FATATUSI I TE ITANETI a te Faleleoleo Maluga
Faleleoleo Maluga
FATATUSI I TE ITANEI
Tuvalu
  • TUSI TAPU
  • TUSI
  • MEETINGS
  • w08 1/1 itu. 12-16
  • Saga Tonu Atu ki Tou “Atamai i te Akoako Atu”

E seai se vitio penei

Fakatoese atu, e isi se fakalavelave ki te peiga o te vitio

  • Saga Tonu Atu ki Tou “Atamai i te Akoako Atu”
  • Te Faleleoleo Maluga e Folafola Atu ei te Malo o Ieova—2008
  • Ulutala fo`liki
  • Mataupu
  • Ke Ati Aka te “Atamai i te Akoako Atu”
  • Ke Fakavae au Akoakoga ki te Muna a te Atua
  • Ke Fakaaogā a Fesili Ma‵goi
  • Ke Fakafaigofie
  • Fesoasoani Atu ke Fakatāua ne Tino A‵koga Olotou Mea ne Tauloto
  • Fakaasi Atu te Alofa Tonu
  • Te Auala ke Fai se Akoga Faka-te-Tusi Tapu Telā ka Iku Atu ki te Papatisoga—Vaega Lua
    Te Faleleoleo Maluga e Folafola Atu ei te Malo o Ieova (Sukesukega)—2020
  • Fesoasoani ki au A‵koga Faka-te-Tusi Tapu ke Fai mo Soko Papatiso
    Te Faleleoleo Maluga e Folafola Atu ei te Malo o Ieova (Sukesukega)—2021
  • Te Auala ke Fai se Akoga Faka-te-Tusi Tapu Telā ka Iku Atu ki te Papatisoga—Vaega Muamua
    Te Faleleoleo Maluga e Folafola Atu ei te Malo o Ieova (Sukesukega)—2020
  • Fesoasoani Atu ki Nisi Tino ke Faka‵logo ki mea Kolā e Akoako Mai i te Tusi Tapu
    Te Faleleoleo Maluga e Folafola Atu ei te Malo o Ieova—2007
Nisi Mea
Te Faleleoleo Maluga e Folafola Atu ei te Malo o Ieova—2008
w08 1/1 itu. 12-16

Saga Tonu Atu ki Tou “Atamai i te Akoako Atu”

“Folafola atu te muna, . . . fakatonu atu, akoako atu, fakamalosi atu fakatasi mo te kufaki katoatoa mo te atamai i te akoako atu.”—2 TIMOTEO 4:2, NW.

1. Se a te fakatonuga ne tuku atu ne Iesu ki ana soko, kae se a te fakaakoakoga ne tuku mai ne ia?

FAITALIA a galuega ‵gali ne fai ne Iesu ki te faka‵leiga o tino i te taimi o tena taviniga i te lalolagi nei, ne seki lauiloa fua a ia e pelā me se tino faka‵lei masaki io me se tino fai vavega, kae e pelā me se faiakoga. (Maleko 12:19; 13:1) A te folafolaatuga o te tala ‵lei e uiga ki te Malo o te Atua ko te ‵toe galuega tāua ki a Iesu, kae e penā foki loa mo ana soko i aso nei. E maua ne Kelisiano se fakatonuga ke tumau i te galuega ko te faiga o soko mai te akoakoga o tino ke faka‵logo ki mea katoa kolā ne fakatonu atu ne Iesu.—Mataio 28:19, 20.

2. Ne a mea e ‵tau o fai ne tatou ke fakataunu ei ‵tou galuega talai?

2 Ko te mea ke fakataunu te fakatonuga ne tuku mai ki a tatou ke fai a soko, e taumafai faeloa tatou ke momea aka te ‵tou atamai i te akoako atu. Ne faka‵mafa mai ne te apositolo ko Paulo a te tāua o te atamai tenei i tena tusi ki tena taugasoa e talai tasi sāle laua, ko Timoteo. Ne fai atu a ia: “Ke matapula koe, kae tausi faka‵lei ki au akoakoga, kae fai eiloa ne koe i taimi katoa, me kafai e fai ne koe, ka fakasao ne koe a koe eiloa, pelā foki mo latou kolā e faka‵logo mai ki a koe.” (1 Timoteo 4:16) A te vaegā akoakoga telā ne mafaufau a Paulo ki ei e se ko te fakaokoatuga fua o te poto ki te suā tino. E taumafai a faifeau Kelisiano ma‵goi ke oko atu latou ki loto o tino kae fakamalosi atu ke fai a fakama‵fuliga ki olotou olaga. A te mea tenā ko te atamai. Tela la, e mafai pefea o ati aka ne tatou te “atamai i te akoako atu” māfai ko fakailoa atu ki nisi tino a te tala ‵lei o te Malo o te Atua?—2 Timoteo 4:2.

