A te Tusi Tapu ko te Muna Fakaosofia Eiloa a te Atua

SE A te mea ne fakauiga tonu ki ei a te apositolo ko Paulo i ana pati me i te Tusi Tapu ne “aumai mai te Atua”? (2 Timoteo 3:16) I tusitusiga a Paulo i te ‵gana Eleni, ne fakaaoga ne ia se pati telā e fakauiga tonu ki te “manava atu ne te Atua.” Ona ko te mea tenā, ne fakauiga ne Paulo me ne takitaki ne te Atua e auala i tena agaga tapu a tino tusitala o te Tusi Tapu ke tusi fua ne latou a mea kolā ne manako a Ia ke tusi ne latou.

Ne fai mai a te apositolo ko Petelu me i “te agaga tapu e fakatasi atu ki tino kolā e folafola atu ne latou a te talaiga telā ne aumai mai i te Atua” e pelā mo tino tusitala konei o te Tusi Tapu. (2 Petelu 1:21) Tela la, ne mafai foki o fakamatala atu ne te apositolo ko Paulo a tusi i te Tusi Tapu e pelā me ne “tusitusiga tapu, kolā e mafai o avatu ne latou ki a koe te poto telā e takitaki ei koe ki te fakaolataga e alatu i te fakatuanaki i a Keliso Iesu.”​—2 Timoteo 3:15.

E kinau malosi mai a tino e tokouke me ne tusi ne te Atua a te Tusi Tapu. A tino kolā ne fakamasei ne latou te Tusi Tapu​—ne fakamatala mai faeloa ne Sir Charles Marston e pelā me “se āva ki tala i te Tusi Tapu”—⁠e ‵teke malosi atu faeloa ki te ‵tonu o te Tusi Tapu. Tela la, e fakaseaoga ne nisi tino a te mea tenei e pelā me se tusi “o tala ‵kai i aso mua.”

Ke Mafaufau ki Fakamaoniga

E mata, e mafai o tali‵tonu tatou ki te Tusi Tapu? Se mea tāua ke mafaufau faka‵lei koe ki te mea tenei. Kaia? Me kafai e fesokotaki mai te Atua e auala i te Tusi Tapu, se mea valea eiloa ke se ‵saga atu tatou ki ei. A te lasi o tou fakamoemoe ki te mea tenei e pelā me se fakamalosiga tonu ke takitaki ei au faifaiga kae fakamalosi aka foki ei tau talitonuga, kae e mafai o gasolo ifo eiloa ki lalo tou talitonu ki ei māfai ko kilo atu fua koe ki ei e pelā me ko muna a tagata i lō te Muna a te Atua.​—1 Tesalonia 2:13.

E fakaiku aka pefea ne koe a te mea tenā? E fakaiku aka pefea ke talitonu koe ki tino kolā e fetaui mo koe? E tasi eiloa te mea mautinoa. Se mea faigata ke talitonu katoatoa ki so se tino telā e se iloa ‵lei ne koe. E mafai fua o iloa ‵lei ne koe a tino māfai ko oti ne iloa tonu ne koe me e fakamaoni kae fakatalitonugina latou. E mafai foki o iloa ‵lei ne koe a te Tusi Tapu i se auala tai ‵pau penā. Ke mo a ma talia ne koe a manatu io me ko akoakoga sē ‵tonu kolā e fakamasei ne latou a te ‵tonu o te Tusi Tapu. Ke lava te taimi ke mafau‵fau ki fakamaoniga kolā e ‵lago atu ki te manatu me i te Tusi Tapu ne “aumai mai i te Atua.”

‵Tekemaiga Mai i “Taugasoa”

Ke mo a ma loto vāi‵vai ki te manatu me i nisi tino kolā e fai pelā me ne “taugasoa” o te Tusi Tapu e ‵teke atu ki te ‵tonu mo te fakatuagagina o te Tusi Tapu. E tiga eiloa e tokouke a tino ‵poto i te Tusi Tapu i aso nei e fai mai i a latou ne Kelisiano, “ka fai atu fua latou me i te Tusi Tapu ne tusi ne tino,” ko pati i te New Dictionary of Theology.

