Te Pogai e Aoga Tonu ei ‵Tou Olaga

I TE taimi eiloa ne fanau ei taku tama tagata ko Gary i te 1958, ne matemate ne au me e isi se fakalavelave. E ui i ei, e nofo ki te sefulu masina ne iloilo ei ne tokita a tena masaki kae toe lima foki tausaga koi tuai o fakapa‵tonu mai ne tokita i Lonitona. Ko oko eiloa i toku fanoanoa i te taimi ne fanau ei taku tamaliki fafine ko Louise, i te iva tausaga mai tua o Gary, kae ‵sae mai foki a failoga o te masaki e ma‵sei atu i a Gary.

“Au tamaliki e tokolua e maua ne te masaki ko te Laurence-Moon-Bardet-Biedl,a kae fakafanoanoa me e seai se faka‵leiga ki ei,” ne fai‵pati mai a tokita ki a au. I te taimi tenā, e seki lasi a te iloa o te masaki tenei. E aofia i vaega masani o te masaki ko te ‵kivi, ‵fula, e silia a matikao vae mo lima, e tuai a te tupuakaga, e se ga‵lue tasi a vaega i ei, sukā, gugu, mo nonu e se ga‵lue ‵lei. Tela la, a te tausiga o aku tamaliki ko oko eiloa i te faigata. I se sukesukega ne fai fakamuli nei, ne fakatautau pelā me e toko 1 mai te 125,000 tino i Peletania e maua ne te masaki tenei, e ui eiloa e tokouke atu a tino e maua ne se vaega e tai feoloolo atu o te masaki tenei.

E FAI A IEOVA MO “KOGA E ‵SAO” EI TATOU

Ne faipati atu au ki se tokotasi o Molimau a Ieova i taku otiga ne avaga, kae ne lavea vave ne au me e akoako ne latou a te munatonu e uiga ki te Tusi Tapu. Kae ko taku avaga tagata ne seki fiafia lele eiloa. Ona ko tena galuega, ne olo sāle ei matou, tela la, ko sē mafai au o kau ki fakatasiga. E tigā te feitu tenā, ne tumau eiloa au o faitau ki te Tusi Tapu kae ‵talo ki a Ieova. Ko oko eiloa i te fakamafanafana loto ke faitau ki ei me i “te Aliki [Ieova] ko te olo malosi e ‵lafi ei a tino fi‵ta, ko te koga e ‵sao ei i taimi o puapuaga” kae “e se tiakina foki ne [ia] so se tino telā e vau ki a [ia]”!​—Sala. 9:9, 10.

A Gary e se ile ‵lei, tela la, i te taimi ko ono ei ana tausaga, ne ave tou tagata ki se akoga fakapito i te feitu ki saute o Egelani. Ne telefoni sāle mai tou tagata ki a au e uiga ki mea kolā ne manavase a ia ki ei, kae ne fesoasoani atu au ki tou tagata ke malamalama i fakatakitakiga fakavae i te Tusi Tapu. I nāi tausaga mai tua o te fanauga a Louise, ne masaki ei au, ona ko te uke o mea ma‵keke i loto i toku foitino mo vaega kese‵kese o te gugu. Ne toe foki mai a Gary mai te akoga i te taimi ko 16 ei ana tausaga. Kae ko ana mata ko gasolo eiloa o ma‵sei, kae ne fakamau tou tagata e pelā me se tino ‵kivi i te 1975. I te 1977 ne tiakina ei matou ne taku avaga tagata.

Mai tua malie o te fokimaiga a Gary, ne ‵kau ei matou ki galuega a te fakapotopotoga, kae ne papatiso au i te 1974. Ko oko eiloa i toku loto fakafetai i te taimi ne fesoasoani atu ei se toeaina ki a Gary ke mafai ne ia o fakafesagai atu ki mafuli‵fuliga o te foitino kolā ka fepaki mo ia i ana tausaga pelā me se talavou. Ne fesoasoani mai a nisi tuagane ki a au i galuega i te fale, kae i te fakaotiga, ne ‵togi ne te potukau e ga‵lue mō tino a Molimau e tokolima ke fesoasoani mai ki a matou. A te mea tenei se fakamanuiaga eiloa!

Ne gasolo ki mua a Gary i te munatonu kae ne papatiso i te 1982. Ko tuku tonu a tena loto ki te paenia lagolago. Tela la, ne fakaiku aka ne au ke kau atu au ki a ia i te galuega tenā kae ne tumau eiloa o fai penā i tausaga e uke. Ne fiafia ‵ki eiloa taku tama tagata i te taimi ne fesili fakamuli atu ei a te motou ovasia o fenua ki tou tagata, “Kaia e se paenia tumau ei koe, e Gary?” Tenā eiloa te vaegā fakamalosiga e manakogina ne Gary, kae ne filifili aka a ia i te 1990.

