Kaia e ‵Tau ei o Takitaki Tatou ne te Agaga Tapu?

“A koe ko toku Atua, ke takitaki ne koe au ki tou agaga ‵lei.” —SALAMO 143:10, TUSI PAIA, SAMOA.

1. Fakaasi mai te auala e mafai ei ne se malosi sē matea o takitaki se tino.

KAI fakaaoga aka eiloa ne koe se kamupasi ke ‵sala ei tou auala? A te kamupasi se kope faigofie telā e mafai o fesoasoani atu ki se tino ke iloa ne ia tena auala. E isi se nila telā e isi se maneta i ei, kae saga faeloa ki matū. Ona ko te malosi sē matea telā e fakaigoa ki te maneta i te va o pole e lua o te lalolagi, e saga atu faeloa te nila o te kamupasi ki matū. Ne fakaaoga faeloa ne tino a te kamupasi i te fia o senitenali ke takitaki ei latou māfai e faima‵laga i luga i te laukele mo te tai.

2, 3. (a) Se a te malosi telā ne fakaaoga ne Ieova i te fia afe miliona tausaga ko ‵teka? (e) Kaia e ‵tau ei o fakamoe‵moe tatou ke takitaki tatou ne te malosi galue sē matea o te Atua i ‵tou olaga i aso nei?

² E isi aka foki se malosi sē matea telā e tāua atu ke takitaki ei tatou. Se a te mea tenā? Ko te mea telā e fakamatala mai i fuaiupu kamata o te Tusi Tapu. E uiga ki mea kolā ne fai ne Ieova i te fia afe miliona o tausaga ko ‵teka, e fai mai penei te tusi ko Kenese: “Ne faite ne te Atua te lagi mo te lalolagi i te kamataga.” Ne uga atu ne ia se malosi lasi ‵ki eiloa i te faitega o mea konā, me ne toe fai mai penei te tala: “Ka ko te ‵mana o te Atua e fano i luga i te vai.” (Kenese 1:1, 2) Se a te mea ne galue i konā? Ko te agaga tapu—ko te malosi telā ne fakaaoga i te faitega o mea katoa. Ne fakaaoga ne Ieova te agaga tenei i te faiga o ana galuega katoa kae tenā te pogai e ola ei tatou.—Iopu 33:4; Salamo 104:30.

³ E pelā me ne tino ola, e mata, e mafai ne te malosi galue o te Atua o fakamalosi ne ia tatou i nisi feitu o te olaga? Ne iloa ne te Tama e tokotasi a te Atua me e ‵tau eiloa tatou o fai penā, me ne fai atu a Iesu ki ana soko: “Kafai e oko mai te agaga . . . ka takitaki ne ia koutou ki muna‵tonu katoa.” (Ioane 16:13) E mafai pefea o malama‵lama tatou me se a te agaga tenei, kae kaia e ma‵nako ei tatou ke takitaki tatou ne ia?

Te Tulaga o te Agaga Tapu

4, 5. (a) Se a te mea telā e fakauiga ‵se ne tino kolā e tali‵tonu ki te Tolutasi e uiga ki te agaga tapu? (e) E fakamatala mai pefea ne koe te tulaga tonu o te agaga tapu?

⁴ Kāti e se fetaui mo te Tusi Tapu a manatu o nisi tino kolā e fetaui mo koe i te galuega talai e uiga ki te agaga tapu. E se tonu te manatu o tino kolā e tali‵tonu ki te Tolutasi me i te mea tenei se agaga telā e ‵pau mo te Atua te Tamana. (1 Kolinito 8:6) Kae e faigofie eiloa o fakamaoni atu me i te talitonuga e uiga ki te Tolutasi e se fetaui mo mea e fakaasi mai i te Tusi Tapu

⁵ Se a la te tulaga tonu o te agaga tapu? I te Tusi Tapu, a te pati Epelu ko te ruʹach telā ne ‵fuli ki te “‵mana” i te Kenese 1:2, ne ‵fuli foki ki te ‘matagi’ mo nisi pati kolā e fakasino atu ki se malosi galue sē matea. (Fakatusa ki te Kenese 3:8; 8:1.) E pelā eiloa mo te matagi telā e se matea ki mata kae e lavea ne tatou tena malosi, e penā foki te agaga tapu, e seai sena foitino, e se matea atu kae e malosi ‵ki. A te agaga tenei ko te malosi mai te Atua telā e tuku atu ki luga i tino io me ne mea ke fakataunu ei tena loto. E mata, e faigata ke tali‵tonu me i te vaegā malosi tenei e māfua mai i te Mafuaga tapu, ko te Atua Malosi Katoatoa? Ikai loa!—Faitau te Isaia 40:12, 13, NW.