E kinau mai a faifeau e tokouke me ko oi ne tusi ne ia a tusi i te Tusi Tapu. E fai mai a nisi tino me e seki tusi ne te pelofeta ko Isaia a te tusi o Isaia. E fai mai latou, me i te tusi tenei ne tusi eiloa mai tua ifo o taimi o Isaia. E pelā me se fakaakoakoga, e ‵losi mai a te Concise Bible Commentary, telā ne tusi ne Lowther Clarke me i te Tusi Tapu “ne tusi ne tino e tokouke i tupulaga e uke.” Kae e fakaseaoga ne vaegā fakamatalaga penā me i a Iesu Keliso mo ana soko ne tavae fakafia ne latou a Isaia fakatasi mo ana tusitusiga i te tusi tenei.​—Mataio 3:3; 15:7; Luka 4:17; Ioane 12:​38-41; Loma 9:​27, 29.

E tai matagā atu a fakamaseiga e uiga ki te Tusi Tapu, e pelā mo pati a te tino poto ko J. R. Dummelow me i valoaga kolā e maua i te tusi ko Tanielu “ne tala mua o mea ko oti ne ‵tupu, kae fakamatala mai ne te tino ne tusi ne ia e pelā me se valoaga.” I te fai atu faeloa o pati konā, e se talia ne latou a fakamaoniga kolā ne taku mai eiloa ne Iesu Keliso. Ne fakailoa atu ne Iesu a te mea telā ne taku ne ia ki “te Mea Fakamataku, telā ne faipatigina ne te pelofeta ko Tanielu, e tu i te koga tapu.” (Mataio 24:15) E mata, se mea ‵lei ke talitonu se Kelisiano me i a Iesu Keliso e mafai o fakaloiloi ne ia a tino​—mai te ‵lago atu ki te faiga o tala mua e pelā me ne valoaga? Ikai.

E Mata, e Tāua te Mea Tenei?

E mafai o fesili ifo koe penei, “E mata, e tāua ke iloa atu a tino kolā ne tusi ne latou a te Tusi Tapu?” Ao, e tāua ‵ki eiloa. E mata, ka talitonu koe ki se tusi telā ne fai pelā me ko te togi mate mo te molimau a se taugasoa māfai e seki tusi ne ia te mea tenā? Kāti ne fai atu a tino ‵poto me se mea sē tonu​—ne tusi ne taugasoa o ia a mea kolā ne tali‵tonu latou me ko te togi mate a tou taugasoa. E mata, ka se fakatāua i ei a te tusi tenā? E mata, ka talitonu katoatoa koe me e fakaasi mai i ei a te togi o tou taugasoa?

E ‵pau eiloa mo te Tusi Tapu. E se tioa eiloa o tokouke a tino​—ke oko foki loa ki tino kolā e fai mai i a latou ne Kelisiano—⁠e tali‵tonu me e maua ne latou a te saolotoga ke se ‵saga atu ki pati i mataupu e pelā mo te fakamaoni, amioga fakatauavaga sē ‵tau, mo nisi mea aka. E lagona faeloa ne koe a pati a tino penei, “Io, a ko te mea tenā ko te Feagaiga Mua!”​—telā e fakauiga ei me ko se aoga malosi a te mea tenā. Kae ne fakamatala mai eiloa ne te apositolo ko Paulo a te Feagaiga Mua e pelā me ko “tusitusiga tapu” kolā ne “aumai mai te Atua.”

