ei a valoaga fakaofoofogina kolā ko oti ne sau‵tala ki ei tatou. Kae e mafai pefea o tali‵tonu tatou me ko pule mai nei a te Malo o te Atua? Kae ko te taimi fea ka kamata ei o pule mai ki te laolagi?

[Fakamatalaga mai lalo]