6. Se a te fakamolemole tāua ne fai atu ne Tavita ki a Ieova?

⁶ E mata, e mafai ne Ieova o fakatumau te fakaaogaga o tena agaga ke takitaki ei tatou i ‵tou olaga kātoa? Ne tauto atu a ia ki te faisalamo ko Tavita penei: “Ka akoako atu ne au ki a koe te auala e ‵tau o fano koe i ei.” (Salamo 32:8) E mata, ne manako a Tavita ki te mea tenā? Ao, me ne fakamolemole atu eiloa a ia ki a Ieova penei: “Akoako mai au ke fai tou loto, me i a koe ko toku Atua, ke takitaki ne koe au ki tou agaga ‵lei.” (Salamo 143:10) E ‵tau foki o maua ne tatou te manakoga mo te loto fiafia tenā ke takitaki tatou ne te agaga o te Atua. Kaia? Mafaufau ki pogai e fa konei.

E se Mafai ne Tatou o Takitaki a Tatou Eiloa

7, 8. (a) Kaia e se mafai ei o takitaki ne tatou a tatou eiloa e aunoa mo te Atua? (e) Fakamatala mai a te pogai e se ‵tau ei o taumafai tatou o ‵sala ‵tou auala i a tatou eiloa i loto i te olaga matagā tenei.

⁷ Muamua la, e ‵tau o ma‵nako tatou ki te takitakiga a te agaga o te Atua me e se mafai ne tatou o takitaki a tatou eiloa. E fakauiga a te pati “ke takitaki” ki te “fakasino atu o te auala io me fakaasi atu te auala e ‵tau o fano i ei.” Kae e seki faite tatou ne Ieova ke mafai o fai ne tatou te mea tenā mō tatou eiloa, maise eiloa ko ‵tou tulaga sē ‵lei katoatoa. Ne tusi mai penei tena pelofeta ko Ielemia: “Te Aliki, e iloa ne au me e se mafai o iloa ne te tagata a tena auala: e seai se malosi o te tagata o takitaki ana vae.” (Ielemia 10:23, The Bible in Basic English) Kaia? Ne fai atu ne te Atua a te pogai e auala i a Ielemia. Ne fai mai a Ieova: “Ko oi te tino e mafai o malamalama i te loto o te tagata ola? Ko te ‵toe mea tafasili foki eiloa i te faka‵se tino.”—Ielemia 17:9; Mataio 15:19.

⁸ E mata, se mea valea ke fano tokotasi se tino i se togavao lasi telā e se lava tena iloa i ei, e aunoa mo se tino e masani mo te koga tenā, e seai sena mape io me se kamupasi? Ona ko tena se iloa o ola i fakanofonofoga sē ‵lei i te togavao, kae seai sena poto o ‵sala tena auala ke oko atu mo te manuia ki te koga e fano a ia ki ei, ka tu atu eiloa tena ola i se tulaga fakamataku. E penā foki te tino telā e mafaufau me e mafai ne ia o takitaki tena auala i loto i te lalolagi matagā tenei e aunoa mo te talia ke takitaki a ia ne te Atua ki te auala tonu, ko fai eiloa ne ia ke tu atu tena ola i se tulaga fakamataku. A te auala fua e tasi e mafai ei ne tatou o sa‵sale i loto i te olaga tenei mo te manuia, ko te faiga foki ne tatou a te mea tela ne fai atu ne Tavita ki a Ieova, i ana pati konei: “Au ne sasale faeloa i ou kalafaga, kae seki piko eiloa keatea.” (Salamo 17:5; 23:3) E mafai pefea o maua se vaegā takitakiga penā?

