Fesoasoani Atu ki Tāgata ke Ga‵solo ki Mua i te Feitu Faka-te-agaga

“Mai i te taimi nei o fano ki mua, ka maua ne koe ne tino.”—LUKA 5:10.

1, 2. (a) Ne ‵saga atu pefea a tāgata ki te talaiga a Iesu? (e) Ne a mea ka sau‵tala ki ei i te mataupu tenei?

ITE taimi e tasi ne talai atu ei latou i Kalilaia, ne ‵sopo atu a Iesu mo ana soko ki se pōti kae olo atu ki se koga e seai ne tino i ei. Kae ne sa‵sale atu se vaitino i uta o tau‵tali atu i a latou. A tino kolā ne olo atu i te aso tenā e ‵tusa mo te toko “lima afe tāgata, kae e se faitau a fāfine mo tama‵liki.” (Mataio 14:21) I te suā taimi, ne ualolo atu se vaitino ki a Iesu ko te mea ke faka‵lei aka olotou ma‵saki kae ke lagona ne latou a ia e faipati. E aofia i a latou konā te toko “fa afe tāgata, kae e se faitau a fāfine mo tama‵liki.” (Mataio 15:38) E manino ‵lei, me e tokouke a tāgata ne olo atu ki a Iesu kae fakaasi atu te lotou fia‵fia ki ana akoakoga. E tonu, ne fakamoemoe a ia ke tokouke atu a tino ka ‵saga tonu atu, me i te otiga ne ‵poa ne ia a ika i se auala fakavavega, ne fai atu a Iesu ki tena soko ko Simona, penei: “Mai i te taimi nei o fano ki mua, ka maua ne koe ne tino.” (Luka 5:10) Ne faka‵pau ne Iesu a te lotou galuega talai ki te faiika. E mafai o fesoasoani atu a ia ki a latou ke ‵sala atu ki tino kolā ka talia ne latou te munatonu. Kae e aofia i ei a tāgata.

² I aso nei, e fakaasi atu foki ne tāgata a te fiafia ki te fekau mai te Tusi Tapu telā e talai atu ne tatou. (Mataio 5:3) Kae e fakatalave a tāgata e tokouke kae se fia ga‵solo atu ki mua i te feitu faka-te-agaga. E mafai pefea o fesoasoani atu tatou ki a latou? E tiga eiloa e seki fakatoka ne Iesu se galuega talai fakapito ke ‵sala atu ki tāgata, kae ne faipati eiloa a ia ki mataupu kolā e manava‵se sale ki ei a tāgata i ana aso. Mai tena fakaakoakoga, ka suke‵suke nei tatou ki auala e mafai ei o fesoasoani atu tatou ki tāgata ke fakafesagai atu ki mea masani kolā e manava‵se ki ei i aso nei: (1) te tausiga o te olaga, (2) te mataku ona ko kilokiloga a tino ki a ia, mo te (3) ko lagonaga me se lava tena atamai.

Te Tausiga o te Olaga

3, 4. (a) Se a te mea e manava‵se malosi ki ei a tāgata e tokouke? (e) Kaia e fakamuamua ei ne nisi tāgata a te ‵sala atu ki mea e tausi ei te olaga i lō manakoga faka-te-agaga?

³ Ne fai atu se faiakoga o te tulafono ki a Iesu, “Te Faiakoga, au e toka o tautali atu i a koe ki so se koga e fano koe ki ei.” Kae i te taimi ne fai atu ei a Iesu me i te “Tama a te Tagata, e seai se koga mo ona fakatapū,” ne toe mafaufau faka‵lei ei a te faiakoga o te tulafono ki ana pati ne fai. Kāti ne manavase a ia me ka maua i fea ana meakai io me ko te koga ka nofo a ia i ei, me e seai se mea e fakaasi mai i te Tusi Tapu me ne fai a ia pelā me se tokotasi o soko o Keliso.—Mataio 8:19, 20.

