“A ko te Tala ‵Lei Tenei o te Malo Ka Talai Atu”

“A ko te tala ‵lei tenei o te Malo ka talai atu ki te lalolagi nofoaki kātoa mo fai se molimau ki atufenua katoa; ko oko mai ei te gataga.”—MATAIO 24:14.

Te Mea e Fakauiga ki ei: E li‵poti mai a te tino tusitala ko Luka me “ne faimalaga atu a Iesu mai fa‵kai ‵lasi ki nisi fa‵kai ‵lasi, e pelā foki mo fa‵kai fo‵liki ki nisi fa‵kai fo‵liki, o talai kae folafola atu te tala ‵lei e uiga ki te Malo o te Atua.” (Luka 8:1) Ko Iesu eiloa telā ne fai mai: “E ‵tau foki o folafola atu ne au te tala ‵lei o te Malo o te Atua ki nisi fa‵kai, me tenā eiloa te mea ne uga mai ei au.” (Luka 4:43) Ne uga atu ne tou tagata ana soko ke talai atu te tala ‵lei i fa‵kai fo‵liki mo fa‵kai ‵lasi kae fakamuli ifo ne fakatonu atu a ia ki a latou: “Ka fai koutou mo molimau ki a au . . . ke oko eiloa ki toe koga ‵mao i te lalolagi.”—Galuega 1:8; Luka 10:1.

Te Auala ne Fakafetaui Aka ei a Uiga o Kelisiano Mua: Ne seki ai eiloa se taimi ne fakamāumāu ne soko o Iesu i te faiga o te mea telā ne fai atu ne Iesu ki a latou. “Kae i aso takitasi ne tumau eiloa latou i te akoako mo te folafola atu a te tala ‵lei e uiga ki te Keliso, ko Iesu, i loto i te faletapu kae mai fale ki fale.” (Galuega 5:42) A te galuega talai e se fai fua ne se potukau foliki, e fai ne tino katoa i loto i te fakapotopotoga. Ne matea ne te tino tusitala ko Neander me i a “Celsus, te tino tusitala muamua eiloa ne ‵teke atu ki te kau Kelisiano, ne pakalaga atu kae muna masei me i tino ga‵lue i fulufulu o mamoe, tino ‵sui taka, tino faite gatu ki pakili o manu, mo toe tino e se iloa o fai‵tau kae tusitusi kae fakamaua‵luga, ne tino talai loto finafinau o te tala ‵lei.” I tena tusi ko The Early Centuries of the Church, ne tusi mai a Jean Bernardi: “E olo atu a [Kelisiano] kae fai‵pati ki so se tino i koga katoa. I loto i auala ‵lasi mo fa‵kai fo‵liki, i koga e tokouke a tino i ei mo fale o tino. E talia io me e se talia. . . . Ke oko eiloa ki toe koga ‵mao o te lalolagi.”

Ko oi la e Fetaui ‵Lei ki Mea Konā i Aso Nei? E tusi mai a te faifeau o te lotu Anglican ko David Watson: “A te fakata‵mala o lotu ke ‵saga tonu atu ki te talai mo te akoako atu ko te pogai e tasi e se lava ei a mea faka-te-agaga i aso nei.” I tena tusi ko te Why Are the Catholics Leaving? ne tusi mai a José Luis Pérez Guadalupe e uiga ki galuega a Kelisiano kolā e fakamalosi aka ei a mea i te Tusi Tapu kae lavea atu me i a “latou e se olo mai fale ki fale.” E uiga ki Molimau a Ieova, ne tusi mai tou tagata: “E masani eiloa latou o olo mai fale ki fale.”

E isi se iloiloga tonu kae fakafiafia ne fai ne Jonathan Turley e maua i te Cato Supreme Court Review, 2001-2002: “Kafai e faipati aka fua e uiga ki Molimau a Ieova, se mea vave eiloa o mafau‵fau a te tokoukega o tino ki tino talai kolā e āsi atu ki olotou fale i taimi ‵se. Ki Molimau a Ieova, a te talai atu mai fale ki fale e sē se faiga fua ke gasolo aka te lotou fakatuanaki kae ko te mea eiloa telā e manakogina ke fakaasi atu i ei a te fakatuanaki.”

[Kato itulau e 9]

E Mata, e Lavea ne Koe a te Fakailoga?

E fakavae ki luga i tulaga faka-te-Tusi Tapu kolā ne sau‵tala ki ei i te fakasologa o mataupu tenei, ko oi loa i aso nei, e mafaufau koe, e maua i ei a te fakailoga o te Kelisiano tonu? E ui eiloa e lau i sefulu afe a potukau mo potukau fakalotu kolā e fai mai i a latou ne Kelisiano, ke masaua a pati a Iesu ne fai atu ki ana soko: “E se ko tino katoa kolā e fai mai ki a au, ‘Te Aliki , te Aliki,’ ka ulu ki loto i te Malo o te lagi, kae ko ia fua telā e fai ne ia te loto o toku Tamana telā i te lagi.” (Mataio 7:21) A te iloa ne koe a latou kolā e fai a te loto o te Tamana—kolā e maua i ei a te fakailoga o te Kelisiano tonu—kae ‵kaufakatasi mo latou e mafai o iku atu koe ki fakamanuiaga se-gata-mai mai lalo i te Malo o te Atua. E ‵kami ne matou a koe ke fakamolemole atu ki Molimau a Ieova kolā ne tuku atu ki a koe a te mekesini tenei, ke maua mai ne fakamatalaga e uke atu e uiga ki te Malo o te Atua mo fakamanuiaga kolā ka maua mai i ei.—Luka 4:43.