9. E pelā mo te ata i te itulau e  23, e takitaki pefea tatou ne te agaga o te Atua?

⁹ Kafai e loto mau‵lalo kae fia‵fia tatou o fakalagolago ki a Ieova, ka tuku mai eiloa ne ia tena agaga tapu ke takitaki ne ia tatou. Ka fesoasoani mai pefea te malosi galue tenā ki a tatou? Ne fai atu a Iesu ki ana soko, penei: “Ka ko te Fesoasoani, ko te agaga tapu tenā, ka uga mai ne te Tamana e alatu mai i toku igoa, o akoako atu ki a koutou i mea katoa; e fakamasaua atu foki a mea katoa kolā ko oti ne fai atu ne au ki a koutou.” (Ioane 14:26) I te taimi e ‵talo kae suke‵suke ei tatou ki te Muna a te Atua, e aofia i ei a pati katoa a Keliso, ka fai eiloa ne te agaga tapu ke gasolo aka o lasi te ‵tou malamalama i te ‵poko o te poto o Ieova, ko te mea ke tau‵tali fakapili‵pili atu tatou ki mea kolā e loto a ia ki ei. (1 Kolinito 2:10) E se gata i ei, kafai e tupu se fakalavelave seki fakamoemoegina ki ‵tou olaga, e mafai eiloa o fesoasoani mai te agaga o te Atua ke iloa ne tatou a te mea e ‵tau o fai. Ka fai ei ke masaua ne tatou a fakatakitakiga fakavae i te Tusi Tapu kolā ko oti ne tauloto ne tatou kae fesoasoani mai foki ke malamalama tatou i te auala e fakagalue aka ei.

Ne takitaki a Iesu ne te Agaga o te Atua

10, 11. Se a te mea ne fakamoemoe ki ei a te Tama e tokotasi a te Atua ke maua ne ia mai te agaga tapu, kae se a te mea ne iloa aka ne ia?

¹⁰ A te lua o pogai e manakogina ei ke takitaki tatou ne te agaga tapu, me ne takitaki foki ne te Atua a tena Tama e auala i ei. A koi tuai o vau ki te lalolagi, ne iloa ne te Tama e tokotasi a te Atua a te valoaga tenei: “A te agaga o te Aliki ka aumai ne ia ki a ia a te poto, te atamai mo te apo i te pulepulega o ona tino. Ka iloa ne ia te loto o te Aliki, kae ka fakaaloalo foki ki ei.” (Isaia 11:2) Mafaufau la ki te fiafia o Iesu ke maua ne ia te fesoasoani o te agaga o te Atua i te taimi ne fakafesagai atu ei a ia ki te olaga faigata i te lalolagi nei!

¹¹ Ne taunu eiloa a pati a Ieova konā. E fakaasi mai ne te fai Evagelia a te mea ne tupu mai tua o te papatisoga a Iesu: “Ne foki mai a Iesu i te Iolitana, ko fonu i te agaga tapu, kae ne takitaki ne te agaga tapu ki te vao.” (Luka 4:1) I te taimi ne fakalikiliki, ‵talo kae mafaufau ‵loto a Iesu i konā, kāti ne akoako kae tuku atu ne Ieova te poto ki tena Tama e uiga ki mea kolā ka fai ne ia. Ne galue te ‵mana o te Atua i te mafaufau mo te loto o Iesu, takitaki ei ne ia ana mafaufauga mo ana fakaikuga. Ne iku atu ei, ki te iloa ne Iesu a mea katoa kolā e manako ki ei tenā tamana ke fai ne ia, kae ne fai katoa ne ia a mea konā.

12. Kaia e ‵tau ei o fakamolemole atu tatou ke takitaki tatou ne te agaga o te Atua?

¹² Ne iloa ne Iesu a te tāua o te agaga o te Atua i tena olaga, ne fakamalosi atu ei a ia ki ana soko ke tumau i te fakamolemole atu ke maua kae ke takitaki latou ne te agaga tapu. (Faitau te Luka 11:9-13.) Kaia e tāua malosi ei te mea tenā mō tatou? Me e mafai o ‵fuli ne ia te auala e mafaufau ei tatou ke pelā mo te mafaufau o Keliso. (Loma 12:2; 1 Kolinito 2:16) Mai te talia ne tatou ke takitaki ‵tou ola ne te agaga o te Atua, ko mafai ei o mafau‵fau tatou e pelā mo Keliso kae tau‵tali atu i tena fakaakoakoga.—1 Petelu 2:21.

