Ka Oko Mai Mafea te Malo o te Atua?

TE ALIKI, e mafai ne koe i te taimi nei o toe fakafoki a te Malo ki a Isalaelu?” (Galuega 1:6) Ne fia iloa malosi ne apositolo me ko te taimi fea ka fakatu aka ei ne Iesu tena Malo. I aso nei, kāti mai tua ifo o se 2,000 tausaga, koi ma‵nako eiloa a tino ke iloa ne latou me: Ka oko mai mafea te Malo o te Atua?

Ona ko te mea ne fai ne Iesu a te Malo e pelā ko te matua tāua o tena galuega talai, kāti e mafaufau foki koe me ne faipati a ia e uiga ki te fesili tenei. Kae ne fai eiloa a ia penā! Ne faipati atu a ia i taimi e uke e uiga ki se vaitaimi telā e taku ne ia ko tena “fakatasi mai.” (Mataio 24:​37, NW) E isi se sokoga o te fakatasimaiga tenā mo te fakatuakaga o te Malo faka-Mesia. Se a te fakatasimaiga tenei? Ke na onoono nei tatou ki manatu ‵tonu e fa kolā e fakaasi mai i te Tusi Tapu e uiga ki te fakatasi mai o Keliso.

1. Ka kamata te fakatasi mai o Keliso i se taimi tai leva mai tua o tena mate. Ne fai mai ne Iesu se tala fakatusa kae ne faka‵pau ne ia a ia ki se tagata telā e fano “ki se fenua ‵mao atu ke fai a ia mo tupu.” (Luka 19:12) Ne fakataunu pefea a te valoaga fakatusa tenā? Tenā ne mate ei a Iesu kae ne toe fakatu aka; faimalaga atu ei ki te “fenua ‵mao,” telā ko te lagi. E pelā mo te mea ne ‵valo mai ne Iesu i se isi tala fakatusa tai ‵pau, a tena toe foki mai i tena malosi fakatupu ka oko mai fua mai tua o se taimi “leva.”​—Mataio 25:19.

I nāi tausaga mai tua o te fanakaga a Iesu ki te lagi, ne tusi mai te apositolo ko Paulo: “Ka ko Keliso ne ofo atu ne ia e tasi faeloa te taulaga mō agasala, ko te taulaga e tumau tona ‵lei ki te se gata mai; nofo ei a ia i te koga tāua ko te feitu fakaatamai o te Atua. Ko fakatali nei i konā ke oko ki te taimi e tuku ei ne te Atua ona fili ke fai mo mea e tuku ei ona vae.” (Epelu 10:​12, 13) Tela la, ne fakatali ei a Iesu i te lagi i se vaitaimi leva. Ne oti atu a te vaitaimi tenā i te taimi ne fai ei ne Ieova te Atua a tena Tama e pelā me ko te Tupu o te Malo faka-Mesia telā ko leva ne folafola mai. A te mea tenā ko te kamataga o te fakatasimaiga o Keliso. E mata, ka lavea ne tino i te lalolagi a te mea fakaofoofogina tenei?

2. E se matea ki mata o tino a tena fakatasi mai. Masaua la, me ne faipati atu a Iesu ki te fakailoga o tena fakatasi mai. (Mataio 24:3) Moi ne fai e matea atu ki mata o tino a tena fakatasi mai, e mata, e manakogina i ei se fakailoga? Ke fai se fakatusa: Ke fakaataata i tou mafaufau me nofo atu koe i se fenua lasi kae faimalaga atu ke lavea ne koe te tai. Kāti ka lavea ne koe a fakailoga i te auala kolā e fakasino atu ki te auala e ‵tau o fano koe i ei, kae i te taimi ko oko atu ei koe ki te tafātai, kae tu atu i te matāfaga kae kilo atu koe ki te moana lasi, e mata, ka fakamoemoe ke lavea atu ne koe se fakailoga lasi telā e fakasino atu ki te tai mo te pati telā e tusi i luga i ei, “te Tai”? Ikai! Kaia fua la e ‵tau ei o fai se fakailoga ke fakasino atu ki te mea telā ko lavea atu ne koe ki ou mata?

Ne fakamatala atu ne Iesu a te fakailoga o tena fakatasi mai, e se ki se mea telā e mafai o lavea atu ne tino ki olotou mata, kae ke fesoasoani atu fua ke iloa ne latou se mea telā ka tupu i te lagi. Tela la, ne fai atu a Iesu: “A te Malo o te Atua e se oko mai mo ni fakailoga ke lavea atu.” (Luka 17:20) Kae e fakaasi atu pefea a te fakailoga ki tino i te lalolagi me ko oti ne kamata a te fakatasi mai o Keliso?

