Se Fesili e Fai ne Tino i te Lalolagi Katoa

E MAFAUFAU la ki te fia selau miliona ke oko ki piliona o tino kolā e fesili mai ne latou se fesili eiloa e tasi. E fakamolemole atu latou ki te ‵toe pule maluga i te lagi mo te lalolagi ke fakataunu aka se fakatagi fakapito. Kae ne nāi tino fua e iloa tonu ne latou a te mea telā e fakamolemole latou ki ei. E mata, e mafai o tupu se vaegā mea penā? A te tonuga loa, e tupu faeloa a te mea tenā i aso katoa. Se a te mea e fakamolemole atu ki ei a tino katoa konei? Ko te oko mai o te Malo o te Atua!

E pelā me se fakatautauga e tasi, e nofo pelā ki se 37,000 o lotu kolā e fai mai i a latou ne Kelisiano, mo te tali‵tonu i a Iesu Keliso ko te lotou Takitaki. Ko sili atu i te lua piliona o tino i lotu konā. E tokouke mai i a latou e fakaaogā ne latou te ‵talo telā e taku pelā me ko te ‵Talo a te Aliki. E mata, e iloa ne koe te ‵talo tenei? E pelā mo te mea ne akoako atu ne Iesu ki ana soko, e kamata penei: “Te motou Tamana i te lagi: ke tapu tou igoa, ke oko mai tou Malo, ke fai te mea e loto koe ki ei i lalo nei, e pelā mo te faiga i te lagi.”​—Mataio 6:​9, 10.

Koi fakaaloalogina faeloa ne tino i te fia o senitenali a pati konā i olotou lotu. E fakafoki‵foki fakatasi foki ne latou a mea konā i olotou kāiga io me ko tino taki tokotasi, i taimi ‵lei mo taimi se ‵lei. E taku atu ne latou a pati konā mo te loto kātoa mo te loto finafinau. Ne fai ne nisi tino a te mea tenei e pelā me se meatauloto kae fai atu faeloa ne latou e aunoa mo te mafaufau faka‵lei ki tena uiga. A tino o Lotu Kelisiano ‵Se konei, e se ko tino fua kolā e fakamoe‵moe kae ‵talo atu mō te oko mai o te Malo o te Atua.

Se Fesili e Fai Foki i Lotu sē Kelisiano

A te ‵talo lauiloa o te lotu Iutaia ko te ‵talo telā e fai i te sunako i aso katoa io me i te mate o se kāiga pili. Faitalia me e se fakasino tonu atu te ‵talo tenā ki te mate io me ko te fanoanoa, e masani eiloa o fai sāle i taimi o te fanoanoa. E fai penei te ‵talo: “Ke fakatu ne ia [te Atua] tena Malo i tou olaga . . .  kae e fai fakavave.”a E faipati loa a te suā ‵talo i te sunako i aso mua ki te fakamoemoega mō te Malo o te Mesia mai te gafa o Tavita.

Ko oti foki ne lavea ne nisi tino i lotu sē Kelisiano a te manatu gali e uiga ki te Malo o te Atua. E pelā mo te mea e fakaasi mai i te nusipepa ko The Times of India, ne fai mai se takitaki lotu i Initia i te 19 o senitenali, telā ne fiafia malosi ke iloa ne ia a mea kolā e lotoma‵lie fakatasi ki ei a tino lotu Hindu, Musilimu, mo nisi lotu Kelisiano: “A te malo tonu o te Atua ka se fakataunu ke oko loa ki te taimi e maopoopo fakatasi ei a lotu kese‵kese.” Kae ne tusi atu fakamuli a te pule faiakoga o se kolisi o te lotu Musilimu i Strathfield, i Ausetalia ki se nusipepa, penei: “E pelā mo tino Musilimu katoa, e talitonu au [me] i a Iesu ka foki mai kae fakatu aka te Malo tonu o te Atua.”

E aunoa mo se fakalotolotolua, ko lau nei i piliona a tino kolā e fakamoe‵moe kae ma‵nako ki te Malo o te Atua. Kae ke mafaufau la ki se manatu tāua.

Kāti e iloa ne koe me i a matou Molimau a Ieova, kolā e ‵lomi ne matou te mekesini tenei, e olo atu sāle mai fale ki fale o sau‵tala mo tino ki mea faka-te-Tusi Tapu. I te taimi ne ‵lomi ei te tusi tenei, e fai ne matou a te galuega tenei i te lalolagi kātoa, i fenua e 236 mo ‵gana e sili atu i te 400. A te matua tāua o te motou talaiga ko te Malo o te Atua. A te tonuga loa, ke onoono me i te matua kātoa o te mekesini tenei ko Te Faleleoleo Maluga e Folafola Atu ei a te Malo o Ieova. E fesili atu sāle matou ki tino me e ‵talo atu latou mō te Malo tenā me ikai. A te tokoukega o latou e tali mai, ao. Kae, kafai e fesili atu me se a te Malo tenā, a te tokoukega o tino e tali mai penei, “E se iloa ne au,” io me kāti e se manino kae se mautinoa olotou tali.

Kaia e fakamolemole atu ei a tino e tokouke ki se mea telā e se mafai ne latou o fakamatala aka? E mata, e fai penā ona ko te Malo o te Atua se mea telā e faigata kae se manino ‵lei? Ikai. E katoatoa kae manino a fakamatalaga i te Tusi Tapu e uiga ki Malo o te Atua. E se gata i ei, e mafai ne te fekau i loto i te Tusi Tapu o tuku mai ki a koe a te fakamoemoega tonu e uiga ki te Malo i te vaitaimi faigata tenei. I te suā mataupu, ka lavea ne tatou a te auala e fakamatala mai ei ne te Tusi Tapu a te fakamoemoega tenā. Kae ka lavea atu ne tatou a te tali ki te ‵talo a Iesu e uiga ki te oko mai o te Malo.

[Fakamatalaga mai lalo]