E Mafai o Takitaki ‵Se Tatou ne te Agaga o te Lalolagi

13. Se a te agaga o te lalolagi, kae ne a mea e iku mai ei?

¹³ A te tolu o pogai e ma‵nako ei tatou ke takitaki ne te agaga o te Atua, me e aunoa mo te agaga tenā e mafai o takitaki ‵se tatou ne te agaga o te lalolagi telā e galue nei i olaga o te tokoukega o tino i aso nei. A te mea tenei se malosi telā e fakamalosi ne ia a tino ke fai ne latou a mea kolā e se fetaui eiloa mo te takitakiga a te agaga tapu. I lō te ati aka ne ia i tino a te mafaufau o Keliso, e fakamalosi aka ne te agaga o te lalolagi a mafaufau mo faifaiga a tino ke ‵pau mo te pule o te lalolagi, ko Satani. (Faitau te Efeso 2:1-3; Tito 3:3.) Kafai ko talia ne se tino a te agaga o te lalolagi kae kamata o fai ne ia a galuega o te foitino, ka iku atu ei ki se tulaga fakamataku, kae ka se mafai o maua sena vaega i te Malo o te Atua.—Kalatia 5:19-21.

14, 15. E mafai pefea o manumalo tatou i te ‵teke atu ki te agaga o te lalolagi?

¹⁴ Ko oti ne fakatoka tatou ne Ieova ke ‵teke atu ki te agaga o te lalolagi. Ne fai mai te apositolo ko Paulo “ke ati ake te otou malosi i te ‵kau fakatasi mo te Aliki i tona ‵mana malosi . . . ko te mea ke mafai ne koutou o ‵teke te oko mai o te fili.” (Efeso 6:10, 13) E auala i tena agaga, e fakatoka tatou ne Ieova ke ‵teke atu ki taumafaiga a Satani ke takitaki ‵se ne ia tatou. (Fakaasiga 12:9) E malosi ‵ki te agaga o te lalolagi, kae e se mafai o ‵kalo katoatoa keatea a tatou mai i ei. Kae e mafai eiloa ne tatou o ‵teke atu ki ei. E sili atu te malosi o te agaga tapu i ei, kae ka fesoasoani mai eiloa ki a tatou!

¹⁵ E uiga ki a latou kolā ne tiakina ne latou te lotu Kelisiano i te senitenali muamua, ne fai mai te apositolo ko Petelu: “Ko olo keatea latou mai te auala tonu; ko tau‵tali i te auala . . . masei.” (2 Petelu 2:15) Ko oko eiloa te lasi o te ‵tou loto fakafetai me ‘e seki maua ne tatou a te agaga o te lalolagi tenei, kae ne maua ne tatou a te agaga ne aumai ne te Atua’! (1 Kolinito 2:12) Mai te fesoasoani o te agaga tapu mo te fakaaogaga katoatoa o fakatokaga katoa a Ieova ke tumau ei tatou i te auala tonu i te feitu faka-te-agaga, e mafai eiloa o manumalo tatou i te ‵teke atu ki te agaga o te lalolagi matagā tenei.—Kalatia 5:16.

E Aumai ne te Agaga Tapu a Fuataga ‵Lei

16. Ne a fuataga o te agaga tapu e mafai o ‵fua mai i a tatou?

¹⁶ A te fa o pogai e ma‵nako ei tatou ke galue te agaga o te Atua i loto i a tatou, me e fua mai ei a fuataga ‵lei i olaga o tino kolā e takitaki ne ia. (Faitau te Kalatia 5:22, 23.) Ko oi te tino i a tatou e se manako ke gasolo aka o lasi tena alofa, fiafia, mo te filemu? Ko oi te tino i a tatou e se manako ke lasi tena kufaki, alofa atafai, mo tena aga‵lei? Ko oi te tino i a tatou e se manako ke aoga ki a ia te lasi o te fakatuanaki, te uiga filemu, mo te loto pulea? E ati aka ne te agaga o te Atua i loto i a tatou a uiga ‵gali kolā e aoga ki a tatou e pelā foki mo tino kolā e ‵nofo tasi mo tatou kae tavini atu foki ki ei. A te fakagaluegaga o te fuataga tenei se galuega telā e ‵tau o fai faeloa, me e seai se tapula ki te aofaki o fuataga o te agaga kolā e manakogina kae talia ke maua ne tatou.