Ke Ati Aka te “Atamai i te Akoako Atu”

3, 4. (a) E mafai pefea o ati aka ne tatou te “atamai i te akoako atu”? (e) E fesoasoani mai pefea a te Akoga mō Tino Talai ke fai tatou pelā me ne faiakoga ma‵goi?

3 E fakamatala mai ne se tikisionale a te “atamai” e pelā me ko te “apo telā e maua mai i te sukesuke, te fakaakoako, io me ko te mataonoono.” E ‵tau o ‵saga tonu atu eiloa tatou ki mea e tolu konei ko te mea ke fai tatou pelā me ne faiakoga ma‵goi o te tala ‵lei. E mafai o malamalama faka‵lei tatou i ‵tou mataupu manafai e suke‵suke faka‵lei ki ei fakatasi mo te faiga o ‵talo. (Faitau te Salamo 119:27, 34.) A te onoono atu ki te auala e akoako ei a faifeau apo o te tala ‵lei, e fesoasoani mai ei ke iloa ne tatou olotou auala kae ke fakaakoako atu foki ki a latou. Kae ko te taumafai malosi i taimi katoa ke fakagalue aka a ‵tou mea ne tauloto, ka fesoasoani mai ke momea aka te apo o tatou.—Luka 6:40; 1 Timoteo 4:13-15.

4 A Ieova ko te ‵tou Faiakoga Sili. E auala i te vaega matea o tena fakapotopotoga, e takitaki ne ia ana tavini i te lalolagi nei ki te auala e ‵tau ei o fakataunu ne latou te lotou galuega talai. (Isaia 30:20, 21) Ona ko te mea tenei, e fai ne fakapotopotoga takitasi a te Akoga mō Tino Talai i vaiaso takitasi ke fesoasoani atu ei ki tino katoa kolā ne ‵kau ki ei ke fai pelā me ne tino talai ma‵goi o te Malo o te Atua. A te tusi telā e fakavae ki ei a te akoga tenei ko te Tusi Tapu. E fakaasi mai i te Muna fakaosofia a Ieova a mea kolā e ‵tau o akoako ne tatou. E se gata i ei, e fakaasi mai foki i ei a auala ma‵goi kae fetaui ‵lei ke akoako atu ei. E fakamasaua mai faeloa ne te Akoga mō Tino Talai me e mafai o apo malosi atu tatou e pelā me ne faiakoga māfai e fakavae a ‵tou akoakoga ki te Muna a te Atua, fakaaogā a fesili ma‵goi, akoako atu i se auala faigofie, kae fakaasi atu te fiafia tonu ki nisi tino. Ke na iloilo aka nei ne tatou a manatu takitasi konei. Ko sau‵tala ei tatou ki te auala ke oko atu ei ki te loto o se tino akoga.

Ke Fakavae au Akoakoga ki te Muna a te Atua

5. Se a te mea e ‵tau o fakavae ki ei ‵tou akoakoga, kae kaia?

5 Ne fakavae ne Iesu, telā ko te ‵toe faiakoga sili o tino, ana akoakoga ki te Tusi Tapu. (Mataio 21:13; Ioane 6:45; 8:17) Ne seki faipati a ia i tena igoa eiloa, kae i te igoa o te Tino telā ne uga mai ne ia a ia. (Ioane 7:16-18) Tenā foki eiloa te mea e ‵tau o fai ne tatou. Tela la, e ‵tau o fakavae a ‵tou pati kolā e fai atu i te galuega mai fale ki fale io me i akoga faka-te-Tusi Tapu ki te Muna a te Atua. (2 Timoteo 3:16, 17) E se mafai eiloa o ‵pau a ‵tou poto mo te malosi mo te ‵mana o te Tusi Tapu. E pule katoatoa te Tusi Tapu ki ei. Tela la, faitalia so se mea telā e taumafai tatou ke fakamalamalama atu ki se tino akoga, a te ‵toe auala ‵lei ko te faiga ke faitau ne ia mai loto eiloa i te Tusi Tapu.—Faitau te Epelu 4:12.

