Tauloto Mai te Muna a te Atua

E ‵Tau o Fakamanatu Pefea ne Tatou a te Mate o Iesu?

Ka mafaufau a te mataupu tenei ki fesili kolā kāti ne fesili ifo ne koe ki a koe eiloa kae fakaasi atu foki i ei a te koga telā e mafai o faitau ne koe a tali i loto i tau Tusi Tapu. Ka fia‵fia eiloa a Molimau a Ieova o sau‵tala fakatasi mo koe ki tali konei.

1. E ‵tau o fakamanatu pefea a te mate o Iesu?

Ne fai atu a Iesu ki ana soko ke fakamanatu tena mate e auala i se ‵kaiga fakatusa, e fakaaoga i ei a te falaoa mo te uaina. E sui ne te falaoa a te foitino o Iesu kae ko te uaina ko tena toto.—Faitau te Luka 22:19, 20.

A te falaoa telā ne fakaaoga ne Iesu e se faka‵fete io me e seai se isi i ei. I loto i te Tusi Tapu ne fakaaoga sāle a te isi ke sui ki ei te agasala. Tela la, a te falaoa ko te fakatusa telā e fetaui ‵lei ki te foitino ‵lei katoatoa o Iesu. Ne ofo mai ne ia tena foitino e pelā me se taulaga, telā ne fakagata ki ei a taulaga o manu mai lalo i te Tulafono a Mose. (Epelu 10:5, 9, 10) A te uaina ko te fakatusa o te toto tāua o Iesu telā ne ‵ligi mai e pelā me se taulaga mō ‵tou agasala.—Faitau te 1 Petelu 1:19; 2:24; 3:18.

2. Ko te taimi fea e ‵tau ei o fakamanatu ne tatou a te mate o Iesu?

Ne mate a Iesu i te Paseka, i a Nisani 14. A te aso o te kau Iutaia e kamata i te ‵tōga o te la. I te afiafi po mai mua o tena mate, ne ‵kai a Iesu mo ana apositolo i te ‵kaiga o te Paseka kae ne kamata i ei ne ia i konā se fakamanatuga fou ke fakamanatu ki ei tena mate.—Faitau te Luka 22:14, 15.

I aso nei, e fakamanatu ne tino o te Atua, a te mea telā ne tuku mai ne te Atua e auala i a Iesu ke fakasaoloto ei a te lalolagi kātoa mai te agasala mo te mate. (Esoto 12:5-7, 13, 17) E pelā mo te Paseka e fakamanatu fakatasi i te tausaga, e penā foki te Fakamanatuga o te mate o Iesu e fai fakatasi i te tausaga māfai ko to te la i a Nisani 14 e ‵tusa mo te kalena faka-te-Tusi Tapu.—Faitau te Ioane 1:29.

3. Ko oi e ‵tau o ‵kai kae inu ki te falaoa mo te uaina?

I te taimi ne tuku atu ei ne Iesu a te uaina ki ana soko, ne fai atu tou tagata: “E fakauiga a te ipu tenei ki te feagaiga fou.” (1 Kolinito 11:25) E sui ne te feagaiga fou a te feagaiga o te Tulafono faka-Mose, telā ne tauto atu te Atua ki tino Isalaelu me kafai e faka‵logo kātoatoa latou ki a ia, ka fai latou mo ana tino. (Esoto 19:5, 6) E ui i ei, ne seki faka‵logo a Isalaelu ki te leo o te Atua. Tenā ne fakatoka ei ne Ieova se feagaiga fou.—Faitau te Ielemia 31:31.

E auala i te feagaiga fou, ne fai ei ne Ieova ke maua ne tino e tokouke a fakamanuiaga e auala i nai tino. A latou kolā e aofia i te feagaiga fou e mu‵tana, se 144,000 fua. E auala i a latou konā, ka maua ei ne te fia miliona o tino mai atufenua katoa a fakamanuiaga ke ola ki te se-gata-mai i se lalolagi palataiso. A nisi tino kolā e ‵to i loto i te feagaiga fou e tavini atu ki a Ieova i te lalolagi i aso nei. Ko latou fua konā e ‵tau o ‵kai kae inu ki te falaoa mo te uaina me i te ipu “e fakauiga . . . ki te feagaiga fou.”—Faitau te Luka 12:32; Fakaasiga 14:1, 3.

4. E aoga pefea ki a tatou a te Fakamanatuga?

A te Fakamanatuga o te mate o Iesu i tausaga katoa e fakalasi aka i ei a ‵tou loto fakafetai ki te alofa sē fuafuagina o Ieova. Ne uga mai ne ia tena Tama ke mate mō ‵tou agasala. Tela la, kafai e ‵kau atu tatou ki te Fakamanatuga, e ‵tau eiloa o mafaufau ‵loto tatou me se a te uiga o te mate o Iesu ki a tatou. E ‵tau eiloa o mafau‵fau tatou me e mafai pefea o fakaasi atu ne tatou a te loto fakafetai ki mea kolā ko oti ne fai ne Ieova mo Iesu mō tatou.​—Faitau te Ioane 3:16; 2 Kolinito 5:14, 15.

Mō fakamatalaga e uke atu, ke onoono ki te itulau 206-208 o te tusi tenei, Ne a Mea e Akoako ‵Tonu Mai i te Tusi Tapu? telā ne ‵lomi ne Molimau a Ieova.