E lua taimi ne fai ei a te tipitipiga ki te tega o Gary, a te taimi muamua ko te 1999 kae ko te lua o taimi ko te 2008, kae masei atu la a te masaki o Louise. Ne fanau mai tou fafine e ‵kivi, kae i te laveaga ne au se matikao vae fakaopoopo i tena vae e tasi, ne iloa ei ne au me e maua foki tou fafine ne te masaki ko te Laurence-Moon-Bardet-Biedl. E seki leva kae fakaasi mai i sukesukega ne fai me i te ukega o tōtōga o tena foitino i loto ko ma‵sei. Ne fai a tipitipiga ‵lasi ki tou fafine i tausaga e uke, e aofia i ei a ‵tipiga e lima ne fai ki ana nonu. A iafoki e sukā e pelā mo Gary.

Ona ko te mea e iloa ne ia me e mafai o ‵sae aka a tulaga faiga‵ta māfai e manakogina ke fai se ‵tipiga, faipati atu ei a Louise ki tokita tipitipi, tokita fakamoe, mo tino pulepule o fakamatala atu te pogai e se talia ei ne ia a te toto. Kae ko te ikuga, ne maua ne tou fafine se fesokotakiga ‵lei mo tino katoa kolā ne amanaia faka‵lei atu ki ana fakalavelave faka-te-foitino.

E ISI SE AOGA O ‵TOU OLAGA

E uke a mea e fai ne matou i te fale ke tapuaki atu ki a Ieova. Koi tuai o maua a fesoasoani mai i poto ‵fou, ne masani o fakamāumāu ne au a itula e uke o faitau atu ki a Gary mo Louise. Nei la, ko fai ne CD, DVD, mo mea kolā e ‵kopi mai i te www.pr2711.com ke fia‵fia a matou katoa ki te fakasologa o sukesukega ki te Tusi Tapu i te vaiaso i taimi kese‵kese, kae ko mafai ne matou o fai a tali i fakatasiga a te fakapotopotoga.

I nisi taimi a tali a Gary e tauloto fua i te mafaufau, kae kafai e isi sena tofiga i te Akoga mō Tino Talai, e mafai o fai ne ia i ana pati eiloa. Ne fai a ia mo fai se tavini fesoasoani i te 1995 kae fakalavelave faeloa tou tagata i te Kingdom Hall o fakafetaui ki tino o te fakapotopotoga kae fesoasoani ki te kau ga‵lue i mea faka‵lasi leo.

E ave ne taina mo tuagane a Gary i te galuega talai, e usu sāle ne latou a tena nofoaga fakatekateka ona ko ana gugu. Ne fesoasoani atu se Molimau e tokotasi ki tou tagata i te faiga o se akoga faka-te-Tusi Tapu mo se tino fiafia. Ne fakamalosi atu foki a Gary ki se Kelisiano telā ne vāivāi i tausaga e 25. Ko ‵kau nei a tino e tokolua konei ki fakatasiga a te fakapotopotoga.

I te taimi ko iva ei ana tausaga, ne tauloto a Louise ke iloa ne ia o kolosē mai i tena tupuna fafine, kae ne akoako ne māua mo se fafine tausi e tokotasi a tou fafine ke iloa ne ia o suisui. Ona ko tena fiafia ki galuega kolā e fakaaoga i ei a nila, ne kolosē ei ne tou fafine a pulagiketi ‵kala valevale mō pepe e pelā foki mo tino ma‵tua o te fakapotopotoga. E faite foki ne tou fafine a greeting cards kae faka‵piki ki ei a tamā ata fo‵liki. Ne fakatāua ne tino kolā ne maua ne latou a pepa konā. I te taimi koi talavou ei tou fafine, ne tauloto a Louise ki te taipa. Nei la, ona ko te fesoasoani o se komipiuta faipati, e fesokotaki faeloa tou fafine ki taugasoa e auala i te meli-iti. E 17 tausaga te matua o Louise i te taimi ne papatiso ei a ia. I te taimi ne fai ei se galuega talai fakapito, e fia‵fia eiloa māua o ga‵lue tasi e pelā me ne paenia lagolago. E pelā mo Gary, e tauloto ne Louise a tusi siki i tena mafaufau ke fakaasi atu a tena fakatuanaki ki tautoga a te Atua e uiga ki se lalolagi telā “a tino ‵kivi ka lavea ne latou a mea” kae “ka seai eiloa se tino i luga i te . . . fenua e tagi i a ia e masaki.”​—Isa. 33:24; 35:5.

Ko oko eiloa i te motou loto fakafetai ki muna‵tonu tāua i te Muna fakaosofia a Ieova! E ‵fonu motou loto i te fakafetai ki te tausiga alofa a te motou fakapotopotoga, me moi seai latou e se mafai o fai a te ukega o motou galuega. Kae maise eiloa, ona ko te fesoasoani o Ieova, ko aoga tonu ei omotou olaga.