“Ke Tumau i te Fakamolemole Atu, Kae ka Tuku Mai ki a Koutou”

“Te Aliki, akoako mai ki a matou te faiga o te ‵talo.” (Luka 11:1) Ne fai atu a te fakamolemole tenā ki a Iesu ne se tokotasi o ana soko. I tena tali, ne taku mai ne Iesu a tala fakatusa e lua kolā e akoako mai ki a tatou a te auala e ‵tau o ‵talo atu tatou kae lagona ne te Atua. Kafai ne fakalotolotolua koe ki te lagona ne te Atua o au ‵talo, ka fiafia eiloa koe ki te tali a Iesu.​—Faitau te Luka 11:5-13.

E faka‵mafa mai i te tala fakatusa muamua a te tino telā e ‵talo. (Luka 11:5-8) E fai mai i te tala me ne oko mai a te mālō a se tagata kae ko leva te po kae e seai ne ana meakai e toka mo tali tou tagata. E tāua a te mea tenei ki te tino talimālō. Faitalia te leva o te po, ne fano tou tagata ki te fale o se taugasoa o kaitalafu ne ana falaoa. I te taimi muamua, ne seki manako tou tagata o tu ki luga me ko ‵nau a tena moe fakatasi mo tena kāiga. Kae ko te tino talimālō ne sē ma o fakamolemole atu faeloa ke oko ki te taimi ne tu aka ei a tena taugasoa ki luga kae fesoasoani atu ki tou tagata.a

Se a te mea e akoako mai ne te tala fakatusa ki a tatou e uiga ki ‵talo? E fai mai a Iesu me e manakogina ke fai faeloa ne tatou​—ke tumau i te fakamolemole, salasala, kae tukituki atu. (Luka 11:9, 10) Kaia? E mata, e fakauiga a Iesu me i te Atua e se fia fakalogo mai ki ‵tou ‵talo? Ikai. E fakaasi mai ne Iesu me e se pelā mo te taugasoa telā ne fakatalave, e loto fiafia te Atua o talia a fakamolemole ‵tau a latou kolā e ‵talo atu ki a ia i te fakatuanaki. E fakaasi atu ne tatou a te vaegā fakatuanaki penā mai i te fai faeloa. Mai i te tumau i te fakamolemole atu, e fakaasi atu i ei ne tatou me e ma‵nako tonu tatou ki te mea telā e fakamolemole atu tatou ki ei kae tali‵tonu me e loto fiafia eiloa te Atua o talia​—māfai e tonu mo tena loto.​—Maleko 11:24; 1 Ioane 5:14.

A te lua o tala fakatusa e faka‵mafa mai i ei a te “Tino fakalogologo ki ‵talo,” ko Ieova. (Salamo 65:2) E fesili mai a Iesu: “Ko oi te tamana i a koutou telā e fakamolemole atu tena tama ki se ika, kae tuku atu ne ia se gata ki a ia i lō se ika? Io me e fakamolemole atu mō se fuamoa, kae tuku atu ki ei se akalava?” E manino ‵lei a te tali​—e seai se tamana atafai e tuku atu ne ia a mea ma‵sei ki ana tamaliki. Tenā, fakamatala mai ei ne Iesu a te uiga o tala fakatusa: Kafai a tamana sē ‵lei katoatoa e “tuku atu a meaalofa ‵lei” ki olotou tama‵liki, “e se sili atu la te otou Tamana i te lagi i te fia tuku atu ne ia o te agaga tapu”​—te ‵toe meaalofa sili​—ki ana tamaliki faka-te-lalolagi kolā e fakamolemole atu ki a ia!b​—Luka 11:11-13; Mataio 7:11.

Se a te mea e akoako mai ne te tala fakatusa tenei ki a tatou e uiga ki a Ieova, te “Tino fakalogologo ki ‵talo”? E ‵kami tatou ne Iesu ke ‵kilo atu ki a Ieova e pelā me se Tamana atafai telā e loto fiafia o tali mai ki manakoga o ana tamaliki. Tela la, e mafai ne tino tapuaki o Ieova o olo atu ki a ia mo manakoga o olotou loto i so se taimi. Kae mai i te iloa ne latou me e manako a ia ke maua ne latou a te ‵toe mea ‵lei, e toka latou o talia a tena tali ki olotou fakamolemole, māfai foki a te tali e se ko te mea telā ne fakamoe‵moe latou ki ei.c