3. A te fakatasi mai o Iesu e fakamailoga ki se taimi o fakalavelave faiga‵ta i te lalolagi nei. Ne fai mai a Iesu me i tena fakatasi mai e pelā me ko te Tupu i te lagi e fakamailoga loa ki taua, oge, mafuie, masaki, mo amioga ma‵sei i te lalolagi. (Mataio 24:​7-​12; Luka 21:​10,11) Ne māfua mai i fea a fakalavelave katoa konei? E fakamatala mai i te Tusi Tapu me i a Satani, “te aliki masei o te lalolagi nei,” ko oko eiloa i te kaitaua, me e iloa ne ia me ko toetoe fua tena taimi, me ko oti ne kamata a te fakatasi mai o Keliso e pelā me ko te Tupu. (Ioane 12:31; Fakaasiga 12:​9, 12) Ko lavea atu i ‵tou aso nei a fakamaoniga e uke o te kaitaua o Satani mo te fakatasi mai o Keliso. Maise loa talu mai te 1914, se tausaga telā ne iloa ne tino tusitala me se vaitaimi o fakama‵fuliga ‵lasi ‵ki, ne lavea atu ei te fakamaoniga tenei i se auala telā ne seki tupu eiloa i te lalolagi kātoa.

Kāti e foliga mai a mea katoa konā e pelā me ne tala se ‵lei, kae e se penā loa. E fakauiga loa me ko pule mai nei a te Malo faka-Mesia i te lagi. Ko pili nei o fakaoko mai ne te malo tenā a tena pulega ki te lalolagi kātoa. E mafai pefea o iloa ne tino a mea e uiga ki te Malo tenā ko te mea ke talia kae ke ‵nofo latou mai lalo o tena pulega?

4. E fakamailoga a te fakatasi mai o Iesu ki te faiga o te galuega talai i te lalolagi kātoa. Ne fai mai a Iesu me i tena fakatasi mai ka pelā eiloa mo te mea ne tupu i “aso o Noa.”a (Mataio 24:​37-​39) Ne seki fai fua a Noa e pelā me se tino faite vaka; kae ne fai foki a ia e pelā me se tino “telā ne folafola atu ne ia te amiotonu.” (2 Petelu 2:5) Ne fakailoa atu ne Noa ki tino me ka oko mai se fakamasinoga mai te Atua. Ne fai mai foki a Iesu me ka fai foki ne ana soko i te lalolagi se mea e tai ‵pau i te taimi o tena fakatasi mai. Ne ‵valo mai a ia: “A te Tala ‵Lei tenei e uiga ki te Malo, e fakamatala atu ki te lalolagi kātoa, mo fai te molimau ki tino ­katoa; ko oko mai ei te gataga.”​—Mataio 24:14.

E pelā mo te mea ne lavea ne tatou i te mataupu mai mua, ka fakaseai ne te Malo o te Atua a malo katoa o te lalolagi nei. A te faiga o te galuega talai se fakailoaga ki tino me ko pili o gasuesue a te malo faka-te-lagi tenei, kae tuku atu ei se avanoaga ki tino katoa ke ‵sao i te fakaseaiga telā ka oko mai kae ke aofia latou i tino kolā ka ‵nofo mai lalo i te Malo tenā. Kae, ko te fesili tāua la, Ka saga atu pefea koe ki ei?

E Mata, a te Malo o te Atua se Tala ‵Lei ki a Koe?

A te fekau telā ne folafola atu ne Iesu se fakamoemoega se fuafuagina. Mai tua o te ‵tekeatuga i Etena i te fia afe tausaga ko ‵teka, ne fuafua ne Ieova te Atua ke fakatu aka se malo telā ka faka‵tonu ne ia a mea katoa, kae toe faka‵foki atu a tino fakamaoni ki te tulaga telā ne fuafua ne te Atua mō latou mai te kamataga​—ko te ola ki te se-gata-mai i se palataiso i te lalolagi nei. Se a la te mea e sili atu tena fakafiafia i tafa o te iloaga me i te malo tenei telā ko leva ne folafola mai ko pule mai nei i te lagi? E se se manatu fua telā ko se aogā, kae se mea tonu eiloa!

Nei la, ko pule atu nei a te Tupu filifilia a te Atua i vā o ana fili. (Salamo 110:2) I te lalolagi faivalevale tenei telā e ‵vae kea‵tea mai te Atua, ko fakataunu nei ne te Mesia a te loto o tena Tamana ke ‵sala atu ki tino kolā e ma‵nako ke iloa ne latou te Atua tonu, kae tapuaki atu ki a ia “i te agaga mo te fakamaoni io me ko te munatonu.” (Ioane 4:​24) E avanoa eiloa ki tino mai itukāiga katoa, mo tupulaga kese‵kese a te fakamoemoega ke ola ki te se-gata-mai, mai lalo o te pulega a te Malo o te Atua. (Galuega 10:​34, 35) E fakamalosi atu matou ke talia ne koe a te avanoaga gali tenei. Ke na tauloto nei e uiga ki te Malo o te Atua, ko te mea ke mafai o fiafia koe o nofo mai lalo i te pulega amiotonu tenei ki te se-gata-mai!​—1 Ioane 2:​17.

[Fakamatalaga mai lalo]

[Ata i te itulau e 7, 8]

A tala se ‵lei kolā e lagona faeloa ne tatou i aso katoa se fakamaoniga me ko pili o oko mai a mea ‵gali

[Te Fakamatalaga]

Antiaircraft gun: U.S. Army photo