6. E fakamautinoa aka pefea ne se faiakoga me e malamalama ‵lei te tino akoga i te mataupu telā e faipati ki ei?

6 E se fakauiga i ei me e se ‵tau o fai a fakatokaga a se faiakoga Kelisiano mō te akoga faka-te-Tusi Tapu. E ‵kese mai i ei, e ‵tau o mafaufau faka‵lei ki tusi siki kolā ka faitau ne te faiakoga io me ko te tino akoga mai te Tusi Tapu, i te taimi e fai ei te akoga. E pelā mo te masani, se mea ‵lei ke faitau a tusi siki kolā e ‵lago atu ki ‵tou talitonuga. Se mea ‵lei foki ke fesoasoani atu ki te tino akoga ke malamalama i fuaiupu takitasi kolā e faitau ne ia.—1 Kolinito 14:8, 9. 

Ke Fakaaogā a Fesili Ma‵goi

7. Kaia e magoi ei ke fakaaogā a fesili i te akoako atu?

7 A te fakaaogāga o fesili mo te atamai, e fakamalosi aka ei te tino ke mafaufau malosi kae fesoasoani atu ki te faiakoga ke oko atu ki te loto o te tino akoga. Tela la, i lō te fakamatala atu ki te tino akoga a tusi siki, fesili atu ki a ia ke fakamatala mai ne ia ki a koe. I nisi taimi, kāti ka manakogina se fakasologa o fesili ke fesoasoani atu ei ki tau tino akoga ke malamalama faka‵lei. Kafai e fakaaogā ne koe a fesili ke akoako atu ei te tino akoga, ko fesoasoani atu eiloa koe ki a ia ke malamalama i nisi fakaikuga e fai ne tatou kae ke talitonu foki eiloa a ia ki te fakaikuga tenā.—Mataio 17:24-26; Luka 10:36, 37.

8. E mafai pefea o iloa ne tatou a mea i te loto o se tino akoga?

8 E fakaaogā i mataupu mō sukesukega kolā e maua i ‵tou tusi a fesili mo tali. E mautinoa eiloa, me i te tokoukega o tino kolā e sukesuke mo koe ki te Tusi Tapu ka mafai o tali fakavave aka ne latou a fesili, mai te fakaaogāga o fakamatalaga i palakalafa konā. Kae, ka se lotomalie fua te faiakoga telā e manako ke oko tonu atu ki te loto o te tino, ki tali ‵tonu konā. E pelā me se fakaakoakoga, e mafai o fakamatala mai ne se tino akoga a mea ‵tonu mai te Tusi Tapu e uiga ki te finalalolagi. (1 Kolinito 6:18) Kae ko te faiga o fesili mo te atamai, e mafai o fakaasi mai i ei a te kilokiloga a se tino akoga e uiga ki ana mea ne tauloto. Kāti e mafai o fesili atu te faiakoga: “Kaia e taku fakamasei ei ne te Tusi Tapu a faifaiga fakatauavaga i tua o te fakaipoipoga? Se a tau faka‵tau ki te tulafono tenei mai te Atua? E mata, e mafaufau koe me e isi ne mea aogā e maua mai te ola e ‵tusa mo tulaga o te Atua i mea tau amioga? A tali ki vaegā fesili penā e mafai o fakaasi mai ei a mea i te loto o te tino akoga.—Faitau te Mataio 16:13-17.

