Fesili Mai te Kau Fai‵tau

Ne fai mai te apositolo ko Paulo me ‘ne fakaolagina a Isalaelu kātoa.’ (Loma 11:26) E mata, ne fakauiga a ia me ne ‵fuli a tino Iutaia i se taimi ki te Lotu Kelisiano?

Ikai, e se tenā te mea ne fakauiga ki ei a Paulo. E pelā me se fenua, ne seki talia ne tino mai te gafa o Apelaamo a Iesu e pelā me ko te Mesia. Kae i tausaga mai tua ifo o te mate o Iesu, ne manino mai ei me ne seki ‵fuli atu a tino Iutaia katoa ki te Lotu Kelisiano. Kae ne tonu eiloa a te fakamatalaga a Paulo me ‘ne fakaolagina a Isalaelu kātoa.’ I te auala fea?

Ne fai atu a Iesu ki takitaki lotu Iutaia i ana aso: “Te Malo o te Atua e ave keatea mai i a koutou, kae tuku atu ki se fenua telā e fakaasi mai i ei ne fua ‵lei.” (Mataio 21:43) Ona ko te mea ne ‵teke atu a te fenua kātoa o Isalaelu ki a Iesu, ne saga atu ei a Ieova ki se fenua fou, se fenua faka-te-agaga. Ne taku ne Paulo te fenua tenei ko te “Isalaelu a te Atua!”​​—Kalatia 6:​16.

E fakamaoni mai i nisi fuaiupu i te Tusi Tapu i te ‵gana Eleni, me i te “Isalaelu a te Atua” e aofia i ei a Kelisiano fakaekegina ki te agaga e toko 144,000. (Loma 8:​15-​17; Fakaasiga 7:4) E fakamaoni mai i te Fakaasiga 5:​9, 10 me i te potukau tenei o Kelisiano fakaekegina ka aofia i ei a tino o fenua fakaa‵tea kolā ne o‵mai mai “fenua katoa, mai matakāiga takitasi, mo ‵gana kese‵kese.” Ne filifili aka a Isalaelu faka-te-agaga ke fai “mo malo o faitaulaga . . . , kae ka pule latou [ki] te lalolagi.” E tiga eiloa ko se toe talia ne Ieova a Isalaelu mo fai tena fenua filifilia, kae ne mafai eiloa o maua ne tino taki tokotasi se fesokotakiga ‵lei mo ia. Tenā eiloa te mea ne tupu ki apositolo mo nisi Kelisiano e tokouke i aso mua. E tonu, e pelā mo nisi tino katoa, e ‵tau o ‵togi a vaegā tino Iutaia penā ki te toto o Iesu Keliso.​​—1 Timoteo 2:​5, 6; Epelu 2:9; 1 Petelu 1:​17-​19.

A te galo atu i te tokoukega o tino Iutaia i te senitenali muamua a te avanoaga ke pule fakatasi mo Iesu, ne seki taofi aka i ei a te fakataunuga o te fuafuaga a te Atua. E se mafai eiloa o tupu te mea tenei, me ne fai mai a Ieova e auala i tena pelofeta: “E penā foki te muna telā e faipati ne au​—e se mafai o se fakataunu ne ia a te mea telā ne fakamoemoe au ke fai ne ia; e fai eiloa ne ia a mea kolā ne fai ne au ki ei ke fano o fai.”​​—Isaia 55:11.

E tonu eiloa te mea tenā e uiga ki te fuafuaga a te Atua ke fakamaopoopo aka te toko 144,000 o tino kolā ka pule fakatasi mo tena Tama i te lagi. E fakaasi manino mai i te Tusi Tapu me ka fakaeke ne te Atua a te aofaki kātoa o tino e toko 144,000. Ka seai eiloa se tino e galo i a latou!​​—Fakaasiga. 14:​1-5.

Tela la, i te taimi ne tusi mai ei a Paulo me ‘ne fakaolagina a Isalaelu kātoa,’ ne seki ‵valo atu a ia me ne ‵fuli a tino Iutaia katoa ki te Lotu Kelisiano. Kae ne fakauiga eiloa a ia me i te fuafuaga a te Atua ke pule fakatasi te toko 144,000 o te Isalaelu faka-te-agaga mo Tena Tama ko Iesu Keliso i te lagi, ka fakataunu eiloa. I te taimi tonu o te Atua, a te aofaki tonu​​—ko te “Isalaelu kātoa”​​—ka fakaolagina, kae ka pule fakamuli mai latou e pelā me ne tupu mo faitaulaga i te Malo faka-Mesia.​​—Efeso 2:8.

[Fakamatalaga o te Ata i te itulau e 32]

Ka o‵mai te kau fakaekegina mai “fenua katoa, mai matakāiga takitasi, mo ‵gana kese‵kese”