⁴ E mafau‵fau sale a tāgata me tāua atu a te puipuiga faka-te-foitino i lō te ‵sala atu ki mea faka-te-agaga. A te kausaki atu ki akoakoga ma‵luga mo se galuega ‵lei ko mea eiloa kolā e fakamuamua ne tāgata e tokouke. E ‵tusa mo olotou mafaufauga konā, ko fakatāua malosi atu ei ne latou a te ‵sala ki tupe i lō so se mea aoga telā e mafai o maua mai te sukesuke ki te Tusi Tapu mo te mauaga o se fesokotakiga pili mo te Atua. E mafai o fia‵fia latou ki mea kolā e akoako mai i te Tusi Tapu, kae e taofi aka latou ne te “manavase ki mea o te olaga nei mo te fia‵fia ki koloa.” (Maleko 4:18, 19) Mafaufau ki te auala ne fesoasoani atu ei a Iesu ki ana soko ke fai ne fakama‵fuliga ki mea kolā e ‵tau o fakamuamua ne latou.

5, 6. Ne a mea ne fesoasoani atu ki a Anitelea, Petelu, Iakopo, mo Ioane ke fai a fakama‵fuliga ki mea e ‵tau o fakamuamua ne latou e uiga ki te faiga o te galuega talai e pelā foki mo te tausiga o te olaga?

⁵ Ne ga‵lue fakatasi a Anitelea mo tena taina ko Simona Petelu i se pisinisi faiika. E penā foki a Ioane, mo tena taina ko Iakopo, mo te lā tamana ko Sepetaio. Ne teletele ‵lei a te pisinisi kae ne manakogina te fesoasoani o nisi tāgata. (Maleko 1:16-20) I te taimi muamua ne tauloto ei ne Anitelea mo Ioane a mea e uiga ki a Iesu mai i a Ioane te Papatiso, ne tali‵tonu lāua me ko maua ne lāua a te Mesia. Ne fakailoa atu ne Anitelea a te tala tenā ki tena taina ko Simona Petelu, kae kāti ne fai foki ne Ioane te mea tenā ki tena taina ko Iakopo. (Ioane 1:29, 35-41) I masina mai tua ifo, ne ‵kau fakatasi a te tokofa konei mo Iesu o talai atu i Kalilaia, Iutaia, mo Samalia. Kae ne toe ‵foki atu a soko e tokofa konei ki olotou pisinisi faiika. Ne fia‵fia latou ki mea faka-te-agaga, kae ne seki fakatāua ne latou a te faiga o te galuega talai i te taimi tenā.

⁶ I se taimi fakamuli ifo, ne ‵kami ne Iesu a Petelu mo Anitelea ke tau‵tali atu i a ia kae ke fai mo “tino faiika ki tino.” Ne ‵saga atu pefea a lāua ki ei? “I konā foki eiloa, tiakina o lā tili kae olo tasi mo ia.” E penā foki loa a Iakopo mo Ioane. “I konā foki eiloa, tiakina te poti mo te lā tamana; kae tau‵tali i a ia.” (Mataio 4:18-22) Se a te mea ne fesoasoani atu ki tāgata konei ke ga‵lue tumau i te faiga o te galuega talai? E mata, se lagonaga fua telā ne sae fakavave aka? Ikai! I masina mai mua atu i ei, ne fakalogo‵logo a tāgata konei ki a Iesu, ne ‵kilo atu ki vavega ne fai ne ia, ne lavea ne latou tena loto finafinau mō te amiotonu, kae ne molimau ne latou a te fia‵fia o tino ki tena talaiga. Ona ko mea konā, ne gasolo aka ei o malosi te lotou fakatuanaki ki a Ieova mo te lotou loto tali‵tonu ki a ia!

7. E mafai pefea o fesoasoani atu tatou ki ‵tou akoga faka-te-Tusi Tapu ke ati aka te loto talitonu me mafai ne Ieova o tausi ana tino?