Ke Fakafaigofie

9. Se a te mea e ‵tau o masaua ne tatou mafai ko fakamatala atu a mea faka-te-Tusi Tapu?

9 A te ukega o muna‵tonu i loto i te Muna a te Atua ne mea faigofie fua. E tiga eiloa te feitu tenā, kae ko oti ne faka‵numi aka a mafaufau o tino kolā e suke‵suke mo tatou ki te Tusi Tapu, ne akoakoga a lotu ‵se. E pelā me ne faiakoga, a te tiute o tatou ko te faiga ke faigofie o malamalama i te Tusi Tapu. A faiakoga ma‵goi e fakailoa atu ne latou a fakamatalaga i se auala faigofie, manino kae ‵tonu. Kafai e tau‵tali tatou i fakatakitakiga konei, ka se fakafaigata ne tatou te munatonu. ‵Kalo keatea mai fakamatalaga sē aogā. E se manakogina ke isi faeloa se fakamatalaga e fai ki so se tusi siki telā e faitau atu. Ke saga tonu atu fua ki mea kolā e tāua ke fakamaina atu i ei te manatu telā e faipati ki ei. Ka gasolo malielie eiloa o malamalama a te tino akoga i muna‵tonu ‵loto mai te Tusi Tapu.—Epelu 5:13, 14.

10. Ne a mea e fai ei ke iloa ne tatou a te uke o mea kolā e mafai o sau‵tala ki ei i se akoga faka-te-Tusi Tapu?

10 E pefea te uke o mea e ‵tau o sau‵tala ki ei i se sukesukega e tasi? E manakogina i konei a te poto. E kese‵kese a atamai mo fakanofonofoga o te tino akoga mo te faiakoga, kae e ‵tau o masaua ne tatou me i te mea telā e taumafai tatou ki ei e pelā me ne faiakoga, ko te fesoasoani atu ki te tino akoga ke ati aka te malosi o tena fakatuanaki. Tela la, e tuku atu ne tatou a taimi e lava ke faitau, ke malamalama, kae ke talia ne ia a muna‵tonu kolā e fakaasi mai i te Muna a te Atua. E se ‵tau o sukesuke tatou ki mea e uke kolā ko se mafai ei o tauloto ne ia i te taimi e tasi. Kae e ‵tau foki eiloa o fai ne tatou te akoga ke gasolo faeloa ki mua. Kafai ko malamalama te tino akoga i te manatu tenā, ko olo ei tatou ki te suā manatu.—Kolose 2:6, 7.

11. Ne a mea tāua e tauloto ne tatou mai te apositolo ko Paulo e uiga ki te akoako atu?

11 Ne fakafaigofie ne te apositolo ko Paulo a te fekau o te tala ‵lei i tena faipatiga ki tino ‵fou. E ui eiloa ne akoga faka‵lei a ia, ne kalo kea‵tea a ia mai te fakaaogāga o pati kolā e se malamalama i ei a nisi tino. (Faitau te 1 Kolinito 2:1, 2.) A te faigofie o muna‵tonu mai te Tusi Tapu e fai ei ke fia‵fia mai a tino loto ‵lei kae ke lotoma‵lie foki ki ei. E se manakogina ke poto malosi se tino ke mafai o malamalama i ei.—Mataio 11:25; Galuega 4:13; 1 Kolinito 1:26, 27.

Fesoasoani Atu ke Fakatāua ne Tino A‵koga Olotou Mea ne Tauloto

12, 13. Se a te mea e mafai o fakamalosi atu ki te tino akoga ke gasuesue e ‵tusa mo ana mea e tauloto? Fakamatala mai.

12 Ko te mea ke magoi a ‵tou akoakoga, e ‵tau o oko atu a mea konā ki te loto o se tino akoga. E ‵tau o malamalama te tino akoga i te auala ke fakagalue aka ei ne ia a fakamatalaga konā ki a ia, e aogā pefea ki a ia, kae ka gasolo aka pefea o ‵lei tena olaga mai te tautali atu ki fakatakitakiga faka-te-Tusi Tapu konā.—Isaia 48:17, 18.

