Se a te Munatonu e Uiga ki te Lagi?

KO OKO eiloa i te ‵tagi gali mai o te fakamoemoega e uiga ki te olo atu ki te lagi! E akoako atu eiloa a te fakamoemoega e uiga ki te ola mai tua o te mate i vaega kese‵kese o te lotu Musilimu, Hinitu, te lotu Puta, tino o Lotu Kelisiano ‵Se, mo nisi tino e tokouke kolā e se fia‵fia ki lotu. E fakaataata eiloa a te lagi e pelā me se koga gali kae fakafiafia telā e maua ei ne tino te saolotoga mai i logo‵maega kae toe ‵kau fakatasi mo “tino pele kolā ko oti ne ‵mate atu.” Kae mō tino e tokouke, e tonu eiloa te fakamunaga mua tenei: E ma‵nako a tino katoa ke olo atu ki te lagi, kae e seai se tino e manako o mate ke fanatu ki ei. Kaia e fai ei penā?

Kafai ne faite tatou ke ‵mate kae olo atu ki te lagi, e mata, ka se olioli ki ei a tino e tokouke e pelā eiloa me se tamaliki telā e olioli ke na matua a ia io me se talavou telā e olioli ke na avaga a ia? Kae e se ma‵nako eiloa a tino e tokouke ke ‵mate latou.

Kae e folafola mai foki a tino talai me mai tua o te malōlōga malie i te lalolagi, e fai eiloa te lagi e pelā me se koga e ola ei tatou i aso mai mua. E pelā me se fakaakoakoga, ne siki mai ne te Faifeau ko Theodore Edgar McCarrick, se faifeau maluga telā ko litaea i Washington, D.C., i ana pati: “E seki faite tatou mō te olaga tenei. Ne faite eiloa tatou ke ola i te lagi.” I se auala tai ‵pau, ne siki mai foki ne se pelesitene mua o te U.S. National Association of Evangelicals, i ana pati penei: “A te pogai o te ola ko te ‵viki atu ki te Atua kae olo atu ki te lagi . . . me i te lagi ko te ‵tou fale.”

A tino kolā e tali‵tonu ki te ola i te lagi mai tua o te mate e masani o fakavae olotou talitonuga ki nai fakamatalaga. Ne iloa aka ne George Barna, telā ko te pelesitene o se kamupane telā e sukesuke ne latou a manatu fakalotu, me e tokouke a tino ne tau‵tali ki “kilokiloga e uiga ki te ola mai tua o te mate telā e fakavae ki manatu mai i mea e pelā mo ata, pese mo tala.” Ne fai mai se faifeau o te lotu Epikopo i Florida, penei: “E se iloa ne matou so se mea e uiga ki te lagi i tafa o te iloa atu me i te Atua e nofo i te lagi.”

Kae e fai eiloa te lagi e pelā me se mataupu tāua telā ne fakamatala mai i te Tusi Tapu. E ‵tusa mo te Muna a te Atua, e pefea a foliga o te lagi? E mata, ne faite a te tagata ke ola i te lagi? Kafai e olo atu eiloa a tino ki te lagi, ne a mea ka fai ne latou i konā?

[Ata i te itulau e 3]

Kaia e ma‵nako ei a tino e tokouke ke olo ki te lagi, kae ne nai tino fua e ma‵nako ke ‵mate latou ko te mea ke olo atu latou ki konā?