⁷ E mafai pefea o fakaakoako tatou ki a Iesu i te fesoasoani atu ki ‵tou a‵koga faka-te-Tusi Tapu ke ati aka te lotou loto tali‵tonu ki a Ieova? (Faataoto 3:5, 6) A te auala e akoako atu ei tatou e tāua ‵ki eiloa. Kafai e akoako atu, e mafai o faka‵mafa atu ne tatou a te folafolaga a te Atua ke fakamanuia ne ia tatou māfai e fakamuamua ne tatou a manakoga o te Malo. (Faitau te Malaki 3:10; Mataio 6:33.) E tonu, e mafai o fakaaoga ne tatou a nisi tusi siki e uke ke faka‵mafa atu i ei te auala e tausi ei ne Ieova ana tino, kae ke mo a e manatu mā‵ma tatou ki te fakaakoakoga telā e fakaasi atu ne tatou. A te sautala ki mea ne ‵tupu ki ‵tou olaga e mafai o fesoasoani malosi atu ki ‵tou tino a‵koga ke fakalagolago ki a Ieova. E mafai foki o fakaasi atu ne tatou a nisi tala fakamalosi loto kolā e fai‵tau ne tatou i ‵tou tusi.a

8. (a) Kaia e tāua ei mō se akoga faka-te-Tusi Tapu ke “‵tofo aka kae ka lavea ne [ia] te lasi o te aga‵lei o Ieova”? (e) E mafai pefea o fesoasoani atu tatou ki ‵tou tino a‵koga ke lavea ne latou te aga‵lei o Ieova?

⁸ A te atiakaga o te fakatuanaki telā e malosi e se gata fua i te faitau mo te fakalogologo ki tala e uiga ki te auala ne maua ei ne nisi tino a fakamanuiaga mai i a Ieova. E ‵tau foki o lavea ne ‵tou a‵koga faka-te-Tusi Tapu a te aga‵lei o Ieova ki a latou. Ne usu mai te faisalamo, penei: “‵Tofo aka kae ka lavea ne koe te lasi o te aga‵lei o Ieova. Ke fiafia a te tino telā e faka‵lafi atu ki a ia.” (Salamo 34:8, Tusi Paia, Samoa) E mafai pefea o fesoasoani atu tatou ki te tino akoga ke lavea ne ia te ‵lei o Ieova? Kāti e taumafai se tino akoga telā e manavase ki mea tau tupe ke manumalo a ia i se faifaiga masani sē ‵lei, e pelā mo te ‵pusi, kemupolo, io me ko te konā. (Faataoto 23:20, 21; 2 Kolinito 7:1; 1 Timoteo 6:10) E mafai o akoako ne tatou a ia ke ‵talo mō te fesoasoani o te Atua ke manumalo i se faifaiga masani sē ‵lei penā. Kafai ko gasolo o feoloolo te tulaga o tena olaga, ka lavea ei ne ia te aga‵lei o Ieova. Mafaufau foki ki te mea e mafai o tupu māfai e fakamalosi atu tatou ki se tino akoga ke fakamuamua a mea faka-te-agaga mai te fakaaogaga o taimi i loto i te vaiaso mō te faiga o tena akoga faka-te-Tusi Tapu mo te fakatoka mō fakatasiga faka-Kelisiano, e pelā foki mo te kau atu ki ei. Kafai ko lavea ne ia a fakamanuiaga a Ieova ona ko ana taumafaiga konā, ka gasolo aka eiloa o malosi tena fakatuanaki!

Te Mataku Ona ko Kilokiloga a Tino ki a ia

9, 10. (a) Kaia ne ‵funa ei ne Nikotemo mo Iosefa te Alimataia a te lā fia‵fia ki a Iesu? (e) Kaia e ma‵taku ei a nisi tāgata i aso nei ma tau‵tali atu i a Keliso?

⁹ Ona ko fakamalosiga mai taugasoa, kāti ko se fia tau‵tali atu a nisi tāgata i a Keliso. Ne ‵funa ne Nikotemo mo Iosefa te Alimataia a te lā fia‵fia ki a Iesu ona ko te lā ma‵taku ki kilokiloga mo mea e mafai o fai ne te kau Iutaia māfai ko iloa ne latou. (Ioane 3:1, 2; 19:38) E isi eiloa se pogai ne ma‵taku ei lāua. Ne gasolo aka eiloa o takalia‵lia malosi a takitaki lotu ki a Iesu, kae ko so se tino ne talitonu ki a ia ne fakatea mai te sunako.—Ioane 9:22.