13 E pelā me se fakaakoakoga, kāti e sau‵tala tatou ki te Epelu 10:24, 25, telā e fakamalosi mai i ei ki Kelisiano ke maopoopo fakatasi mo taina tali‵tonu ko te mea ke maua mai i ei a fakamalosiga mai te Tusi Tapu kae ‵kau fakatasi mo te alofa. Kafai e seki kau atu nei te tino akoga ki fakatasiga a te fakapotopotoga, kāti e mafai o fakamatala fakatoetoe atu ne tatou a te auala e fai ei a fakatasiga konā mo mea kolā ka sautala ki ei. Kāti e mafai o fakaasi atu me i fakatasiga a te fakapotopotoga se vaega o ‵tou tapuakiga kae fakaasi atu me ka aogā eiloa ki a tatou taki tokotasi. Ka oti ko ‵kami ei ne tatou te tino akoga ke kau atu ki ei. A tena fakalogo ki fakatonuga mai te Tusi Tapu e ‵tau o fakamalosi aka ne tena manakoga ke fakalogo ki a Ieova, kae e se ko te mea ke fakafiafia atu fua ki te tino e fai ne ia tena akoga.—Kalatia 6:4, 5.

14, 15. (a) Ne a mea e mafai o tauloto ne se tino akoga e uiga ki a Ieova? (e) E mafai o aogā pefea ki se tino akoga ki te Tusi Tapu ke iloa ne ia a uiga totino o te Atua?

14 A te suā mea aogā telā e maua ne te tino akoga mai te sukesuke ki te Tusi Tapu mo te fakagaluegaga o fakatakitakiga i ei, ko te faiga ke iloa kae ke a‵lofa latou ki a Ieova e pelā me se tino tonu. (Isaia 42:8) E se fai fua a ia e pelā me se Tamana alofa mo te Tino ne faite kae pule atu ki te lagi mo te lalolagi, kae e fakaasi mai foki ne ia ana uiga totino mo tena malosi ki tino kolā e a‵lofa kae tavini atu ki a ia. (Faitau te Esoto 34:6, 7.) I te taimi ko pilipili o ‵taki keatea ei ne Mose a te fenua o Isalaelu mai te ‵nofo pologa i Aikupito, ne fakaasi mai ne Ieova a ia eiloa i ana pati: “Ka fai ne au so se mea e ‵tau o fai.” (Esoto 3:13-15, NW) E fakasino atu te mea tenei me e mafai o fai a Ieova mo fai so se mea telā e ‵tau o fai ne ia ko te mea ke fakataunu i ei ana fuafuaga mō ana tino filifilia. Tela la, ne iloa i ei ne tino Isalaelu a Ieova e pelā me ko te Tino telā ne faka‵sao ne ia latou, se toa, ne fakatoka ne ia a mea mō latou, ne fakataunu ne ia ana folafolaga, kae ne fesoasoani atu foki ki a latou i auala e uke.—Esoto 15:2, 3; 16:2-5; Iosua 23:14.

15 Kāti ne seki maua eiloa ne ‵tou tino a‵koga a faifaiga fakavavega mai i a Ieova i olotou olaga, e pelā mo Mose. Kae, kafai e gasolo faeloa ki mua te lotou fakatuanaki kae loto fakafetai ki mea e tauloto ne latou kae kamata o fakagalue ne latou, e mautinoa me ka lavea ne latou te manakoga ke fakalagolago ki a Ieova ke maua te loto toa, te poto mo tena takitakiga. Kafai e fai penā, ka iloa foki ne latou a Ieova e pelā me se Tino poto kae fakatuagagina telā e fakatonutonu, e puipui kae tuku mai ne ia mo te kaimalie a mea katoa kolā e ma‵nako latou ki ei.—Salamo 55:22; 63:7; Faataoto 3:5, 6.

Fakaasi Atu te Alofa Tonu

16. Kaia e se fai ei a te masani ‵lei i se mea mo fai te ‵toe mea tāua i te faiga e pelā me se faiakoga apo?

16 Kafai e mafaufau koe me e se apo malosi koe i te akoako atu, ke se loto vāivāi koe. Ko Ieova eiloa mo Iesu e fakatoka ne laua te polokalame o akoakoga telā e fai i te lalolagi kātoa i aso nei. (Galuega 1:7, 8; Fakaasiga 14:6) E mafai o fakamanuia ne laua ‵tou taumafaiga ko te mea ke aogā a ‵tou pati e fai ki tino loto ‵lei. (Ioane 6:44) A te loto alofa tonu o se faiakoga ki tena tino akoga e mafai o fakasēaogā ne ia so se vāivāiga o te tino. Ne fakaasi mai ne te apositolo ko Paulo me ne malamalama a ia i te tāua o te alofa ki tino kolā ne akoako ne ia.—Faitau te 1 Tesalonia 2:7, 8. 

