E Maua a Fuataga o Galuega Fakapito Kolā e Aofaga Faka‵lei

A Maria Isabel se tino talai loto finafinau telā koi talavou i te fa‵kai ko San Bernando i te fenua ko Chile i Amelika ki Saute. A ia mo tena kāiga ne tino Mapuche. Ne ‵lago malosi atu te kāiga kātoa o latou ke fakatu se fakapotopotoga fou i te ‵gana Mapuche, telā e taku foki ko te Mapudungun.

I te taimi ne faka‵pula ei me ka fai foki a te Fakamanatuga o te mate o Keliso i te ‵gana Mapuche kae e 2,000 a pepa ‵kami o te Fakamanatuga e mafai o maua i te ‵gana tenā, ne mafaufau ‵mafa a Maria Isabel ki te mea tenā. Ne a mea e mafai ne tou fafine o fai ke fesoasoani atu? Ne masaua ne tou fafine a tala o nisi Molimau talavou kolā ne fia‵fia i te talaiatuga ki tamaliki a‵koga mo faiakoga. Ne fai‵pati tou fafine mo ana mātua e uiga ki ei, kae ne fakaiku aka ne latou ke taumafai a Maria Isabel o mafaufau ki se aofaga e tufa atu ei a pepa ‵kami i te akoga. Se a te aofaga ne fai ne ia?

Te mea muamua, ne fakamolemole atu a Maria Isabel ki tino pulepule o te akoga ke maua se taliaga ke faka‵piki ne ia se ‵kamiga i te mata o te auala telā e vau ki loto i te akoga. Ne talia ne latou a tena fakamolemole kae tavae atu ki tou fafine mō ana mafaufauga ‵gali. I te taeao e tasi ne fai ei te laulauga o igoa, ne fai foki ne te pule o te akoga se faka‵pulaga e uiga ki te ‵kamiga tenā!

I konā, ne fakamolemole atu a Maria Isabel ke āsi atu a ia ki faleakoga katoa. Mai tua o te taliaga ne faiakoga, ne fesili atu tou fafine ki tamaliki a‵koga i vasega takitasi me e isi ne tamaliki i ei ne tino Mapuche. “Ne mafaufau au me kāti e toko 10 io me toko 15 tamaliki mai i kāiga Mapuche i te akoga kātoa,” ko pati a tou fafine, “kae tela la, e tokouke atu​—ne tufa atu ne au e 150 pepa ‵kami!”

“NE FAKAMOEMOE TOU FAFINE ME SE TINO MATUA”

Ne fesili atu se fafine e tokotasi telā ne lavea ne ia te ‵kamiga i mua o te auala ki loto i te akoga me ko oi te tino e ‵tau o faipati a ia ki ei e uiga ki te faigāmea. Mafaufau ki te poi o tou fafine i te taimi ne ‵taki atu ei a ia ki se tamaliki fafine ko sefulu ana tausaga! “Ne fakamoemoe tou fafine me se tino matua,” ko pati a Maria Isabel kae fakamisikata. I te otiga ne tuku atu ki a ia se pepa ‵kami mo se fakamatalaga toetoe, ne fakamolemole atu a Maria Isabel ki te fafine mō tena fakatuatusi ko te mea ke āsi atu a ia mo ana mātua o fakaasi atu a mea e uke e uiga ki te Malo o te Atua. Ko oko eiloa i te fia‵fia o tino talai e toko 20 i te ‵gana Mapudungun ke lavea atu a te fafine tenā fakatasi mo nisi tino fia‵fia e toko 26 mai tino Mapuche ne ‵kau mai ki te Fakamanatuga. Ko fai nei a te potukau tenā e pelā me se fakapotopotoga e gasolo ki mua!

Faitalia me pefea tou matua, e mata, e mafai ne koe o fai se mea tai ‵pau ke ‵kami mai a tamaliki a‵koga io me ko tino ne ga‵lue mo koe ki te Fakamanatuga, se lāuga mō tino katoa, io me se fono o te atufenua? Kaia e se fai ei au sukesukega ki ‵tou lōmiga ke maua a tala kolā e mafai o fesoasoani atu ki a koe ke iku manuia te faiga o se vaegā galuega penā? ‵Talo atu foki ke fesoasoani atu te agaga tapu o Ieova ke maua ne koe te malosi o faipati e uiga ki a ia. (Luka 11:13) Kafai e fai koe penā, kāti ka poi koe kae fakamalosi aka foki ne ikuga o au taumafaiga kolā ne aofaga faka‵lei.