¹⁰ I nisi koga i aso nei, kafai e fiafia se tagata ki mea e uiga ki te Atua, te Tusi Tapu, io me ko lotu, e mafai eiloa o fakatauemu atu a tino e ga‵lue tasi mo ia, ana taugasoa, mo ana kāiga. I nisi koga, se mea fakamataku eiloa māfai e fakaasi atu ne se tino me ko fia ‵fuli tena talitonuga. Kae e sili atu te faigata o fakamalosiga e maua mai taugasoa māfai e galue se tāgata e pelā me se sotia, i mea fakapolitiki io me se tulaga maluga i te fenua. E pelā me se fakaakoakoga, ne fai ‵tonu mai se tāgata i Siamani, penei: “A mea kolā e talai atu ne koutou Molimau e uiga ki te Tusi Tapu e ‵tonu eiloa. Kae kafai ko fai au e pelā me se Molimau i te aso nei, ka mafai o iloa ne tino katoa a te mea tenā i te aso ma taeao. Kae ne a foki la a mafaufauga o tino i te koga ga‵lue, oku tuakoi mo oku taugasoa ka fai ki a au mo toku kāiga? E se mafai ne au o fakafesagai atu ki te mea tenā.”

11. Ne fesoasoani atu pefea a Iesu ki ana soko ke kufaki i te ma‵taku ki tino?

¹¹ E se fai a apositolo a Iesu e pelā me ne tino mata ma‵taku, ne ma‵taku fua latou ona ko mafaufauga o tino e uiga ki a latou. (Maleko 14:50, 66-72) Ne fesoasoani atu pefea a Iesu ki ana soko ke ga‵solo ki mua faitalia a fakatauemuga mai nisi tino? Ne gasuesue a Iesu o fakatoka ana soko ki auala e fakafesagai atu ei ki ‵tekemaiga kolā ka fe‵paki mo latou fakamuli. Ne fai mai a ia: “E fia‵fia koutou māfai e takalia‵lia a tino ki a koutou, māfai e ‵tuli ne latou a koutou, e fakatauemu atu ki a koutou kae taku fakamasei otou igoa ona ko te Tama a te tagata.” (Luka 6:22) Ne fakailoa atu ne Iesu ki ana soko me e ‵tau o fe‵paki latou mo ‵tekemaiga. Ka oko mai a ‵tekemaiga konei ona “ko te Tama a te tagata.” Ne fakatalitonu atu foki a Iesu me ka ‵lago atu te Atua ki a latou māfai e fakalago‵lago latou ki a Ia mō se fesoasoani mo te malosi. (Luka 12:4-12) E se gata i ei, ne ‵kami ne Iesu a tino ‵fou ke fakamasani atu ki ana soko kae fai taugasoa mo latou.—Maleko 10:29, 30.

12. I auala fea e mafai ei o fesoasoani atu tatou ki tino ‵fou ke manumalo i te mataku ki tino?

¹² E ‵tau foki o fesoasoani atu tatou ki a‵koga faka-te-Tusi Tapu ke manumalo i te mataku ki tino. E faigofie faeloa ke fakafesagai atu ki se fakalavelave māfai e toka koe ki ei. (Ioane 15:19) E pelā me se fakaakoakoga, kaia e se fesoasoani atu ei koe ki te tino akoga ke fakatoka a tali faigofie, aoga kae e fakavae ki te Tusi Tapu ki fesili mo ‵tekemaiga kolā e mafai o faka‵sae aka ne ana tino ga‵lue? I tafa o te faiga e pelā me se taugasoa o koe, e mafai foki o fakamasani ne tatou a ia ki nisi tino i te fakapotopotoga, maise eiloa ko latou kolā e tai ‵pau a mea e fia‵fia ki ei. Mai mea katoa, e ‵tau o akoako ne tatou a ia ke ‵talo faeloa mai tena loto. E mafai ne te mea tenei o fesoasoani atu ki a ia ke fakapilipili atu ki te Atua kae fai ne ia a Ieova e pelā me ko tena ‵Pui mo tena Tausi.—Faitau te Salamo 94:21-23; Iakopo 4:8.