17. E mafai pefea o fakaasi atu ne tatou te alofa tonu ki ‵tou akoga faka-te-Tusi Tapu taki tokotasi?

17 I se auala penā, e mafai o fakaasi atu ne tatou te alofa tonu ki ‵tou akoga faka-te-Tusi Tapu taki tokotasi mai te fakamasani faka‵lei mo ia. Kafai e sautala ki fakatakitakiga faka-te-Tusi Tapu mo ia, kāti ka mafai o malamalama tatou i ana fakanofonofoga. Ka mafai o iloa ne tatou me e ola nei a ia e ‵tusa mo nisi manatu kolā ne tauloto ne ia mai te Tusi Tapu. Kae kāti koi manakogina ke fai ne fakama‵fuliga i nisi feitu. Mai te fesoasoani atu ki te tino akoga ke lavea ne ia te auala ke fakagalue aka ei a mea kolā ne tauloto ne ia mai tena akoga faka-te-Tusi Tapu, ko mafai eiloa o fesoasoani atu tatou ki a ia ke fai pelā me se soko tonu o Keliso.

18. Kaia e tāua ei ke ‵talo fakatasi mo te tino akoga kae ‵talo atu foki mō latou?

18 Kae sili atu i ei, e mafai o ‵talo fakatasi tatou mo ‵tou tino a‵koga kae ‵talo atu foki mō latou. E ‵tau o lavea mai ne ia me i te mea telā e ma‵nako tatou ki ei ko te fesoasoani atu ki a ia ke iloa faka‵lei ne ia te Atua, fakapilipili atu ki a Ia, kae ke maua ne ia a mea aogā mai te takitakiga a Ia. (Faitau te Salamo 25:4, 5.) Kafai e ‵talo atu tatou ke fakamanuia ne Ieova a taumafaiga a te tino akoga ke fakagalue ne ia ana mea ne tauloto, ka lavea ne te tino akoga a te tāua ke fai pelā me se ‘tino telā e tautali i te muna.’ (Iakopo 1:22) Kae kafai e fakalogologo a te tino akoga ki ‵tou ‵talo kolā e fai mo te loto kātoa, ka tauloto foki a ia ki te faiga o ‵talo. Ma‵faga o mea fakafiafia ke fesoasoani atu ki akoga faka-te-Tusi Tapu ke ati aka te lotou fesokotakiga mo Ieova!

19. Ne a mea ka sau‵tala ki ei i te suā mataupu?

19 Se mea fakamalosi loto ke iloa atu me ko sili atu nei i te ono mo te afa miliona o Molimau a Ieova i te lalolagi kātoa e fakalavelave nei i te atiakaga o te lotou “atamai i te akoako atu,” mo te fakamoemoega ke fesoasoani atu ki tino loto ‵lei taki tokotasi ke faka‵logo ki mea katoa kolā ne fakatonu mai ne Iesu. Ne a ikuga e maua ne tatou mai ‵tou galuega talai? Ka maua ne tatou a te tali ki te fesili tenei i te suā mataupu.

E Masaua ne Koe?

• Kaia e ‵tau ei o ati aka ne Kelisiano a te “atamai i te akoako atu”?

• Ne a auala e mafai o fai ei ke magoi ‵tou akoako atu?

• Se a te mea e mafai o fakasēaogā i ei a ‵tou vāivāiga i te akoako atu?

[Ata i te itulau e 13]

E mata, ko kau atu nei koe ki te Akoga mō Tino Talai?

[Ata i te itulau e 14]

Kaia e tāua ei ke ‵kami ne koe au tino a‵koga ke fai‵tau eiloa ki te Tusi Tapu?

[Ata i te itulau e 16]

‵Talo fakatasi mo te tino akoga kae ‵talo atu foki mō latou

    Tusi Tuvalu (1981-2026)
    Log Out
    Log In
    • Tuvalu
    • Share
    • Nisi Manakoga
    • Copyright © 2025 Watch Tower Bible and Tract Society of Pennsylvania
    • Auala ki te Fakaaogaga
    • Saolotoga Faka-te-Tulafono
    • Privacy Settings
    • JW.ORG
    • Log In
    Share