E mafai o fai atu koe, penei: “Kae e mautinoa eiloa me ka se mafai ne koe o fakaseaoga a te fakamaoniga a tino ‵poto katoa.” E tonu, e se mafai! E pelā me se fakaakoakoga, e loto fakafetai tatou ke sukesuke aka a fakamatalaga ‵tonu kolā ne fesoasoani mai ke iloa ne tatou a tusitusiga i te Tusi Tapu. E manino ‵lei me e uke a mea ‵se ne ‵sae aka i te Tusi Tapu i te taimi ne ‵kopi ei i senitenali e uke. Kae ke masaua a te mea tenei: E lasi ‵ki eiloa a te ‵kese i te laveaatuga o tamā mea ‵se kolā ne faulu ki loto i ‵kopi o te Tusi Tapu mo te fakaseaogaga o te Tusi Tapu kātoa e pelā me ne tusi fua ne tino.

Ke Tumau i te Fakatuanaki ki “Tusitusiga Tapu”

Mai mua o fai atu ana pati me i te Tusi Tapu ne aumai mai i te Atua, ne fai atu ne Paulo ki a Timoteo a te pogai e tāua ei se vaegā tusi telā ne fakaosofia ne te Atua. “I aso fakaoti,” ne fai mai a ia, a “tino amio ma‵sei mo te fakaloiloi tino, ka kamata eiloa latou mai te masei o fakasolo o na ma‵sei atu, i te fakaloiloi ki nisi tino, kae toe pa‵kia foki eiloa latou i olotou ‵loi.” (2 Timoteo 3:​1, 13) E foliga mai i aso o Paulo me e fakaaoga ne “tino ‵poto” a “pati fakakolekole” ke takitaki ‵se ei a tino kae fakavāivāi atu ki te lotou fakatuanaki ki a Iesu Keliso. (1 Kolinito 1:​18, 19; Kolose 2:​4, 8) E pelā me se puipuiga mai i olotou fakamalosiga, ne fakamalosi atu a te apositolo ko Paulo ki a Timoteo ke ‘tumau a ia i mea ‵tonu kolā ne akoako atu ki a ia i tena folikiga’ mai i te Atua.​—2 Timoteo 3:​14, 15.

E tāua foki ke fai ne koe a te mea tenā i te vaitaimi tenei o “aso fakaoti.” Ke mo a ma manatu māmā ki te fakamataku o tou takitaki ‵se ne “pati fakakolekole” kolā e fai mai ne tino ‵poto. I lō te fai penā, e pelā mo Kelisiano i te senitenali muamua, ke na puipuigina koe mai te fakalagolago katoatoa ki mea kolā e tauloto ne koe mai te Tusi Tapu​—telā ko te Muna fakaosofia a te Atua.

Ka fia‵fia eiloa a Molimau a Ieova o fesoasoani atu ke ati aka ne koe a te fakatuanaki ki te Tusi Tapu. E pelā mo te mafai o fakaasi atu ne latou a te auala ne fakamaoni atu ei me i fakatakitakiga i te Tusi Tapu e ‵tonu eiloa i tala mua; te auala e tonu ei te Tusi Tapu i mea fakasaienitisi; te auala e fetaui ‵lei ei mai te kamataga ki te fakaotiga; te auala e ‵tonu katoatoa eiloa ana valoaga​—mo nisi mea e tai uke atu. Kafai e manako koe ki ei, ke mo a ma fakatalave o tusi atu ki tino kolā e ‵lomi ne latou te mekesini tenei mō fakamatalaga kolā ne fesoasoani atu ki te fia miliona o tino loto ‵lei ke lavea ne latou me i te Tusi Tapu ko te Muna a te Atua.

[Ata i te itulau e 5]

E fakaiku aka pefea ke talitonu koe ki tino kolā e fetaui mo koe?

[Ata i te itulau e 6]

E loto fakafetai tatou ki sukesukega ‵tonu kolā ne fesoasoani atu ke iloa aka ei a fakamatalaga kolā ne tusi muamua ki lalo i te Tusi Tapu