Lagonaga me se Lava te Atamai

13. Ne taofi aka pefea ne nisi tino a te aofia o latou i mea faka-te-agaga ona ko lagonaga me se lava te lotou atamai?

¹³ E taofi aka ne nisi tāgata a te aofia o latou i mea faka-te-agaga me se iloa ne latou o fai‵tau faka‵lei io me se mafai o fai‵pati faka‵lei io me e mata ‵ma. E se mafai ne nisi tāgata o fakaasi atu olotou kilokiloga mo lagonaga i mua o tino. E mafai o faigata ki a latou ke fai olotou sukesukega, ke tali i fakatasiga Kelisiano, io me fakaasi atu ki nisi tino ana talitonuga. E fai ‵tonu mai se taina Kelisiano, penei: “I te taimi koi talavou ei au, e fanatu fakavave eiloa au ki te mataloa o te fale, tukituki fakaloiloi te mataloa, kae sasale fakavave atu keatea e aunoa mo se logoa, kae fakamoemoe ke mo a e lagona io me lavea au ne se tino. . . . A te mafaufau ke fanatu mai fale ki fale e fai fua ne ia au ke masaki.”

14. Kaia ne seki mafai ei o faka‵lei aka ne soko o Iesu a te tamaliki tagata telā ne ulufia ne te temoni?

¹⁴ Mafaufau ki te sē lava o te loto talitonu telā ne ‵tau o maua ne soko o Iesu i te taimi ne seki mafai ei o faka‵lei aka ne latou se tamaliki tagata ne ulufia ne temoni. Ne fanatu te tamana o te tamaliki tagata ki a Iesu kae fai atu, penei: “Taku tamaliki tagata . . . e maua ne te pole, e valea foki tena ulu. E siga sale foki ki te afi mo te vai. Ne aumai ne au a ia ki ou soko, kae ne seki mafai ne latou o fai ke ‵lei tona masaki.” Ne ‵tuli ne Iesu a te temoni, kae faka‵lei a te tamaliki tagata. Ne olo fakamuli atu a soko ki a Iesu kae fesili atu: “Ai a ne se mafai ei ne matou o afuli a te temoni ki tua?” Ne tali atu a Iesu: “A te pogai, ko te sē lava o te otou fakatuanaki. Ke masaua ne koutou te manatu tenei: kafai e ‵pau te lasi o te otou fakatuanaki mo te fuaga o te sinapi, e mafai ne koutou o muna atu ki te mauga tenei ‘Masiki mai konei ki ‵ko,’ ko te mea eiloa ko masiki. Me mafai ne koutou o fai so se mea i te fakatuanaki.” (Mataio 17:14-20) E manakogina a te fakatuanaki ki a Ieova ke manumalo ei i fakalavelave ‵lasi kolā e fai pelā me ne mauga. Se a te mea e mafai o tupu māfai e galo i se tino a te kilokiloga e uiga ki te mea tenei kae ko kamata o saga atu fua ki mea kolā e mafai ne ia o fai? Kafai e se iku manuia a ia ka galo atu foki tena loto talitonu.

15, 16. E mafai pefea o fesoasoani atu tatou ki se akoga faka-te-Tusi Tapu ke manumalo i lagonaga me se lava tena atamai?

