“Ko Oti ne Fakailoa Atu ne Au Tou Igoa”

“Ko oti ne fakaasi atu ne au a tou igoa ki tāgata kolā ne tuku mai ne koe ki a au mai te lalolagi. . . . Ko oti ne fakailoa atu ne au tou igoa ki a latou kae ka toe fakailoa atu ne au.”—IOANE 17:6, 26.

Te Mea e Fakauiga ki ei: Ne fakailoa atu ne Iesu a te igoa o te Atua e auala i te fakaaogāga ne ia i tena galuega talai. Kafai e faitau a Iesu mai te Tusi Tapu, e pelā mo te mea e masani o fai ne ia, e taku atu eiloa ne ia te igoa totino o te Atua. (Luka 4:16-21) Ne akoako ne ia ana soko ke ‵talo penei: “Te Tamana, ke tapu tou igoa.”—Luka 11:2.

Te Auala ne Fakafetaui Aka ei a Uiga o Kelisiano Mua: Ne fai atu te apositolo ko Petelu ki tāgata ma‵tua i Ielusalema me ko oti ne aumai ne te Atua mai i atufenua “ne tino mō tena igoa.” (Galuega 15:14) Ne talai atu te kau apositolo mo nisi tino me “ko tino katoa kolā e ka‵laga ki te igoa o Ieova ka ‵sao.” (Galuega 2:21; Loma 10:13) E fai mai The Tosefta, se fakaputuga o tulafono faka-Iutaia telā ne oti kāti ko te 300 T.A. e uiga ki tusitusiga faka-Kelisiano kolā ne ‵sunu ne tino ‵teke: “A tusi a te kau fai evagelia mo tusi o te minim [e fai pelā me ne Kelisiano Iutaia] ne seki faka‵sao ne latou mai te afi. Kae ne ‵sunu eiloa ne latou i so se koga e maua i ei . . . mo nisi mea aka kolā e ‵lago atu ki te Igoa o te Atua.”

Ko oi la e Fetaui ‵Lei ki Mea Konā i Aso Nei? E fai mai a pati fakatomua i te Revised Standard Version o te Tusi Tapu telā ne talia ne te National Council of the Churches of Christ i te Iunaite Sitete: “A te fakaaogāga o so se igoa ‵lei ki te Atua fua e tokotasi, e pelā eiloa me e isi aka foki ne atua kolā e ‵tau o fakaseai atu ne ia, ne fakagata atu loa i taimi o te kau Iutaia mai mua o te vaitaimi o Kelisiano kae e se fetaui lele mo te fakatuanaki o te Lotu Kelisiano i te lalolagi kātoa.” Tela la, e sui a te igoa o te atua ki te tofi, “ALIKI.” Fakamuli fua nei, ne fakatonu atu te Vatikana ki pisopo: “A te igoa o te Atua i te tetragrammaton YHWHa e se ‵tau eiloa o fakaaoga io me takutaku atu i pese mo ‵talo.”

Ko oi la e fakailoa atu ne latou a te igoa totino o te Atua i aso nei? I te taimi koi talavou ei a Sergey i Kyrgyzstan, ne onoono a ia i se tamunei telā e fai mai i ei te igoa o te Atua e pelā me ko Ieova. I se fia sefulu tausaga, ne seki toe lagona ne ia a te igoa o te Atua. Fakamuli ifo, i te otiga ne fanatu a Sergey ki te Iunaite Sitete, ne āsi atu se tokolua Molimau a Ieova ki tou tagata i tena fale kae fakaasi atu ki a ia a te igoa o te Atua i loto i te Tusi Tapu. Ne fiafia ‵ki eiloa a Sergey i te iloaga ne ia me e isi se potukau e fakaaoga ne latou a te igoa ko Ieova. Se mea fakafiafia, me mai lalo i te tugāpati ko “Ieova te Atua,” e tuku mai i ei ne te Webster’s Third New International Dictionary a te fakamatalaga tenei, “se atua tafasili i te maluga kae ko te atua fua e tokotasi telā e iloa kae tapuaki ki ei a Molimau a Ieova.”

[Fakamatalaga fakaopoopo]