17. E mafai pefea o maua ne tatou se vaega o fuataga o te agaga i se auala tai lasi atu?

¹⁷ Se mea poto ke iloilo faka‵lei aka ne tatou a tatou eiloa me e mata, e fakaasi atu ne tatou i ‵tou pati mo ‵tou faifaiga me e takitaki tatou ne te agaga tapu kae ‵fua mai foki i a tatou ana fuataga? (2 Kolinito 13:5a; Kalatia 5:25) Kafai e matea ne tatou me e manakogina ke maua a nisi vaega o fuataga o te agaga, e mafai o kausaki malosi tatou ke maua a uiga penā e auala i te takitakiga a te agaga. E fai ne tatou te mea tenei mai te suke‵suke ki vaega takitasi kolā e fakaasi mai i te Tusi Tapu kae e fakamatala mai foki i ‵tou tusi faka-Kelisiano, ko mafai ei o iloa ne tatou te auala e fakaasi atu ei a fuataga o te agaga i ‵tou olaga i aso takitasi, ko fakagalue ei ne tatou i se auala tai lasi atu.a I te taimi e matea ei ne tatou a ikuga o galuega a te agaga o te Atua i ‵tou olaga, e pelā foki mo olaga o ‵tou taina Kelisiano, ko matea faka‵lei atu ei ne tatou te pogai e ‵tau ei o takitaki tatou ne te agaga tenā.

A Koe e Fakalogo ki te Agaga o te Atua?

18. E fai pefea a Iesu mo fai se fakaakoakoga mō tatou i te fakalogo ki te agaga o te Atua?

¹⁸ E pelā me ko te “tagata poto i te fakatu‵tu” a te Atua i te faitega o mea katoa i te iunivesi, ko leva ne iloa ne Iesu a te maneta o te lalolagi telā e fakaaoga ne tino ke fo‵lau atu ei i te lalolagi. (Faataoto 8:30; Ioane 1:3) Kae e seai se fakamaoniga i te Tusi Tapu me ne fakaaoga ne Iesu te malosi tenā ke takitaki ei a ia i tena nofoga i te lalolagi. E fakaasi mai i te Tusi Tapu me e pelā me se tagata, ne matea ne ia te malosi sē fuafuagina o te agaga tapu o te Atua i tena olaga. Ne talia ne ia ana fakamalosiga, kae kafai e fakatonu atu ki a ia, ne fakalogo kae fai eiloa ne ia e ‵tusa mo tena fakatonuga. (Maleko 1:12, 13; Luka 4:14) A koe se vaegā tino penā?

19. Se a te mea e ‵tau o fai ne tatou ko te mea ke fai te agaga tapu mo fai se malosi telā e takitaki ne ia tatou i ‵tou olaga?

¹⁹ Koi galue eiloa te ‵mana tenā i mafaufau mo loto o tino faka‵logo, ke takitaki ei latou. E mafai pefea o talia ne koe ke takitaki koe ne te agaga tenā i te auala tonu? ‵Talo faeloa ki a Ieova ke uga mai tena agaga ke fesoasoani atu ki a koe ke fakalogo koe ki ei. (Faitau te Efeso 3:14-16.) Ke galue e ‵tusa mo au ‵talo mai te ‵sala atu ki pati fakatonutonu i te Muna tusia a te Atua, ko te Tusi Tapu—telā ne tusi mai lalo i te takitakiga a te agaga tapu. (2 Timoteo 3:16, 17) Fakalogo ki akoakoga ‵poto kolā e tuku mai i ei, kae ke talia ne koe te takitakiga a te agaga tapu. Mai te faiga o mea konei, ko fakaasi atu ei ne koe tou fakatuanaki ki te malosi o Ieova ke takitaki faka‵lei koe i loto i te lalolagi matagā tenei.

[Fakamatalaga fakaopoopo]

Ne Maua ne Koe a Manatu Tāua?

• E pokotia pefea ‵tou olaga i te agaga tapu?

• Ne a pogai e fa e ‵tau ei o ma‵nako tatou ki te takitakiga a te agaga o te Atua?

• E mafai pefea o fai ‵tou tusaga ko te mea ke aoga katoatoa ki a tatou te takitakiga a te agaga tapu?

[Ata i te itulau e 21]

Ne fai te agaga o te Atua mo fai se fakamalosiga lasi i te olaga o Iesu

[Ata i te itulau e 23]

E galue te agaga o te Atua i mafaufau mo loto o tino ko te mea ke gasue‵sue kae takitaki atu latou ne te agaga