¹⁵ A te auala ‵lei ke fesoasoani atu ki se tino telā e nofo mo lagonaga me e se lava tena atamai ko te fakamalosi atu ke saga tonu ki a Ieova i lō te saga ifo ki a ia eiloa. Ne tusi mai a Petelu, penei: “Ke loto ma‵lalo koutou mai lalo i lima ‵mafi o te Atua, ko te mea ke siki ake ne ia koutou ki luga i te taimi ‵tau.” (1 Petelu 5:6, 7) E ‵tau o fai ne tatou te mea tenei ke fesoasoani atu ki ‵tou akoga faka-te-Tusi Tapu ke ati aka a mea faka-te-agaga. A te tino faka-te-agaga e fakatāua malosi ne ia a mea faka-te-agaga. E alofa a ia ki te Muna a te Atua kae fakaasi atu a “fuataga o te agaga” i tena olaga. (Kalatia 5:22, 23) A iase tagata telā e ‵talo faeloa. (Filipi 4:6, 7) E se gata i ei, e kilo atu a ia ki te Atua ke maua te loto toa mo te malosi telā e manakogina ke fakafesagai atu ki so se tulaga io me fakataunu so se galuega i se auala manuia.—Faitau te 2 Timoteo 1:7, 8.

¹⁶ Kāti e manakogina ne nisi tino a‵koga a te fesoasoani ke iloa ne latou o fai‵tau, fai a sau‵talaga, io me ko te atamai i te faipati atu. Nisi tino e mafau‵fau me se aoga te lotou taviniga ki te Atua ona ko faifaiga ma‵sei ne fai ne latou a koituai o iloa ne latou a Ieova. I feitu e lua konei, kāti ka ma‵nako eiloa latou ki ‵tou fesoasoani i se auala alofa kae kufaki. Ne fai mai a Iesu: “A tino sē ma‵saki, e se ma‵nako ki se tokita, ka ko latou fua kolā e ma‵saki.”—Mataio 9:12.

‵Sala Atu ke “Maua” a Tāgata e Tokouke

17, 18. (a) E mafai pefea o maua ne tatou a tāgata e tokouke i te galuega talai? (e) Se a te mea ka sau‵tala tatou ki ei i te suā mataupu?

¹⁷ E ma‵nako eiloa tatou ke tokouke a tāgata e ‵saga mai ki te fekau fakamalie loto telā e maua fua i te Tusi Tapu. (2 Timoteo 3:16, 17) Tela la, e mafai pefea o ‵sala ne tatou a tāgata e tokouke i te ‵tou galuega talai? Mai te fakaaogaga o taimi e uke ke talai i afiafi, i tutonu o fakaotiga o vaiaso, io me ko aso malō‵lo māfai ko ‵nofo atu a tāgata e tokouke i fale. E mafai o fakamolemole atu tatou ke fai‵pati ki te tagata i o ia te fale māfai e mafai. Ke talai atu tatou i taimi seki fuafuagina ki tāgata e ga‵lue fakatasi mo tatou māfai e ‵lei kae taumafai o ‵futi mai a tāgata a‵vaga sē tali‵tonu ki te fakapotopotoga.

¹⁸ I te taimi e talai atu ei tatou ki tino katoa e fetaui mo tatou, e mafai o tali‵tonu tatou me ka ‵saga mai eiloa a latou kolā e loto fia‵fia. Ke na fesoasoani atu tatou mo te kufaki ki tino katoa kolā e fakaasi mai ne latou te fiafia tonu ki te munatonu. Kae e mafai pefea o fesoasoani atu tatou ki tāgata papatiso i te fakapotopotoga ke kausaki atu mō tauliaga i te fakapotopotoga saukātoa a te Atua? Ka faipati eiloa a te suā mataupu ki te fesili tenei.

[Fakamatalaga fakaopoopo]

E Mafai Pefea ne Koe o Tali?

• E mafai pefea o fesoasoani atu ki tāgata ke fakamuamua ne latou a mea faka-te-agaga?

• E mafai pefea o fesoasoani atu tatou ki tino ‵fou ke se ma‵taku ki kilokiloga a tino e uiga ki a latou?

• E mafai pefea o fesoasoani atu ki nisi tino ke manumalo i lagonaga me se lava te lotou atamai?

[Ata i te itulau e 25]

E mata, e ‵sala koe ki avanoaga ke fakaoko atu te tala ‵lei ki tāgata?

[Ata i te itulau e 26]

E mafai pefea o fakatoka ne koe tau akoga faka-te-Tusi Tapu ke fakafesagai atu ki tofotofoga?