E Mata, a te Tusi Tapu ko te Muna a te Atua?

“Me i Tusitusiga Tapu katoa ne aumai mai te Atua, kae aoga ki te akoakoga o te mea tonu, ki te polopoloki, ki te fakatonu o te mea ‵se, mo te akoako atu ki te olaga ‵lei, ko te mea, ko te tino telā e tavini atu ki te Atua, ke maua ne ia te fakamaoniga, ke lava tena uta e fai ei ne ia so se galuega ‵lei.”​—2 TIMOTEO 3:16, 17.

KO OKO eiloa i te malosi o te fakamatalaga a te apositolo ko Paulo e uiga ki te tāua o te Tusi Tapu! E tonu, ne fakasino tonu atu eiloa a ia ki te vaega o te Tusi Tapu telā ne maua i ana aso​—ko tusitusiga kolā e fakasino atu ki ei a tino i nisi taimi ki te Feagaiga Mua. A ko te ‵tonuga loa, e fakasino malosi atu ana pati ki tusi katoa e 66 o te Tusi Tapu, e aofia i ei a tusi kolā ne tusi ne soko fakamaoni o Iesu i te senitenali muamua T.A.

E mata, e fakatāua malosi ne koe a te Tusi Tapu e pelā mo Paulo? E mata, e talitonu koe me ne fakaosofia eiloa ne te Atua a tino tusitala o te Tusi Tapu? Ne fai eiloa penā a Kelisiano i te senitenali muamua. Ne seki galo atu a te talitonuga tenā i te senitenali muamua. I te 14 o senitenali, ne kilo atu a te faifeau ko John Wycliffe ki te Tusi Tapu e pelā me ko te “tulafono ‵lei katoatoa o te munatonu.” E fai mai a The New Bible Dictionary, telā ne fai atu ne ia a pati a Paulo kolā e siki atu mai i luga me “e fakaasi mai ne te Atua a te munatonu i loto i te Tusi Tapu.”

Te ‵Fuliga o Kilokiloga e Uiga ki te Tusi Tapu

Kae i aso nei, ko gasolo o matafitafi atu a te loto tali‵tonu ki te Tusi Tapu. E fai mai a te tusi ko The World’s Religions, e uiga ki “akoakoga” “me [koi] talia eiloa ne Kelisiano katoa a te Tusi Tapu e pelā me se tusi fakatonutonu, telā e takitaki ei olotou faifaiga kae faka‵tu aka ei olotou talitonuga.” Kae ko se tonu eiloa te manatu tenā i faifaiga a tino. E ‵kilo atu a tino e tokouke ki te Tusi Tapu e pelā me se “mea e se ‵lei kae se fakatuagagina foki i tuu a tino.” E tiga eiloa e ma‵losi faka-te-agaga a tagata kolā ne tusi ne latou a te Tusi Tapu, e ‵kilo atu latou ki tino tusitala konā e pelā me ne tagata sē ‵lei katoatoa kolā ne taumafai malosi ke fakamatala atu a muna‵tonu faka-te-agaga ‵loto kae se lava te lotou poto mo te malamalama telā e maua ne tatou i aso nei.

A te ‵tonuga loa, e mu‵tana fua a tino i aso nei e talia ne latou a te Tusi Tapu ke takitaki ne ia olotou mafaufauga mo faifaiga. E mata, e lagona faeloa ne koe a pati a tino me i tulaga o te Tusi Tapu e uiga ki amioga ko se aoga i aso nei? E tali‵tonu a tino e tokouke me e mafai o akoako atu ne latou a tulafono mo akoakoga fakavae i te Tusi Tapu kolā e fia fakalogo‵logo ki ei a tino​—io me e taumafai ke se ‵saga katoatoa atu latou ki ei. Ko se ‵saga atu nei a nisi tino kolā e taku ne latou a latou eiloa e pelā me ne Kelisiano ki pati i te Tusi Tapu e uiga ki te finalalolagi, mulilua, sē fakamaoni mo te konā.​—1 Kolinito 6:9, 10.

Kaia ko fai ei penei? I te kamataga o te 20 senitenali, ne fakaasi mai a te pogai e tasi ne se tino telā e sukesuke ki mea mua ko Sir Charles Marston i tena tusi ko The Bible Is True. Ne fai mai a ia me i tino ko tō vave ke “talia ne latou a manatu tuku taumate e uke o tino tusitala i aso nei” kolā ne taumafai o ‵teke atu ki te ‵tonu o te Tusi Tapu. E mata, koi tonu eiloa te mea tenā i aso nei? E pefea tau kilokiloga ki manatu mo akoakoga a faifeau kolā e fakavāivāi ne latou a te loto talitonu ki te Tusi Tapu? Ke onoono aka me ne a mea e fakaasi mai i te suā mataupu.